Samuel I, 30 - BAIBLO ALOO NGMAMI KLƆUKLƆU Ɔ

David kɛ Amalek bi hwu ta

¹ Ligbi nɛ ji etɛ ɔ, be nɛ David kɛ e we bi ɔmɛ ke a suu Ziklag ɔ, Amalek bi ɔmɛ ba ha ní ngɛ Yuda leneyi je, nɛ a tua Ziklag. A kɛ la sã Ziklag,

² nɛ a nuu yi ɔmɛ, kɛ nɔ tsuaa nɔ nɛ ngɛ ma a mi ɔ, jokuɛwi kɛ nikɔtɔmahi tsuo. A gbi nɔ ko nɔ ko; se mohu benɛ a yaa a, a muɔ mɛ tsuo kɛ ho.

³ Benɛ David kɛ e we bi ɔmɛ ba su ma a mi ɔ, a na kaa a sã ma a, nɛ jehanɛ hu a nuu a yi ɔmɛ, a binyumu ɔmɛ, kɛ a biyi ɔmɛ kɛ je.

⁴ Kɛkɛ nɛ David kɛ e we bi ɔmɛ wo yana hluu kɛ ya si a he wami ta.

⁵ A nuu David yi enyɔ ɔmɛ hu kɛ ho. Mɛ ji Ahinoam, Yezreel no ɔ, kɛ Abigail, Nabal nɛ je Karmel yalɔyo ɔ.

⁶ David hao wawɛɛ nitsɛ; ejakaa e we bi ɔmɛ a hɛ dɔ ngɛ a bimɛ ɔmɛ nɛ a be ɔ a he. Jehanɛ hu a de ke a maa fia lɛ tɛ. Se Yawɛ, David Mawu ɔ wo lɛ he wami.

⁷ David de osɔfo Abiatar, Ahimelek binyumu ɔ ke, “Ngɔɔ efɔd ɔ kɛ ba ha mi.” Nɛ Abiatar ngɔ efɔd ɔ kɛ ba ha lɛ.

⁸ David bi Yawɛ ke, “Ma nyɛɛ ní hali ɔmɛ a se lo? Anɛ ye nine maa su a nɔ lo?” Yawɛ he nɔ ke, “Ee, moo nyɛɛ a se; ejakaa o ma ya na mɛ, nɛ bɔ tsuaa bɔ nɛ pee ɔ, o ma kpɔ ni ɔmɛ.”

⁹ Lɔ ɔ he ɔ, David kɛ e we bi nɛ ji nyumuhi lafa ekpa amɛ pue blɔ. Benɛ a su Besor pa a nya a, ni komɛ tlɔ lejɛ ɔ nɛ a je a he.

¹⁰ David kɛ nyumuhi lafa eywiɛ tsa nyɛɛmi ɔ nɔ. Nyumuhi lafa enyɔ nɛ piɛ ɔ, pɔ tɔ mɛ nɛ a nyɛ we nɛ a po Besor pa a; lɔ ɔ he ɔ, mɛɛ a tlɔ pa a se.

¹¹ David we bi ɔmɛ ya na Egipt niheyo ko ngɛ nga a nɔ, nɛ a kɛ lɛ ba David ngɔ. A ha lɛ ní nɛ e ye, nɛ a ha lɛ nyu nɛ e nu.

¹² Lɔ ɔ se ɔ, a ha lɛ ngmɔkɔ kɛ wai yiblii sau enyɔ nɛ e ye, kɛkɛ nɛ e hɛ mi tsɔ lɛ; ejakaa e yi ní, nɛ e nui nyu ligbi etɛ sɔuu.

¹³ David bi lɛ ke, “Mɛnɔ ngɔ bi ji mo? Nɛ jije o je?” Niheyo ɔ he nɔ ke, “Egipt no ji mi, se ye nyɔmtsɛ ɔ lɛɛ Amalek no ji lɛ. Ye nyɔmtsɛ ɔ je ye he ngɛ hiɛ ɔ mwɔnɛ ɔ ji ligbi etɛ; ejakaa i be he wami.

¹⁴ Wa ya tua Keret bi a zugba a nɛ ngɛ Yuda leneyi je ɔ, kɛ Kaleb bi a zugba a, nɛ wa sã Ziklag ma a.”

¹⁵ David bi lɛ ke, “Anɛ o ma nyɛ maa tsɔɔ mi he nɛ nimli nɛ ɔmɛ ngɛ lo?” Niheyo ɔ he nɔ ke, “Ke o maa wo si ngɛ Mawu biɛ mi kaa o be mi gbee, nɛ jehanɛ hu, o be mi jee kɛ wo ye nyɔmtsɛ ɔ dɛ mi ɔ, lɛɛ i kɛ mo maa ya.”

