Samuel I, 24 - BAIBLO ALOO NGMAMI KLƆUKLƆU Ɔ

David ngɔ Saul wami ngɔ ke lɛ

¹ Benɛ Saul kpale kɛ je Filisti bi ɔmɛ a se nyɛɛmi kɛ ba a, a de lɛ ke David ngɛ Engedi nga a nɔ.

² Lɔ ɔ he ɔ, e hla ta buli kpakpahi akpe etɛ kɛ je Israel tsuo nɛ e kɛ mɛ ho, konɛ a ya hla David kɛ e we bi ɔmɛ ngɛ nga mi apletsihi a tɛ sa amɛ a nɔ.

³ Benɛ Saul su to tsu komɛ a he ngɛ blɔ ɔ nɔ ɔ, e gba ya sɛ tɛ puɔ ko mi, nɛ e ya nane nɔ ngɛ lejɛ ɔ. David kɛ e we bi ɔmɛ hu laa a he ngɛ jamɛ a tɛ puɔ ɔ nɔuu mi ngɛ se blɔ.

⁴ Kɛkɛ nɛ David we bi ɔmɛ de lɛ ke, “Yawɛ de mo ke, ‘Ma je o he nyɛlɔ ɔ kɛ wo o dɛ mi nɛ o pee lɛ nɔ́ nɛ o suɔ.’ O nɛ, be ɔ su.” David pee blɛuu nɛ e ya po Saul bo ɔ nya nigii.

⁵ Kɛkɛ nɛ David he nile bɔni lɛ haomi,

⁶ nɛ e de e we bi ɔmɛ ke, “Yawɛ kó ha ma pee ye nyɔmtsɛ ɔ nɛ lɛ, Yawɛ ɔ hla, nɛ e wo lɛ matsɛ ɔ nɔ́ ko kaa kikɛ nɛ ɔ. I be lɛ awi yee; ejakaa nɔmlɔ nɛ Yawɛ hla, nɛ e wo matsɛ ji lɛ.”

⁷ David kɛ munyu nɛ ɔmɛ jɔɔ e we bi ɔmɛ a he, nɛ e ngmɛ́ mɛ blɔ nɛ a pee Saul nɔ́ ko. Pee se ɔ, Saul je tɛ puɔ ɔ mi, nɛ e ma e blɔ ɔ nɔ.

⁸ David hu je kpo kɛ je tɛ puɔ ɔ mi, nɛ e kpa huhui kɛ tsɛ Saul yi se, nɛ e de ke, “Ye nyɔmtsɛ matsɛ!” Nɛ benɛ Saul plɛ nɛ e hyɛ e se ɔ, David kpla si nɛ e kɛ e hɛ mi bu si ngɛ zugba kɛ tsɔɔ bumi.

⁹ David de Saul ke, “Mɛni he je nɛ nihi ngɛ mo dee ke i ngɛ hlae ma ye mo awi, nɛ o ngɛ mɛ tue bue ɔ?

¹⁰ Mwɔnɛ ligbi nɛ ɔ, mo nitsɛ o na kɛ o hɛngmɛ bɔ nɛ Yawɛ je mo kɛ wo ye dɛ mi ngɛ tɛ puɔ ɔ mi, bɔ nɛ ni komɛ de mi ke ma gbe mo, se i kɛ o wami ke mo, nɛ i de ke, ‘I be ye nyɔmtsɛ ɔ awi yee, ejakaa Yawɛ nɛ hla lɛ kaa e ba ye matsɛ!’

¹¹ Jehanɛ tsaatsɛ hyɛ, o bo ɔ nya nɛ ngɛ ye dɛ mi nɛ ɔ nɛ. Kaa i nyɛ po o bo ɔ nya, se i gbi mo ɔ, nɔ́ nɛ ɔ maa tsɔɔ mo kaa nɔ́ yayami, loo atuã tsɔmi ko be ye mi.

¹² Yawɛ maa kojo i kɛ mo wa kpɛti, nɛ e maa wo mo hiɔ ngɛ nɔ́ nɛ o ngɛ mi pee nɛ ɔ he; imi lɛɛ ye nine be o he sae.

¹³ Nimeli bu abɛ ke, ‘Nimli yayamihi a dɛ mi nɛ nɔ́ yayami jeɔ.’ Se imi lɛɛ ye nine be o he sae.

¹⁴ Mɛni se lɛ Israel matsɛ nyɛɛ nɛ ɔ? Mɛni o ngɛ fiee? Gbe gbogboe, aloo malɛɛ?

¹⁵ Yawɛ maa kojo i kɛ mo wa kpɛti. E maa hyɛ, nɛ e maa ye ye sane ɔ ha mi. E maa wo mi nguɔ, nɛ e ma je mi kɛ je o dɛ mi.”

¹⁶ Benɛ David tu munyu ta a, Saul bi lɛ ke, “Ye bi David, mo ji nɛ ɔ?” Kɛkɛ nɛ Saul wo ya,

¹⁷ nɛ e de David ke, “O da pe mi; ejakaa benɛ i pee mo yayami ɔ, moo o pee mi kpakpa kɛ to nane mi.

¹⁸ Mwɔnɛ ɔ, o na mi mɔbɔ agbo; ejakaa be mi nɛ Yawɛ je mi kɛ wo o dɛ mi ɔ, o gbi mi.

¹⁹ Ke nɔ ko nine su e he nyɛlɔ nɔ ɔ, anɛ e ngmɛɛɔ e he nɛ e yaa slɔkee lo? Yawɛ nɛ e gbaa mo ngɛ nɔ́ nɛ o pee ha mi mwɔnɛ ɔ he.

²⁰ Jehanɛ lɛɛ i le kaa bɔ tsuaa bɔ nɛ pee ɔ, o ma ba ye matsɛ, nɛ a maa ngɔ Israel matsɛ yemi ɔ kɛ wo o dɛ.

²¹ Lɔ ɔ he ɔ, mo ka mi kita ngɛ Yawɛ biɛ mi kaa ke i gbo ɔ, o be ye nina hɛ mi kpatae, bɔ nɛ pee nɛ ye biɛ, kɛ ye weku li a biɛ ko laa.”

²² David ka Saul kita kaa bɔ nɛ Saul ngɛ hlae ɔ. Lɔ ɔ se ɔ, Saul je kɛ ho we mi ya; nɛ David kɛ e we bi ɔmɛ hu kpale a se kɛ ho tɛ puɔ ɔ mi ya.