Samuel I, 29 - BAIBLO ALOO NGMAMI KLƆUKLƆU Ɔ

Filisti bi ɔmɛ hla we David

¹ Filisti bi ɔmɛ bua a tabo ɔmɛ tsuo a nya ngɛ Afek, nɛ Israel bi ɔmɛ hu ya bua ngɛ nyu vu ko nɛ ngɛ Yezreel ɔ kasa nya.

² Filisti matsɛmɛ enuɔ ɔmɛ je kpo kɛ a tabo ɔmɛ ngɛ lafahi kɛ akpehi a nya. David kɛ e we bi ɔmɛ hu ya piɛ Akish he ngɛ se tabo ɔ mi.

³ Benɛ Filisti tatsɛmɛ ɔmɛ na mɛ ɔ, a bi ke, “Mɛni Hebri bi nɛ ɔmɛ ngɛ pee ngɛ hiɛ ɔ?” Akish he nɔ ke, “Israel matsɛ, Saul tsɔlɔ David ɔ ji nɛ ɔ nɛ. E kɛ mi ba hi si jeha saii ji nɛ ɔ nɛ. Kɛ je be mi nɛ e bɔ ko ba dumɔ mi kɛ ba si mwɔnɛ ligbi nɛ ɔ, i nɛ yayami ko yayami ko ngɛ e he.”

⁴ Se Filisti tatsɛmɛ ɔmɛ a mi mi fu Akish, nɛ a de lɛ ke, “Ha nɛ nyumu ɔ nɛ kpale e se kɛ ya he nɛ o ngɔ ha lɛ ɔ. Waa kɛ lɛ be ta yae nɛ e ba plɛ wo wɔ ngɛ ta a mi nɛ e fia wɔ senya kɔ. Mɛni nɔmlɔ nɛ ɔ kɛ ma kpata e nyɔmtsɛ ɔ, nɛ maa sa e hɛ mi pe nimli nɛ ngɛ hiɛmɛ nɛ ɔ a yi koklodohi?

⁵ David ɔ, nɔ nɛ he nɛ yi ɔmɛ do, nɛ a la ke, ‘Saul gbe akpehi, se David gbe akpe nyɔngmahi’ ɔ, pi lɛ ji nɛ ɔ?”

⁶ Akish tsɛ David, nɛ e de lɛ ke, “I na Israel Mawu, hɛ kalɔ ɔ kaa o yeɔ mi anɔkuale, nɛ jinɛ imi lɛɛ i ko suɔ kaa o kɛ mi nɛ ya ta nɛ ɔ; ejakaa kɛ je ligbi ɔ nɛ o ba ye ngɔ kɛ ba si mwɔnɛ ɔ, i nɛ nɔ́ yayami ko ngɛ o he. Se matsɛmɛ kpa amɛ sume kaa o kɛ wɔ nɛ ya.

⁷ Lɔ ɔ he ɔ, moo kpale kɛ ho we mi ya ngɛ he jɔmi mi, nɛ́ o ko pee nɔ́ ko nɛ sɛ Filisti matsɛmɛ ɔmɛ a hɛ mi.”

⁸ David bi Akish ke, “Mɛni i pee? Kɛ je ligbi ɔ nɛ i ba bɔni mo sɔmɔmi kɛ ba si mwɔnɛ ɔ, mɛni o na ngɛ o tsɔlɔ ɔ he loko e sɛ kaa i yaa nɛ i kɛ ye nyɔmtsɛ matsɛ ɔ he nyɛli ya hwuɔ ta a?”

⁹ Akish ha David heto ke, “Imi lɛɛ i le kaa nɔ́ ko be o he; o ngɛ kaa Mawu bɔfo. Filisti tatsɛmɛ kpa amɛ nɛ a de ke, ‘Waa kɛ lɛ be ta yae’ ɔ nɛ.

¹⁰ Lɔ ɔ he ɔ, David, hwɔɔ mɔtu ɔ, o kɛ Saul tsɔli ɔmɛ tsuo nɛ piɛ o he ɔ maa te si mla; nɛ benɛ je mi ke e tsɔɔ ɔ, kɛkɛ nyɛ je hiɛ ɔ.”

¹¹ David kɛ e we bi ɔmɛ te si mɔtu mla nɛ a kpale kɛ ho Filistia ya; nɛ Filisti bi ɔmɛ hu pue nɔ kɛ ho Yezreel ya.