Samuel I, 4 - BAIBLO ALOO NGMAMI KLƆUKLƆU Ɔ

Filisti bi ɔmɛ kpɔ somi daka a

¹ Jamɛ a be ɔ, Filisti bi ɔmɛ ya bua a he nya ngɛ Afek, konɛ a ya tua Israel bi ɔmɛ. Israel bi ɔmɛ hu ya bua a he nya ngɛ Ebenezer, konɛ a kɛ mɛ nɛ hwu.

² Ta a mi wa saminya. Filisti bi ɔmɛ ye Israel bi ɔmɛ a nɔ, nɛ a gbe a ta buli maa pee akpe eywiɛ.

³ Benɛ ta buli ɔmɛ kpale a se kɛ ba ma sito he ɔ, Israel ma nimeli ɔmɛ bi ke, “Mɛni he je nɛ Yawɛ ha Filisti bi ɔmɛ gbe wɔ mwɔnɛ ɔ kikɛ nɛ ɔ? Nyɛ ha wa ya ngɔ Yawɛ somi daka a ngɛ Shilo kɛ ba konɛ Yawɛ ba hi wa ngɔ, nɛ e ba kpɔ wɔ kɛ je wa he nyɛli ɔmɛ a dɛ mi.”

⁴ Lɔ ɔ he ɔ, a tsɔ ya ngɔ Yawɛ somi daka a ngɛ Shilo kɛ ba. Somi daka a daa si ha Yawɛ Ope ɔ matsɛ sɛ. Eli binyumu enyɔ ɔmɛ, Hofni kɛ Finehas piɛ nihi nɛ ngɔ somi daka a kɛ ba a a he.

⁵ Benɛ Yawɛ somi daka a ba su ma sito he ɔ, Israel tsuo hwɔ lele wawɛɛ, nɛ lɔ ɔ ha zugba mimiɛ.

⁶ Filisti bi ɔmɛ nu lele hwɔmi ɔ, nɛ a bi ke, “Lele nɛ a hwɔ wawɛɛ ngɛ Israel bi ɔmɛ a sito he ɔ, kɛ ji e sisi kɛɛ?” Benɛ a na le kaa Yawɛ somi daka a ba su Hebri bi ɔmɛ a sito he ɔ,

⁷ sawale nu Filisti bi ɔmɛ, nɛ a de ke, “Mawu komɛ ba ni ɔmɛ a sito he ɔ! Akuanyɛ! Nɔ nɛ ɔ eko tsa bɛ hyɛ.

⁸ Wa yi ta! Mɛnɔ ma kpɔ wɔ kɛ je kikɛmɛ a mawu kpetekpleenyɛ nɛ ɔmɛ a dɛ mi? Mɛ ji mawuhi nɛ kɛ haomi slɔɔtohi gba Egipt bi ɔmɛ a nya ngɛ nga a nɔ ɔ nɛ!

⁹ Nyɛ wlua nyɛ, nɛ nyɛɛ pee kã kaa nyumuhi; ke pi ja a, nyɛ ma ba plɛ pee Hebri bi ɔmɛ a nyɔguɛhi kaa bɔ nɛ mɛ hu a sɔmɔ nyɛ be ko mi ɔ. Lɔ ɔ he ɔ, nyɛɛ hwu ta kaa nyumuhi!”

¹⁰ Filisti bi ɔmɛ hwu ta wawɛɛ, nɛ a ye Israel nɔ. Israel ta a gbɛ, nɛ nɔ tsuaa nɔ tu fo kɛ ho e we mi ya. A gbe nihi babauu nitsɛ, nɛ Israel ta buli akpe nyingmi etɛ sɔuu gbo.

¹¹ A kpɔ Mawu somi daka a, nɛ Hofni kɛ Finehas, Eli binyumu enyɔ ɔmɛ hu gbo.

Eli gbenɔ

¹² Nyumu ko nɛ je Benyamin wɛtso ɔ mi gbɔ fo kɛ je ta nga a nɔ kɛ ba Shilo jamɛ a ligbi ɔ nɔuu kɛ e he tade nɛ hía, kɛ e yi mi zu.

¹³ Benɛ e ba a, Eli hii si ngɛ sɛ nɔ ngɛ agbo ɔ nya, nɛ e ngɛ blɔ ɔ mi hyɛe; ejakaa e ngɛ e tsui yee ngɛ somi daka a he. Benɛ nyumu ɔ ba su ma a mi, nɛ e ba gba sane nɛ ba a, ma a tsuo kpa bubuubui.

¹⁴ Benɛ Eli nu ngmlaa a, e bi ke, “Kɛ ji bubuubui nɛ a ngɛ kpae nɛ ɔ sisi kɛɛ?” Nɛ nyumu ɔ nyɛɛ esɔesɔ kɛ ho ya bɔ Eli amaniɛ.

¹⁵ Jamɛ a be ɔ, Eli ye jeha nyingmi nɛɛ kɛ kpaanyɔ; e hɛngmɛ nɔ ha, nɛ e hyɛ we nɔ́ kpakpa ko hu.

¹⁶ Nyumu ɔ de Eli ke, “Ta nga a nɔ i je kɛ ba nɛ ɔ nɛ; mwɔnɛ ɔ nɔuu i tu fo kɛ je lejɛ ɔ.” Eli bi lɛ ke, “Ye bi, kɛ níhi ya nɔ kɛɛ?”

¹⁷ Tsɔlɔ ɔ ha lɛ heto ke, “Israel tu fo ngɛ ta a nya, nɛ a gbe a ti nihi babauu. Hofni kɛ Finehas, o binyumu enyɔ ɔmɛ gbo; nɛ a kpɔ Mawu somi daka a hu kɛ je!”

¹⁸ Nɛ́ nyumu ɔ wo somi daka a nɔ ta kikɛ nɛ ɔ, Eli kpa kɛ je e sɛ ɔ nɔ kɛ ya nɔ e se ngɛ agbo ɔ kasa nya. Nɛ akɛnɛ nɔmlɔ ɔ bwɔ nɛ e jiɔ he je ɔ, e kuɛ ku nɛ e gbo. Eli hi Israel ma a nya jeha nyingmi eywiɛ.

Finehas yo ɔ gbenɔ

¹⁹ Eli nganyɛ nɛ ji Finehas yo ɔ mi wa, nɛ e fɔmi be su ta. Benɛ e nu kaa a kpɔ Mawu somi daka a, nɛ e ngatsɛ ɔ, kɛ e huno ɔ tsuo gbo ɔ, e kpatu nu kɔɔmi, nɛ e fɔ.

²⁰ Benɛ e maa ho gbomi ya a, yi ɔmɛ nɛ daa si ngɛ e he ɔ de lɛ ke, “Koo ye gbeye! O fɔ binyumu!” Se e pui a nya mi, nɛ e ha we mɛ heto hulɔ.

²¹ E wo jokuɛ nyumuyo ɔ biɛ ke Ikabod ngɛ Mawu somi daka a nɛ a kpɔ ɔ, kɛ e ngatsɛ ɔ, kɛ e huno ɔ nɛ a gbo ɔ he. Ikabod sisi ji, “Israel hɛ mi nyami ɔ je.”

²² E de ke, “Israel hɛ mi nyami ɔ je, ejakaa a kpɔ Mawu somi daka a.”