Rut Womi 4 - BAIBLO ALOO NGMAMI KLƆUKLƆU Ɔ

Boaz ngɔ Rut

¹ Boaz ho ya hi si ngɛ kpe he ɔ ngɛ ma a agbo ɔ nya. Kɛkɛ nɛ e na Elimelek weku no ɔ nɛ e tu e he munyu ɔ nɛ bee. Boaz tsɛ lɛ nɛ e de lɛ ke, “Ye huɛ, ba nɛ o ba hi si ngɛ hiɛ ɔ.” E ba nɛ e ba hi si.

² Jehanɛ Boaz tsɛ ma a mi nimeli ɔmɛ a ti nihi nyɔngma ke a ba hi si ngɛ lejɛ ɔ; nɛ mɛ hu a ba hi si.

³ Boaz de Elimelek weku no ɔ ke, “Nɛ Naomi kpale e se kɛ je Moab kɛ ba nɛ ɔ, e ngɛ hlae nɛ e jua zugba kpɔ ɔ nɛ ji wa nyɛmi Elimelek zugba a,

⁴ nɛ i susu kaa ma wo o tue nɔ. Lɔ ɔ he ɔ, ke o suɔ ɔ, kpɔ ngɛ nihi nɛ hii si ngɛ hiɛmɛ nɛ ɔ a hɛ mi. Se ke o sume ɔ, de mi; ejakaa nɔ ko be he blɔ nɛ e kpɔɔ nɔ́ nɛ ɔ kaa ja mo, nɛ o se loko imi.” Nyumu ɔ de lɛ ke, “Ma kpɔ.”

⁵ Kɛkɛ nɛ Boaz de lɛ ke, “Saminya! Ke o he zugba a ngɛ Naomi dɛ ɔ, ja o ngɔ Rut, Moab yo yalɔyo ɔ hulɔ, bɔ nɛ pee nɛ o kɛ lɛ nɛ fɔ bimɛ, konɛ nɔ nɛ be je mi ɔ biɛ nɛ hi e gbosi ní ɔ he.”

⁶ Kɛkɛ nɛ Elimelek weku no ɔ de lɛ ke, “Ke ja a lɛɛ i be zugba a kpɔe mɔ; ejakaa ke i pee ja a, imi nitsɛ ye nina a maa je mi dɛ gu. Lɛɛ mo kpɔ zugba a mɔ, ejakaa imi nitsɛ i be suɔe.”

⁷ Blema a, kusumi ko nɛ Israel bi peeɔ kɛ maa weto ní kpɔmi kɛ tsakemi nɔ mi ji kaa nɔtsɛ ɔ ma je e tokota kɛ ha helɔ ɔ. Enɛ ɔ a kɛ yeɔ odase ngɛ Israel.

⁸ Lɔ ɔ he ɔ, benɛ Elimelek weku no ɔ de lɛ ke, “Mo nitsɛ mo he” ɔ, e je e tokota a kɛ ha Boaz.

⁹ Lɔ ɔ se ɔ, Boaz de ma nimeli ɔmɛ, kɛ ni ɔmɛ tsuo nɛ kpe ɔ ke, “I tsɛ nyɛ odase kaa mwɔnɛ ligbi nɛ ɔ, Elimelek nɔ́ nɛ ngɛ Naomi dɛ, kɛ nɔ́ tsuaa nɔ́ nɛ ji Kilion kɛ Malon a níhi ɔ, i he lɛ tsuo ngɛ Naomi dɛ.

¹⁰ Jehanɛ se ɔ, Rut, Moab yo ɔ, nɛ ji Malon yalɔyo ɔ, ba peeɔ ye yo. Enɛ ɔ he je ɔ, gbosi ní ɔ hu maa hi Malon weku ɔ dɛ, bɔ nɛ pee nɛ Elimelek biɛ ko laa ngɛ e nyɛmimɛ ɔmɛ a kpɛti ngɛ e ma a mi. Nɔ́ nɛ nyɛ na mwɔnɛ ɔ, nyɛ ma nyɛ maa ye he odase hwɔɔ se.”

¹¹ Ma a mi bi ɔmɛ nɛ ngɛ lejɛ ɔ, kɛ ma nimeli ɔmɛ de ke, “Wa kplɛɛ nɔ, Yawɛ nɛ ha yo nɛ ɔ ba pee kaa Rahel kɛ Lea nɛ a fɔ bimɛ fuu kɛ ha Yakob ɔ. Yawɛ nɛ pee mo niatsɛ ngɛ Efrat, nɛ o biɛ nɛ pɛ ngɛ Betlehem.

¹² Ngmɛduhi nɛ Yawɛ ma ha mo kɛ gu yo nɛ ɔ nɔ ɔ, a ha nɛ o we ɔ hɛ mi nɛ ba nyami kaa Yuda kɛ Tamar a bi Perez we ɔ.”

Boaz nina

¹³ Lɔ ɔ se ɔ, Boaz kɛ Rut ho we mi ya, nɛ e ya pee e yo. Yawɛ gbaa Rut, nɛ e ngɔ hɔ, nɛ e fɔ binyumu.

¹⁴ Nɛ huza a nɔ yi ɔmɛ de Naomi ke, “Nyɛ ha wa je Yawɛ yi kaa e ha mo bibi mwɔnɛ ɔ nɛ e ba ye o se. Yawɛ nɛ ha nɛ e na biɛ kpakpa ngɛ Israel.

¹⁵ O nganyɛ ɔ suɔ mo, nɛ e he jua wa ha mo pe binyumuwi kpaago. Jehanɛ lɛɛ e ha mo bibi, nɔ nɛ ma ha mo he wami he, nɛ e maa hyɛ o nɔ ngɛ o bwɔmi si.”

¹⁶ Naomi wo jokuɛ ɔ kaa lɛ nitsɛ e bi nɛ e hyɛ lɛ.

¹⁷ Nɛ huza a nɔ yi ɔmɛ de ke, “Jehanɛ lɛɛ Naomi na binyumu.” A wo jokuɛyo ɔ biɛ ke Obed. Pee se ɔ, Obed fɔ binyumu, nɛ a wo lɛ biɛ ke Ishai. Ishai nɛ ɔ ji David tsɛ.

David weku kpa

^18-22 Bɔ nɛ David weku kpa ngɛ kɛ je Perez nɔ ji nɛ ɔ nɛ: Perez fɔ Hezron, nɛ Hezron fɔ Ram, nɛ Ram fɔ Aminadab, nɛ Aminadab fɔ Naashon, nɛ Naashon fɔ Salmon, nɛ Salmon fɔ Boaz, nɛ Boaz fɔ Obed, nɛ Obed fɔ Ishai, nɛ Ishai fɔ David.