Rut Womi 2 - BAIBLO ALOO NGMAMI KLƆUKLƆU Ɔ

Rut ya tsu ní ngɛ Boaz ngmɔ nɔ

¹ Naomi ngɛ weku no ko nɛ a tsɛɛ lɛ Boaz nɛ je e huno Elimelek weku ɔ mi. Nyumu nɛ ɔ ngɛ biɛ saminya, nɛ niatsɛ ji lɛ.

² Ligbi ko ɔ, Rut, Moab yo ɔ, de Naomi ke, “Ha ma ya nyɛɛ ngmɔ ɔmɛ a mi nɛ ma ya kukuɔ ngma bibliwi ngɛ ní kpali ɔmɛ a se. Nɔ ko kɛ̃ maa ngmɛ mi blɔ nɛ ma kukuɔ ní ngɛ e se.” Naomi de lɛ ke, “Ye bi, moo ya.”

³ Kɛkɛ nɛ Rut ho ngma ngmɔ ɔmɛ a mi ya nɛ e ya nyɛɛ ní kpali ɔmɛ a se kɛ kukuɔ bibliwi ɔmɛ. He ní a nya a, e ya je Boaz, nɛ je Elimelek weku ɔ mi ɔ e ngmɔ mi.

⁴ Saii mi ɔ, Boaz nitsɛ je ma a mi kɛ ba. E ha ní kpali ɔmɛ ayekoo, nɛ mɛ hu a he nɔ ke, “Aayee.”

⁵ Boaz bi e tsɔlɔ ɔ nɛ ji ní kpali ɔmɛ a nyatsɛ ɔ ke, “Jije zangmayo nɛ ɔ je?”

⁶ Nyumu ɔ he nɔ ke, “Lɛ ji Moab yo nubwɔ ɔ nɛ e kɛ Naomi je Moab zugba a nɔ kɛ ba a nɛ.

⁷ E bi ke ma ngmɛ lɛ blɔ nɛ e kukuɔ ngma bibliwi ngɛ ní kpali ɔmɛ a se. E bɔni ní tsumi kɛ je mɔtu kpla nɛ he jɔɔmi be mi, nɛ kpaako e kpa nɛ e yaa jɔɔ e he bɔɔ ngɛ gba a sisi.”

⁸ Kɛkɛ nɛ Boaz de Rut ke, “Ye bi, o ngɛ tue bue? Ko ya kukuɔ ngma bibliwi ngɛ nɔ kpa ko ngmɔ mi pe hiɛmɛ nɛ ɔ pɛ. Moo nyɛɛ yihewi ní tsuli ɔmɛ a se bɛbɛɛbɛ;

⁹ moo hyɛ he nɛ nyumu ɔmɛ ngɛ ngma a poe ngɛ ɔ, konɛ o nyɛɛ yihewi ní kpali ɔmɛ a se. I wo nihewi ɔmɛ si ke a ko doo o nya. Ke kuma ngɛ mo yee ɔ, yaa buɛ ɔmɛ a he nɛ o ya nu nyu nɛ nihewi ɔmɛ yɛ ɔ eko.”

¹⁰ Kɛkɛ nɛ Rut kpla si nɛ e kɛ e hɛ mi bu si, nɛ e bi Boaz ke, “I kpa mo pɛɛ, mɛni he je o ngɛ o he haoe ngɛ ye he, nɛ o tsɔ o hɛ mi ha mi kikɛ nɛ ɔ? Imi ma se no ɔ!”

¹¹ Boaz he nɔ ke, “Níhi nɛ o pee ha o nganyɛ ngɛ o huno gbenɔ se ɔ, a bɔ mi lɛ tsuo pɛpɛɛpɛ; nɛ jehanɛ ɔ, o si o tsɛ kɛ o nyɛ, kɛ o ma kɛ ba je nihi nɛ o li mɛ a kpɛti.

¹² Yawɛ Israel Mawu ɔ, nɔ ngɔ nɛ o ba sa we ngɛ ɔ, lɛ nitsɛ nɛ e wo mo níhi nɛ o pee ɔ kulaa he hiɔ.”

