Samuel II, 16 - BAIBLO ALOO NGMAMI KLƆUKLƆU Ɔ

David kɛ Ziba

¹ Benɛ David po mi ngɛ yo ɔ yi mi bɔɔ ɔ, Mefiboshet tsɔlɔ Ziba kɛ lɛ ba kpe. E hɛɛ teji enyɔ kɛ a se tlomi: abolo bɔbɔɛ lafa enyɔ, wai yiblii gbigbli sau lafa, tso yiblii lafa, kɛ wai lohwe he womi tɔ kake.

² Matsɛ ɔ bi lɛ ke, “Jije o kɛ ní nɛ ɔmɛ yaa?” Ziba he nɔ ke, “I ngɔ teji ɔmɛ kɛ ba, konɛ o we bi ɔmɛ nɛ a hi a nɔ. I ngɔ abolo ɔ kɛ tso yiblii ɔmɛ kɛ ba konɛ nihewi ɔmɛ nɛ a ye. Jehanɛ, i kɛ wai hu ba, konɛ ke pɔ tɔ nihewi ɔmɛ ngɛ nga a nɔ nɛ a nu.”

³ Matsɛ ɔ bi lɛ ke, “O nyɔmtsɛ ɔ bibi Mefiboshet ɔ, jije e ngɛ?” Ziba he nɔ ke, “E ngɛ Yerusalem, ejakaa e susu kaa be su nɛ Israel ma a maa kpale e nɛ̃ matsɛ yemi ɔ kɛ ha lɛ.”

⁴ Matsɛ ɔ de Ziba ke, “O nɛ, Mefiboshet nɔ́ tsuaa nɔ́ ba peeɔ o nɔ jehanɛ.” Ziba de lɛ ke, “Ye nyɔmtsɛ matsɛ, i kɛ he si bami ngɛ mo tsumi haae; moo pɛtɛ ye he daa.”

David kɛ Shimei

⁵ Benɛ David ba su Bahurim ɔ, Gara binyumu Shimei, Saul weku no ɔ kɛ lɛ ba kpe; benɛ e ma a tsuo, e ngɛ David gbiɛe.

⁶ Kɛkɛ nɛ e muɔ tɛ nɛ e kɛ fiaa Matsɛ David, kɛ e tsɔli ɔmɛ, kɛ e we bi a tabo ɔ, kɛ ta buli ɔmɛ tsuo nɛ bɔle lɛ ɔ.

⁷ Benɛ Shimei ngɛ David gbiɛe ɔ, nɔ́ nɛ e ngɛ dee ji, “Jee hiɛ ɔ! Jee hiɛ ɔ! Mo muɔ si puelɔ, kɛ yakayaka nɔmlɔ!

⁸ O kpɔ Saul matsɛ yemi ɔ, se piɔ lɛɛ Yawɛ ngɛ o tue gblae ngɛ Saul we mi bimɛ babauu a muɔ si nɛ o pue ɔ he. Yawɛ ngɔ matsɛ yemi ɔ ngɔ wo o binyumu Absalom dɛ. Hyɛ, o hɛ mi kpata pɛ, ejakaa muɔ si puelɔ ji mo.”

⁹ Kɛkɛ nɛ Abishai nɛ e nyɛ biɛ ji Zeruya a, bi matsɛ ɔ ke, “Ye nyɔmtsɛ matsɛ, mɛni he je nɛ o ngmɛ blɔ nɛ gbe gbogboe nɛ ɔ ngɛ mo gbiɛe kikɛ nɛ ɔ? Ha nɛ ma ya nɛ ma ya po e yi.”

¹⁰ Se matsɛ ɔ de Abishai, kɛ e nyɛminyumu Yoab ke, “Nyɛ Zeruya bimɛ, mɛni sane nɛ ɔ kɔɔ ngɛ nyɛ he? Ke Yawɛ nɛ de lɛ ke e gbiɛ mi, nɛ e ngɛ mi gbiɛe ɔ, mɛnɔ ngɛ he blɔ nɛ e biɔ ke mɛni he je e ngɛ ja pee lo?”

