Romabi 15 - BAIBLO ALOO NGMAMI KLƆUKLƆU Ɔ

Waa pee níhi nɛ maa sa wa nyɛmimɛ a hɛ mi

¹ Wɔ nihi nɛ wa hemi kɛ yemi mi wa a, e sa kaa waa ye bua ni nɛmɛ nɛ a hemi kɛ yemi mi wɛ ɔ. Wa ko susu wɔ nitsɛmɛ pɛ wa he.

² Mohu ɔ, wa ti nɔ tsuaa nɔ nɛ pee nɔ́ nɛ hi nɛ maa sa e nyɛmi hɛ mi, konɛ e nyɛmi ɔ nɛ na hemi kɛ yemi nɛ pi si.

³ Ejakaa Kristo hu pee we lɛ nitsɛ e suɔmi nya ní; se mohu ngmami ɔ ke, “Níhi nɛ a de kɛ bɔ mo ahlua a, imi mohu ye hɛ mi si a pue.”

⁴ Nɔ́ tsuaa nɔ́ nɛ ngɛ ngmami ɔmɛ a mi ɔ, a ngma konɛ a kɛ tsɔɔ wɔ ní. Kɛkɛ ɔ, ngmami ɔmɛ ma ha wa maa to wa tsui si; nɛ a maa wo wɔ he wami nɛ wa na hɛ kɛ nɔ fɔmi.

⁵ Mawu ɔ nɛ haa nɔ toɔ e tsui si, nɛ e woɔ nɔ he wami nɛ ha nɛ nyɛ wo Kristo Yesu nane, nɛ nyɛɛ kɛ nyɛ sibi nɛ hi si saminya.

⁶ Kɛkɛ ɔ, nyɛ tsuo nyɛ maa pee kake, nɛ nyɛɛ kɛ gbi kake nɛ wo Mawu, wa Nyɔmtsɛ Yesu Kristo Tsɛ ɔ hɛ mi nyami.

A ya fiɛ sane kpakpa a ha ma je li ɔmɛ hulɔ

⁷ Lɔ ɔ he ɔ, nyɛ he nyɛ sibi atuu kaa bɔ nɛ Kristo hu he nyɛ atuu ɔ. Nyɛɛ pee enɛ ɔ, nɛ nyɛ kɛ wo Mawu hɛ mi nyami.

⁸ Ejakaa i ngɛ nyɛ dee ke Kristo ba sɔmɔ Yuda bi ɔmɛ nɛ e kɛ tsɔɔ mɛ kaa Mawu yeɔ anɔkuale, nɛ e kɛ ma si nɛ Mawu wo a nɛmɛ ɔmɛ ɔ nɔ mi.

⁹ E pee ja, konɛ ma je li ɔmɛ tete nɛ a wo Mawu hɛ mi nyami, ejakaa e na mɛ hu mɔbɔ. Kaa bɔ nɛ ngmami ɔ deɔ ɔ, “Enɛ ɔ he ɔ, ma je o yi ngɛ ma je li ɔmɛ a kpɛti, Nɛ ma wo o biɛ ta kɛ la.”

¹⁰ Ngmami ɔ kpale deɔ ke, “Nyɛ ma je li, nyɛɛ kɛ Mawu ma a nɛ nya.”

¹¹ Jehanɛ, e deɔ ekohu ke, “Nyɛ ma je li tsuo, nyɛ je Nyɔmtsɛ ɔ yi; Je mahi tsuo, nyɛ je e yi wawɛɛ!”

¹² Yesaya hu de ke, “Ishai nina ko maa ba; E maa te si nɛ e ba ye ma je li ɔmɛ a nɔ, Nɛ ma je li ɔmɛ maa ngɔ a hɛ ngɔ fɔ e nɔ.”

¹³ Mawu, nɔ nɛ haa nihi tsuo hɛ kɛ nɔ fɔmi ɔ, e ha nyɛ hyi tɔ kɛ bua jɔmi, kɛ he jɔmi tsuo ngɛ nyɛ hemi kɛ yemi ɔ nya, konɛ Mumi Klɔuklɔu ɔ nɛ wo nyɛ he wami, nɛ nyɛɛ ngɔ nyɛ hɛ kɛ fɔ Mawu nɔ daa.

Paulo tsɔɔ nɔ́ he je nɛ e ngma womi kaa kikɛ nɛ ɔ

¹⁴ Ye nyɛmimɛ, imi nitsɛ i le tsɔ kaa nyɛ nitsɛmɛ tete nyɛ mi mi hi; nyɛ le ní bɔ nɛ sa, nɛ nyɛ nyɛɔ woɔ nyɛ sibi ga.

¹⁵ Se kɛ̃, i ngma womi nɛ ɔ kɛ ngɛ ní nɛ ɔmɛ ekomɛ a nɔ ta woe kaa a he hia. I kɛ hɛdɔ ngɛ ní nɛ ɔmɛ ngmae kɛ kai nyɛ kaa Mawu dloomi ɔ nya a,

¹⁶ i ba pee Kristo Yesu tsɔlɔ nɛ ma tsu ma je li ɔmɛ a he ní. Ma tsu ní kaa osɔfo kɛ fiɛ sane kpakpa a nɛ je Mawu ngɔ ɔ, konɛ Mumi Klɔuklɔu ɔ nɛ tsu ma je li ɔmɛ a he, nɛ a pee kaa bɔ nɛ a sã, nɛ maa sa Mawu hɛ mi.

