Samuel I, 12 - BAIBLO ALOO NGMAMI KLƆUKLƆU Ɔ

Samuel sɛ yemi munyu

¹ Jehanɛ Samuel de Israel tsuo ke, “Nɔ́ nɛ nyɛ bi mi ɔ, i pee ha nyɛ; i wo matsɛ ha nyɛ.

² Amlɔ nɛ ɔ, lɛ nɛ e maa nyɛɛ nyɛ hɛ mi. Imi lɛɛ i bwɔ, nɛ ye yi bwɔmi hiɛ futaa, nɛ ye binyumuhi ngɛ nyɛ kpɛti. I nyɛɛ nyɛ hɛ mi kɛ je ye nihe mi kɛ ba si mwɔnɛ ɔ.

³ Imi ji nɛ ɔ nɛ. Ke i pee nɔ́ ko nɛ dɛ ɔ, nyɛɛ po ye nya ngɛ Yawɛ, kɛ nɔ nɛ a wo lɛ matsɛ ɔ a hɛ mi. Anɛ i kpɔ nɔ ko na, loo nɔ ko teji? Anɛ i ye nɔ ko amimi, aloo i wa nɔ ko yi mi? Anɛ i he nyɔ mi ní ngɛ nɔ ko dɛ bɔ nɛ pee nɛ ma ye e sane ɔ ha lɛ lo? Nyɛ de, konɛ ma to nyɛ nane mi.”

⁴ Ma a he nɔ ke, “Dɛbi, o yi wɔ amimi; o wɛ wɔ yi mi, nɛ o kpɔ we nɔ́ ko ngɛ nɔ ko dɛ.”

⁵ Samuel de mɛ ke, “Yawɛ, kɛ nɔ nɛ e wo lɛ matsɛ ɔ ji ye we odasehi mwɔnɛ ɔ, kaa nyɛ nɛ nɔ́ ko nɔ́ ko ngɛ ye he.” A he nɔ ke, “Ee, Yawɛ ji wa we odase.”

⁶ Samuel ya nɔ nɛ e de ma a ke, “Yawɛ lɛ hla Mose kɛ Aaron, nɛ lɛ ji nɔ nɛ kpaka nyɛ nɛmɛ ɔmɛ kɛ je Egipt zugba a nɔ kɛ ba.

⁷ Lɔ ɔ he ɔ, nyɛɛ da si dii, konɛ ma po nyɛ nya ngɛ Yawɛ hɛ mi, nɛ ma kai nyɛ ní nguahi nɛ Yawɛ pee kɛ he nyɛɛ kɛ nyɛ nɛmɛ ɔmɛ a yi wami.

⁸ Benɛ Yakob kɛ e bimɛ ɔmɛ ya Egipt, nɛ Egipt bi ɔmɛ ngɛ mɛ yi mi wae ɔ, nyɛ nɛmɛ ɔmɛ fa kue ha Yawɛ, nɛ e tsɔ Mose kɛ Aaron nɛ a ya je mɛ kɛ je Egipt kɛ ba hiɛmɛ nɛ ɔ.

⁹ Se a hɛ je Yawɛ, a Mawu ɔ nɔ. Enɛ ɔ he je ɔ, lɛ hu e ngɔ mɛ ngɔ wo Hazor tatsɛ Sisera, kɛ Filisti bi ɔmɛ, kɛ Moab matsɛ ɔ a dɛ mi, nɛ a kɛ mɛ hwu ta.

¹⁰ Kɛkɛ nɛ a fa kue ha Yawɛ, nɛ a de ke, ‘Wa pee yayami, ejakaa wa je Yawɛ se nɛ wa ya ja Baal amaga amɛ, kɛ yo wɔ Ashtarot ɔ hu e we amaga amɛ. Mo kpɔ wɔ kɛ je wa he nyɛli ɔmɛ a dɛ mi, nɛ wa ma sɔmɔ mo!’

¹¹ Kɛkɛ nɛ Yawɛ tsɔ Gideon; Gideon se ɔ, e tsɔ Barak; Barak se ɔ, e tsɔ Yefta; nɛ pee se ɔ, e tsɔ imi Samuel. Wa ti nɔ tsuaa nɔ je nyɛ kɛ je nyɛ he nyɛli ɔmɛ nɛ bɔle nyɛ ɔ a dɛ mi, nɛ nyɛ hi si ngɛ tue mi jɔmi mi.

