Samuel I, 6 - BAIBLO ALOO NGMAMI KLƆUKLƆU Ɔ

A kpale somi daka a kɛ ba

¹ Benɛ Yawɛ somi daka a na nyɔhiɔ kpaago ngɛ Filisti bi ɔmɛ a zugba a nɔ ɔ,

² ni ɔmɛ ya tsɛ wɔnɔ ɔmɛ, kɛ kunya yeli ɔmɛ, nɛ a bi mɛ ke, “Kɛ wa maa pee Yawɛ somi daka a kɛɛ? Mɛni waa kɛ maa piɛ he kɛ ho e je he ya?”

³ A he nɔ ke, “Ke nyɛɛ kɛ Israel Mawu ɔ somi daka a maa ya a, nyɛɛ kɛ lɛ ko ya dɛ gu; e hia doo kaa nyɛɛ ngɔ fɔ yemi bɔ kɛ ya nɛ nyɛ ya kpata lɛ. Ke nyɛ pee ja loko nyɛ ma na he wami, kɛkɛ nyɛ maa le nɔ́ nɛ he je nɛ Mawu ngɛ nyɛ tue gblae ɔ.”

⁴ Ma a bi ke, “Mɛni fɔ yemi bɔ waa kɛ maa ya a?” Nɛ a ha heto ke, “Sika tsu tslɔɔ enuɔ, kɛ sika tsu kɔkue enuɔ, ngɛ Filisti matsɛmɛ ɔmɛ a hiɛmi nya; ejakaa haomi kake ɔ nɔuu lɛ ba nyɛɛ kɛ nyɛ matsɛmɛ enuɔ ɔmɛ tsuo nyɛ nɔ ɔ nɛ.

⁵ Lɔ ɔ he ɔ, nyɛɛ pee sika tsu tslɔɔ nɛ ɔmɛ, kɛ sika tsu kɔkue nɛ ɔmɛ nɛ daa si ha kɔkuehi nɛ ba ngɛ nyɛ zugba a hɛ mi kpatae ɔ, konɛ nyɛ ya wo Israel Mawu ɔ hɛ mi nyami kaa, alini e maa jɔɔ nyɛɛ kɛ nyɛ wɔ ɔmɛ, kɛ nyɛ zugba a tue gblami lo.

⁶ Mɛni he je nyɛ maa kplii nyɛ tsui kaa bɔ nɛ Egipt bi ɔmɛ, kɛ Farao ɔ kplii a tsui ɔ? Nyɛ kai kaa Mawu kɛ Egipt bi ɔmɛ to ní wawɛɛ nitsɛ kɛ ya si be nɛ a ngmɛɛ Israel bi ɔmɛ a he nɛ a ho.

⁷ Lɔ ɔ he ɔ, nyɛɛ kpɛ tlɔɔke he kake, nɛ nyɛɛ fi na nyɔ hali enyɔ nɛ a wui mɛ kuɛ pã tso hyɛ kɛ wo he; na bi ɔmɛ lɛɛ nyɛɛ po mɛ ya wo tsu mi.

⁸ Nyɛ wo Yawɛ somi daka a kɛ ma tlɔɔke ɔ mi, nɛ sika tsu ní ɔmɛ nɛ nyɛɛ kɛ ma ha Yawɛ kaa fɔ yemi bɔ ɔ, nyɛɛ ngɔ mɛ kɛ wo daka ko mi kɛ ma somi daka a kasa nya. Nyɛɛ ngɔ tlɔɔke ɔ ngɔ ma blɔ ɔ nɔ, nɛ lɛ nitsɛ e ho.

⁹ Lɔ ɔ se ɔ, nyɛɛ hi lɛ hyɛe; ke e ba mi kaa tlɔɔke ɔ nyɛɛ tɛ̃ɛ̃ kɛ ya su lɛ nitsɛ e zugba a nɔ ngɛ Bet Shemesh ɔ, lɛɛ Israel Mawu ɔ ji nɔ nɛ kɛ amanehlu nguaa nɛ ɔ ba wa nɔ ɔ nɛ. Se ke e pee we ja a, lɛɛ wa maa na kaa tsa pi lɛ nɛ e gbla wa tue, se mohu matahu kɛkɛ nɛ ba po wɔ.”

Somi daka a ya su Bet Shemesh

¹⁰ Ni ɔmɛ pee kaa bɔ nɛ a de mɛ ɔ; a ya nu na nyɔ hali enyɔ, nɛ a fi mɛ kɛ wo tlɔɔke ɔ he. Se na bi ɔmɛ lɛɛ a nga a yi wo tsu mi.