¹⁷ Lɔ ɔ he ɔ, ma nyɛ ma fĩa ngɛ Kristo Yesu mi kaa i ngɛ Mawu ní tsue.

¹⁸ Ejakaa i be nɔ́ kpa ko he munyu nyɛe ma tu pe kaa Kristo gu ye munyu tumi, kɛ ní tsumi nɔ nɛ e ha ma je li ɔmɛ ba le Mawu.

¹⁹ Okadihi, kɛ nyakpɛ níhi nɛ i pee ɔ, Mumi Klɔuklɔu ɔ lɛ tsu enɛ ɔmɛ tsuo. Lɔ ɔ he ɔ, ye sikpa a tsuo, kɛ je Yerusalem hluu kɛ ya su Ilirikum ɔ, sane kpakpa a nɛ kɔɔ Kristo he ɔ sɔuu i fiɛ.

²⁰ Nɔ́ pɔtɛɛ nɛ i kɛ ma ye hɛ mi ji kaa he nɛ a fiɛ we sane kpakpa a nɛ kɔɔ Kristo he ɔ ngɛ lolo ɔ, ma ya fiɛ ngɛ lejɛ ɔ. Kɛkɛ ɔ, nihi be dee ke i ngɛ tsu fiae kɛ ngɛ nɔ kpa sisi tomi nɔ mae.

²¹ Kaa bɔ nɛ ngmami ɔ deɔ ɔ, “Nihi nɛ a jaje we e he sane ko kɛ tsɔɔ we mɛ hyɛ ɔ maa na lɛ; Nɛ nihi nɛ nui e he hyɛ ɔ maa nu sisi.”

Paulo to kaa e maa ya Roma

²² I ka si abɔ kaa ma ba nyɛ ngɔ, se enɛ ɔ he ɔ, i nyɛ we.

²³ Se amlɔ nɛ ɔ nɛ i be nɔ́ ko peemi ngɛ hiɛ ɔ ni ɔmɛ a mi hu nɛ ɔ, ma ba su nyɛ ngɔ kaa bɔ nɛ i hla nɛ ma pee be babauu ji nɛ ɔ.

²⁴ I heɔ yeɔ kaa ke kaa ma be kɛ ya Spania, ma ba gba nyɛ ngɔ nɛ i kɛ nyɛ nɛ hi si be bɔɔ, konɛ lɔ ɔ se ɔ, nyɛ ya je mi blɔ kɛ ho.

²⁵ Amlɔ nɛ ɔ lɛɛ i pue nɔ kɛ yaa Yerusalem nɛ ma ngɔ nike ní kɛ ya ha ni klɔuklɔu ɔmɛ nɛ ngɛ lejɛ ɔ.

²⁶ Ejakaa nyɛmimɛ ɔmɛ nɛ ngɛ Makedonia, kɛ Akaya a kɛ bua jɔmi bua nɔ́ ko nya nɛ a kɛ ya ye bua ohiatsɛmɛ nɛ ngɛ ni klɔuklɔu ɔmɛ a kpɛti ngɛ Yerusalem ɔ.

²⁷ Mɛ nitsɛmɛ lɛ a to kaa a maa pee enɛ ɔ lɛɛ, se anɔkuale mi ɔ, a blɔ nya ní tsumi ji kaa a ye bua mɛ. Mumi mi nike ní nɛ Mawu ha Yuda bi ɔmɛ ɔ, a kɛ ma je li ɔmɛ nɛ dla; enɛ ɔ he ɔ, e sa kaa ma je li ɔmɛ hu, he lo mi ní kpakpahi nɛ Mawu ke mɛ ɔ, a kɛ eko nɛ sɔmɔ Yuda bi ɔmɛ.

²⁸ Ke i ngɔ nike ní tsuo nɛ a bua nya a ya su mɛ ɔ, ma pue blɔ kɛ ba gu nyɛ ngɔ kɛ ho Spania ya.

²⁹ I le kaa ke i ba nyɛ ngɔ ɔ, Kristo maa gbaa nyɛ babauu.

³⁰ Ye nyɛmimɛ, i ngɔ Nyɔmtsɛ Yesu Kristo, kɛ suɔmi nɛ Mumi Klɔuklɔu ɔ haa nɔ ɔ kɛ ngɛ nyɛ pɛɛ kpae nɛ nyɛɛ piɛ ye he kɛ sɔle wawɛɛ nɛ Mawu nɛ ye bua mi.

³¹ Nyɛɛ sɔle konɛ nihi nɛ ngɛ Yudea nɛ he we Mawu yi ɔ nɛ a ko doo ye nya, nɛ jehanɛ hu, ní nɛ i yaa tsu ngɛ Yerusalem ɔ nɛ sa ni klɔuklɔu ɔmɛ a hɛ mi.

³² Kɛkɛ ɔ, ke Mawu suɔ ɔ, i kɛ bua jɔmi maa ba nyɛ ngɔ nɛ ma ba jɔɔ ye he bɔɔ.

³³ He jɔmi Mawu ɔ kɛ nyɛ tsuo nɛ hi si. Amen!