Romabi 2 - BAIBLO ALOO NGMAMI KLƆUKLƆU Ɔ

Mawu yeɔ dami sane

¹ Ye nyɛmi, anɛ o kojoɔ nihi, nɛ o buɔ mɛ fɔ lo? Ke o peeɔ ja a, lɛɛ o be nya jemi ko kulaa. Ejakaa ke o kojoɔ ni kpahi, nɛ o buu mɛ fɔ, nɛ mo hu o peeɔ jamɛ a ní ɔmɛ nɔuu ɔ, na nɛ o le kaa mo nitsɛ o he fɔ o ngɛ bue ɔ nɛ.

² Wa le kaa Mawu buɔ nihi nɛ tsuɔ jamɛ a ní ɔmɛ bɔ nɛ fɔ ɔ le da pɛpɛɛpɛ.

³ Se mo ye nyɛmi nɛ o kojoɔ nihi nɛ tsuɔ jamɛ a ní ɔmɛ, nɛ́ mo hu o peeɔ ja nɔuu ɔ, anɛ o susuu kaa o maa ye o he, nɛ Mawu be mo kojoe lo?

⁴ O bui nɔ́! Mɛni he je ɔ, Mawu mi mi jɔ, e naa nɔ he tsui, nɛ e toɔ e tsui si. Blɔɔ o li kaa Mawu mi mi jɔ ha mo konɛ o tsake o tsui lo?

⁵ Se akɛnɛ o kplii o tsui, nɛ o pia we o he ɔ, kojomi ligbi ɔ nɛ Mawu mi mi ma fu, nɛ e maa kojo kɛ dami sane yemi ɔ, o tue gblami ɔ maa pe nine.

⁶ Ejakaa Mawu maa wo nɔ tsuaa nɔ hiɔ bɔ nɛ sa lɛ ngɛ e ní tsumi ɔ nya.

⁷ Nihi nɛ toɔ a tsui si kɛ peeɔ kpakpa daa, nɛ a kɛ hlaa hɛ mi nyami, kɛ bu ha a he konɛ a ko gbo ɔ, Mawu ma ha mɛ neneene wami.

⁸ Se ni nɛmɛ nɛ mɛɛ lɛɛ mɛ nitsɛmɛ a nɔ mi pɛ a foɔ, nɛ a bui anɔkuale, nɛ nɔ́ yayami se pɛ a dii ɔ, Mawu kɛ mi mi la, kɛ mi mi fumi ma kple a nɔ.

⁹ Mawu ma ha nɛ haomi, kɛ nɔ́ nami maa ba yayami peeli tsuo a nɔ, Yuda bi kekle, kɛ ma je li hulɔ.

¹⁰ Se ni nɛmɛ nɛ peeɔ nɔ́ kpakpa a, Mawu maa wo a hɛ mi nyami; bu maa ba a he, nɛ e ma ha mɛ he jɔmi, Yuda bi kekle, kɛ jehanɛ ɔ, ma je li hulɔ.

¹¹ Ejakaa Mawu hyɛ we nɔ hɛ mi.

¹² Nihi abɔ nɛ mlaa a kpakaa we mɛ, nɛ a peeɔ yayami ɔ, a hɛ mi kpataa kaa nihi nɛ mlaa a kpakaa we mɛ; nɛ nihi abɔ nɛ guu mlaa a nɔ peeɔ yayami ɔ, mlaa a nɔuu nɔ a daa kɛ kojoɔ mɛ.

¹³ Ejakaa pi nihi nɛ le mlaa a nɛ a buu nihi nɛ da ngɛ Mawu hɛ mi, se mohu nihi nɛ yeɔ mlaa a nɔ, mɛ a maa wo nguɔ.

¹⁴ Ke ma je li ɔmɛ nɛ yi Mose mlaa a nɔ ngɛ a fɔmi su ɔ nya a tsuɔ mlaa a nya ní ɔ, a peeɔ mlaa ha mɛ nitsɛmɛ a he; pohu mlaa ko yi a nɔ.

¹⁵ A ní peepee tsɔɔ kaa nɔ́ nɛ mlaa a ngɛ hlae kaa a pee ɔ, Mawu ngɔ wo a tsui mi momo; nɛ a he nile hu yeɔ enɛ ɔ he odase. Ejakaa be komɛ ɔ, a susumi deɔ mɛ ke nɔ́ nɛ a ngɛ pee ɔ dɛ, nɛ be komɛ hu e deɔ mɛ ke e da.

