Samuel II, 13 - BAIBLO ALOO NGMAMI KLƆUKLƆU Ɔ

Amnon kɛ Tamar

¹ David binyumu Absalom ngɛ nyɛmiyo ko nɛ he ngɛ fɛu saminya. E biɛ ji Tamar. E ba mi kaa Tamar tsɛbi Amnon ba na suɔmi wawɛɛ kɛ ha e nyɛmiyo nɛ ɔ.

² Suɔmi nɛ Amnon ngɛ kɛ ha e nyɛmiyo ɔ nya wa saminya, nɛ nɔ́ nɛ ɔ ba wo lɛ hiɔ. Amnon le kaa bɔ tsuaa bɔ nɛ pee ɔ, e be e nyɛmiyo ɔ he blɔ nae; ejakaa yomiyo ji lɛ, nɛ a ngmɛ́ lɛ blɔ nɛ e kɛ nyumu nɛ na bɔmi.

³ Se Amnon ngɛ huɛ ko nɛ le nɔ́ he ga tomi saminya. E biɛ ji Yonadab, nɛ e kɛ Amnon peeɔ tsɛngua kɛ tsɛwayo bimɛ; ejakaa Yonadab tsɛ Shimea kɛ David peeɔ nɔ kɛ e senɔ.

⁴ Yonadab bi Amnon ke, “Mo matsɛbi mluku ɔ, mɛni ba loko o ngɛ flaae jenajena kikɛ nɛ ɔ?” Amnon he nɔ ke, “I suɔ Tamar, ye tsɛbi Absalom nyɛmiyo ɔ sane saminya.”

⁵ Yonadab de lɛ ke, “Yaa hwɔ si nɛ o buá nɛ o pee kaa o be he wami. Ke o tsɛ ba slaa mo ɔ, de lɛ ke, ‘Mo ha nɛ ye nyɛmiyo Tamar ba ha mi niye ní nɛ ma ye. Ha nɛ e ba pee niye ní ɔ ngɛ hiɛ ɔ nɛ ma na; konɛ e hɛɛ ngɛ e dɛ mi nɛ ma ye.’ ”

⁶ Amnon ho ya hwɔ si nɛ e buá pee kaa nɔ nɛ e be he wami. Matsɛ David ya slaa lɛ, nɛ Amnon de lɛ ke, “I kpa mo pɛɛ nɛ o ngmɛ ye nyɛmiyo Tamar blɔ nɛ e ba hiɛ ɔ nɛ e ba si tatale enyɔ ko ha mi, konɛ e hɛɛ ngɛ e dɛ mi nɛ ma ye.”

⁷ David tsɔ ya de Tamar ngɛ matsɛ we ɔ mi ke, “Yaa o nyɛminyumu Amnon we ɔ mi, nɛ o ya pee niye ní ha lɛ.”

⁸ Kɛkɛ nɛ Tamar ba Amnon we ɔ mi, nɛ e ba na lɛ nɛ e hwɔɔ si. Tamar pɔtɔ ma ngɛ Amnon hɛ mi nɛ e kɛ pee tatale nɛ e si.

⁹ Lɔ ɔ se ɔ, e plɛ tatale ɔ ngɛ nisi kã a mi, nɛ e ngɔ kɛ ya ma Amnon hɛ mi; se e kua yemi. Amnon de ke, “Nɔ tsuaa nɔ nɛ e je hiɛ ɔ!” Nɛ ni ɔmɛ tsuo je lejɛ ɔ.

¹⁰ Jehanɛ Amnon de Tamar ke, “Moo hɛɛ niye ní ɔ ngɛ o dɛ mi nɛ o kɛ ba ha mi ngɛ se tsu ɔ mi nɛ ma ye.” Tamar ngɔ tatale nɛ e si ɔ ya ha e nyɛminyumu Amnon ngɛ se tsu ɔ mi.

¹¹ Benɛ e kɛ niye ní ɔ su Amnon ngɔ pɛ kɛkɛ nɛ Amnon nu lɛ, nɛ e de lɛ ke, “Ye nyɛmiyo, ba nɛ o kɛ mi ba hwɔ!”

¹² Se Tamar de lɛ ke, “Dɛbi, ye nyɛminyumu, ko pue ye hɛ mi si; ejakaa a pee we nɔ́ nɛ ɔ ngɛ Israel. Ko tsu zo ní kaa kikɛ nɛ ɔ.

