Samuel I, 25 - BAIBLO ALOO NGMAMI KLƆUKLƆU Ɔ

Samuel gbenɔ

¹ Samuel ba gbo, nɛ Israel ma a tsuo ba bua a he nya nɛ a nyɛ ya ha lɛ. Lɔ ɔ se e, a ya pu lɛ ngɛ e we ɔ mi ngɛ Rama. Pee se ɔ, David pue nɔ kɛ ho Paran nga a nɔ ya.

David kɛ Abigail

^2-3 Nyumu ko hi si nɛ je Kaleb weku ɔ mi. E biɛ ji Nabal, nɛ e je Maon, se e ngɛ zugba ngɛ Karmel. Nyumu nɛ ɔ, niatsɛ nguaa ji lɛ; e ngɛ jijɔ akpe etɛ, kɛ apletsi hu akpe. E yo, Abigail ɔ he ngɛ fɛu saminya, nɛ e ngɛ juɛmi hulɔ. Se lɛ nyumu ɔ nitsɛ lɛɛ amimitsɛ kɛ nɔmlɔ nɛ be subai ji lɛ.

⁴ David nu ngɛ nga a nɔ kaa Nabal ngɛ e to ɔmɛ a he bwɔmi sãe.

⁵ Lɔ ɔ he ɔ, e tsɔ nihewi nyɔngma ke a ya Nabal ngɔ ngɛ Karmel nɛ a kɛ e biɛ ya fɔ lɛ,

⁶ nɛ a de lɛ ke, “He manye, ye nyɛmi. He jɔmi nɛ ba o we ɔ, kɛ o nɔ́ tsuaa nɔ́ nɔ.

⁷ I nu kaa o ngɛ o to ɔmɛ a he bwɔmi sãe. I ngɛ hae nɛ o le kaa o to hyɛli ɔmɛ kɛ wɔ ba hi si, nɛ wa pee we mɛ yayami ko. Jehanɛ hu, ligbi abɔ nɛ a ye ngɛ Karmel ɔ, a nɔ́ ko nɔ́ ko laa we.

⁸ Bi o nihewi ɔmɛ, nɛ a ma de mo. Lɔ ɔ he ɔ, akɛnɛ nyami ligbi nɔ wa ba ngɛ he je ɔ, mo he wɔ atuu. I kpa mo pɛɛ, nɔ́ tsuaa nɔ́ nɛ ngɛ o dɛ ɔ, mo ha o tsɔli ɔmɛ, kɛ o binyumu David hu eko.”

⁹ David we bi ɔmɛ ngɔ sɛ gbi ɔ ya ha Nabal ngɛ David biɛ mi; nɛ lɔ ɔ se ɔ, a mlɛ.

¹⁰ Se Nabal he nɔ nɛ e de David tsɔli ɔmɛ ke, “Mɛnɔ ji jamɛ a David ɔ? Nɛ mɛnɔ hu ji Ishai binyumu nɛ ɔ? Ligbi etɛ nɛ ɔ mi ɔ, tsɔli nɛ tsɔ a nyɔmtsɛmɛ a hɛ mi atuã ba ngɛ hiɛe tsɔ.

¹¹ Lɔ ɔ he ɔ, ma ngɔ ye abolo, ye nyu, kɛ lohwehi nɛ i gbe ha ye to he bwɔmi sali ɔ ngɔ ha nihi nɛ i li he nɛ a je ɔ lo?”

¹² David we bi ɔmɛ kpale a se nɛ a ya gba David nɔ́ tsuaa nɔ́ nɛ Nabal de ɔ.

¹³ Kɛkɛ nɛ David de e we bi ɔmɛ ke, “Nyɛ ti nɔ tsuaa nɔ nɛ fi e klaate!” Nɛ a pee ja. David hu fi e klaate ɔ, nɛ e kɛ nyumuhi maa pee lafa eywiɛ hia kɛ je lejɛ ɔ, nɛ a si nihi lafa enyɔ ngɛ tlomi ɔmɛ a he.

¹⁴ Nabal tsɔli ɔmɛ a ti nɔ kake ya de Nabal yo, Abigail ke, “David tsɔ nihi kɛ je nga a nɔ kɛ ba ke a ba ha wa nyɔmtsɛ ɔ manye; se Nabal kuɛ wo mɛ.

