Samuel I, 26 - BAIBLO ALOO NGMAMI KLƆUKLƆU Ɔ

David ngɔ Saul wami ngɔ ke lɛ ekohu

¹ Zif bi ɔmɛ ba Saul ngɔ ngɛ Gibea ba bɔ lɛ amaniɛ ke David ba laa e he ngɛ Hakila yo ɔ nɔ ngɛ Yuda nga a nya.

² Amlɔ ɔ, Saul ngɔ Israel ta buli kpanakpanaa akpe etɛ ngɔ piɛ e he, nɛ a ho, konɛ a ya hla David ngɛ Zif nga a nɔ.

³ Saul kɛ e tabo ɔ ya bua a he nya ngɛ blɔ ɔ nɛ gu Hakila yoku ɔ nɔ ɔ he, ngɛ Yeshimon hanɔ. Jamɛ a be ɔ, David ngɛ laami tso mi ngɛ nga a nɔ. Benɛ David nu kaa Saul ba lɛ hlami ngɛ nga a nɔ ɔ,

⁴ e tsɔ slaali ngɛ laami mi nɛ e kɛ ná le kaa Saul ngɛ lejɛ ɔ niinɛ.

⁵ Kɛkɛ nɛ David be kɛ ho he nɛ Saul ta buli ɔmɛ bua a he nya ngɛ ɔ ya. David ya na he nɛ Saul kɛ e tatsɛ nguaa Abner, Ner bi ɔ hwɔɔ si ngɛ ɔ. Saul hwɔɔ si ngɛ ta a mi, nɛ e ta buli ɔmɛ pue si kɛ bɔle lɛ.

⁶ David bi Ahimelek, Hit no ɔ, kɛ Yoab nyɛminyumu Abishai, Zeruya binyumu ɔ ke, “Nyɛ ti mɛnɔ kɛ mi maa ya Saul ta a mi?” Abishai he nɔ ke, “I kɛ mo maa ya.”

⁷ Lɔ ɔ he ɔ, David kɛ Abishai ho ta a mi ya jamɛ a nyɔ ɔ mi, nɛ a ya na Saul nɛ hwɔ mahe kɛ e we akplɔ ɔ nɛ a kɛ gbɔ si ngɛ e yi tetle mi. Abner kɛ ta buli ɔmɛ hwɔɔ si kɛ bɔle lɛ.

⁸ Kɛkɛ nɛ Abishai de David ke, “Mawu je o he nyɛlɔ ɔ kɛ wo o dɛ mi mwɔnɛ ɔ; lɔ ɔ he ɔ, ha nɛ ma hɛ lɛ akplɔ ɔ si kake pɛ kɛ ya pi zugba, nɛ e be hiae kaa a hɛ lɛ enyɔne.”

⁹ Se David de Abishai ke, “Mo ko kpata e hɛ mi; ejakaa tue gblami fɔɔ si ha nɔ tsuaa nɔ nɛ pueɔ nɔ nɛ Yawɛ pɔ lɛ nu ke e ye matsɛ ɔ e muɔ si.”

¹⁰ David ya nɔ nɛ e de ke, “I na Yawɛ, hɛ kalɔ ɔ kaa lɛ Yawɛ nitsɛ e maa fia Saul nɔ, loo Saul gbenɔ be maa su nɛ e ma gbo, loo e ma gbo ngɛ ta nya.

¹¹ Yawɛ hiɔ kaa nɔmlɔ nɛ lɛ, Yawɛ nitsɛ e wo lɛ matsɛ ɔ, ma pue e muɔ si. Ha waa kɛ̃ akplɔ ɔ nɛ ngɛ e yi tetle mi ɔ, kɛ nyu kɛ kplu ɔ, nɛ waa ho.”

¹² David kɛ̃ akplɔ ɔ, kɛ nyu kɛ kplu ɔ nɛ ngɛ Saul yi tetle mi ɔ, nɛ a je lejɛ ɔ. Nɔ ko nɔ ko nɛ mɛ; nɔ ko nɔ ko li nɔ́ nɛ ba, nɛ nɔ ko nɔ ko hɛ tsɛ̃ hulɔ. Nɔ tsuaa nɔ hwɔ mahe; ejakaa Yawɛ ha mahe vii ko ba nɔ mɛ tsuo a nɔ.