¹³ Zo nɛ ɔ, jije ma kɛ gu? Se moo lɛɛ o maa pee kaa Israel yakayaka nimli ɔmɛ a ti nɔ kake. Lɔ ɔ he ɔ, i kpa mo pɛɛ, yaa nɛ o ya na matsɛ ɔ; ejakaa i heɔ yeɔ kaa e maa kplɛɛ kaa e kɛ mi ma ha mo.”

¹⁴ Se Amnon bui nɔ́ nɛ e nyɛmi ɔ ngɛ de ɔ tue; nɛ akɛnɛ e he wa pe lɛ he je ɔ, e nu lɛ pani nya, nɛ e kɛ lɛ hwɔ.

¹⁵ Enɛ ɔ se ɔ, Tamar he tai bɔni Amnon peemi; nɛ ninyɛ nɛ Amnon na kɛ ha lɛ ɔ nya wa kulaa pe suɔmi nɛ e kɛ suɔ lɛ kekle ɔ. Kɛkɛ nɛ Amnon de lɛ ke, “Tee si nɛ o ho!”

¹⁶ Se Tamar de lɛ ke, “Mo ko de mi ja! Fiemi nɛ o ngɛ mi fiee nɛ ɔ, e ji yayami nɛ kle pe kekle nɔ́ nɛ o pee mi ɔ po.” Se Amnon bui nɔ́ nɛ e ngɛ de ɔ tue.

¹⁷ E tsɛ niheyo ɔ nɛ sɔmɔɔ lɛ ɔ, nɛ e de lɛ ke, “Je yo nɛ ɔ kpo; fie lɛ kɛ je hiɛ ɔ, nɛ o la sinya a se!”

¹⁸ Tsɔlɔ ɔ pee ja, nɛ e la sinya a se. Tamar wo tade klɔii saminyayoo; ejakaa blema a, ja ji bɔ nɛ matsɛmɛ a biyihi nɛ a gbɛ lolo ɔ dlaa a he.

¹⁹ Tamar muɔ la zu kɛ pue e yi mi, nɛ e hía tade klɔii saminyayoo ɔ nɛ e wo ɔ. E kɛ e nine kpla e yi, nɛ e ma blɔ; nɛ e ngɛ ya foe boboobo kɛ ho.

²⁰ Benɛ e nyɛminyumu Absalom na lɛ ɔ, e bi lɛ ke, “Anɛ o nyɛminyumu Amnon ta o he lo? Ye nyɛmiyo, mo ma o nya kɛkɛ; mo ko ye o tsui, ejakaa o nyɛminyumu ji lɛ.” Tamar hi si mɔbɔmɔbɔ ngɛ e nyɛminyumu Absalom we ɔ mi.

²¹ Benɛ Matsɛ David nu sane nɛ ɔmɛ tsuo a he ɔ, e muklii mi fu wawɛɛ nitsɛ.

²² Absalom hu na ninyɛ agbo kɛ ha Amnon, nɛ e kɛ lɛ hiɔ nya kaa e nyɛ e nyɛmiyo Tamar nɔ pani nya, nɛ e kɛ lɛ hwɔ.

Absalom lue yemi

²³ Jeha enyɔ se ɔ, e ba mi kaa a ya ngɛ Absalom tohi a he bwɔmi sãe ngɛ Baal Hazor, ngɛ Efraim kasa nya; nɛ Absalom fɔ matsɛbinyumu ɔmɛ tsuo nine.

²⁴ Absalom ba matsɛ ɔ ngɔ nɛ e ba de lɛ ke, “A ma o tsɔlɔ ɔ to ɔmɛ a he bwɔmi sami. I kpa mo pɛɛ nɛ o kɛ o tsɔli ɔmɛ nɛ ba, nɛ nyɛ ba hyɛ ye kuɛ se mi.”

²⁵ Se matsɛ ɔ de Absalom ke, “Dɛbi, ye bi, ke wɔ tsuo wa ba a, wa ma ba pee tlomi ngɛ o kuɛ nɔ.” Absalom nyɛ e nɔ hluu, se e kplɛɛ we; se kɛ̃, matsɛ ɔ gbaa lɛ.

²⁶ Kɛkɛ nɛ Absalom de ke, “Ke o kplɛɛ we ɔ, lɛɛ i kpa mo pɛɛ nɛ o ha nɛ ye nyɛminyumu Amnon ba sɛ wɔ mɔ.” Matsɛ ɔ bi lɛ ke, “Mɛni he je o ngɛ Amnon hlae ɔ?”

