Romabi 4 - BAIBLO ALOO NGMAMI KLƆUKLƆU Ɔ

Abraham hemi kɛ yemi peeɔ nɔhyɛ nɔ́

¹ Wa tsɛ Abraham ɔ, kɛ wa ma de ngɛ e he kɛɛ? Kɛ e wami si himi mi sane ngɛ kɛɛ?

² Ke ní nɛ e tsu nɔ a da kɛ wo lɛ nguɔ ɔ, lɛɛ jinɛ e ngɛ nɔ́ ko nɛ e maa fĩa ngɔ fɔ nɔ. Se ngɛ Mawu blɔ fa mi ɔ, Abraham be nɔ́ ko kulaa nɛ e ma nyɛ maa fĩa ngɔ fɔ nɔ.

³ Ngmami ɔ deɔ ke, “Abraham he Mawu ye, lɔ ɔ he ɔ, Mawu bu lɛ nɔ nɛ da.”

⁴ Ke nɔ ko tsu ní ɔ, a woɔ lɛ hiɔ; hiɔwo ɔ, e gbo he dengme; pi dloomi nya nɛ e na lɛ.

⁵ Se nɔ nɛ ngɔɔ e hɛ ngɔ fɔɔ Mawu pɛ nɔ, se pi ní nɛ e tsuɔ nɔ ɔ, Mawu ɔ nɛ lɛ pɛ nɛ nyɛɔ woɔ yayami peelɔ nguɔ ɔ daa nɔmlɔ nɛ ɔ hemi kɛ yemi ɔ nɔ kɛ buɔ lɛ nɔ da.

⁶ Enɛ ɔ nɔuu David hu ngɛ tsɔɔe be nɛ e tu nɔ nɛ Mawu buu lɛ nɔ nɛ da, nɛ pohu pi nɔ́ ko nɛ e tsu he je ɔ e gbaami he munyu ɔ nɛ. E de ke,

⁷ “A gbaa nɔ nɛ a ngɔ e tɔmihi, kɛ e he yayamihi ngɔ pa lɛ!

⁸ A gbaa nɔ nɛ Nyɔmtsɛ ɔ nɛ́ yayami ko ngɛ e he!”

⁹ Gbaami nɛ David tu he munyu ɔ, anɛ nihi nɛ a po mɛ ɔ kɛkɛ a nɔ lo? Dɛbi! Ni nɛmɛ a pui mɛ ɔ hu e kɔɔ a he. Ejakaa wa ngɛ dee ke, “Abraham he Mawu ye, lɔ ɔ he ɔ, Mawu bu lɛ nɔ nɛ da.”

¹⁰ Mɛni be mi nɔ́ nɛ ɔ ba mi? Loko a po Abraham, aloo benɛ a po lɛ ɔ se? Nɔ́ nɛ ɔ ba mi loko a po lɛ.

¹¹ Pomi nɛ a po lɛ ɔ ji okadi ko kɛkɛ nɛ maa nɔ mi kaa hemi kɛ yemi nɛ Abraham ngɛ he je ɔ, Mawu he lɛ momo kaa nɔ nɛ da, be mi nɛ a na we nɛ a po lɛ tete. Lɔ ɔ he ɔ, nihi tsuo nɛ heɔ Mawu yeɔ, nɛ pohu a pui mɛ, nɛ Mawu buu mɛ dali ɔ, Abraham peeɔ a tsɛ.

¹² Lɛ nɔuu kɛ̃ e peeɔ nihi nɛ a po mɛ ɔ a tsɛ; pi ngɛ pomi nɛ a po mɛ ɔ kɛkɛ he, se mohu kaa hemi kɛ yemi nɛ wa tsɛ Abraham hɛɛ mi benɛ a na we nɛ a po lɛ tete ɔ, a hɛɛ jamɛ a hemi kɛ yemi ɔ nɔuu mi.

Abraham he Mawu siwo ɔ ye

¹³ Pi mlaa a nɔ nɛ Abraham ye ɔ he nɛ Mawu wo lɛ si kaa e kɛ e nina maa ye je ɔ nɔ ɔ, se mohu akɛnɛ e he Mawu ye, nɛ Mawu bu lɛ nɔ nɛ da a he.