¹⁶ Sane kpakpa a nɛ i ngɛ fiɛe ɔ ngɛ tsɔɔe kaa ligbi ɔ nɛ Mawu maa gu Yesu Kristo nɔ ba kojo nihi tsuo ngɛ a laami mi sanehi a he ɔ, kikɛ nɛ ɔ níhi maa ba.

Yuda bi kɛ mlaa a

¹⁷ Nyɛɛ lɛɛ kɛ nyɛ sane ngɛ kɛɛ? Nyɛ tsɛɔ nyɛ he Yuda bi, nɛ nyɛ daa mlaa a nɔ kɛ fĩaa kaa Mawu nihi ji nyɛ.

¹⁸ Nyɛ le nɔ́ nɛ Mawu suɔ kaa nyɛɛ pee, nɛ a gu mlaa a nɔ tsɔɔ nyɛ nɛ nyɛ le nɔ́ nɛ hi.

¹⁹ Nyɛ buu nyɛ he nihi nɛ tsɔɔ hɛ yuyuili blɔ, aloo la kɛ ha nihi nɛ ngɛ diblii mi.

²⁰ Nyɛɛ buu nyɛ he kuasiahi a tsɔseli, kɛ nihi nɛ li nɔ́ ko ɔ a ní tsɔɔli; ejakaa nyɛ le kaa niinɛ, nile kɛ anɔkuale tsuo ngɛ mlaa a mi.

²¹ Nyɛ nɛ nyɛ tsɔɔ ni kpahi ní ɔ, mɛni he je nyɛ tsɔɔ we nyɛ nitsɛmɛ nyɛ he ní mɔ? Nyɛ fiɛɔ ke a ko ju; se tse nyɛ juɔ?

²² Nyɛ deɔ ke a ko puɛ gba; se nyɛ puɛ we gba lo? Amagahi a he peeɔ nyɛ tai, se tse nyɛ ya juɔ ngɛ wɔ piɛhi a mi?

²³ Nyɛ fĩaa ke nyɛ le mlaa a, se tse nyɛ tɔɔ mlaa a kɛ pueɔ Mawu hɛ mi si?

²⁴ Kaa bɔ nɛ ngmami ɔ deɔ ɔ, “Nyɛ Yuda bi nyɛ he ɔ, ma je li ɔmɛ tuɔ musu bɔmi munyuhi kɛ siɔ Mawu.”

²⁵ Nyɛ yeɔ mlaa a nɔ jinɛ pomi nɛ a po nyɛ ɔ, se nami ngɛ he. Se nyɛ yi nɔ; lɔ ɔ he ɔ, nyɛ ngɛ kaa ni nɛmɛ nɛ a pui mɛ ɔ.

²⁶ Ke ma je no nɛ a pui lɛ ɔ yeɔ mlaa a nɔ ɔ, anɛ Mawu be lɛ bue kaa nɔ ko nɛ a po lɛ lo?

²⁷ Lɔ ɔ he ɔ, nyɛ Yuda bi, ma je li ɔmɛ maa kojo nyɛ, ejakaa nyɛ nɛ a ngma mlaa a ngɔ ha, nɛ́ mlaa a nya a poɔ nyɛ ɔ, nyɛ tɔɔ mlaa a. Se mɛɛ lɛɛ a yeɔ mlaa a nɔ, pohu a pui mɛ.

²⁸ Lɛɛ mɛnɔ ji Yuda no nitsɛnitsɛ mɔ? Pi okadi nɛ a to ngɛ nɔ he lo mi kaa nɔ pomi kikɛ nɛ ɔ nɛ peeɔ nɔ Yuda no.

²⁹ Mohu ɔ, Yuda no nitsɛnitsɛ peemi ɔ ngɛ nɔ ɔ nitsɛ e mi, nɛ nɔ pomi ɔ hu ngɛ e tsui mi. Mawu mumi ɔ pɛ lɛ tsuɔ enɛ ɔ, pi mlaa nɛ a ngma a. Kikɛmɛ a nɔmlɔ nɛ ɔ, Mawu nitsɛ lɛ jeɔ e yi, pi nɔmlɔ adesa.