Romabi 14 - BAIBLO ALOO NGMAMI KLƆUKLƆU Ɔ

Koo kojo o nyɛmi Kristo se nyɛɛlɔ

¹ Nɔ ko nɛ hemi kɛ yemi mi wɛ ɔ, nyɛɛ kɛ lɛ ko sã nya ngɛ nɔ́ nɛ e susuɔ kaa e sa nɛ e pee, kɛ nɔ́ nɛ e ko pee he. Se mohu nyɛ he lɛ atuu kɛ ba nyɛ kpɛti.

² Nɔ nɛ heɔ yeɔ ɔ, e yeɔ nɔ́ tsuaa nɔ́; se nɔ nɛ hemi kɛ yemi mi wɛ ɔ, lɛɛ pui pɛ e yeɔ.

³ Nɔ nɛ yeɔ nɔ́ tsuaa nɔ́ ɔ, e ko gbe nɔ nɛ yi ɔ he guɛ; nɛ nɔ nɛ yeɔ pui pɛ ɔ, e ko kojo nɔ nɛ yeɔ nɔ́ tsuaa nɔ́ ɔ, ejakaa Mawu he lɛ momo.

⁴ Mɛnɔ ji mo nɛ o kojoɔ nɔ kpa tsɔlɔ? Ke tsɔlɔ nɛ ɔ maa ya nɔ, loo e maa gbee si ɔ, lɛ nitsɛ e nyɔmtsɛ ɔ lɛ maa na. Ee, Nyɔmtsɛ ɔ ma ha nɛ e ya nɔ, ejakaa Nyɔmtsɛ ɔ ngɛ he wami nɛ haa nɔ yaa nɔ saminya.

⁵ E peeɔ ni komɛ kaa ligbi ɔmɛ ekomɛ a he hia pe ekomɛ, be mi nɛ ni komɛ susuɔ kaa ligbi ɔmɛ tsuo sɔ. Nɔ tsuaa nɔ nɛ pee e juɛmi ngɛ nɔ́ nɛ ɔ he.

⁶ Nɔ nɛ susuɔ kaa ligbi komɛ a he hia pe ekomɛ ɔ, Nyɔmtsɛ ɔ hɛ mi nyami e ngɛ woe; nɛ nɔ nɛ yeɔ nɔ saisaa a, lɛ hu e ngɛ Nyɔmtsɛ ɔ hɛ mi nyami woe, ejakaa e naa Mawu si ngɛ he. Nɔ nɛ yi nɔ́ saisaa a, lɛ hu e kɛ woɔ Nyɔmtsɛ ɔ hɛ mi nyami, nɛ lɛ hu e naa Mawu si.

⁷ Wa ti nɔ ko nɔ ko hɛ ka we kɛ ha lɛ nitsɛ e he, nɛ́ nɔ ko ma gbo ha lɛ nitsɛ e he.

⁸ Ke wa hɛ ngɛ ɔ, Nyɔmtsɛ wa hɛ ngɛ kɛ ha, nɛ ke wa gbo hu Nyɔmtsɛ ɔ wa gbo kɛ ha. Lɔ ɔ he ɔ, wa hɛ ngɛ jio, wa gbo jio, Nyɔmtsɛ ɔ nihi ji wɔ.

⁹ Ejakaa Kristo gbo, nɛ e kpale ba wami mi ekohu, konɛ e pee Nyɔmtsɛ kɛ ha ni nɛmɛ nɛ a hɛ ngɛ, kɛ ni nɛmɛ nɛ gbo ɔ tsuo.

¹⁰ Lɛɛ mɛni he je moo o kojoɔ o nyɛmi? Aloo pohu mɛni he je nɛ o gbeɔ o nyɛmi he guɛ ɔ? Mawu hɛ mi wɔ tsuo wa maa da si ngɛ nɛ e maa kojo wɔ.

