Samuel I, 2 - BAIBLO ALOO NGMAMI KLƆUKLƆU Ɔ

Hana sɔlemi

¹ Hana sɔle nɛ e de ke, “Yawɛ ha ye tsui mi hyi kɛ bua jɔmi; hyɛ bɔ nɛ ye bua jɔ ha ngɛ nɔ́ nɛ e pee ɔ he! I muɔ ye he nyɛli ɔmɛ; ye bua jɔ ye he, ejakaa Mawu ye bua mi!

² Nɔ ko be nɛ ngɛ klɔuklɔu kaa Yawɛ. E se ɔ, nɔ ko be. Ee, Mawu se ɔ, wesa he kpa ko be.

³ Nyɛ kpa fiami munyu puu tumi; he nɔ womi munyu nɛ ko je nyɛ nya mi. Yawɛ ji Mawu nɛ le níhi tsuo, nɛ e kojoɔ nɔ́ tsuaa nɔ́ nɛ nimli peeɔ.

⁴ Katsɛmɛ ɔmɛ a kɛ̃ɛ̃ ɔmɛ ku, nɛ ni nɛmɛ nɛ a he wɛ ɔ na he wami he.

⁵ Ni nɛmɛ nɛ tɔ hyɛ ɔ, a bɔni apaa yemi nɛ a kɛ na a nya mi ngma; ni nɛmɛ nɛ hwɔ ye mɛ ɔ, a hwɔ ɔ se po. Yosa a ba fɔ bimɛ kpaago, nɛ bimɛ a nyɛ ɔ ba pee kaa yo nɛ fɔ we hyɛ.

⁶ Yawɛ gbeɔ nɔ, nɛ e haa nɔ wami ekohu; e kɛ nɔ yaa gbeje, nɛ e kpaleɔ lɛ kɛ baa wami mi ekohu.

⁷ Yawɛ lɛ peeɔ nɔ ohiatsɛ, nɛ e peeɔ nɔ niatsɛ. E baa nɔ si, nɛ e woɔ nɔ nɔ.

⁸ E woɔ ohiatsɛmɛ a nɔ kɛ jeɔ tabo zu mi, nɛ e jeɔ ni nɛmɛ nɛ e fi mɛ kɛ jeɔ a haomihi a mi. E haa a kɛ ganɔhi hii si, nɛ e kɛ mɛ toɔ hɛ mi nyami blɔ hehi. Yawɛ níhi ji je ɔ titima amɛ; a nɔ nɛ e fia je ɔ kɛ fɔ.

⁹ “E baa ni nɛmɛ nɛ yeɔ lɛ anɔkuale ɔ a yi. Se yayami peeli lɛɛ a hɛ mi kpataa ngɛ diblii mi; tsa pi adesa nitsɛ he wami nya nɛ e yeɔ manye.

¹⁰ A ma kpata Yawɛ he nyɛli ɔmɛ a hɛ mi pɛsɛpɛsɛ; hiɔwe ma si wo mɛ. Yawɛ maa kojo je ɔ tsuo; e kɛ he wami ma ha e matsɛ ɔ, nɛ e ma ha matsɛ nɛ a pɔ lɛ nu ɔ maa ye kunimi.”

¹¹ Pee se ɔ, Elkana kpale e se kɛ ho we mi ya ngɛ Rama, se jokuɛyo Samuel ɔ hi osɔfo Eli ngɔ nɛ e sɔmɔ Yawɛ.

Eli binyumu ɔmɛ

¹² Eli binyumu ɔmɛ ɔ, yakayaka nimli ji mɛ; a bui Yawɛ,

¹³ loo blɔ nya tomi nɛ ngɛ kɛ ha osɔfo ɔmɛ a blɔ fa mi ní nɛ sa kaa a he ngɛ ma a dɛ ɔ. Mohu ɔ, ke nɔ ko ba ngɛ bɔ sãe ɔ, osɔfo ɔ tsɔlɔ ɔ maa ba kɛ e dɛ mi gbowe kɛ e nya gbla etɛ. Nɛ benɛ a ngɛ lo ɔ hooe ɔ,

¹⁴ e kɛ gbowe ɔ maa wo dadesɛ, loo ngɛyu, loo kutu ɔ mi, nɛ nɔ́ tsuaa nɔ́ nɛ gbowe ɔ maa bɛ ɔ, maa pee osɔfo ɔ nɔ́. Bɔ nɛ a peeɔ Israel bi tsuo nɛ baa Shilo ji nɛ ɔ nɛ.

