Samuel I, 1 - BAIBLO ALOO NGMAMI KLƆUKLƆU Ɔ

Elkana kɛ e yihi kɛ e bimɛ ngɛ Shilo

¹ Nyumu ko hi Rama, ngɛ Efraim yo ɔmɛ a nɔ. E je Efraim wɛtso ɔ mi, nɛ e biɛ ji Elkana. E tsɛ biɛ ji Yeroham; e nɛ̃ ji Elihu; e nɛnɛkasowa ji Tohu, nɛ Tohu tsɛ ji Zuf.

² Elkana ngɛ yihi enyɔ; nɔ kake biɛ ji Hana, nɛ nɔ kake hu biɛ ji Penina. Penina ngɛ bimɛ, se Hana lɛɛ e fɔ we.

³ Daa jeha a, Elkana jeɔ Rama kɛ yaa Shilo ya jaa Yawɛ Tabohiatsɛ ɔ, nɛ e sãã bɔ kɛ haa lɛ. Lejɛ ɔ Hofni kɛ Finehas, Eli binyumu enyɔ ɔmɛ ngɛ osɔfo yee ngɛ.

⁴ Be tsuaa be nɛ Elkana maa sã bɔ ɔ, e ma gba lo ɔ kɛ ha e yo Penina kɛ e binyumu ɔmɛ kɛ e biyi ɔmɛ tsuo nɔ tsuaa nɔ kɛ e nɔ́.

⁵ Se Hana lɛɛ, e jeɔ blɔ haa lɛ e nɔ́ pɔtɛɛ; ejakaa Yawɛ tsi e fɔmi nya mohu, se e huno ɔ suɔ lɛ saminya.

⁶ E hunoyo Penina yeɔ e he fɛu nɛ e yeɔ e tsui ngɛ fɔmi nɛ e fɔ we ɔ he.

⁷ Nɔ́ nɛ ɔ yaa nɔ daa jeha; be tsuaa be nɛ a ya Yawɛ we ɔ, Penina maa ye Hana tsui kɛ yaa si e ma fo ya nɛ e ma kua ní yemi.

⁸ Kɛkɛ e huno Elkana ma bi lɛ ke, “Hana, mɛni he je o ngɛ ya foe? Mɛni he je o yi ní? Mɛni he je o pee mɔbɔmɔbɔ kikɛ nɛ ɔ? Anɛ i pi binyumuhi nyɔngma kɛ ha mo lo?”

Hana kɛ Eli

^9-10 Ligbi ko, benɛ a ye ní gbe nya ngɛ Yawɛ we ɔ ngɛ Shilo ɔ, Hana te si. Aywilɛho nu lɛ, nɛ be mi nɛ e ngɛ kue fae ha Yawɛ ɔ, e fo ya gbogboogbo. Jamɛ a be ɔ, osɔfo Eli hii si ngɛ sinya a nya ngɛ Yawɛ sɔlemi we ɔ.

¹¹ Hana wo si nɛ e de ke, “Yawɛ Ope, ke o maa hyɛ o mawayo haomi, nɛ o ma kai mi, nɛ o hɛ be ye nɔ jee, nɛ o ma ha o mawayo binyumu ɔ, i kɛ lɛ ma ha mo e wami ligbi tsuo, nɛ asoyi nya be e yi he sae.”

¹² Benɛ e ngɛ sɔlee kɛ mwɔɔ ngɛ Yawɛ hɛ mi ɔ, Eli to e nya he hɛ.

¹³ Hana ngɛ munyu tue ngɛ e tsui mi; e gbi lɛɛ a nui, se e nya mi kɛkɛ nɛ e ngɛ pae nɛ e ngɛ mae. Lɔ ɔ he ɔ, Eli susu kaa e de dã,

¹⁴ nɛ e de ke, “Mɛni be o maa de dã kɛ yaa si? Ha dã nɛ je o hɛ mi!”