¹³ Rut he nɔ ke, “I naa mo si, ye nyɔmtsɛ. Hyɛ bɔ nɛ o munyu ngɔngɔɛ ɔmɛ wo mi gɛjɛmi, nɛ ye nɔ gbagba te ha, pohu tsa pi o mawayi ɔmɛ a ti nɔ kake ji mi.”

¹⁴ Benɛ ní yemi be su ɔ, Boaz de Rut ke, “Hɛɛ mo kɛ ba nɛ o ba ngɔ abolo ɔ eko nɛ o kɛ sɔ flɔɔ ɔ mi.” Nɛ e ba nɛ e ba hi si ngɛ ní kpali ɔmɛ a kasa nya. Boaz ha lɛ ngma a nɛ a sí ɔ eko nɛ e ye kɛ ya si eko piɛ nɛ́ e nyɛ we yemi hu.

^15-16 Benɛ Rut ho nɛ e ya ngɛ ngma bibliwi ɔmɛ kukuɔe ekohu ɔ, Boaz fa ní tsuli ɔmɛ ke a ngmɛ lɛ blɔ nɛ e kukuɔ ní ngɛ ngma nɛ a fi, se a bua we nya lolo ɔ mi, nɛ a ko nyafi lɛ. Jehanɛ hu, e de mɛ ke a je blɔ nɛ a hia ngma a eko ngɛ fifii ɔmɛ a kpɛti, nɛ a si ha lɛ nɛ e kukuɔ, nɛ a ko tsi lɛ blɔ.

¹⁷ Kikɛ nɛ ɔ Rut pee kɛ kukuɔ ngma bibliwi ngɛ ngmɔ ɔ nɔ kɛ ya si du bu. Nɛ benɛ e kɛ tso gbee nɔ́ nɛ e kukuɔ ɔ, e ná ngma maa pee kilo nyɔngma.

¹⁸ Rut tloo ngma a kɛ ho ma a mi ya, nɛ e kɛ ya tsɔɔ e nganyɛ ɔ kaa nɔ́ nɛ e nyɛ bua nya ji lɔ ɔ nɛ. E kɛ ní ɔ nɛ e ye piɛ ɔ hu ha lɛ.

¹⁹ Naomi bi Rut ke, “Jije o ya bua ngma fuu nɛ ɔ nya ngɛ? Mawu maa gbaa nɔmlɔ nɛ tsɔ e hɛ mi ha mo kikɛ nɛ ɔ.” Rut de e nganyɛ ɔ ke ngmɔ si he nɛ e ya tsu ní ngɛ ɔ, a tsɛɛ ngmɔtsɛ ɔ ke Boaz.

²⁰ Naomi de ke, “Yawɛ nɛ yeɔ e siwo nɔ kɛ haa hɛ kali, kɛ nihi nɛ gbo tsuo ɔ maa gbaa lɛ.” E ya nɔ nɛ e de ke, “Boaz nɛ ɔ, wa weku no pɔtɛɛ ji lɛ, nɛ kusumi nya hu e peeɔ wa nɔ hyɛlɔ.”

²¹ Rut, Moab yo ɔ ya nɔ nɛ e de e nganyɛ ɔ ke, “Nɔ́ kake hu nɛ nyumu ɔ de ji kaa ma hi ní ɔ kukuɔe ngɛ ní tsuli ɔmɛ a se kɛ yaa si a ma kpa e ngma a tsuo gbe nya.”

²² Naomi de e nganyɛ Rut ke, “Ye bi, e hi kaa o kɛ yihewi ɔmɛ ma tsu ní ngɛ Boaz ngmɔ mi pe kaa o maa ya nɔ kpa ko ngmɔ mi nɛ a ya doo o nya.”

²³ Lɔ ɔ he ɔ, Rut pee ja, nɛ daa nɛ ɔ, e ya kukuɔɔ ngma bibliwi ngɛ lejɛ ɔ kɛ ya si be nɛ a poo ngma slɔɔto ɔmɛ tsuo pɛpɛɛpɛ gbe nya. Nɛ e tsa nɔ nɛ e kɛ e nganyɛ ɔ hi si.