Samuel I, 21 - BAIBLO ALOO NGMAMI KLƆUKLƆU Ɔ

David tu fo kɛ je Saul he

¹ David ba Nob ngɛ osɔfo Ahimelek ngɔ. Ahimelek kɛ he domi ba kpee David, nɛ e bi lɛ ke, “Mɛni he je nɛ mo nɔ kake too o nyɛɛ, nɛ nɔ ko nɔ ko piɛ we o he ɔ?”

² David de osɔfo Ahimelek ke, “Matsɛ tsɔ mi, nɛ e de mi ke ma ko ha nɛ nɔ ko nɛ le nɔ́ nɛ he nɛ e tsɔ mi ngɛ ɔ. Ye we bi ɔmɛ lɛɛ i kɛ mɛ so kaa a kɛ mi nɛ e kpe ngɛ he ko.

³ Amlɔ nɛ ɔ, mɛni ngɛ o dɛ ngɛ hiɛ ɔ? Ha mi abolo enuɔ, loo nɔ́ tsuaa nɔ́ nɛ ngɛ o dɛ.”

⁴ Osɔfo ɔ de David ke, “I be abolo gu ko ngɛ hiɛ ɔ; abolo klɔuklɔu lɛ ngɛ. Ke o we bi ɔmɛ ya tɛ yihi a he ɔ, lɛɛ ma nyɛ ma ha nyɛ.”

⁵ David de osɔfo ɔ ke, “Niinɛ, be nɛ wa ngɛ ní tsumi ko nɔ ɔ, wa tɛ yihi a he. Nihewi ɔmɛ hyɛɛ a he nɔ saminya ke wa nyɛɛ nyɛɛmi gu po. Anɛ mwɔnɛ ɔ nɛ wa ngɛ ní tsumi pɔtɛɛ ko nɔ ɔ, a be a he pee klɔuklɔu lo?”

⁶ Lɔ ɔ he ɔ, osɔfo ɔ ngɔ abolo klɔuklɔu ɔ ngɔ ha lɛ; ejakaa abolo kpa ko be lejɛ ɔ, pe abolo klɛdɛɛ ɔ nɛ a je kɛ je Yawɛ hɛ mi ligbi ɔ nɛ a kɛ abolo kala a tsake ɔ.

⁷ Jamɛ a ligbi ɔ, Saul tsɔli ɔmɛ a ti nɔ kake ngɛ lejɛ ɔ nɛ a tsi e nya ngɛ Yawɛ hɛ mi. E biɛ ji Doeg; e je Edom, nɛ Saul lohwehi a hyɛli ɔmɛ a nɔkɔtɔma ji lɛ.

⁸ David bi Ahimelek ke, “O be akplɔ, loo klaate ko ngɛ hiɛ ɔ lo? Matsɛ tsɔmi ɔ he esɔ nɛ i ngɛ yee ɔ ha nɛ i je ye klaate kɛ ta hwumi ní kpa amɛ a he.”

⁹ Osɔfo ɔ he nɔ ke, “Goliat, Filisti no ɔ nɛ o gbe ngɛ Ela kɔ̃ ɔ mi ɔ, e klaate ɔ fɔɔ si ngɛ efɔd ɔ se nɛ a ha he bo. Ke o suɔ ɔ, ngɔɔ; ejakaa klaate kpa ko be hiɛ ɔ hu.” David de ke, “Ngɔɔ lɛ ha mi; klaate ko be nɛ hi kɛ lɛ sɔ.”

¹⁰ Jamɛ a ligbi ɔ, David tu fo kɛ je Saul he kɛ ho Gat matsɛ, Akish ngɔ ya.

¹¹ Akish tsɔli ɔmɛ ya de Akish ke, “Anɛ pi David, zugba a nɔ matsɛ ɔ ji nɛ ɔ lo? Anɛ yihi la we nɛ a do, nɛ a de ngɛ e he ke, ‘Saul gbe akpehi, se David gbe akpe nyɔngmahi lo?’ ”

¹² David susu munyu nɛ ɔmɛ a he saminya, nɛ e ye Gat matsɛ, Akish gbeye wawɛɛ nitsɛ.

¹³ Lɔ ɔ he ɔ, e tsake e ní peepee, nɛ e buá pee e he godotsɛ ngɛ a kpɛti. E maa ngma ní ngɛ matsɛ we agbo ɔmɛ a he, nɛ e maa la lada kɛ kpa e kpɛni he kpɔtɔɔ.

¹⁴ Lɔ ɔ he ɔ, Akish bi e tsɔli ɔmɛ ke, “Nɛ nyɛ na kaa nɔ ɔ nu godo ɔ, mɛni he je nyɛɛ kɛ lɛ ba ye ngɔ mɔ?

¹⁵ Anɛ godotsɛmɛ a he hia mi loko nyɛ kpaka nɔ nɛ ɔ hu kɛ ba ye ngɔ nɛ e ba pee kuasiahi a ní kɛ wo ye mi mi la a? Nɔ nɛ sa kaa e baa ye we mi ji nɛ ɔ?”