¹¹ A kɛ somi daka a, kɛ daka nɛ sika tsu kɔkue ɔmɛ, kɛ sika tsu tslɔɔ ɔmɛ ngɛ mi ɔ wo tlɔɔke ɔ mi.

¹² Kɛkɛ nɛ na amɛ ma Bet Shemesh blɔ ɔ nɔ tɛ̃ɛ̃ kɛ ho; a gba we a hiɔ nɔ, loo a muɔ nɔ; nɛ benɛ a yaa a tsuo a ngɛ pɛe muu muu ngɛ blɔ ɔ nɔ. Filisti matsɛmɛ enuɔ ɔmɛ nyɛɛ a se kɛ ya si Bet Shemesh huzu ɔ nya.

¹³ Jamɛ a be ɔ, Bet Shemesh bi ɔmɛ ngɛ ngma pooe ngɛ kɔ̃ ɔ mi; nɛ benɛ a na somi daka a, a nya saminya.

¹⁴ Tlɔɔke ɔ ba su Bet Shemesh no ɔ nɛ a tsɛɛ lɛ Yoshua a ngmɔ si; nɛ e da si ngɛ tɛ sa agbo ko kasa nya. Kɛkɛ nɛ ni ɔmɛ kplɔ tlɔɔke ɔ he tso ɔ, nɛ a kɛ na amɛ sã sami bɔ ha Yawɛ.

¹⁵ Levi bi ɔmɛ je Yawɛ somi daka a, kɛ daka nɛ maa si ngɛ e kasa nya nɛ sika ní ɔmɛ ngɛ mi ɔ ngɔ ma tɛ sa agbo ɔ nɔ. Bet Shemesh bi ɔmɛ sã sami bɔhi, kɛ bɔ kpahi kɛ ha Yawɛ jamɛ a ligbi ɔ.

¹⁶ Filisti matsɛmɛ enuɔ ɔmɛ hyɛ nɔ́ nɛ ɔ bɔɔ, nɛ a kpale a se kɛ ho Ekron ya jamɛ a ligbi ɔ nɔuu.

¹⁷ Filisti bi ɔmɛ ngɔ sika tsu tslɔɔ enuɔ ɔmɛ ya ha Yawɛ kaa fɔ yemi bɔ kɛ ha a ma nguaa enuɔ ɔmɛ. Ma amɛ ji Ashdod, Gaza, Ashkelon, Gat, kɛ Ekron.

¹⁸ Sika tsu kɔkue ɔmɛ lɛɛ a kɛ mɛ kpata Mawu kɛ ha Filisti ma nguaa amɛ nɛ a fia gbogbo ngɔ wo a he ɔ, kɛ ma wawihi nɛ a fiɛ gbogbo ngɔ wui a he, nɛ ji mahi nɛ Filisti matsɛmɛ enuɔ ɔmɛ yeɔ a nɔ ɔ tsuo. Tɛ sa agbo ɔ nɛ a kɛ Yawɛ somi daka a ma nɔ ngɛ Yoshua ngmɔ ɔ mi ngɛ Bet Shemesh ɔ ngɛ lejɛ ɔ kɛ ba si mwɔnɛ ɔ kaa nɔ́ nɛ ba a he odase.

¹⁹ Yawɛ gbe Bet Shemesh bi ɔmɛ a ti nihi nyingmi kpaago, ejakaa mɛɛ a ya hyɛ somi daka a mi. Nɛ ni ɔmɛ ye kɔmɔ kaa Yawɛ kpata nihi babauu a hɛ mi.

Somi daka a ngɛ Kiriat Yearim

²⁰ Kɛkɛ nɛ Bet Shemesh bi ɔmɛ bi ke, “Mɛnɔ po ma nyɛ Yawɛ, Mawu klɔuklɔu nɛ ɔ hɛ mi maa da? Nɛ jije wa ma je lɛ kɛ je wa ngɔ kɛ ya?”

²¹ A tsɔ nihi kɛ ho Kiriat Yearim bi ɔmɛ a ngɔ ya ya de mɛ ke, “Filisti bi ɔmɛ kpale Yawɛ somi daka a kɛ ba. Lɔ ɔ he ɔ, nyɛɛ ba nɛ nyɛ ba ngɔ kɛ ho.”