¹⁵ Se Hana he nɔ ke, “Dɛbi, ye nyɔmtsɛ, i nui wai, loo dã ko nɛ nya wa. Yo nɛ e haomi kle ji mi, nɛ i kɛ ye haomi ɔ ba pue Yawɛ hɛ mi kɛ kue fami.

¹⁶ Koo bu mi kaa yaka nɔ ko, ejakaa ye haomi, kɛ nɔ nami ɔmɛ a he i ngɛ kue fae ngɛ.”

¹⁷ Eli de lɛ ke, “O kɛ he jɔmi nɛ ya; Israel Mawu ɔ ma ha mo nɔ́ tsuaa nɔ́ nɛ o bi lɛ ɔ.”

¹⁸ Lɛ hu e he nɔ ke, “I kpa mo pɛɛ nɛ o susu o mawayo he daa.” Kɛkɛ nɛ e ho nɛ e ya ye ní, nɛ aywilɛho ɔ je e hɛ mi.

Samuel fɔmi

¹⁹ E nɔ jena a, Elkana kɛ e yi ɔmɛ, kɛ e bimɛ ɔmɛ te si mla, nɛ benɛ a ja Yawɛ ta a, a kpale a se kɛ ho a we mi ya ngɛ Rama. Elkana kɛ e yo Hana na bɔmi, nɛ Yawɛ bu Hana kue fami ɔ tue.

²⁰ Hana ngɔ hɔ, nɛ e fɔ binyumu, nɛ e wo lɛ biɛ ke Samuel; nɛ e de ke, “I wo lɛ kikɛmɛ a biɛ nɛ ɔ, ejakaa i bi Yawɛ nɛ e kɛ lɛ ha mi.”

²¹ Jeha ba su ekohu, nɛ Elkana kɛ e we ɔ tsuo ho Shilo ya, konɛ a ya sã daa jeha bɔ ɔ, kɛ bɔ titli ko hu nɛ e wo Yawɛ he si ɔ.

²² Se Hana lɛɛ e yɛ, ejakaa e de e huno ɔ ke, “Ke i tsɔ jokuɛ ɔ nyɔ pɛ ma ngɔ lɛ kɛ ya Yawɛ we ɔ; nɛ lejɛ ɔ e maa hi e wami be tsuo.”

²³ E huno Elkana de lɛ ke, “E da; nɔ́ tsuaa nɔ́ nɛ o susu kaa e hi ɔ, moo pee; hii si ngɛ hiɛ ɔ kɛ yaa si o ma tsɔ lɛ nyɔ. Yawɛ nɛ e ha nɛ o pee kaa bɔ nɛ o wo si ɔ.” Lɔ ɔ he ɔ, Hana hi si nɛ e hyɛ e bi ɔ kɛ ya si e tsɔ lɛ nyɔ.

²⁴ Benɛ e tsɔ lɛ nyɔ se ɔ, e ngɔ lɛ kɛ ho Yawɛ we ɔ ya ngɛ Shilo. E ngɔ na ku kake nɛ ye jeha etɛ, ngma mamu kilo nyɔngma, kɛ wai lohwe he womi tɔ kake kɛ ho.

²⁵ Benɛ a gbe na ku ɔ se ɔ, a kɛ jokuɛ ɔ ba Eli ngɔ.

²⁶ Hana de lɛ ke, “I kpa mo pɛɛ, ye nyɔmtsɛ, o kai mi lo? Imi ji yo ɔ nɛ o na be ko nɛ i daa si ngɛ hiɛ ɔ nɛ i ngɛ kue fae ha Yawɛ ɔ nɛ.

²⁷ I bi Yawɛ bi nɛ ɔ, nɛ e ha mi nɔ́ nɛ i bi lɛ ɔ.

²⁸ Lɔ ɔ he ɔ, imi hu i ngɔ lɛ ba ha Yawɛ. E maa pee Yawɛ nɔ́ e wami ligbi ɔmɛ tsuo.” Kɛkɛ nɛ a ja Yawɛ ngɛ lejɛ ɔ.