Samuel I, 5 - BAIBLO ALOO NGMAMI KLƆUKLƆU Ɔ

Somi daka a ya je Filistia

¹ Benɛ Filisti bi ɔmɛ kpɔ somi daka a, a wo lɛ kɛ je Ebenezer kɛ ho Ashdod ya,

² nɛ a kɛ lɛ ya ma a wɔ ɔ nɛ a tsɛɛ lɛ Dagon ɔ kasa nya ngɛ piɛ ɔ mi.

³ E nɔ jena mɔtu mla benɛ Ashdod bi ɔmɛ te si ɔ, o nɛ Dagon nɛ kuɛli nɔ si, nɛ e hɛ mi bu si ngɛ Yawɛ somi daka a hɛ mi. A wo e nɔ kɛ ma e ma he ɔ ekohu.

⁴ E nɔ jena kpa mɔtu mla benɛ a ke a teɔ si ekohu ɔ, o nɛ Dagon nɛ kuɛli nɔ si ekohu, nɛ e hɛ mi bu si ngɛ Yawɛ somi daka a hɛ mi. Dagon yi, kɛ e nine enyɔ ɔmɛ tsuo kplɔ pue si ngɛ kpoku ɔ nya; e nɔmlɔ tso ɔ pɛ lɛ piɛ.

⁵ Nɔ́ nɛ ɔ he je ɔ, kɛ ba si mwɔnɛ ɔ, Dagon wɔnɔ ɔmɛ, kɛ nihi tsuo nɛ yaa wɔ piɛ ɔ mi ngɛ Ashdod ɔ kɛ nane mɛ kpoku ɔ nɔ; pe a haneɔ lɛ.

⁶ Yawɛ gbla Ashdod bi ɔmɛ a tue wawɛɛ nitsɛ, nɛ e kɛ tslɔɔ kpata a kɛ a huza a nɔ bi ɔmɛ tsuo a hɛ mi.

⁷ Benɛ Ashdod bi ɔmɛ na bɔ nɛ níhi ngɛ nɔ yae ha a, a de ke, “Israel Mawu ɔ ngɛ waa kɛ wa wɔ Dagon ɔ tsuo tue gblae. Wa ko ha nɛ somi daka a nɛ hi wa ngɔ hu.”

⁸ Lɔ ɔ he ɔ, a tsɛ Filisti matsɛmɛ enuɔ ɔmɛ tsuo kpe, nɛ a bi mɛ ke, “Kɛ wa maa pee Israel Mawu ɔ somi daka a kɛɛ?” A he nɔ ke, “Nyɛɛ ngɔ Israel Mawu ɔ somi daka a kɛ ya Gat.” Nɛ a wo daka a kɛ ho lejɛ ɔ ya.

⁹ Se benɛ daka a ya su Gat ɔ, Yawɛ gbla ma a tue. E ha tslɔɔ fuu ma mi bi ɔmɛ tsuo, jokuɛwi kɛ nikɔtɔmahi; nɛ sawale nu nɔ tsuaa nɔ.

¹⁰ Lɔ ɔ he ɔ, a wo Yawɛ somi daka a kɛ ho Ekron ya. Se benɛ Mawu somi daka a ya su Ekron ɔ, Ekron bi ɔmɛ kpa bubuubui, nɛ a de ke, “A wo Israel Mawu ɔ somi daka a kɛ ba hiɛ ɔ, konɛ e ba gbe wɔ, kɛ wa ma mi bi ɔmɛ tsuo!”

¹¹ Lɔ ɔ he ɔ, mɛ hu a tsɛ Filisti matsɛmɛ ɔmɛ tsuo kpe, nɛ a de mɛ ke, “Nyɛ wo Israel Mawu ɔ somi daka a kɛ je hiɛ ɔ kɛ ya ha nɔtsɛmɛ, konɛ e ko ba gbe wɔ, kɛ wa ma mi bi ɔmɛ.” Sawale nu ma a tsuo, ejakaa gbenɔ hiɔ ɔ bɔni ní puɛmi momo.

¹² Ni nɛmɛ nɛ gbo we ɔ po, tslɔɔ fuu mɛ; nɛ ma a kpa bubuubui kɛ ba yemi kɛ buami ngɛ a wɔ ɔmɛ a dɛ mi.