Samuel I, 31 - BAIBLO ALOO NGMAMI KLƆUKLƆU Ɔ

Saul kɛ e binyumu ɔmɛ a gbenɔ

¹ Ligbi ko ɔ, Filisti bi ɔmɛ, kɛ Israel bi ɔmɛ hwu ta ngɛ Gilboa yo ɔ nɔ. A gbe Israel bi ɔmɛ babauu nitsɛ ngɛ lejɛ ɔ, nɛ Saul, kɛ e binyumu ɔmɛ, kɛ ni nɛmɛ nɛ piɛ ɔ tu fo.

² Se Filisti bi ɔmɛ ya na mɛ, nɛ a gbe Saul binyumu etɛ ɔmɛ, Yonatan, Abinadab, kɛ Malkishua.

³ Ta nɛ nyɛɛ Saul se ɔ mi wa wawɛɛ nitsɛ. Kɛ̃ɛ̃ tsɛli ɔmɛ a nine su e nɔ, nɛ a plaa lɛ wawɛɛ.

⁴ Kɛkɛ nɛ Saul de e ta hwumi ní hɛɛlɔ ɔ ke, “Moo hia o klaate ɔ nɛ o kɛ gbe mi, nɛ́ mɔmlɔtɔtsɛmɛ nɛ ɔmɛ ko ba gbe mi nɛ a bɔ mi ahlua.” Se niheyo ɔ ye gbeye, nɛ e nyɛ we nɛ e pee ja. Lɔ ɔ he ɔ, Saul nitsɛ kɛ̃ e klaate ɔ, nɛ e kɛ gbe e he.

⁵ Benɛ Saul ta hwumi ní hɛɛlɔ ɔ na kaa Saul gbo ɔ, lɛ hu e kɛ lɛ nitsɛ e klaate ɔ gbe e he.

⁶ Nɛ Saul kɛ e binyumu etɛ ɔmɛ, e ta hwumi ní hɛɛlɔ ɔ, kɛ e ta buli ɔmɛ tsuo gbo ligbi kake too.

⁷ Benɛ Israel bi ɔmɛ nɛ ngɛ Yezreel kɔ̃ ɔ se je, kɛ ni nɛmɛ nɛ ngɛ Yordan pa a beleku je ɔ nu kaa Israel ta a gbɛ, nɛ jehanɛ hu, Saul kɛ e binyumu ɔmɛ gbo ɔ, a tu fo kɛ je a ma amɛ a mi; nɛ Filisti bi ɔmɛ ba nɛ a ba hi lejɛ ɔmɛ.

⁸ E nɔ jena benɛ Filisti bi ɔmɛ ba nɛ a ba ha ní ngɛ ni gbogboe ɔmɛ a he ɔ, a na Saul kɛ e binyumu etɛ ɔmɛ nɛ a gbo fɔɔ si ngɛ Gilboa yo ɔ nɔ.

⁹ A po Saul yi, nɛ a je ta hwumi ní ɔmɛ ngɛ e he, nɛ a kɛ tsɔ nihi ke a kɛ ya kpa Filistia tsuo, nɛ a ngɔ manye munyu ɔ ya ha amaga amɛ, kɛ ma a tsuo.

¹⁰ Lɔ ɔ se ɔ, a ngɔ e ta hwumi ní ɔmɛ ya to yo mawu ɔ nɛ a tsɛɛ Ashtarot ɔ we ɔ, nɛ a kɛ e nɔmlɔ tso ɔ ya kpla Bet Shan gbogbo ɔ he.

¹¹ Benɛ Yabesh Gilead bi ɔmɛ nu nɔ́ nɛ Filisti bi ɔmɛ pee Saul ɔ,

¹² nyumuhi katsɛmɛ ɔmɛ tsuo nyɛɛ nyɔnyɔɔnyɔ kɛ ya Bet Shan ya je Saul gbogboe ɔ, kɛ e binyumu ɔmɛ a ní ɔmɛ kɛ je gbogbo ɔ he, nɛ a ngɔ mɛ kɛ ba Yabesh, nɛ a ba sã mɛ ngɛ lejɛ ɔ.

¹³ Lɔ ɔ se ɔ, a muɔ wu ɔmɛ ya pu ngɛ tso nguaa ko sisi ngɛ Yabesh ma a mi, nɛ a ha hwɔ ligbi kpaago.