Romabi 5 - BAIBLO ALOO NGMAMI KLƆUKLƆU Ɔ

A wo wɔ nguɔ

¹ Amlɔ nɛ ɔ, kɛ gu hemi kɛ yemi nɔ ɔ, Mawu wo wɔ nguɔ. Lɔ ɔ he ɔ, he jɔmi ba waa kɛ Mawu wa kpɛti kɛ gu Yesu Kristo nɔ.

² Si himi nɛ wa ngɛ mi amlɔ nɛ ɔ, Mawu dloomi nya nɛ wa na kɛ gu Yesu Kristo nɛ wa heɔ yeɔ ɔ nɔ. Lɔ ɔ he ɔ, wa fĩaa, ejakaa wa nine maa su Mawu hɛ mi nyami ɔ nɔ.

³ Wa le kaa dengme nɛ wa ngɛ gboe ɔ be yaka pee. Pi enɛ ɔ kɛkɛ, se ke wa ngɛ nɔ́ nae po, wa naa bua jɔmi, ejakaa wa le kaa nɔ́ nami haa nɛ wa toɔ wa tsui si;

⁴ nɛ tsui si tomi haa nɛ wa peeɔ Mawu suɔmi nya ní. Nɛ ke wa ngɛ Mawu suɔmi nya ní pee ɔ, e haa waa kɛ wa hɛ fɔɔ Mawu nɔ Kulaa.

⁵ Hɛ kɛ nɔ fɔmi nɛ ɔ ha we nɛ zo gbeɔ wɔ, ejakaa kɛ gu Mumi klɔuklɔu ɔ nɛ Mawu ha wɔ ɔ nɔ ɔ, Mawu ha wa tsui hyi tɔ kɛ e suɔmi ɔ.

⁶ Ejakaa be nɛ sa mi, be mi nɛ peepee ta wa he ɔ, jamɛ a be ɔ Kristo ba gbo ngɛ yayami peeli a he.

⁷ Ejakaa e maa wa kaa nɔ ko maa suɔ nɛ e gbo ngɛ nɔ nɛ yeɔ mlaa nɔ ɔ he; pohu nɔmlɔ kpakpa he ɔ, e maa ba mi kaa nɔ ko ma si gugue kaa e ma gbo.

⁸ Se suɔmi kpetekpleenyɛ nɛ Mawu je kpo ji nɛ ɔ nɛ, kaa be nɛ wa ji yayami peeli ɔ, jamɛ a be ɔ Kristo ba gbo ngɛ wa he.

⁹ Lɔ ɔ he ɔ, jehanɛ ɔ nɛ a gu Kristo muɔ nɛ pue si ɔ nɔ wo wɔ nguɔ ɔ, a maa gu e nɔ hluu tsɔ kɛ kpɔ wɔ kɛ je Mawu mi mi la a mi.

¹⁰ Jinɛ sa a, Mawu he nyɛli ji wɔ, se kɛ gu e Bi ɔ gbenɔ ɔ nɔ ɔ, a kpata waa kɛ Mawu wa kpɛti. Lɔ ɔ he ɔ, amlɔ nɛ ɔ nɛ a kpata waa kɛ Mawu wa kpɛti ɔ, e ma he wa yi wami hluu tsɔ ngɛ e Bi ɔ wami ɔ mi.

¹¹ Pi enɛ ɔ kɛkɛ, se wa fĩaa fɔɔ Mawu nɔ kaa kɛ gu wa Nyɔmtsɛ Yesu Kristo nɔ ɔ, e ha nɛ jehanɛ ɔ, a kpata waa kɛ lɛ Mawu ɔ wa kpɛti.

Slɔɔto nɛ ngɛ Adam kɛ Kristo a kpɛti

¹² Nɔ kake lɛ pee yayami, nɛ yayami kɛ gbenɔ ba. Enɛ ɔ ha gbenɔ sã nimli tsuo, ejakaa nɔ tsuaa nɔ pee yayami.

¹³ Yayami ngɛ je ɔ mi loko mlaa a ba; se be nɛ mlaa be ɔ, nɔ ko nɔ ko pee we yayami he akɔtaa.

¹⁴ Se kɛ je Adam yi nɔ kɛ ba si Mose yi nɔ ɔ, gbenɔ kpata nimli adesahi a hɛ mi wawɛɛ; pohu nimli nɛ ɔmɛ pee we yayami kaa Adam nɛ lɛɛ e tɔ mlaa a nɛ a wo lɛ ɔ tete ɔ. Adam ji nɔ nɛ maa ba a he okadi.

¹⁵ Se Mawu nɔke nɔ́ ɔ slo kulaa ngɛ yayami nɛ Adam pee ɔ he. Ejakaa yayami nɛ Adam pee ɔ ha nihi babauu gbo lɛɛ, se Mawu dloomi ɔ, kɛ nɔke nɔ́ nɛ a gu Yesu Kristo dloomi ɔ nɔ ha wɔ ɔ hiɛ hluu tsɔ kɛ ha nihi tsuo.

¹⁶ Jehanɛ ɔ, Mawu nɔke nɔ́ ɔ slo kulaa ngɛ si gbeemi nɛ yayami nɛ Adam pee ɔ kɛ ba a he. Ejakaa nɛ Adam pee yayami ɔ, a kojo lɛ, nɛ a bu lɛ fɔ; se lɔ ɔ se ɔ, yayami babauu nɛ nihi pee ɔ, nɔke nɔ́ ɔ he ɔ, Mawu wo nihi tsuo nguɔ.

¹⁷ Ejakaa ke yayami nɛ nɔ kake pee ɔ, ha gbenɔ kpata nihi babauu a hɛ mi ɔ, lɛɛ nihi tsuo nɛ a nine su Mawu dloomi ɔ nɔ, nɛ Mawu gu nɔke nɔ́ ɔ nɔ bu mɛ nihi nɛ da a, Kristo ma ha a na neneene wami hluu tsɔ.

¹⁸ Lɔ ɔ he ɔ, kaa bɔ nɛ yayami kake he ɔ, a bu nihi tsuo fɔ ɔ, jã nɔuu kpakpa kake he ɔ, Mawu maa wo nihi tsuo nguɔ, nɛ a ma he a yi wami.

¹⁹ Ejakaa kaa bɔ nɛ nihi babauu ba pee yayami peeli ngɛ nɔ kake tue gbomi he ɔ, jã kɛ̃ Yesu Kristo nɔ kake e tue nɛ e bu ɔ he ɔ, Mawu maa bu nihi tsuo dali.

²⁰ A wo mlaa a hulɔ, konɛ wa yɔse yayami ɔmɛ babauu; se he nɛ yayami hiɛ ngɛ ɔ, lejɛ ɔ Mawu dloomi ɔ hiɛ kɛ be nɔ babauu.

²¹ Lɔ ɔ he ɔ, bɔ nɛ yayami ye tsɛ kɛ gu gbenɔ nɔ ɔ, ja nɔuu Mawu dloomi ɔ ngɛ tsɛ yee kɛ gu dami nɔ; nɛ kɛ gu wa Nyɔmtsɛ Yesu Kristo nɔ ɔ, wa ma na neneene wami.