Rut Womi 3 - BAIBLO ALOO NGMAMI KLƆUKLƆU Ɔ

Rut ya na huno

¹ Be ko se ɔ, Naomi de Rut ke, “Ye bi, tse i ko hla gba ha mo konɛ níhi a mi nɛ e hi ha mo?

² Kaa bɔ nɛ o le ɔ, Boaz nɛ o kɛ e mawayi ɔmɛya kukuɔ ní ɔ, wa weku no ji lɛ. Gbɔkuɛ nɛ ɔ, e ma ya sa e ngma a mi.

³ Moo bu tue! Moo du o he, nɛ o kpa nu, nɛ o bu bo, nɛ o pue nɔ kɛ ya ngma mi sami he ɔ. Mo ko je o he si ha lɛ kɛ yaa si be nɛ e maa ye ní gbe nya nɛ e maa hwɔ si.

⁴ Bɔɔ mɔde nɛ o to he nɛ e maa hwɔ ɔ he hɛ, konɛ ke e ya hwɔ si ɔ, o ya nɛ o ya kpa bo ngɛ e nane he ngɛ kusumi nya, nɛ o hwɔ lejɛ ɔ; nɛ e maa tsɔɔ mo nɔ́ nɛ o pee.”

⁵ Rut he nɔ nɛ e de ke, “Yoo, nɔ́ tsuaa nɔ́ nɛ o de mi ɔ, ma pee.”

⁶ Lɔ ɔ he ɔ, Rut pue nɔ kɛ ho ngma mi sami he ɔ ya, nɛ e ya pee bɔ nɛ e nganyɛ ɔ de lɛ ɔ pɛpɛɛpɛ.

⁷ Benɛ Boaz ye ní nɛ e nu nɔ́ ko, nɛ e bua jɔ e he ɔ, e ho nɛ e ya hwɔ si ngɛ ngma nɛ a bua nya a kasa nya. Rut pee blɛuu nɛ e ya kpa bo ngɛ e nane he, nɛ e hwɔ lejɛ ɔ.

⁸ Kɛ yaa nyɔ mi kpɛti ɔ, Boaz hɛli si, nɛ benɛ e plɛ e he ɔ, e pee lɛ nyakpɛ kaa yo ko hwɔɔ si ngɛ lejɛ ɔ.

⁹ E bi ke, “Mo mɛnɔ?” Nɛ Rut he nɔ ke, “Imi Rut, o mawayo ɔ. Akɛnɛ o weku no yalɔyo ji mi he je ɔ, e ji o blɔ nya kaa o kɛ o bo ɔ haa ye nɔ ngɛ kusumi nya kɛ tsɔɔ kaa o maa ngɔ mi.”

¹⁰ Nɛ Boaz de lɛ ke, “Yawɛ maa gbaa mo, ye bi, kaa o kɛ nɔ́ nɛ o pee nɛ ɔ tsɔɔ weku no kpakpa peemi he okadi pe níhi kulaa nɛ o pee ha o nganyɛ ɔ po, kaa o ya nyɛɛ we nihewi ohiatsɛmɛ, loo niatsɛmɛ a se.

¹¹ Lɔ ɔ he ɔ, ye bi, mo ko ye gbeye! Nɔ́ tsuaa nɔ́ nɛ o de ɔ, ma pee ha mo; ejakaa ye ma mi bi ɔmɛ tsuo le kaa yo kpakpa ji mo.

¹² E ngɛ mi niinɛ kaa ngɛ kusumi nya a, i ngɛ he blɔ nɛ i ngɔɔ mo nɛ i hyɛɛ o nɔ lɛɛ, se kɛ̃ ɔ nɔ ko pa ngɛ blɔ nya pe imi.

¹³ Lɔ ɔ he ɔ, moo hi hiɛ ɔ kɛ yaa si mɔtu; nɛ ke nyumu nɛ ɔ kplɛɛ nɛ e pee kusumi ɔ, nɛ e ngɔ mo ɔ, kɛkɛ lɛɛ saminya. Se ke e kplɛɛ we ɔ, lɛɛ i ngɛ si woe ngɛ Mawu hɛ kalɔ ɔ biɛ mi kaa ma ngɔ mo. Moo hwɔ si ngɛ hiɛ ɔ kɛ yaa si je maa na.”

¹⁴ Lɔ ɔ he ɔ, e hwɔ Boaz nane si blɔ kɛ ya si mɔtu. Nɛ́ nɔ ko kó le kaa yo ko ba lejɛ ɔ he je ɔ, Rut te si loko je mi tsɔ.

¹⁵ Boaz de lɛ ke, “Mo je o nɔ hami bo ɔ nɛ o bli mi.” Nɛ benɛ e pee ja a, Boaz ka ngma kilo nyingmi enyɔ nya kɛ wo mi, nɛ e ngɔ tloo lɛ, nɛ e kɛ tlomi ɔ kpale e se kɛ ho ma a mi ya.

¹⁶ Benɛ e ya su we mi ɔ, e nganyɛ ɔ bi lɛ ke, “Kɛ ji lɛ kɛɛ, ye bi?” Rut gba lɛ nɔ́ tsuaa nɔ́ nɛ Boaz pee ha lɛ ɔ.

¹⁷ E ya nɔ nɛ e de lɛ ke, “E ke ma ko kpale dɛ gu kɛ ba ye nganyɛ ngɔ. Lɔ ɔ he ɔ, moo hyɛ ngma sɔuu nɛ e ha mi!”

¹⁸ Naomi de lɛ ke, “Moo to o tsui si, ye bi, kɛ yaa si o maa na sane nɛ ɔ nya; ejakaa ja Boaz gbe sane nɛ ɔ nya mwɔnɛ ɔ loko e maa jɔɔ e he.”