¹⁵ Anɔkuale mi ɔ, nyumu nɛ ɔmɛ kɛ wɔ hi si saminya, nɛ a pee we wɔ yayami ko. Jehanɛ hu ligbi abɔ nɛ waa kɛ mɛ hi nga a nɔ ɔ, wa nɔ́ ko nɔ́ ko laa we.

¹⁶ A bu wa he nyɔ kɛ pia be tsuo nɛ waa kɛ mɛ hi si nɛ wa ngɛ to ɔmɛ hyɛe ɔ.

¹⁷ Lɔ ɔ he ɔ, mo susu he, konɛ o hyɛ nɔ́ nɛ sa peemi; ejakaa sane yobu lɛ ma wa nyɔmtsɛ ɔ kɛ e weku li a nɔ nɛ ɔ nɛ. Nɔmlɔ ɔ tsui wa, nɛ a wui lɛ ga.”

¹⁸ Abigail he sɔ ya ngɔ abolo lafa enyɔ, wai lohwe he womi tɔ enyɔ, jijɔ enuɔ nɛ a sã, ngma nɛ a si kilo nyɔngma kɛ kpaago, wai yiblii nɛ gbli sau lafa, kɛ ngmɔkɔ gbigbli lafa enyɔ, nɛ e ngɔ pue tejihi a se mi.

¹⁹ E de e tsɔli ɔmɛ ke, “Nyɛɛ nyɛɛ waa ho; i ngɛ nyɛ se kɛ ma.” Se e sɛ́ e huno Nabal.

²⁰ Abigail hi e teji ɔ nɔ kɛ ngɛ yo ɔ kplee nɛ e kɛ David kɛ e we bi ɔmɛ ya bua tlukaa nɛ mɛ hu a ma e ngɔ blɔ.

²¹ David de e he ke, “I tsu yaka ní pɛ kaa i bu nɔmlɔ nɛ ɔ níhi a he ha lɛ ngɛ nga a nɔ nɛ e nɔ́ ko nɔ́ ko laa we. Yayami mohu e kɛ to kpakpa nɛ i pee lɛ ɔ nane mi.

²² I na Mawu, benɛ je ke e naa a, ke nyumu kake ngmelu piɛ ngɛ e we bi ɔmɛ a kpɛti fii!”

²³ Benɛ Abigail na David ɔ, e kple si kɛ je teji ɔ nɔ esɔesɔ, nɛ e ya kpla si ngɛ David hɛ mi nɛ e kɛ e hɛ mi bu si ngɛ zugba

²⁴ ngɛ David nane nya; nɛ e de ke, “Ye nyɔmtsɛ, o kɛ tɔmi ɔ nɛ fɔ imi nɔ kake too ye nɔ. I kpa mo pɛɛ nɛ o bu munyu nɛ o mawayo maa tu ɔ tue.

²⁵ Ye nyɔmtsɛ, i kpa mo pɛɛ, mo ko di Nabal yaka nɔmlɔ nɛ ɔ; ejakaa bɔ nɛ e biɛ ngɛ ɔ, ja nɛ lɛ nɔmlɔ ɔ ngɛ. E biɛ Nabal ɔ sisi ji kuasia; nɛ kuasiahi a sane nɛ e yeɔ. Se imi, o mawayo ɔ, nihewi ɔmɛ nɛ ye nyɔmtsɛ ɔ tsɔ kɛ ba a, i nɛ mɛ.

²⁶ Yawɛ lɛ tsi o nya, bɔ nɛ pee nɛ o ko pue muɔ si kɛ ye mo nitsɛ o he lue. Lɔ ɔ he ɔ, i na Mawu kaa o he nyɛli, kɛ nihi nɛ hlaa mo yayami ɔ, a maa gbla a tue kaa Nabal.

²⁷ Jehanɛ, i kpa mo pɛɛ, o nɛ nike ní nɛ o mawayo kɛ ba ha mo nɛ o kɛ ha o we bi ɔmɛ.

²⁸ I kpa mo pɛɛ, ke i pee mo yayami ko ɔ, kɛ pa mi. Yawɛ maa wo mo matsɛ, nɛ e maa pee o we ɔ matsɛ we kɛ maa ya neneene; ejakaa Yawɛ tahi lɛ o ngɛ hwue ɔ nɛ; nɛ yayami ko yayami ko be o he sae kɛ yaa si o gbenɔ ligbi.