¹⁴ Ejakaa ke nihi nɛ mlaa a nɔ pɛ a yeɔ ɔ, mɛ hu gbosi ní yeli ji mɛ ɔ, lɛɛ hemi kɛ yemi ɔ peeɔ yaka, nɛ siwo ɔ hu se nami be he.

¹⁵ Ejakaa mlaa a kɛ Mawu mi mi la baa; he nɛ mlaa be ɔ, nɔ ko tɔ we mlaa hulɔ.

¹⁶ Lɔ ɔ he ɔ, Abraham hemi kɛ yemi nɔ Mawu da kɛ wo si ɔ. Mawu pee enɛ ɔ, konɛ siwo ɔ nɛ ba pee dloomi nɔ́ ko nɛ a fi kɛ fɔ nɔ kpɛii kɛ ha Abraham nina tsuo. Pi kɛ ha nihi nɛ yeɔ mlaa a nɔ kɛkɛ, se mohu kɛ ha ni nɛmɛ nɛ mɛ hu a hɛɛ hemi kɛ yemi ɔ mi kpɛii kaa bɔ nɛ Abraham he ye ɔ, ejakaa Abraham ji wɔ tsuo wa tsɛ.

¹⁷ Ejakaa ngmami ɔ deɔ ke, “Ma pee mo je mahi babauu a tsɛ.” Mawu ɔ nɛ Abraham he ye ɔ, anɔkualetsɛ ji lɛ, nɛ si nɛ e wo ɔ maa ba mi. Lɛ ji Mawu nɛ tleɔ ni gbogboehi si kɛ baa wami mi ekohu; nɔ́ nɛ bɛ je mi hyɛ po, e haa e baa.

¹⁸ Bɔ nɛ Abraham he Mawu ye, nɛ e ngɔ e hɛ ngɔ fɔ e nɔ, pohu jamɛ a be ɔ mi ɔ, hɛ kɛ nɔ fɔmi tsuo ta a, lɔ ɔ nɛ ha e ba pee je mahi babauu a tsɛ kaa bɔ nɛ ngmami ɔ deɔ ke, “Jã o nina hu maa hiɛ” ɔ nɛ.

¹⁹ Jamɛ a be ɔ mi ɔ, Abraham ye maa pee jeha lafa momo; se e hemi kɛ yemi ɔ lɛɛ e ngmɛɛ we he. Lɛ nitsɛ e nɔmlɔ tso ɔ pee kaa nɔ nɛ gbo momo, nɛ e yo Sara hu fɔ we. Se enɛ ɔmɛ a he susumi ha we nɛ e hemi kɛ yemi nɛ ta.

²⁰ E yi mi pee we lɛ enyɔɔnyɔ ngɛ si nɛ Mawu wo lɛ ɔ he; se mohu e hemi kɛ yemi ha lɛ he wami he, nɛ e wo Mawu hɛ mi nyami.

²¹ Ejakaa Abraham he ye wawɛɛ kaa si nɛ Mawu wo lɛ ɔ, e maa ye nɔ.

²² Enɛ ɔ he nɛ Mawu bu lɛ nɔ nɛ da a.

²³ Munyu “A bu lɛ nɔ nɛ da” a, pi lɛ nɔ kake e he nɛ a ngma ngɛ.

²⁴ Se mohu e kɔɔ wɔ hu wa he, wɔ nihi nɛ a maa wo wɔ nguɔ ja nɔuu ɔ; ejakaa nɔ nɛ tle wa Nyɔmtsɛ Yesu si kɛ ba wami mi ekohu ɔ, wa heɔ lɛ yeɔ.

²⁵ Mawu ngɔ Kristo kɛ ha nɛ a gbe lɛ ngɛ wa he yayami ɔmɛ a he; nɛ a tle lɛ si kɛ ba wami mi ekohu, konɛ e kɛ wo wɔ nguɔ.