²⁷ Se Absalom nyɛ e nɔ hluu kɛ ya si e kplɛɛ kaa Amnon kɛ matsɛbinyumu ɔmɛ tsuo nɛ a ya. Absalom ngmɛ okplɔɔ gbidii kaa a ngmɛɛ okplɔɔ ha matsɛ.

²⁸ Absalom fa e tsɔli ɔmɛ ke, “Ke Amnon nu wai nɛ e bua jɔ e he ɔ, nyɛɛ hi lɛ huɔe konɛ ke i de ke, ‘Nyɛɛ fia Amnon nɔ́,’ pɛ nɛ nyɛɛ gbe lɛ. Imi nɛ i fa nyɛ ɔ nɛ. Nyɛ ko ye gbeye! Nyɛɛ pee kã; nɛ nyɛ ha nɛ a na kaa nyumuhi ji nyɛ.”

²⁹ Absalom tsɔli ɔmɛ tsu Amnon he ní kaa bɔ nɛ Absalom fa mɛ ɔ. Kɛkɛ nɛ matsɛbinyumu ɔmɛ tsuo te si, nɛ nɔ tsuaa nɔ ya kuɔ e teji okpɔngɔ; nɛ a tu fo.

³⁰ Benɛ a ngɛ blɔ ɔ nɔ kɛ yaa a, nɔ ko ya bɔ David amaniɛ ke, “Absalom gbe matsɛbinyumu ɔmɛ tsuo, nɛ a ti nɔ kake po píɛ.”

³¹ Kɛkɛ nɛ matsɛ ɔ te si nɛ e kɛ aywilɛho hía e tade ɔmɛ ngɛ e he, nɛ e hwɔ si ngɛ zugba; nɛ e tsɔli ɔmɛ tsuo nɛ daa si ngɛ e kasa nya a hu hía a tade ɔmɛ ngɛ a he.

³² Se Yonadab, nɛ ji David nyɛminyumu Shimea bi ɔ de ke, “Ye nyɔmtsɛ nɛ e ko susu kaa a gbe matsɛbinyumu ɔmɛ tsuo; Amnon nɔ kake too pɛ ji nɔ nɛ a gbe ngɛ Absalom fami nya. Kɛ je be nɛ Amnon nu Absalom nyɛmiyo Tamar pani nya nɛ e kɛ lɛ hwɔ ɔ, kɛ je jamɛ a be ɔ tɔɔ Absalom to ga nɛ ɔ ngɛ Amnon he.

³³ Lɔ ɔ he ɔ, ye nyɔmtsɛ matsɛ nɛ e ko ye e tsui kaa matsɛbinyumu ɔmɛ tsuo pɛpɛɛpɛ gbo; ejakaa Amnon nɔ kake pɛ ji nɔ nɛ a gbe ɔ nɛ.”

³⁴ Jamɛ a be ɔ, Absalom tu fo kɛ je momo. Kɛkɛ nɛ bulɔ ɔ na nimli babauu ngɛ Horonaim blɔ ɔ nɔ nɛ a ngɛ yo ɔ kplee kɛ ma.

³⁵ Yonadab de matsɛ ɔ ke, “O nɛ, matsɛbinyumu ɔmɛ nɛ a ma a nɛ. Nɔ́ nɛ o tsɔlɔ de ɔ, lɔ ɔ nɛ e ba mi nɛ ɔ nɛ.”

³⁶ Benɛ e gbe e munyu ɔ nya pɛ kɛkɛ nɛ matsɛbinyumu ɔmɛ ba hia si ngɛ lejɛ ɔ. A hɛ dɔ, nɛ a wo yana. Kɛkɛ nɛ matsɛ ɔ kɛ e tsɔli ɔmɛ tsuo wo yana kɛ piɛ a he.

^37-38 Absalom tu fo kɛ ho Geshur matsɛ Talmai, nɛ ji Amihud binyumu ɔ ngɔ ya; nɛ e ya hi lejɛ ɔ jeha etɛ. David ye e binyumu Amnon he kɔmɔ be babauu.

³⁹ Se benɛ kɔɔhiɔ fia Amnon gbenɔ ɔ mi bɔɔ ɔ, David hɛ ja ngɛ Absalom he; nɛ e ná nɛ e na lɛ ekohu.