Samuel I, 16 - BAIBLO ALOO NGMAMI KLƆUKLƆU Ɔ

A wo David matsɛ

¹ Yawɛ bi Samuel ke, “Mɛni be o maa ye Saul he kɔmɔ kɛ yaa si? O nɛ kaa i kua lɛ kaa matsɛ ngɛ Israel lo? Wo o koli ɔ mi nu nɛ e hyi tɔ, nɛ ma tsɔ mo Betlehem no, Ishai ɔ ngɔ; ejakaa i hla ye matsɛ ɔ kɛ je e binyumu ɔmɛ a kpɛti.”

² Se Samuel de ke, “Kɛ ma plɛ kɛ ya kɛɛ? Ke Saul nu he ɔ, e maa gbe mi.” Yawɛ ha heto ke, “Moo hɛɛ na bi kɛ to dɛ, nɛ o de ke, ‘I ba nɛ ma ba sã bɔ ha Yawɛ.’

³ Moo kpee Ishai kɛ ba bɔ sami ɔ, nɛ ma tsɔɔ mo nɔ́ nɛ o pee. O maa pɔ nɔmlɔ nɛ ma tsɔɔ mo ɔ nu, nɛ o wo lɛ matsɛ ha mi.”

⁴ Samuel pee kaa bɔ nɛ Yawɛ de lɛ ɔ. E ya Betlehem, nɛ ma nimeli ɔmɛ kɛ lɛ ba kpe kɛ he domi, nɛ a bi ke, “O ba ngɛ tue mi jɔmi mi lo?”

⁵ E he nɔ ke, “Ee, i ba nɛ ma ba sã bɔ ha Yawɛ. Nyɛɛ tsukɔ nyɛ he nɛ waa ho bɔ sami he ɔ ya.” E tsukɔ Ishai kɛ e binyumu ɔmɛ a he, nɛ e kpee mɛ hu kɛ ya bɔ sami he ɔ.

⁶ Benɛ a ya su lejɛ ɔ, Samuel na Eliab, nɛ e de ngɛ e yi mi ke, “Niinɛ, nɔ nɛ Yawɛ hla a nɛ daa si ngɛ Yawɛ hɛ mi ɔ nɛ.”

⁷ Se Yawɛ de Samuel ke, “Koo hyɛ e kami, loo e he fɛu; i sume lɛ, ejakaa i hyɛ we nɔ́ kaa bɔ nɛ nɔmlɔ hyɛɛ nɔ́ ɔ. Nɔmlɔ lɛɛ nɔ hɛ mi e hyɛɛ; se imi Yawɛ lɛɛ tsui mi i hyɛɛ.”

⁸ Jehanɛ Ishai tsɛ e binyumu Abinadab, nɛ e kɛ lɛ ba be ngɛ Samuel hɛ mi. Se Samuel de ke, “Dɛbi, nɔ nɛ ɔ hu Yawɛ hlɛ lɛ.”

⁹ Lɔ ɔ se ɔ, Ishai ha Shama ba. Se Samuel de ke, “Dɛbi, nɔ nɛ ɔ hu Yawɛ hlɛ lɛ.”

¹⁰ Ishai tsa nɔ kikɛ nɛ ɔ kɛ ya si e ngɔ e binyumuhi kpaago kɛ ba Samuel hɛ mi. Se Samuel de Ishai ke, “Yawɛ hlɛ a ti nɔ ko nɔ ko.”

¹¹ Lɔ ɔ he ɔ, Samuel bi Ishai ke, “O binyumu ɔmɛ tsuo ji nɛ ɔ lo?” E he nɔ ke, “E piɛ a kpɛti nɔ wayoo pe kulaa a, se lɛɛ e ngɛ tohi hyɛe.” Samuel de Ishai ke, “Tsɔ nɛ a ya ngɔ lɛ kɛ ba; ejakaa wa be si hie, ja e ba hiɛ ɔ.”

¹² Lɔ ɔ he ɔ, Ishai tsɔ nɛ a ya ngɔ lɛ kɛ ba. Ke o hyɛ lɛ ɔ, e tsuɔ papaapa; e hɛngmɛ nɔ tsɔ, nɛ e he hu ngɛ fɛu. Yawɛ de Samuel ke, “Tee si nɛ o pɔ lɛ nu, ejakaa lɛ ji nɛ ɔ nɛ!”

¹³ Kɛkɛ nɛ Samuel wo nu kɛ koli ɔ, nɛ e pɔ David nu ngɛ e nyɛminyumu ɔmɛ a hɛ mi. Nɛ Yawɛ mumi ɔ ba David nɔ kɛ je jamɛ a ligbi ɔ. Enɛ ɔ se ɔ, Samuel kpale e se kɛ ho Rama ya.

David ba sɔmɔ Saul

¹⁴ Jehanɛ Yawɛ mumi ɔ je Saul nɔ, nɛ Yawɛ ha mumi yayami ko ba hao lɛ.

¹⁵ Lɔ ɔ he ɔ, Saul tsɔli ɔmɛ de lɛ ke, “Wa kpa mo pɛɛ, mumi yayami ko lɛ Mawu kɛ ngɛ mo haoe nɛ ɔ nɛ.

¹⁶ Wa nyɔmtsɛ, mo fa wɔ, o tsɔli ɔmɛ mɔ, nɛ wa ya hla nɔ ko nɛ le saku fiami saminya kɛ ba, konɛ ke Mawu ha mumi yayami ɔ ba o nɔ ɔ, nɛ e fia saku ɔ, nɛ o na he wami ekohu.”

¹⁷ Saul de e tsɔli ɔmɛ ke, “Nyɛɛ ya nɛ nyɛ ya hla nɔ ko nɛ le saku fiami saminya, nɛ nyɛɛ ngɔ lɛ kɛ ba ye ngɔ.”

¹⁸ Nihewi ɔmɛ a ti nɔ kake de lɛ ke, “I kpa mo pɛɛ, i le Ishai, Betlehem no ɔ binyumuyo ko nɛ le saku fiami saminya. Nyumu katsɛ kɛ ta hwulɔ ji lɛ. E nya mi tsɔ, nɛ e he ngɛ fɛu, nɛ Yawɛ kɛ lɛ ngɛ.”

¹⁹ Lɔ ɔ he ɔ, Saul tsɔ ya de Ishai ke, “Ha nɛ o bi David, to hyɛlɔ ɔ nɛ ba.”

²⁰ Ishai fi abolo, kɛ wai lohwe he womi tɔ kake, kɛ apletsi bi ngɔ fɔ teji se mi, nɛ e kɛ ha e binyumu David ke e ngɔ kɛ ya ha Saul.

²¹ David ba Saul ngɔ nɛ e ba bɔni lɛ sɔmɔmi. Saul suɔ David sane saminya, nɛ e ngɔ lɛ kɛ pee e ta hwumi ní hɛɛlɔ.

²² Saul tsɔ ya de Ishai ke, “I suɔ David sane; lɔ ɔ he ɔ, ha nɛ e hi hiɛ ɔ nɛ e sɔmɔ mi.”

²³ Kɛ je jamɛ a be ɔ kɛ yaa a, be tsuaa be nɛ Mawu ma ha mumi yayami ɔ maa ba Saul nɔ ɔ, David ma wo saku ɔ nɛ e maa fia. Kɛkɛ mumi yayami ɔ maa je Saul nɔ, nɛ e hɛ mi ma tsɔ, nɛ e ma na he wami ekohu.