¹¹ Jehanɛ, David de Abishai, kɛ e tsɔli ɔmɛ tsuo ke, “Nyɛɛ hyɛ, ke imi nitsɛ ye bi fɔfɔɛ ngɛ ye wami se blɔ hlae ɔ, lɛɛ Benyamin no nɛ ɔ, mɛni tsiɔ lɛ blɔ? Nyɛɛ ngmɛɛ e he nɛ e gbiɛ mi faa, ejakaa Yawɛ nɛ de lɛ ke e pee ja a nɛ.

¹² Eko ɔ, Yawɛ maa hyɛ ye nɔ́ nami ɔ, nɛ e kɛ kpakpa maa to ahlua nɛ a ngɛ mi bɔe mwɔnɛ ɔ nane mi ha mi.”

¹³ Benɛ David kɛ e we bi ɔmɛ nyɛɛ blɔ ɔ nɔ kɛ yaa a, Shimei hu nyɛɛ yoku ɔ nɔ ngɛ a hanɔ kɛ yaa. Nɛ benɛ e yaa a tsuo, e ngɛ David gbiɛe nɛ e ngɛ lɛ tɛ fiae, nɛ e ngɛ zu muɔe kɛ ngɛ e nɔ puee.

¹⁴ Benɛ matsɛ ɔ kɛ e we bi ɔmɛ tsuo nɛ nyɛɛ e se ɔ su Yordan pa a he ɔ, pɔ tɔ mɛ nyanyaanya; nɛ a jɔɔ a he ngɛ lejɛ ɔ.

Absalom ba su Yerusalem

¹⁵ Absalom kɛ Israel ma a tsuo ba Yerusalem, nɛ Ahitofel hu piɛ a he.

¹⁶ Benɛ David huɛ Hushai, Arki no ɔ ba su Absalom ngɔ ɔ, e hwɔ lele, nɛ e de ke, “Manye oo, manye! Manye oo, manye!”

¹⁷ Kɛkɛ nɛ Absalom bi Hushai ke, “Bɔ nɛ o jeɔ o suɔmi kpo kɛ tsɔɔ o huɛ David ɔ ji nɛ ɔ lo? Mɛni he je o kɛ lɛ yɛ ɔ?”

¹⁸ Hushai he nɔ ke, “Dɛbi, imi lɛɛ nɔmlɔ nɛ Yawɛ kɛ ma nɛ ɔ, kɛ Israel tsuo hla lɛ ɔ, e nɔ ji mi; nɛ lɛ i kɛ maa hi si.

¹⁹ Jehanɛ se hu, ke i sɔmɔ we ye nyɔmtsɛ ɔ binyumu ɔ nɛɛ, mɛnɔ ma sɔmɔ mɔ?”

²⁰ Jehanɛ, Absalom de Ahitofel ke, “Moo wo ga koo; kɛ wa maa pee kɛɛ?”

²¹ Ahitofel de Absalom ke, “Yaa nɛ o kɛ o tsɛ plã amɛ nɛ e si ke a hi we ɔ nɔ hyɛe ɔ ya hwɔ. Ke o pee ja a, Israel tsuo maa na kaa o kɛ o tsɛ ɔ, nyɛ plɛ he nyɛli. Nɔ́ nɛ ɔ maa fɔ o se nyɛɛli ɔmɛ tsuo a kɔni nɔ kpa.”

²² Kɛkɛ nɛ a pee bo tsu ha Absalom ngɛ tsu ɔ yi mi, nɛ Absalom ya tsɛ e tsɛ plã amɛ ngɛ lejɛ ɔ, ngɛ Israel ma a tsuo a hɛ mi.

²³ Ga tsuaa ga nɛ Ahitofel wo Absalom ɔ, e buɔ tue pɛpɛɛpɛ kaa bɔ nɛ e tsɛ David hu pee ɔ; ejakaa jamɛ a be ɔ, ke Ahitofel tu munyu ko ɔ, a ngɔɔ munyu ɔ kaa Mawu nitsɛ nya mi munyu.