¹⁶ Nɛ e kɛ David ho. Benɛ a su lejɛ ɔ, a na ni ɔmɛ nɛ a pueɔ si babauu ngɛ zugba. Blɔɔ a ngɛ ní yee, a ngɛ ní nue, nɛ a ngɛ doe; ejakaa ta yibu ní nɛ a nine su nɔ ngɛ Filistia kɛ Yuda a, tsa pi fiɛmi.

¹⁷ E nɔ jena makɛ ɔ, David ya tua mɛ, nɛ e kɛ mɛ hwu kɛ ya si gbɔkuɛ. Nɔ ko nɔ ko he ji mi, kaa ja nihewi lafa eywiɛ nɛ mɛɛ a hi afukpɔngɔ nɔ kɛ tu fo pɛ.

¹⁸ David kpɔ nɔ́ tsuaa nɔ́ nɛ Amalek bi ɔmɛ ba ha kɛ ho ɔ. E nine su e yihi enyɔ ɔmɛ hu a nɔ,

¹⁹ nɛ nɔ́ ko nɔ́ ko laa we. David kpɔ e we bi ɔmɛ a binyumu ɔmɛ, kɛ a biyi ɔmɛ, kɛ ta yibu ní nɛ Amalek bi ɔmɛ muɔ ɔ tsuo.

²⁰ Jehanɛ David muɔ to ɔmɛ, kɛ na amɛ tsuo pɛpɛɛpɛ. E we bi ɔmɛ kpaka lohwe ɔmɛ kɛ nyɛɛ a hɛ mi be mi nɛ a ngɛ dee ke, “David ta yibu ní ji nɛ ɔmɛ nɛ!”

Ta yibu ní dlami

²¹ David ba su nyumuhi lafa enyɔ ɔmɛ a ngɔ. Mɛ ji ni nɛmɛ nɛ pɔ tɔ mɛ nɛ a nyɛ we nɛ a kɛ David nɛ ya nɛ a je a he ngɛ Besor pa a nya a nɛ. Benɛ David kɛ e we bi ɔmɛ ba su ɔ, ni ɔmɛ nya a he, nɛ lɛ hu e kɛ bua jɔmi fɔ mɛ, nɛ e bi mɛ se amaniɛ.

²² Se amimitsɛmɛ kɛ yaka nimli nɛ nyɛɛ David se ɔ de ke, “Akɛnɛ a kɛ wɔ yɛ he je ɔ, wa be mɛ ta yibu ní ɔmɛ nɛ wa ya kpɔ ɔ eko hae. A ba ngɔ a yi ɔmɛ, kɛ a bimɛ ɔmɛ kɛkɛ nɛ a ho.”

²³ Se David de mɛ ke, “Ye nyɛmimɛ, nɔ́ nɛ Yawɛ ha wɔ ɔ, nyɛ ko pee lɛ ja. Yawɛ baa wa yi nɛ e je ni nɛmɛ nɛ ba tua wɔ ɔ kɛ wo wa dɛ mi.

²⁴ Mɛnɔ maa kplɛɛ nɔ́ nɛ nyɛ de nɛ ɔ nɔ? Bɔ nɛ ta yalɔ ko ma na a, ja nɔuu nɔ nɛ buu ní ɔmɛ a he ɔ ma na; mɛ tsuo a ma na sɔsɔɛ.”

²⁵ David pee nɔ́ nɛ ɔ mlaa, nɛ a ngɛ nɔ yee ngɛ Israel kɛ je jamɛ a be ɔ kɛ ba si mwɔnɛ ɔ.

²⁶ Benɛ David kpale kɛ ba Ziklag ɔ, e tsɔ nɛ a kɛ ta yibu ní ɔ eko ya ha e huɛmɛ Yuda ma nimeli ɔmɛ, nɛ e de mɛ ke, “Nike ní nɛ wa ngɔ kɛ ba ha nyɛ nɛ ɔ ji ta yibu ní nɛ wa ngɔ kɛ je Yawɛ he nyɛli ɔmɛ a dɛ mi ɔ eko.”

²⁷ David kɛ ta yibu ní ɔ eko mane nihi nɛ ngɛ Betel, nihi nɛ ngɛ Rama ngɛ Yuda leneyi je ɔ, nihi nɛ ngɛ Yatir,

²⁸ nihi nɛ ngɛ Aroer, nihi nɛ ngɛ Sifmot, ni nɛmɛ nɛ ngɛ Eshtemoa,

²⁹ nihi nɛ ngɛ Rakal, Yerameel bi ɔmɛ, Ken bi ɔmɛ,

³⁰ nihi nɛ ngɛ Horma, Borashan, Atak,

³¹ kɛ Hebron ma amɛ a mi. He tsuaa he nɛ David kɛ e we bi ɔmɛ ya kpa a, e mane nihi nɛ ngɛ lejɛ ɔ ta yibu ní ɔ eko.