Samuel I, 3 - BAIBLO ALOO NGMAMI KLƆUKLƆU Ɔ

Yawɛ je e he kpo tsɔɔ Samuel

¹ Be mi nɛ jokuɛ nyumuyo Samuel ɔ ngɛ Eli ngɔ nɛ e ngɛ Yawɛ sɔmɔe ɔ, Yawɛ nya mi sɛ gbi pɔɛ he; nɛ ní nami hu pɔɛ he.

² Ligbi ko nyɔ mi, benɛ Eli, nɛ lɔ ɔ ji e hɛngmɛ yu ta, hwɔɔ si ngɛ lɛ nitsɛ e tsu ɔ mi ɔ,

³ Samuel lɛɛ e hwɔɔ si ngɛ Yawɛ sɔlemi we ɔ he nɛ Mawu somi daka a ngɛ ɔ. Benɛ je mi tsɔ we lolo, nɛ kane ɔ hu na we nɛ e gbo ɔ,

⁴ Yawɛ tsɛ Samuel; nɛ

⁵ Samuel tu fo kɛ ho Eli ngɔ ya nɛ e ya de lɛ ke, “I kpa mo pɛɛ, i ba; i nu nɛ o tsɛ mi.” Se Eli de lɛ ke, “I tsɛ we mo; yaa nɛ o ya hwɔ si ekohu.” Nɛ Samuel ho nɛ e ya hwɔ si.

⁶ Yawɛ tsɛ Samuel ekohu, nɛ Samuel te si kɛ ho Eli ngɔ ya nɛ e ya de lɛ ke, “I kpa mo pɛɛ, i ba; i nu nɛ o tsɛ mi.” Se Eli de lɛ ke, “I tsɛ we mo, ye bi; yaa nɛ o ya hwɔ si ekohu.”

⁷ Jamɛ a be ɔ, Samuel li Yawɛ lolo; ejakaa Yawɛ kɛ lɛ tui munyu hyɛ.

⁸ Yawɛ tsɛ Samuel ekohu si etɛne, nɛ Samuel te si kɛ ho Eli ngɔ ya nɛ e ya de lɛ ke, “I kpa mo pɛɛ, i ba; i nu nɛ o tsɛ mi.” Jehanɛ Eli yɔse kaa Yawɛ nɛ ngɛ jokuɛ nyumuyo ɔ tsɛe ɔ nɛ.

⁹ Lɔ ɔ he ɔ, e de Samuel ke, “Yaa hwɔ si, nɛ ke e tsɛ mo ekohu ɔ, de ke, ‘Moo tu munyu, Yawɛ; o tsɔlɔ ngɛ mo tue bue.’ ” Nɛ Samuel ho nɛ e ya hwɔ si.

¹⁰ Kɛkɛ nɛ Yawɛ ba da si ngɛ lejɛ ɔ, nɛ e tsɛ lɛ kaa kekle ɔ ke, “Samuel! Samuel!” Nɛ Samuel he nɔ ke, “Moo tu munyu, o tsɔlɔ ngɛ mo tue bue.”

¹¹ Yawɛ de Samuel ke, “I miɔ nɛ ma pee nɔ́ ko ngɛ Israel, nɛ nɔ tsuaa nɔ nɛ maa nu he ɔ, e tue mi maa pee lɛ heii.

¹² Jamɛ a ligbi ɔ, ma ha nɔ́ tsuaa nɔ́ nɛ i de kɛ si Eli we ɔ maa ba mi kɛ maa je sisije kɛ yaa si nyagbe.

¹³ I de lɛ momo ke ma gbla e we ɔ tue kɛ maa ya neneene, ejakaa e le kaa e bimɛ ɔmɛ ngɛ musu bɔe kɛ ngɛ Mawu sie, se e kua we nɔ́ ha mɛ.

¹⁴ Lɔ ɔ he ɔ, i ngɛ Eli kɛ e we mi bi ɔmɛ kita kae kaa yayami agbo nɛ a pee nɛ ɔ, a kɛ sami bɔ, loo niye ní bɔ ko be nyɛe ma kpata mi kɔkɔɔkɔ.”

¹⁵ Samuel ho ya hwɔ si kɛ ya si mɔtu; nɛ e te si nɛ e bli Yawɛ we ɔ sinya amɛ. Samuel ye gbeye kaa e ma de Eli nɔ́ nɛ Yawɛ de lɛ ɔ.

¹⁶ Se Eli tsɛ lɛ nɛ e de lɛ ke, “Ye bi Samuel!” Nɛ e he nɔ ke, “Tsaatsɛ!”

¹⁷ Eli bi lɛ ke, “Mɛni Yawɛ de mo ɔ? De mi nɔ́ tsuaa nɔ́. Ke o laa mi ba a, Mawu maa gbla o tue!”

¹⁸ Lɔ ɔ he ɔ, Samuel de lɛ nɔ́ tsuaa nɔ́; e si we nɔ́ ko nɛ e de we lɛ. Eli de ke, “Lɛ ji Yawɛ ɔ nɛ; nɔ́ tsuaa nɔ́ nɛ sa e hɛ mi ɔ, e pee!”

¹⁹ Nɛ́ Samuel ngɛ wae ɔ, Yawɛ kɛ lɛ ngɛ, nɛ nɔ́ tsuaa nɔ́ nɛ Samuel de ɔ, Yawɛ haa e baa mi ja pɛpɛɛpɛ.

²⁰ Lɔ ɔ he ɔ, Israel ma a tsuo, kɛ je Dan kɛ ya si Beersheba ba na le kaa Samuel ɔ, Yawɛ nitsɛ gbalɔ ji lɛ.

²¹ Yawɛ ya nɔ nɛ e je e he kpo ngɛ Shilo, he nɛ e kɛ Samuel tu munyu ngɛ ɔ. Nɛ ke Samuel tu munyu ɔ, Israel tsuo buɔ lɛ tue.