¹¹ Ejakaa ngmami ɔ deɔ ke, “Nyɔmtsɛ ɔ ngɛ kita kae ke Nɔ tsuaa nɔ ma kpla si ha mi Nɛ nɔ tsuaa nɔ ma gba mi ma de paa ke imi ji Mawu.”

¹² Lɛɛ wa ti nɔ tsuaa nɔ maa bu lɛ nitsɛ e he akɔtaa ngɛ Mawu hɛ mi.

Ko ha nɛ o nyɛmi Kristo se nyɛɛlɔ nɛ pee yayami

¹³ Lɔ ɔ he ɔ, nyɛ ha wa kpa wa sibi kojomi; se mohu nyɛ pee saminya nɛ nɔ ko ko pee nɔ́ ko nɛ ma ha o nyɛmi nane ma kpata, aloo nɛ ma ha e pee yayami.

¹⁴ Nɛ i ngɛ Kristo mi ɔ, i kpá si, nɛ i le kaa niye ní ko niye ní ko be nɛ he tsɔ we. Se ke nɔ ko buu niye ní ko kaa e he tsɔ we ɔ, lɛ nɛ niye ní ɔ he tsɔ we ha.

¹⁵ Ke o ye niye ní ko, nɛ lɔ ɔ kɛ haomi ba o nyɛmi nɔ ɔ, lɛɛ o sume o nyɛmi ɔ. Ko ha ní nɛ o maa ye ɔ nɛ kpata o nyɛmi nɛ Kristo gbo ngɛ e he ɔ hɛ mi.

¹⁶ Nɔ́ ko nɛ nyɛ buu nɔ́ kpakpa a, nyɛ ko ha nɛ a tu he munyu yaya.

¹⁷ Ejakaa Mawu matsɛ yemi ɔ, pi nɔ́ nɛ a maa ye, loo nɔ́ nɛ a maa nu; se mohu kaa a pee nɔ́ nɛ da, nɛ a hi si ngɛ he jɔmi mi, nɛ a na bua jɔmi. Mumi Klɔuklɔu ɔ lɛ haa ní nɛ ɔmɛ tsuo.

¹⁸ Ke nɔ ko ngɛ Kristo sɔmɔe ngɛ kikɛmɛ a blɔ nɛ ɔ nɔ ɔ, e ngɛ Mawu suɔmi nya ní pee, nɛ e saa nimli adesahi hu a hɛ mi.

¹⁹ Lɔ ɔ he ɔ, nyɛ ha waa di níhi nɛ kɛ he jɔɔmi baa, nɛ waa kɛ maa wo wa sibi he wami ɔ a se daa.

²⁰ Ko ya di niye ní se, nɛ o kpata nɔ́ ko nɛ Mawu pee hɛ mi. Nɔ́ tsuaa nɔ́ nɛ a yeɔ ɔ, e he tsɔ. Se nɔ́ ko nɛ o maa ye, nɛ ma ha o nyɛmi maa pee yayami ɔ, e sɛ kaa o ye.

²¹ Lɔ ɔ he ɔ, e hi kaa o ko ye lo, nɛ o ko nu wai, nɛ jehanɛ hu, o ko pee nɔ́ ko nɛ ma ha o nyɛmi nane ma kpata.

²² Bɔ nɛ o heɔ yeɔ ngɛ munyu nɛ ɔ he ɔ, e pee o kɛ Mawu nyɛ kpɛti sane. Ke nɔ ko pee nɔ́ ko nɛ lɛ nitsɛ e le kaa nɔ́ nɛ e pee ɔ da, nɛ e he nile hu bui lɛ fɔ ngɛ he ɔ, e naa bua jɔmi saminya.

²³ Se ke e yi mi peeɔ lɛ enyɔɔnyɔ ngɛ niye ní ko he nɛ e ye ɔ, Mawu maa bu lɛ fɔ, ejakaa e be hemi kɛ yemi; nɛ nɔ́ ko nɛ o peeɔ nɛ hemi kɛ yemi be mi ɔ, e ji yayami.