²⁹ Nɛ ke nɔ ko maa te si kɛ wo mo, nɛ e ma hla kaa e gbe mo ɔ, Yawɛ, o Mawu ɔ maa bu o he kaa bɔ nɛ nɔmlɔ adesa buu june nɛ he jua wa he ɔ. Se o he nyɛli ɔmɛ lɛɛ e ma sake mɛ ngɔ fɔ he kaa bɔ nɛ a fɔɔ amlami tɛ ɔ.

³⁰ Ní kpakpahi tsuo nɛ Yawɛ wo mo a he si ɔ, ke e na pee ha mo nɛ e wo mo ganɔ ngɛ Israel ɔ,

³¹ ko pia o he, nɛ ko ha nɛ o he nile hu nɛ hao mo kaa o pue muɔ si yaka gu, aloo kaa o ye mo nitsɛ o he lue. I kpa mo pɛɛ, ke Yawɛ gbaa mo ɔ, mo kai imi, o mawayo ɔ.”

³² David de Abigail ke, “Yawɛ, Israel Mawu ɔ, nɔ nɛ tsɔ mo mwɔnɛ ligbi nɛ ɔ ke o kɛ mi nɛ ba kpe ɔ, a je e yi.

³³ I naa Mawu si kaa e ha mo juɛmi. A maa gbaa mo kaa mwɔnɛ ligbi nɛ ɔ, o tsi ye nya nɛ ma ko pue muɔ si, nɛ ma ko ye imi nitsɛ ye he lue!

³⁴ Niinɛ, Yawɛ, Israel Mawu ɔ tsi ye nya ke ma ko pee mo yayami ko. Se i na Mawu, kaa o pee we esɔ nɛ o kɛ mi ba kpe, jinɛ hwɔɔ benɛ je ke e naa a, nɔ kake ngmelu be piɛe ha Nabal.”

³⁵ Kɛkɛ nɛ David he nike ní ɔ ngɛ e dɛ, nɛ e de lɛ ke, “Koo ye gbeye; moo kpale kɛ ho we mi ya. Nɔ́ nɛ o ngɛ hlae ɔ, ma pee ha mo.”

³⁶ Benɛ Abigail kpale e se kɛ ba we ɔ mi ɔ, o nɛ Nabal nɛ ngmɛ okplɔɔ kaa matsɛ. Nabal de dã kpɔtɔɔ, nɛ e bua jɔ e he, lɔ ɔ he ɔ, Abigail bɔɛ lɛ amaniɛ ko kɛ ya si je na.

³⁷ Mɔtu benɛ dã a je Nabal hɛ mi ɔ, e yo ɔ gba lɛ nɔ́ tsuaa nɔ́ nɛ ya nɔ. Kɛkɛ nɛ Nabal tsui kpa tsɔ, nɛ e hule pue si.

³⁸ Maa pee ligbi nyɔngma se ɔ, Yawɛ fia Nabal nɔ nɛ e gbo.

³⁹ Benɛ David nu kaa Nabal gbo ɔ, e de ke, “A je Yawɛ yi! E wo Nabal hiɔ ngɛ jɛmi nɛ e jɛ mi ɔ he. Jehanɛ hu e tsi ye nya konɛ ma ko pee yayami. Yawɛ wo Nabal nitsɛ e yayami ɔ he hiɔ.” Pee se ɔ, David tsɔ ke a ya su Abigail ha lɛ.

⁴⁰ David tsɔli ɔmɛ ba Abigail ngɔ ngɛ Karmel, nɛ a ba de lɛ ke, “David tsɔ wɔ ke wa ba kpaka mo kɛ ba nɛ o ba pee e yo.”

⁴¹ Abigail kpla si nɛ e kɛ e hɛ mi bu zugba nɛ e de ke, “O nɛ, imi ji ye nyɔmtsɛ ɔ mawayo ɔ nɛ ma fɔ e tsɔli ɔmɛ a nane he ɔ nɛ.”

⁴² Abigail te si esɔesɔ nɛ e ya hi e teji ɔ nɔ, nɛ e kɛ e mawayi enuɔ ɔmɛ nyɛɛ David tsɔli ɔmɛ a se kɛ ho, nɛ e ya pee e yo.

⁴³ David ngɔ Ahinoam nɛ je Yezreel ɔ hu kɛ piɛ e yo Abigail ɔ he.

⁴⁴ David yo Mikal lɛɛ e tsɛ Saul ngɔ lɛ ngɔ ha Laish binyumu Palti nɛ je Galim ɔ.