Samuel I, 7 - BAIBLO ALOO NGMAMI KLƆUKLƆU Ɔ

¹ Kiriat Yearim bi ɔmɛ ba nɛ a ba ngɔ Yawɛ somi daka a kɛ ho nyumu ko nɛ a tsɛɛ lɛ Abinadab ɔ we mi ya, ngɛ yoku ko nɔ. A wo e binyumu Eleazar osɔfo, konɛ e hyɛ Yawɛ somi daka a nɔ.

Samuel hyɛ Israel ma a nɔ

² Yawɛ somi daka a hi Kiriat Yearim be babauu, maa pee jeha nyingmi enyɔ sɔuu. Nɛ Israel tsuo fa kue kɛ bi yemi kɛ buami ngɛ Yawɛ ngɔ.

³ Samuel de Israel bi ɔmɛ ke, “Ke nyɛ maa kpale ba nyɛɛ Yawɛ se niinɛ kɛ nyɛ tsui tsuo ɔ, lɛɛ nyɛ je ma se mawu ɔmɛ, kɛ yo wɔ Ashtarot ɔ kɛ je nyɛ kpɛti. Nyɛ dla nyɛ tsui mi kɛ ha Yawɛ, nɛ nyɛ sɔmɔ lɛ nɔ kake too, nɛ e ma je nyɛ kɛ je Filisti bi ɔmɛ a dɛ mi.”

⁴ Lɔ ɔ he ɔ, Israel bi ɔmɛ ngmɛɛ a Baal ɔmɛ, kɛ Ashtarot ɔ he, nɛ a sɔmɔ Yawɛ pɛ.

⁵ Kɛkɛ nɛ Samuel de ke, “Nyɛ bua Israel ma a tsuo nya ngɛ Mizpa, nɛ ma kpa Yawɛ pɛɛ ha mɛ ngɛ lejɛ ɔ.”

⁶ Lɔ ɔ he ɔ, ma a tsuo ba bua a he nya ngɛ Mizpa. A yɛ nyu kɛ pue si ngɛ Yawɛ hɛ mi, nɛ a ha hwɔ jamɛ a ligbi ɔ tsuo, nɛ a de ke, “Wa pee yayami kɛ si Yawɛ.” Mizpa ji he nɛ Samuel hyɛɛ Israel bi ɔmɛ a kpɛti sanehi a mi haa mɛ ngɛ.

⁷ Filisti bi ɔmɛ nu kaa Israel bi ɔmɛ ya bua a he nya ngɛ Mizpa, nɛ Filisti matsɛmɛ enuɔ ɔmɛ hia konɛ a ya tua mɛ ngɛ lejɛ ɔ. Benɛ Israel bi ɔmɛ nu he ɔ, a ye gbeye,

⁸ nɛ a de Samuel ke, “Moo hi kue fae kɛ hi Yawɛ, wa Mawu ɔ hae, konɛ e je wɔ kɛ je Filisti bi ɔmɛ a dɛ mi.”

⁹ Lɔ ɔ he ɔ, Samuel nu jijɔ bi nɛ ji nyɔ nya lolo nɛ e sã lɛ mluku ɔ tsuo kaa sami bɔ kɛ ha Yawɛ. Samuel kpa Yawɛ pɛɛ kɛ ha Israel, nɛ Yawɛ bu e kue fami ɔ tue.

¹⁰ Benɛ Samuel ngɛ sami bɔ ɔ sãe ɔ, Filisti bi ɔmɛ hɛ mɛ kɛ ba, konɛ a ba tua Israel. Se Yawɛ ha hiɔwe si wawɛɛ kɛ wo Filisti bi ɔmɛ jamɛ a ligbi ɔ; nɛ e ha basabasa sɛ a kpɛti, nɛ a kɛ sawale tu fo.

¹¹ Israel bi ɔmɛ hia kɛ je Mizpa kɛ nyɛɛ Filisti bi ɔmɛ a se, nɛ a gbe mɛ hluu kɛ ya si e piɛ bɔɔ nɛ a maa su Bet Kar.

¹² Kɛkɛ nɛ Samuel ngɔ tɛ kɛ ma Mizpa kɛ Shen a kpɛti, nɛ e wo lejɛ ɔ biɛ Ebenezer; nɛ e de ke, “Hiɛmɛ nɛ ɔ Yawɛ ye bua wɔ kɛ ba si.”

¹³ Bɔ nɛ a plɛ kɛ ye Filisti bi ɔmɛ a nɔ ji nɛ ɔ nɛ. Samuel yi nɔ ɔ, Yawɛ ngmɛ́ blɔ nɛ Filisti bi ɔmɛ ya tua Israel ngɛ a zugba a nɔ hu.

¹⁴ Jehanɛ, ma amɛ nɛ Filisti bi ɔmɛ kpɔ ngɛ Israel dɛ kɛ je Ekron kɛ ya si Gat kɛ a he zugba amɛ ɔ, a kpale mɛ tsuo ngɔ ha Israel ekohu. Nɛ tue mi jɔmi ba Israel bi ɔmɛ, kɛ Amor bi ɔmɛ a kpɛti.

¹⁵ Samuel hyɛ Israel ma a nɔ e wami ligbi ɔmɛ tsuo.

¹⁶ Daa jeha a, e kpaa si kɛ yaa Betel, Gilgal, kɛ Mizpa ya hyɛɛ sanehi a mi ngɛ lejɛ ɔmɛ.

¹⁷ Lɔ ɔ se ɔ, e kpaleɔ kɛ baa e ma mi Rama, nɛ e ba kojoɔ ngɛ lejɛ ɔ hulɔ. E ma bɔ sami la tɛ hu ha Yawɛ ngɛ Rama.