¹³ Jehanɛ, David po mi kɛ ho, nɛ e ya da yoku ɔ yi mi tsitsaa lokoo,

¹⁴ nɛ e kpa ngmlaa kɛ tsɛ ta buli ɔmɛ, kɛ Ner binyumu Abner, nɛ e de ke, “Abner! Mo he nɔ koo!” Abner bi ke, “Mo mɛnɔ lɛ o ngɛ ngmlaa kpae kɛ ngɛ matsɛ ɔ woe ɔ?”

¹⁵ David he nɔ ke, “Pi nyumu ji mo? Mɛnɔ kɛ mo sɔ ngɛ Israel? Mɛni he je mɔ nɛ o bui o nyɔmtsɛ matsɛ ɔ he? Nɔ ko ba ta a mi piɔ, nɛ jinɛ e ko kpata o nyɔmtsɛ matsɛ ɔ hɛ mi.

¹⁶ Nyɛ pee we nɛ hi kulaa. I na Mawu, ja a gbe nyɛ tsuo kulaa; ejakaa nyɛ bui nyɛ nyɔmtsɛ ɔ, nɔ nɛ Yawɛ pɔ lɛ nu ɔ he. Jehanɛ, hyɛ he nɛ matsɛ ɔ akplɔ ɔ ngɛ! Nyu kɛ kplu ɔ hu nɛ ngɛ matsɛ ɔ yi tetle mi ɔ, hyɛ he nɛ e ba je!”

¹⁷ Saul yɔse David gbi, nɛ e bi ke, “Ye bi David, mo ji nɛ ɔ?” David he nɔ ke, “Ee, ye nyɔmtsɛ matsɛ, imi!”

¹⁸ David ya nɔ nɛ e bi lɛ ke, “Ye nyɔmtsɛ, mɛni he je o ngɛ ye se nyɛɛe kɛ mwɔɔ? Mɛni i pee mo? Mɛni yayami i pee?

¹⁹ Ye nyɔmtsɛ, moo bu nɔ́ nɛ o tsɔlɔ ma de mo nɛ ɔ tue. Ke Yawɛ lɛ pee loko o ngɛ ye se blɔ hlae ɔ, lɛɛ e ngmɛ mi blɔ nɛ ma sã bɔ kɛ kpata lɛ. Se ke nimli adesahi a ní tsumi ɔ, lɛɛ Yawɛ nɛ e gbiɛ mɛ; ejakaa mwɔnɛ ligbi nɛ ɔ, a fie mi kɛ je Yawɛ zugba a nɔ kɛ ho ma kpa nɔ ya nɛ ma ya ja mawu kpahi ngɛ lejɛ ɔ.

²⁰ Mo ko ha nɛ ma gbo nɛ ye muɔ nɛ pue si ngɛ zugba kpa nɔ kɛ je Yawɛ hɛ mi. Mɛni he je Israel matsɛ hia ta kɛ ma mi tuami, imi nɛ i ngɛ kaa malɛɛ kɛkɛ ɔ? Mɛni he je e ngɛ mi dae kaa a daa hɔne ngɛ yoku nɔ ɔ?”

²¹ Saul he nɔ ke, “I tɔ̃! Ye bi David, moo kpale kɛ ba; i be mo nɔ́ ko nɔ́ ko pee hu, ejakaa o kɛ ye wami ke mi mwɔnɛ ligbi nɛ ɔ. I je kuasia nɛ i tɔ̃ babauu.”

²² David he nɔ ke, “Matsɛ, o we akplɔ ɔ ji nɛ ɔ nɛ! Ha nɛ o we bi ɔmɛ a ti nɔ kake nɛ e ba nɛ e ba ngɔ.

²³ Yawɛ gbaa nihi nɛ yeɔ anɔkuale, kɛ ni nɛmɛ nɛ da. Yawɛ je mo kɛ wo ye dɛ mi mwɔnɛ ɔ, se mo nɔmlɔ nɛ Yawɛ pɔ mo nu ɔ, i tɛ o he.

²⁴ Lɔ ɔ he ɔ, kaa bɔ nɛ i kɛ o wami ke mo mwɔnɛ ligbi nɛ ɔ, Yawɛ nɛ e ngɔ ye wami kɛ ke mi, nɛ e je mi kɛ je amanehlu tsuo pɛpɛɛpɛ mi.”

²⁵ Saul de David ke, “Mawu nɛ e gbaa mo, ye bi David! O maa ye manye ngɛ nɔ́ tsuaa nɔ́ mi.” Kɛkɛ nɛ David je lejɛ ɔ, nɛ Saul hu kpale e se kɛ ho we mi ya.