Romabi 13 - BAIBLO ALOO NGMAMI KLƆUKLƆU Ɔ

E sa kaa a bu ma nɔ yeli tue

¹ Nɔ tsuaa nɔ nɛ ba e he si ha ma nɔ yeli, ejakaa blɔ nya tsuaa blɔ nya a, Mawu lɛ haa nɔ; nɛ nɔ yeli nɛ ngɛ nɛ ɔ hu he wami nɛ a hɛɛ ɔ, Mawu lɛ ha mɛ.

² Lɔ ɔ he ɔ, nɔ tsuaa nɔ nɛ teɔ si kɛ siɔ blɔ nya nɛ ɔ, Mawu blɔ nya tomi ɔ e nɛ ngɛ si tee kɛ ngɛ woe ɔ nɛ; nɛ nɔ tsuaa nɔ nɛ peeɔ ja a, Mawu maa gbla e tue.

³ Ejakaa nɔ yeli nɛ ngɛ nɛ ɔ, e sɛ kaa nihi nɛ peeɔ nɔ́ kpakpa yeɔ mɛ gbeye, se mohu nihi nɛ peeɔ nɔ́ yaya. Anɛ o suɔ nɛ o ko ye nɔ yelɔ ɔ gbeye lo? Ke ja a, lɛɛ pee nɔ́ kpakpa; nɛ nɔ yelɔ ɔ ma je o yi.

⁴ Mawu tsɔlɔ ji lɛ, nɛ e ní tsumi ji kaa e hyɛ nɛ e hi ha mo. Se ke o pee yayami ɔ, lɛɛ o ye nɔ yelɔ ɔ gbeye; ejakaa a ha we lɛ blɔ nya nɛ ɔ yaka. Mawu tsɔlɔ ji lɛ; nɛ nihi nɛ peeɔ yayami ɔ, e kɛ mi mi la gblaa a tue ngɛ Mawu nane mi.

⁵ Enɛ ɔ he je ɔ, e sa kaa nyɛɛ ba nyɛ he si ha nɔ yeli; pi kaa nyɛ tue kɛkɛ nɛ Mawu maa gbla ke nyɛ pee we ja, se nyɛ he nile hu maa bu nyɛ fɔ.

⁶ Enɛ ɔ he je nɛ nyɛ woɔ tó ɔ nɛ. Ejakaa nɔ yeli ɔmɛ ɔ, Mawu tsɔli ji mɛ; nɛ ní tsumi pɔtɛɛ nɛ a tsuɔ ji nɛ ɔ nɛ.

⁷ Lɔ ɔ he ɔ, bɔ nɛ ji nɔ tsuaa nɔ blɔ nya a, nyɛɛ pee ha lɛ. Ma tó nɛ sa kaa nyɛɛ wo ɔ, nyɛɛ wo; tó nɛ a heɔ ngɛ weto ní he jio, nyɛɛ wo; nihi nɛ sa he si bami ɔ, nyɛɛ ba he si ha mɛ; nɛ nyɛɛ bu nihi nɛ sa bu.

Bɔ nɛ sa kaa nyɛmimɛ kɛ a sibi nɛ hi si

⁸ Nyɛ ko hɛɛ nɔ ko nɔ ko hiɔ. Hiɔ pɛ nɛ sa nɛ nyɛɛ hɛɛ nyɛ sibi ji suɔmi nɛ nyɛɛ kɛ maa suɔ nyɛ he. Ke nɔ ko suɔ e nyɛmi ɔ, kɛkɛ pe e ye mlaa a tsuo nɔ ji lɔ ɔ nɛ.

⁹ Mlaa a nɛ deɔ ke, “Koo bɔ ajuama; koo gbe nɔmlɔ; koo ju; o hɛ ko kɔ̃ nɔ́ ko nɔ,” kɛ ekpa komɛ nɛ piɛ he ɔ, lɛ tsuo kpiti pomi ji nɔ́ nɛ deɔ ke, “Suɔ o nyɛmi nɔmlɔ kaa bɔ nɛ o suɔ mo nitsɛ o he” ɔ nɛ.

¹⁰ Ke o suɔ nɔ ko ɔ, o be lɛ yayami ko yayami ko pee. Ke o suɔ o nyɛmi ɔ, kɛkɛ pe o ye mlaa a tsuo nɔ ɔ nɛ.

¹¹ Jehanɛ ɔ, nyɛ le be nɔ nɛ mi nɛ wa ngɛ nɛ ɔ, kaa e sa nɛ nyɛ hɛ nɛ tsɛ kɛ je mahe nɛ nyɛ ngɛ hwɔe ɔ mi. Ejakaa be ɔ nɛ Mawu ma he wa yi wami ɔ, amlɔ nɛ ɔ, e na wɔ haa pe kekleekle nɛ wa he ye ɔ.

¹² Nyɔ ɔ be ta kulaa, nɛ je mi miɔ nɛ e ma tsɔ. Lɔ ɔ he ɔ, nyɛ ha wa kpa níhi nɛ wa peeɔ ngɛ laami mi ɔ; wa ní peemi ɔmɛ nɛ a kpɛ́ kaa níhi nɛ ta bulɔ kɛ mia.

¹³ Nyɛ ha waa ba wa je mi saminya kaa nihi nɛ ngɛ nyɛɛe piani, se pi kaa nihi nɛ ngɛ diblii mi. Wa ko fiɛ fiɛmi yaya; wa ko de dã; wa ko fiɛ nyumu kɛ yo yakayaka fiɛmi; wa ko tsu mu ní; wa ko pɛ, nɛ wa ko je hunga.

¹⁴ Nyɛ ha Nyɔmtsɛ Yesu nɛ pee kaa tade nɛ nyɛ wo; nyɛ ko susu he lo nya níhi a he, ke pi ja a, e ma jlo nyɛ kaa nyɛ pee.