¹⁵ Anɔkuale mi ɔ, be mi nɛ a na we nɛ a sã zɔ ɔ tete ɔ, osɔfo ɔ tsɔlɔ ɔ maa ba nɛ e ma ba de nɔ nɛ ngɛ bɔ ɔ sãe ɔ ke, “Ha mi lo ɔ eko nɛ ma kɛ ya ha osɔfo ɔ nɛ e si; ejakaa e be lo nɛ a hoo momo hee ngɛ o dɛ, ja lo mumu.”

¹⁶ Ke nɔ ɔ de lɛ ke, “Ha nɛ a sã zɔ ɔ kekle kaa bɔ nɛ mlaa a tsɔɔ ɔ, konɛ lɔ ɔ se nɛ o ngɔ bɔ tsuaa bɔ nɛ o suɔ” ɔ, e ma de ke, “Dɛbi! Ha mi nɔuu! Ke pi ja a, ma ngɔ pani nya!”

¹⁷ Eli binyumu ɔmɛ pee yayami agbo ngɛ Yawɛ hɛ mi, ejakaa a bui Yawɛ bɔ sami ɔ.

Samuel ngɛ Shilo

¹⁸ Jamɛ a be ɔ, jokuɛyo Samuel ɔ lɛɛ e ngɛ Yawɛ sɔmɔe, nɛ a kɛ kploba efɔd fi e kpɛti.

¹⁹ Daa jeha a, e nyɛ kpɛɔ tade bɔbɔyoo ko kɛ ya haa lɛ, ke e kɛ e huno ɔ ya nɛ a ya sã jeha bɔ ɔ.

²⁰ Kɛkɛ Eli maa gbaa Elkana kɛ e yo ɔ, nɛ e ma de Elkana ke, “Yawɛ nɛ e ha nɛ o kɛ o yo ɔ nɛ na bimɛ kpahi, nɛ a ba ye nɔ nɛ o ngɔ kɛ ba ha lɛ ɔ nane mi.” Lɔ ɔ se ɔ, a maa kpale a se kɛ ho a ma mi ya.

²¹ Yawɛ gbaa Hana niinɛ, nɛ e fɔ binyumu kpahi etɛ kɛ yihi enyɔ. Jokuɛyo Samuel ɔ ba wa, nɛ e ya nɔ nɛ e sɔmɔ Yawɛ.

Eli kɛ e binyumu ɔmɛ

²² Jehanɛ lɛɛ Eli ba bwɔ; níhi nɛ e binyumu ɔmɛ ngɛ Israel bi ɔmɛ pee ɔ, e nu lɛ tsuo pɛpɛɛpɛ. E nu hulɔ kaa a kɛ yi ɔmɛ nɛ tsuɔ ní ngɛ kpe he bo tsu ɔ nya a ngɛ si hwɔe.

²³ Lɔ ɔ he ɔ, e bi mɛ ke, “Mɛni he je nɛ nyɛ ngɛ ní nɛ ɔmɛ pee, nɛ nɔ tsuaa nɔ ngɛ nyɛ he munyu tue ɔ?

²⁴ Dɛbi, ye bimɛ, nyɛ kpa! Níhi nɛ i ngɛ nue nɛ Yawɛ ma a ngɛ dee ngɛ nyɛ he ɔ, pi ní kpakpahi.

²⁵ Ke nɔ ko pee e nyɛmi adesa yayami ɔ, Mawu maa da mi ha lɛ; se ke nɔ ko pee yayami kɛ si Yawɛ ɔ, mɛnɔ maa da mi ha lɛ?” Se a bui a tsɛ ɔ munyu ɔmɛ tue; ejakaa Yawɛ to momo kaa e maa gbe mɛ.

²⁶ Jokuɛyo Samuel ɔ lɛɛ e ngɛ wae ngɛ nɔmlɔ tso mi; nɛ Yawɛ kɛ nimli adesahi tsuo na e he bua jɔmi.

