Samuel I, 8 - BAIBLO ALOO NGMAMI KLƆUKLƆU Ɔ

Israel ngɛ matsɛ hlae

¹ Benɛ Samuel ba bwɔ ɔ, e pee e binyumu ɔmɛ kojoli ngɛ Israel,

² nɛ a kojo ngɛ Beersheba. E bitɛte ɔ biɛ ji Yoel, nɛ e binyumu enyɔne ɔ biɛ ji Abiya.

³ Mɛɛ a be kaa a tsɛ ɔ; mɛɛ a ya di sika se, nɛ a heɔ nyɔ mi ní, nɛ a plɛɔ sane hɛ mi ngɔ buɔ si.

⁴ Enɛ ɔ he je ɔ, Israel ma nimeli ɔmɛ ba Rama, nɛ a kɛ Samuel ba pee kpe,

⁵ nɛ a de lɛ ke, “O nɛ, o bwɔ, nɛ o binyumu ɔmɛ ya wo we o nane; lɔ ɔ he ɔ, moo wo matsɛ ha wɔ nɛ e ye wa nɔ kaa bɔ nɛ je ma kpa amɛ ngɛ ɔ.”

⁶ Se e ngɔɛ Samuel nya kaa ni ɔmɛ bi ke a ha mɛ matsɛ. Lɔ ɔ he ɔ, Samuel fa kue ha Yawɛ;

⁷ nɛ Yawɛ de lɛ ke, “Nɔ́ tsuaa nɔ́ nɛ ma a bi mo ɔ, moo pee ha mɛ. Pi mo nɛ a kua a; imi mohu nɛ a kua ke ma ko ye a nɔ matsɛ ɔ nɛ.

⁸ Kɛ je be mi nɛ i je mɛ kɛ je Egipt ɔ, a je ye se ya ngɛ mawu kpahi jae. Nɔ́ nɛ a pee mi ɔ, lɔ ɔ a ngɛ mo hu pee ɔ nɛ.

⁹ Lɔ ɔ he ɔ, moo pee ha mɛ kaa bɔ nɛ a ngɛ hlae ɔ, se mohu o ka a hɛ mi saminya, nɛ o tsɔɔ mɛ nɛ a le bɔ nɛ matsɛ nɛ maa ye a nɔ ɔ, kɛ ma a maa hi si ha.”

¹⁰ Samuel ya bɔ ma a nɛ bi ke a ha mɛ matsɛ ɔ nɔ́ tsuaa nɔ́ nɛ Yawɛ de lɛ ɔ.

¹¹ E de mɛ ke, “Matsɛ ɔ nɛ ma ba ye nyɛ nɔ ɔ, bɔ nɛ e maa pee nyɛ ji nɛ ɔ nɛ. E maa ngɔ nyɛ binyumu ɔmɛ ngɔ pee e ta buli; ni komɛ maa hi e ta zugba lɛ ɔmɛ a mi, ni komɛ maa hi e ta okpɔngɔ ɔmɛ a nɔ, nɛ ni komɛ hu maa hi fo tue ngɛ ta zugba lɛ ɔmɛ a hɛ mi.

¹² E maa to tatsɛmɛ ngɛ ta buli akpehi, kɛ nyingmi enuɔɔnuɔ a nya. Ni komɛ ma hu ngmɔ nɛ a ma kpa ní ha lɛ, nɛ ni komɛ hu maa sɔ̃ ta hwumi níhi, kɛ ta zugba lɛ ɔmɛ a he níhi.

¹³ Nyɛ bi yi ɔmɛ hu e maa ngɔ mɛ kɛ pee e nu via peeli, ní hooli, kɛ abolo sali.

¹⁴ E maa ngɔ nyɛ ngmɔ ɔmɛ, wai ngmɔ ɔmɛ, kɛ oliv abɔɔ kpakpa amɛ kɛ ha e mɔ mi ní tsuli ɔmɛ.

¹⁵ E maa ngɔ nyɛ ngma, kɛ nyɛ wai ngmɔ ɔmɛ a mi dlami nyɔngmanyɔngma mi kakaaka kɛ ha e mɔ mi ní tsuli, kɛ e tsɔli.

¹⁶ Nyɛ nyɔguɛ nyumuhi kɛ yihi, nyɛ nahi, kɛ nyɛ teji kpakpa amɛ ɔ, e maa ngɔ mɛ kɛ ya tsu lɛ nitsɛ e ní tsumi.

¹⁷ E maa ngɔ nyɛ to ɔmɛ a mi dlami nyɔngma mi kake, nɛ nyɛ nitsɛmɛ nyɛ ma plɛ pee e nyɔguɛhi.

¹⁸ Jamɛ a be ɔ, nyɛ maa wo yana ngɛ matsɛ ɔ nɛ nyɛ nitsɛmɛ nyɛ hla a e ní peepee he, se Yawɛ be nyɛ nya mi poe.”

¹⁹ Se ma a bui Samuel tue; mohu ɔ, a de ke, “Dɛbi, ja wa ná matsɛ nɛ ye wa nɔ

²⁰ kaa bɔ nɛ je ma amɛ tsuo ngɛ ɔ. Wa matsɛ ɔ maa kojo wɔ, nɛ e maa nyɛɛ wa hɛ mi kɛ hwu ta amɛ ha wɔ.”

²¹ Benɛ Samuel nu nɔ́ tsuaa nɔ́ nɛ ma a de ɔ, e ho ya bɔ Yawɛ.

²² Yawɛ de lɛ ke, “Moo bu mɛ tue nɛ o wo matsɛ ha mɛ.” Enɛ ɔ se ɔ, Samuel ha Israel bi ɔmɛ nane, nɛ nɔ tsuaa nɔ kpale kɛ ho e ma mi ya.