Samuel I, 19 - BAIBLO ALOO NGMAMI KLƆUKLƆU Ɔ

Saul wa David yi mi

¹ Saul de e binyumu Yonatan kɛ e tsɔli ɔmɛ kulaa ke a gbe David. Se suɔmi babauu nɛ Yonatan ngɛ kɛ ha David he je ɔ,

² e ya de David ke, “Tsaatsɛ ngɛ hlae nɛ e gbe mo; lɔ ɔ he ɔ, o hɛ nɛ hi o he nɔ saminya hwɔɔ mɔtu. Ya hla laami he ko nɛ o laa o he ngɛ lejɛ ɔ.

³ Imi lɛɛ ma ya nɛ ma ya da tsaatsɛ kasa nya ngɛ nga a nɔ he nɛ o ngɛ ɔ, nɛ i kɛ lɛ maa tu munyu ngɛ o he; nɛ bɔ nɛ e ma ya ba ha a, ma ha nɛ o le.”

⁴ Yonatan ya je David yi ha e tsɛ Saul, nɛ e de lɛ ke, “Tsaatsɛ, koo pee o tsɔlɔ David yayami, ejakaa e pee we mo yayami ko. Jehanɛ se hu, ní tsumihi nɛ e tsu ɔ tsuo pɛpɛɛpɛ ji dloomi agbo kɛ ha mo.

⁵ E ngɔ e wami ngɔ ke, benɛ e gbe Filisti no ɔ, nɛ Yawɛ ye kunimi nguaa kɛ ha Israel tsuo. O na, nɛ o bua jɔ he. Mɛni he je mɔ nɛ o ngɛ hlae nɛ o gbe David yaka gu nɛ e pee we mo yayami ko ɔ?”

⁶ Saul bu Yonatan munyu ɔ tue; nɛ e kɛ Yawɛ biɛ ka kita ke e be David gbee.

⁷ Yonatan ya tsɛ David nɛ e bɔ lɛ nɔ́ tsuaa nɔ́. Lɔ ɔ se ɔ, e kɛ lɛ ba Saul ngɔ, nɛ David sɔmɔ Matsɛ Saul kaa kekle ɔ.

⁸ Se ta te si ekohu, nɛ David ya nɛ e kɛ Filisti bi ɔmɛ ya hwu, nɛ e gbe mɛ basabasa; nɛ Filisti bi ɔmɛ tu fo kɛ je ta a nya.

⁹ Ligbi ko ɔ, mumi yayami ko nɛ je Yawɛ ngɔ ba Saul nɔ. Jamɛ a be ɔ, e hii si ngɛ e we ɔ mi, nɛ e hɛɛ akplɔ ngɛ e dɛ mi, nɛ David hu ngɛ kpa saku fiae.

¹⁰ Saul ka kaa e maa hɛ David akplɔ ɔ kɛ wo gbogbo ɔ he, se David yu e he nɛ akplɔ ɔ ya pi gbogbo ɔ. Nɛ David tu fo kɛ je.

¹¹ Jamɛ a nyɔ ɔ mi nɔuu ɔ, Saul tsɔ nihi kɛ ho David we ɔ mi ya nɛ́ a ya huɔ lɛ, konɛ mɔtu nɛ a gbe lɛ. Se David yo Mikal de lɛ ke, “Ke o ji hiɛ ɔ nyɔ nɛ ɔ mi nɛ o he o yi wami ɔ, hwɔɔ ɔ, a maa gbe mo.”

¹² Lɔ ɔ he ɔ, Mikal ngɔ David kɛ gu saflɛ mi kɛ kple si; nɛ e tu fo kɛ je.

¹³ Enɛ ɔ se ɔ, Mikal ngɔ amaga ko kɛ fɔ sa a nɔ, nɛ e ngɔ sɔnue nɛ a kɛ apletsi he bwɔmi pee fɔ e yi je, nɛ e ngɔ bo ha he.

¹⁴ Benɛ Saul tsɔli ɔmɛ ba konɛ a ba nu David kɛ ho ɔ, Mikal de mɛ ke e be he wami.

¹⁵ Saul de tsɔli ɔmɛ ke a kpale nɛ a ya hyɛ kaa a maa na David ɔ lo. E fa mɛ ke, “Nyɛɛ ngɔ lɛ kɛ sa a tsuo ba ha mi nɛ ma gbe lɛ.”

¹⁶ Benɛ tsɔli ɔmɛ kpale kɛ ba a, a ba na amaga a ngɛ sa a nɔ nɛ sɔnue nɛ a kɛ apletsi he bwɔmi pee fɔɔ si ngɛ e yi je.

¹⁷ Saul bi Mikal ke, “Mɛni he je nɛ o sisi mi kikɛ nɛ ɔ, nɛ o ha ye he nyɛlɔ ɔ tu fo kɛ je ɔ?” Mikal he nɔ ke, “E de mi ke ke i ha we lɛ blɔ nɛ e ho ɔ, e maa gbe mi.”

David kɛ Samuel ngɛ Rama

¹⁸ David tu fo kɛ ho Samuel ngɔ ya ngɛ Rama, nɛ e ya bɔ lɛ nɔ́ nɛ Saul pee lɛ ɔ tsuo pɛpɛɛpɛ. David kɛ Samuel ho Nayot ya, nɛ a ya hi lejɛ ɔ.

¹⁹ Benɛ Saul nu kaa David ngɛ Nayot ngɛ Rama a,

²⁰ e tsɔ nihi ke a ya nu lɛ kɛ ba. Se benɛ tsɔli ɔmɛ na gbali a kuu ɔ nɛ a ngɛ doe, nɛ a ngɛ huhui kpae, nɛ Samuel hu ngɛ a kpɛti kaa a nyatsɛ ɔ, Mawu mumi ɔ ba Saul tsɔli ɔmɛ a nɔ, nɛ mɛ hu a bɔni domi kɛ huhui kpami.

²¹ Benɛ Saul nu he ɔ, e tsɔ ni kpahi kɛ ho; se mɛ hu a do nɛ a kpa huhui ja nɔuu. Saul kpale tsɔ nihi kɛ ho si etɛne; nɛ mɛ hu a pee ja nɔuu.

²² Kɛkɛ nɛ Saul nitsɛ pue nɔ kɛ ho Rama ya, nɛ benɛ e ya su vu nguaa a he ngɛ Seku ɔ, e bi ke, “Jije Samuel kɛ David ngɛ?” Nɛ nɔ ko ha lɛ heto ke, “A ngɛ Nayot ngɛ Rama.”

²³ Benɛ e je lejɛ ɔ kɛ yaa Nayot ngɛ Rama a, Mawu mumi ɔ ba lɛ hu e nɔ; nɛ e do nɛ e kpa huhui kɛ nyɛɛ blɔ ɔ nɔ kɛ ya su Nayot.

²⁴ E jé e he tade ɔmɛ, nɛ e do nɛ e kpa huhui ngɛ Samuel hɛ mi, nɛ e hɛɛ e he gu jamɛ a ligbi ɔ piani kɛ nyɔ mi tsuo. Nɛ nɔ́ nɛ ɔ ba pee nɔ́ ko nɛ a kɛ tuɔ munyu “Anɛ Saul hu ba plɛ pee gbalɔ lo?”