¹² Se benɛ nyɛ na kaa Amon matsɛ, Nahash ma nyɛ tuami ɔ, nyɛ de mi ke, ‘Dɛbi, ja wa ná matsɛ nɛ e ye wa nɔ,’ be mi nɛ Yawɛ, nyɛ Mawu ɔ ji nyɛ matsɛ.

¹³ “Lɔ ɔ he ɔ, ne matsɛ ɔ nɛ nyɛ hla a; nyɛ bi ke a ha nyɛ matsɛ, nɛ Yawɛ ngɔ lɛ ngɔ ha nyɛ.

¹⁴ Ke nyɛ maa ye Yawɛ, nyɛ Mawu ɔ gbeye, nɛ nyɛ ma sɔmɔ lɛ, nɛ nyɛ be e hɛ mi atuã tsɔe, se nyɛ maa ye e mlaa amɛ a nɔ, nɛ nyɛɛ kɛ nyɛ matsɛ ɔ maa nyɛɛ e se ɔ, lɛɛ e maa hi ha nyɛ.

¹⁵ Se ke nyɛ bui Yawɛ tue, nɛ nyɛ tsɔ atuã kɛ si e mlaa amɛ ɔ, nyɛɛ, kɛ nyɛ matsɛ ɔ tsuoyawɛ kɛ nyɛ maa ye saminya.

¹⁶ Lɔ ɔ he ɔ, nyɛɛ da si dii, nɛ nyɛ maa na nyakpɛ ní nguaa nɛ Yawɛ ma tsu.

¹⁷ Anɛ pi ngma kpami be ji nɛ ɔ? Se ma tsɛ Yawɛ nɛ e ma ha hiɔwe ma si, nɛ hiɔmi maa nɛ konɛ nyɛ na nyɛɛ le kaa nyɛ pee Yawɛ yayami agbo kaa nyɛ bi ke a ha nyɛ matsɛ.”

¹⁸ Kɛkɛ nɛ Samuel fa kue ha Yawɛ, nɛ Yawɛ ha hiɔwe si, nɛ hiɔmi nɛ jamɛ a ligbi ɔ. Nɛ ma a tsuo ye Yawɛ kɛ Samuel gbeye wawɛɛ nitsɛ;

¹⁹ nɛ a de Samuel ke, “Kpa Yawɛ, o Mawu ɔ pɛɛ ha wɔ, konɛ wa ko gbo; ejakaa wa na jehanɛ kaa ngɛ wa yayami kpa amɛ a se ɔ, wa pee yayami kaa wa bi ke a ha wɔ matsɛ.”

²⁰ Se Samuel de mɛ ke, “Nyɛ ko ye gbeye. E ngɛ mi kaa nyɛ ná pee kikɛmɛ a yayami nɛ ɔmɛ tsuo lɛɛ, se kɛ̃, nyɛ ko je Yawɛ se; mohu nyɛ sɔmɔ lɛ kɛ nyɛ tsui tsuo.

²¹ Nyɛ ko ya nyɛɛ yaka níhi nɛ a he be se nami, nɛ a be nyɛ yi wami nyɛe ma he ɔ a se; ejakaa yaka níhi kɛkɛ ji mɛ.

²² Yawɛ be e ma nɛ e hla a he ngmɛɛe. Ke e pee ja pɛ kɛkɛ e biɛ kpetekpleenyɛ ɔ puɛ; ejakaa e sa e hɛ mi kaa e kɛ nyɛ maa pee lɛ nitsɛ e ma.

²³ Imi lɛɛ ma kpa Yawɛ pɛɛ ha nyɛ daa, nɛ ma tsɔɔ nyɛ nɔ́ nɛ hi, kɛ nɔ́ nɛ da, konɛ ma ko pee yayami kɛ si Yawɛ.

²⁴ Nɔ́ nɛ sa nyɛ peemi kɛkɛ ji nyɛɛ ye Yawɛ gbeye, nɛ nyɛ kai ní nguahi nɛ e pee ha nyɛ ɔ.

²⁵ Se ke nyɛ tsa nɔ pee yayami ɔ, lɛɛ e ma kpata nyɛɛ kɛ nyɛ matsɛ ɔ tsuo nyɛ hɛ mi.”