Romabi 16 - BAIBLO ALOO NGMAMI KLƆUKLƆU Ɔ

Paulo ke e biɔ nyɛmimɛ ɔmɛ

¹ Wa nyɛmiyo Foibe nɛ sɔmɔɔ ngɛ Kenkrea asafo ɔ mi ɔ, ma suɔ nɛ ma wo e ta kɛ je e yi.

² Nyɛ he lɛ hɛmuɔ ngɛ Nyɔmtsɛ ɔ biɛ mi bɔ nɛ sa ni klɔuklɔu ɔmɛ. Nɔ́ tsuaa nɔ́ nɛ he maa hia lɛ ɔ, nyɛ ha lɛ, ejakaa e pee kpakpa ha nihi babauu, kɛ imi nitsɛ hulɔ.

³ I biɔ Priskila kɛ Akuila, nyɛmimɛ nɛ i kɛ mɛ tsuɔ ní ha Yesu Kristo ɔ.

⁴ Ye he ɔ, e piɛ nguɛ nya nɛ a sake a he lo ngɔ fɔ he. I ngɛ mɛ si nae saminya; ee, pi imi kɛkɛ, se ma je li ɔmɛ asafo ɔmɛ tsuo ngɛ mɛ si nae.

⁵ I biɔ asafo ɔ nɛ kpeɔ ngɛ a we ɔ mi ɔ hulɔ. I biɔ Epeneto, kekleekle nɔ nɛ he Kristo ye ngɛ Asia a; ye huɛ saminya ji lɛ.

⁶ I biɔ Maria; lɛ hu e gbo nyɛ he dengme wawɛɛ nitsɛ.

⁷ I biɔ Androniko kɛ Yunia, ye nyɛmimɛ Yuda bi nɛ a wo i kɛ mɛ tsuo tsu ɔ. A he biɛ saminya ngɛ bɔfo ɔmɛ a kpɛti; nɛ a sɛ ye hlami ngɛ Kristo mi.

⁸ I biɔ Ampliato nɛ i suɔ lɛ saminya ngɛ Nyɔmtsɛ ɔ mi ɔ.

⁹ I biɔ Urbano nɛ waa kɛ lɛ tsuo tsuɔ ní ha Kristo ɔ, kɛ jehanɛ hu ye huɛ Staki nɛ i suɔ lɛ saminya a.

¹⁰ I biɔ Apele; a yeɔ e he odase kaa e sɔmɔɔ Kristo saminya. I biɔ Aristobulo weku ɔ hulɔ.

¹¹ I biɔ Herodion, ye nyɛmi Yuda no ɔ, kɛ nyɛmimɛ Kristo we bi nɛ je Narkiso weku ɔ mi ɔ.

¹² I biɔ Trifaina kɛ Trifosa nɛ a tsuɔ ní ha Nyɔmtsɛ ɔ. I biɔ Persi, ye huɛ nɛ i suɔ lɛ saminya a; lɛ hu e tsu ní wawɛɛ kɛ sɔmɔ Nyɔmtsɛ ɔ.

¹³ I biɔ Rufo, nɔ nɛ je e he si kaa Nyɔmtsɛ ɔ ní tsulɔ kpanaa a, kɛ e nyɛ ɔ nɛ ngɔ imi hu kaa e bi ɔ.

¹⁴ I biɔ Asinkrito, Felgon, Herma, Patroba, Herme, kɛ nyɛmimɛ ɔmɛ tsuo nɛ a kɛ mɛ ngɛ ɔ.

¹⁵ I biɔ Filologo, kɛ Yulia, kɛ Nerea, kɛ e nyɛmiyo ɔ, kɛ Olimpas, kɛ ní klɔuklɔu ɔmɛ tsuo nɛ a kɛ mɛ ngɛ ɔ.

¹⁶ Nyɛɛ fua nyɛ sibi kɛ nga nyɛ he. Kristo asafo tsuo biɔ nyɛ.

Nyagbe munyu

¹⁷ Ye nyɛmimɛ, i kpa nyɛ pɛɛ, nihi nɛ teɔ si kɛ siɔ níhi nɛ wa tsɔɔ nyɛ, nɛ a ngɛ nyɛ tue puɛe, nɛ a kɛ mi gbami ngɛ asafo ɔ mi bae ɔ, nyɛ hɛ nɛ hi nyɛ he ngɛ a he, nɛ nyɛɛ kɛ mɛ ko bɔ.

¹⁸ Ejakaa nimli kaa kikɛ nɛ ɔ, pi Kristo, wa Nyɔmtsɛ ɔ nɛ a ngɛ sɔmɔe. Se mɛ nitsɛmɛ a muklii mohu he mɔde nɛ a ngɛ bɔe. A kɛ munyu dɔkɔɔ gbeɔ nihi nɛ a juɛmi se ti we ɔ a yi mi, nɛ a sisiɔ mɛ.

¹⁹ A nu nyɛ he ngɛ he tsuaa he kaa nyɛ pɛtɛ sane kpakpa a he wawɛɛ; nɔ́ nɛ ɔ ha nɛ i na nyɛ he bua jɔmi saminya. I suɔ kaa nyɛɛ le kpakpa, nɛ nyɛɛ pee; se yayami blɔ fa mi lɛɛ a ko nu nyɛ he kulaa.

²⁰ E be kɛe kulaa nɛ he jɔmi Mawu ɔ ma kpata Abosiami hɛ mi, nɛ wa maa ye e nɔ. Wa Nyɔmtsɛ Yesu Kristo dloomi ɔ kɛ nyɛ nɛ hi si.

²¹ Timoteo nɛ i kɛ lɛ ngɛ ní tsumi kake tsue ɔ ke e biɔ nyɛ. Ye nyɛmimɛ Yuda bi, Lukio, Yason, kɛ Sosipatre hu ke a biɔ nyɛ.

²² Imi Tertio nɛ i ngma ní nɛ ɔmɛ ɔ, i biɔ nyɛ ngɛ Nyɔmtsɛ ɔ biɛ mi.

²³ Gayo, ye wetsɛ ɔ hu ke e biɔ nyɛ. E we mi nɛ asafo ɔ tsuo kpee ngɛ. Erasto, ma sika tolɔ ɔ, kɛ wa nyɛmi Kuato hu ke a biɔ nyɛ. [

²⁴ Wa Nyɔmtsɛ Yesu Kristo dloomi ɔ kɛ nyɛ tsuo kulaa nɛ hi si! Amen!]

Nyagbe yi jemi sɔlemi

²⁵ Nyɛ ha wa je Mawu yi. Lɛ nɛ e ma ha nyɛ hemi kɛ yemi ɔ mi maa wa ngɛ Yesu Kristo he sane kpakpa a nɛ i fiɛ ha nyɛ ɔ mi. Kɛ je blema lokoo ɔ, nɔ ko nɔ ko li anɔkuale nɛ ɔ.

²⁶ Se amlɔ nɛ ɔ lɛɛ níhi nɛ gbali ɔmɛ ngma a ha nihi babauu ba na anɔkuale ɔ paa kaa bɔ nɛ neneene Mawu ɔ nitsɛ to nɛ a fiɛ ha je mahi tsuo, konɛ a he Mawu ye, nɛ a bu lɛ tue ɔ.

²⁷ A je Mawu kake too ɔ nɛ le ní tsuo ɔ yi ngɛ Yesu Kristo mi kɛ ya neneene. Amen!