Eli we ɔ hɛ mi kpatami

²⁷ Ligbi ko ɔ, gbalɔ ko ngɔ sɛ gbi kɛ je Yawɛ ngɔ ba ha Eli ke, “Benɛ o nɛ̃ Aaron, kɛ e weku li ɔmɛ ngɛ nyɔguɛ si himi mi ngɛ Egipt ɔ, i je ye he kpo ngɔ tsɔɔ Aaron.

²⁸ Imi lɛ i hla Aaron kɛ e weku ɔ kɛ je Israel wɛtso ɔmɛ tsuo a kpɛti ke a ba pee ye osɔfohi, nɛ a sã tsopa kɛ e he via ngɛ bɔ sami la tɛ ɔ nɔ, nɛ a wo efɔd nɛ a kɛ bi ye yi mi tomi. I ha mɛ he blɔ kaa bɔ ɔmɛ nɛ Israel ma a ba sãã ngɛ bɔ sami la tɛ ɔ nɔ ɔ, mɛ nitsɛmɛ a ngɔ eko ha a he.

²⁹ Mɛni he je mɔ nɛ nyɛ peeɔ jiklɔɔ ngɛ bɔ ɔmɛ nɛ i fa ke a kɛ ba ha mi ɔ he? Eli, mɛni he je o buu o binyumu ɔmɛ pe mi ɔ? Mɛni he je o ngmɛ blɔ nɛ a ngɔ bɔ ɔmɛ nɛ ye ma Israel kɛ ba haa mi ɔ e mi kpakpa amɛ kɛ ngɛ a he lɛe, nɛ a ngɛ plɔkee kikɛ nɛ ɔ?

³⁰ Imi Yawɛ, Israel Mawu ɔ, i wo si be ko ke o kɛ o weku li ma sɔmɔ mi kaa osɔfohi kɛ maa ya neneene. Se jehanɛ ɔ, i ngɛ dee ke i kpale ye nya se! Mohu ɔ, nihi nɛ woɔ ye hɛ mi nyami ɔ, ma wo a hɛ mi nyami; nɛ nihi nɛ hiee mi ɔ, imi hu ma hie mɛ.

³¹ Bu tue, be ma nɛ ma kpata nihewi nɛ ngɛ o we ɔ, kɛ o weku ɔ mi tsuo a hɛ mi, nɛ nɔmoyo ko be o we ɔ mi hie hu.

³² O maa hao, nɛ o kɛ hɛkɔ maa hyɛ gbaamihi nɛ i kɛ ma ha Israel bi kpa amɛ, se o we ɔ mi lɛɛ nɔmoyo ko nɔmoyo ko be mi hie hu.

³³ Se kɛ̃, ma ha o nina ko yi ma na wami, nɛ e ma sɔmɔ mi kaa osɔfo. Lɛɛ e hɛ ma yu nɛ e maa hao, se ni nɛmɛ nɛ piɛ ɔ lɛɛ a kɛ klaate maa gbe mɛ tsuo.

³⁴ Nɛ nɔ́ nɛ o kɛ maa le kaa nɔ́ nɛ i de ɔ tsuo maa ba mi ji lss ma ha o binyumu enyɔ ɔmɛ nɛ ji Hofni kɛ Finehas tsuo ma gbo ligbi kake too.

³⁵ Ma hla osɔfo ko nɛ maa ye mi anɔkuale; nɛ lɛ ji nɔ nɛ maa pee níhi nɛ ngɛ ye tsui nɔ, kɛ níhi nɛ ngɛ ye juɛmi mi ɔ ha mi. Ma bɔ we saminya ha lɛ, nɛ a ma sɔmɔ ngɛ ye matsɛ ɔ nɛ i pɔ lɛ nu ɔ e hɛ mi daa.

³⁶ Nɛ ni nɛmɛ nɛ maa piɛ ngɛ o we ɔ mi ɔ, ja a ya jamɛ a osɔfo ɔ ngɔ nɛ a ya ba sika, loo niye ní; aloo ja a ya kpa pɛɛ kaa a ngmɛ mɛ blɔ nɛ a piɛ osɔfo ɔmɛ a he kɛ tsu ní, loko a ma na a nya mi ngma!”