Samuel II, 10 - BAIBLO ALOO NGMAMI KLƆUKLƆU Ɔ

David ye Amon bi kɛ Siria bi a nɔ

^1-2 Pee se ɔ, Amon bi ɔmɛ a matsɛ nɛ a tsɛɛ lɛ Nahash ɔ ba gbo; nɛ e binyumu Hanun ba ye e se. David de ke, “I kɛ Hanun maa hi si saminya kaa nɔ kɛ e huɛ, ejakaa e tsɛ Nahash kɛ mi hi si saminya.” Lɔ ɔ he ɔ, David tsɔ nihi nɛ a ya ha Hanun lakpoo benɛ Nahash gbo ɔ. Se benɛ David tsɔli ɔmɛ ba su Amon bi ɔmɛ a zugba a nɔ ɔ,

³ Amon ganɔ ɔmɛ bi a matsɛ Hanun ɔ ke, “O susu kaa David tsɔ nihi ba ha mo lakpoo, konɛ e kɛ wo o tsɛ hɛ mi nyami lo? Dɛbi! Ni ɔmɛ nɛ David tsɔ kɛ ba o ngɔ ɔ, pe a ba nɛ a ba slaa ma a, nɛ a kɛ kpa níhi si loko a ba tua wɔ.”

⁴ Enɛ ɔ he je ɔ, Hanun nuu David tsɔli ɔmɛ nɛ e sɛ a kpɛni kasa fa kake, nɛ e hía a tade ɔmɛ a mi ngɛ kpɛti tutuutu kɛ ba su a mlɛ mi, nɛ e ngmɛɛ a he nɛ a ho.

⁵ Benɛ David nu nɔ́ nɛ ba a; e tsɔ ya de mɛ ke a mlɛ ngɛ Yeriko kɛ yaa si a kpɛni ɔmɛ maa hɛ loko a ba, ejakaa e ngɛ mɛ zo pee kaa a maa kpale kɛ ba bɔ nɛ a ngɛ ɔ.

⁶ Benɛ Amon bi ɔmɛ na kaa a ya hla munyu ngɛ David he ɔ, a tsɔ ya bɔ Siria ta buli akpe nyingmi enyɔ apaa kɛ je Bet Rehob kɛ Zoba. Jehanɛ hu, a ya bɔ Maaka matsɛ, kɛ e we bi akpe apaa kɛ piɛ Tob bi akpe nyɔngma kɛ enyɔ a he.

⁷ Benɛ David nu he ɔ, e wo Yoab kɛ Israel tabo ɔ blɔ nɛ a kɛ mɛ ya kpe.

⁸ Amon bi ɔmɛ hia nɛ a ya gba ta ngɛ a ma nguaa a nɛ a tsɛɛ Raba a agbo ɔ nya. Se ni kpa amɛ nɛ ji Siria bi ɔmɛ, kɛ ni nɛmɛ nɛ je Tob kɛ Maaka a, mɛɛ lɛɛ a tsɔ a he kɛ ho nga a nɔ ya.

⁹ Yoab na bɔ nɛ a gba ta a ha, kaa a ma lɛ tuami kɛ je hɛ mi kɛ se blɔ tsuo. Lɔ ɔ he ɔ, e hla Israel ta buli komɛ nɛ a kɔni si wa, nɛ e ngɔ mɛ ngɔ kpee Siria bi ɔmɛ.

¹⁰ Ni nɛmɛ nɛ piɛ ɔ, e ngɔ mɛ ngɔ wo e nyɛminyumu Abishai dɛ mi, konɛ mɛ hu a kɛ Amon bi ɔmɛ ya kpe.

¹¹ Yoab de lɛ ke, “Ke e ba mi kaa i ya nyɛ we Siria bi ɔmɛ ɔ, lɛɛ o ba nɛ o ba piɛ ye he. Se ke Amon bi ɔmɛ ngɛ mo gbee ɔ, lɛɛ imi ma ba piɛ o he.

¹² Moo pee kã, nɛ o ha nɛ waa da si kaa nyumuhi kɛ ha wa nyɛmimɛ ɔmɛ, kɛ wa Mawu ɔ ma amɛ. Nɔ́ nɛ sa Yawɛ hɛ mi ɔ, e pee.”

¹³ Yoab kɛ e we bi ɔmɛ hia kɛ ba na Siria bi ɔmɛ, konɛ a kɛ mɛ nɛ ba hwu; se Siria bi ɔmɛ tu fo.

¹⁴ Benɛ Amon bi ɔmɛ na kaa Siria bi ɔmɛ tu fo ɔ, mɛ hu a tu fo ngɛ ta nɛ a kɛ Abishai ngɛ hwue ɔ nya kɛ ho ma a mi ya. Lɔ ɔ he ɔ, Yoab jɔɔ Amon bi ɔmɛ a se nyɛɛmi, nɛ e kpale kɛ ho Yerusalem ya.

¹⁵ Benɛ Siria bi ɔmɛ na kaa Israel bi ɔmɛ ye a nɔ ɔ, a ya bua a he nya.

¹⁶ Matsɛ Hadadezer tsɔ nɛ a ya ngɔ Siria bi nɛ ngɛ Yufrate pa a se ɔ kɛ ba, nɛ Hadadezer we asafoatsɛ Shobak nyɛɛ a hɛ mi kɛ ba Helam.

¹⁷ Benɛ David nu he ɔ, e bua Israel tsuo nya, nɛ e kɛ mɛ po Yordan pa a kɛ ho Helam ya. Siria bi ɔmɛ gba ta wo David, nɛ a kɛ lɛ hwu.

¹⁸ Se Israel bi ɔmɛ wo Siria bi ɔmɛ fo; nɛ David kɛ e we bi ɔmɛ gbe Siria bi ɔmɛ a ta zugba lɛ ta buli lafa kpaago, kɛ okpɔngɔ ta buli akpe nyingmi eywiɛ. A he nyɛli ɔmɛ a we asafoatsɛ Shobak ɔ lɛɛ a plaa lɛ, nɛ e gbo ngɛ ta nga a nɔ.

¹⁹ Benɛ matsɛmɛ ɔmɛ nɛ ngɛ Hadadezer sɔmɔe ɔ ná le kaa Israel bi ɔmɛ ye a nɔ ɔ, a kɛ Israel bi ɔmɛ ya kpata, nɛ a sɔmɔ mɛ. Lɔ ɔ he ɔ, Siria bi ɔmɛ ye gbeye kaa a ma ya piɛ Amon bi ɔmɛ a he ekohu.