Samuel II, 1 - BAIBLO ALOO NGMAMI KLƆUKLƆU Ɔ

David nu Saul gbenɔ he

¹ Benɛ Saul gbo, nɛ David ye Amalek bi ɔmɛ a nɔ kunimi se ɔ, e kpale kɛ ba Ziklag, nɛ e ba ye ligbi enyɔ ngɛ lejɛ ɔ.

² Ligbi etɛne ɔ, nyumu ko je Saul ta a mi kɛ ba. E hía e tade ɔmɛ ngɛ e he, nɛ e ngɔ zu ngɔ pue e yi mi kɛ tsɔɔ kaa e ngɛ kɔmɔ yee. E ba David ngɔ, nɛ e kɛ bumi ba kpla si ngɛ e hɛ mi.

³ David bi lɛ ke, “Jije o je?” Nɛ e he nɔ ke, “I ku kɛ je Israel ta a mi.”

⁴ David de lɛ ke, “Moo bɔ mi bɔ nɛ níhi ya nɔ ha.” Nyumu ɔ de David ke, “Wa ta buli ɔmɛ tu fo ngɛ ta a nya, nɛ a gbe a ti nihi babauu. Saul kɛ e bi Yonatan hu gbo.”

⁵ David bi niheyo ɔ nɛ ba bɔ lɛ amaniɛ ɔ ke, “Kɛ o pee kɛ le kaa Saul kɛ e bi Yonatan gbo kɛɛ?”

⁶ Niheyo ɔ he nɔ ke, “I ya je Gilboa yo ɔ nɔ tlukaa, nɛ i na Saul nɛ e buu si ngɛ e we akplɔ ɔ nɔ. E he nyɛli ɔmɛ a ta zugba lɛ ɔmɛ, kɛ a we okpɔngɔ nɔ hili ɔmɛ su e he haa.

⁷ Saul plɛ hyɛ e se, nɛ e na mi. E tsɛ mi, nɛ i he nɔ ke, ‘Nɛnɛ!’

⁸ E bi mi ke, ‘Mɛnɔ ji mo?’ Nɛ i ha lɛ heto ke, ‘Amalek no ji mi.’

⁹ Kɛkɛ nɛ e de mi ke, ‘Hɛɛ mo kɛ su ye he nɛ o gbe mi, ejakaa i ngɛ gbenɔ muɔ nya, se i na we ma gbo lolo.’

¹⁰ Lɔ ɔ he ɔ, i hɛ kɛ su e he nɛ i gbe lɛ; ejakaa i le sa kaa si nɛ e nɔ ɔ, e be je mi tlɔe. I je matsɛ pɛɛ ɔ nɛ e bu ɔ, kɛ ga nɛ ngɛ e kɔni si ɔ, nɛ i hɛɛ kɛ ma mo, ye nyɔmtsɛ ɔ ha mi.”

¹¹ Kɛkɛ nɛ David kɛ aywilɛho hía tade ɔ ngɛ e he, nɛ e we bi ɔmɛ tsuo pee ja nɔuu.

¹² A wo yana, nɛ a ye kɔmɔ, nɛ a ha hwɔ kɛ ya si gbɔkuɛ. A wo yana kɛ ha Saul kɛ e bi Yonatan, kɛ Israel, Yawɛ ma a; ejakaa nimli babauu gbo ngɛ ta a mi.

¹³ David bi niheyo ɔ nɛ ba bɔ lɛ amaniɛ ɔ ke, “Jije o je?” E he nɔ ke, “Amalek no ko nɛ ba to nubwɔ ngɛ Israel bi ji mi.”

¹⁴ David bi lɛ ekohu ke, “Mɛni he je o yi gbeye kaa o kɛ o nine ma kpata nɔmlɔ nɛ Yawɛ pɔ lɛ nu ɔ hɛ mi ɔ?”

¹⁵ Kɛkɛ nɛ David tsɛ e we bi ɔmɛ a ti nɔ kake, nɛ e de lɛ ke, “Yaa nɛ o ya gbe lɛ!” Nɛ niheyo ɔ fia lɛ nɔ́ nɛ e gbe.

¹⁶ David de Amalek no ɔ ke, “O musu tloo mo; ejakaa mo nitsɛ o kɛ o nya ye odase ke, ‘I gbe nɔmlɔ nɛ Yawɛ pɔ lɛ nu ɔ.’ ”

David kɔmɔ yemi la kɛ ha Saul kɛ Yonatan

¹⁷ David la aywilɛho la nɛ ɔ kɛ nyɛ ya ha Saul kɛ e bi Yonatan,

¹⁸ nɛ e fa kaa a tsɔɔ Yuda bi ɔmɛ tsuo. A ngma la nɛ ɔ ngɛ Yashar Womi ɔ mi. E la ke,

¹⁹ “A gbe wa ta hɛ mi nyɛɛli ɔmɛ ngɔ pue Israel yo ɔmɛ a nɔ. Wa ta buli kpanaa amɛ gbo!

²⁰ Nyɛ ko tu munyu nɛ ɔ nɛ Gat bi ba nu. Nyɛ ko sɛɛ ngɛ Ashkelon gbɛjegbɛ ɔmɛ a nɔ. Ke pi ja a, Filisti yi ɔmɛ ma na bua jɔmi. Ke pi ja a, wɔ jali a biyi ɔmɛ ma nya.

²¹ Nyɛ Gilboa yohi, bɔ́, loo hiɔmi nɛ ko nɛ ngɛ nyɛ nɔ; nyɛ ngmɔ ko ngmɔ ko nɛ kó ba ní. Ejakaa lejɛ ɔ nyɛ katsɛmɛ ɔmɛ a tsɛ̃i ɔmɛ a hɛ mi pue si ngɛ; Saul tsɛ̃i ɔ fɔɔ si nɛ a pɔɛ he nu hu!

²² Jinɛ Yonatan kɛ̃ɛ̃ ɔ, duɔ ngɛ nya; jinɛ Saul klaate ɔ nya ba. A kɛ gbe a he nyɛli kpanakuhi ngɛ ta mi kɛ be.

²³ “Saul kɛ Yonatan a he ngɛ bua jɔmi; a suɔ mɛ saminya. Wami mi jio, gbenɔ mi jio, a mi gba we. A he sɔɔ pe kɔle; nɛ a he wa pe jata.

²⁴ “Nyɛ Israel yihi, nyɛɛ ye kɔmɔ ha Saul! Lɛ nɛ e bu nyɛ bo tsu kpakpahi, nɛ e ha nyɛ bua jɔmi. Lɛ nɛ e kɛ sika tsu, kɛ june dla nyɛ he!

²⁵ “Oo, hyɛ bɔ nɛ katsɛmɛ kpanaa amɛ gbo kɛ pueɔ si ngɛ ta mi ha! Oo, hyɛ bɔ nɛ Yonatan gbo kɛ fɔɔ si ngɛ yoku ɔmɛ a nɔ ha!

²⁶ “Ye nyɛmi Yonatan, i ngɛ mo kɔmɔ yee; o suɔ mi saminya! Suɔmi nɛ o je kpo ngɔ ha mi ɔ, e nya wa pe yihi a suɔmi po!

²⁷ “Oo, hyɛ bɔ nɛ katsɛmɛ kpanaa amɛ gbo kɛ pueɔ si ngɛ ta mi ha! Oo, hyɛ bɔ nɛ a ta hwumi ní ɔmɛ fɔɔ si gu ha!”