Romabi 1 - BAIBLO ALOO NGMAMI KLƆUKLƆU Ɔ

¹ Imi Paulo, Yesu Kristo tsɔlɔ kɛ bɔfo nɛ Mawu hla nɛ e tsɔ ke ma ya fiɛ sane kpakpa a nɛ i ngɛ womi nɛ ɔ ngmae.

² Mawu wo sane kpakpa a he si ngɔ to momoomo kɛ gu e gbali ɔmɛ a nɔ kaa bɔ nɛ a ngma ngɛ ngmami klɔuklɔu ɔmɛ a mi ɔ.

³ Sane kpakpa a kɔɔ e Bi, wa Nyɔmtsɛ Yesu Kristo he. A fɔ lɛ kaa adesa, nɛ David nina ji lɛ.

⁴ Se a tle lɛ si kɛ je gbeje ngɛ Mawu mumi ɔ he wami nya kɛ tsɔɔ kaa Mawu Bi ji lɛ; nɛ e ngɛ klɔuklɔu.

⁵ Kristo nɔ i gu nɛ i na dloomi, nɛ a wo mi bɔfo, konɛ e biɛ ɔ he ɔ, je ma amɛ kulaa nɛ a bu hemi kɛ yemi ɔ tue.

⁶ Nyɛ nihi nɛ nyɛ ngɛ Roma, nɛ Mawu tsɛ nyɛ nɛ nyɛ ba pee Kristo we bi ɔ, nyɛ hu nyɛ piɛ he.

⁷ I ngɛ womi nɛ ɔ ngmae ha nyɛ tsuo nɛ nyɛ ngɛ Roma nɛ Mawu suɔ nyɛ, nɛ e tsɛ nyɛ kɛ ba pee lɛ nitsɛ e ni klɔuklɔuhi ɔ. Dloomi kɛ he jɔmi nɛ je wa Tsɛ Mawu ɔ, kɛ Nyɔmtsɛ Yesu Kristo dɛ mi ɔ ha nyɛ!

Paulo sɔle kɛ na Mawu si

⁸ Kekleekle ɔ, i gu Yesu Kristo nɔ kɛ ngɛ ye Mawu ɔ si nae ngɛ nyɛ tsuo nyɛ he, ejakaa a ngɛ hemi kɛ yemi nɛ nyɛ hɛɛ mi ɔ he odase yee ngɛ je ɔ mi he tsuaa he.

⁹ Mawu ɔ nɛ i sɔmɔɔ lɛ kɛ ye tsui tsuo kɛ gu sane kpakpa a nɛ kɔɔ e Bi ɔ he ɔ fiɛmi mi ɔ ji ye we odase kaa i kaiɔ nyɛ daa nɛ i jɔɔ we ngɛ ye sɔlemi mi.

¹⁰ I kpaa pɛɛ kaa alinɔ Mawu suɔmi nya a jehanɛ lɛɛ blɔ ma bli ha mi nɛ ma nyɛ ma ba nyɛ ngɔ.

¹¹ Ejakaa ye hɛ ngɛ jae wawɛɛ ngɛ nyɛ he, nɛ i suɔ kaa ma na nyɛ, konɛ ma ba ha nyɛ mumi mi nike ní kɛ wo nyɛ he wami.

¹² I ngɛ tsɔɔe kaa i kɛ nyɛ tsuo waa ngɔ hemi kɛ yemi nɛ wa ngɛ ɔ kɛ wo wa sibi he wami.

¹³ Ye nyɛmimɛ, i suɔ nɛ nyɛɛ le kaa i pee ye yi mi si abɔ kaa ma ba slaa nyɛ, konɛ ma ná yiblii komɛ ngɛ nyɛ kpɛti kaa bɔ nɛ i ná ngɛ ma je li kpa amɛ a kpɛti ɔ. Se kɛ ba si amlɔ nɛ ɔ, i na we blɔ.

¹⁴ I ngɛ kaa nɔ ko nɛ hɛɛ nihi tsuo hiɔ, Hela bi, kɛ nihi nɛ pi Hela bi ji mɛ; ní leli kɛ, kuasiahi tsuo i hɛɛ mɛ hiɔ.

¹⁵ Enɛ ɔ he ɔ, e ngɛ ye tsui nɔ wawɛɛ kaa maa fiɛ sane kpakpa a ngɔ tsɔɔ nyɛ nihi nɛ nyɛ ngɛ Roma a hulɔ.

Mawu he wami ngɛ sane kpakpa a mi

¹⁶ Sane kpakpa a he pee we mi zo, ejakaa e ji Mawu he wami nɛ haa nɔ tsuaa nɔ nɛ heɔ yeɔ ɔ yi naa wami, Yuda bi kekle, lɔ ɔ se ɔ, ma je li hulɔ.

¹⁷ Ejakaa sane kpakpa a lɛ tsɔɔ kaa kɛ je sisije kɛ yaa si nyagbe ɔ, hemi kɛ yemi nɔ Mawu daa nɛ e kɛ buu nimli adesahi nihi nɛ da. Kaa bɔ nɛ ngmami ɔ deɔ ɔ, “Nɔ nɛ a gu hemi kɛ yemi nɔ bu lɛ nɔ nɛ da a yi ma na wami.”

Nimli adesahi tsuo yeɔ fɔ

¹⁸ Nihi nɛ peeɔ yayami, nɛ a bɔɔ musu kɛ tsiɔ anɔkuale ɔ nɛ kɔɔ Mawu he ɔ nya a, Mawu kɛ mi mi fumi nɛ jeɔ hiɔwe gblaa a tue.

¹⁹ Mawu gblaa a tue wawɛɛ, ejakaa nɔ́ nɛ sa nɛ a le ngɛ Mawu he ɔ fɔɔ si paa; Mawu nitsɛ je tsɔɔ mɛ momo.

²⁰ Kɛ je be nɛ Mawu bɔ je ɔ, e he wami nɛ ngɛ daa, kɛ e su nɛ ji níhi nɛ a nɛ́ kɛ hɛngmɛ ɔ jeɔ kpo paa ngɛ e nibɔ ní ɔmɛ a mi, nɛ adesa naa. Lɔ ɔ he ɔ, a be nya jemi ko kulaa.

²¹ A le Mawu ji nɛ, se e hɛ mi nyami nɛ sa kaa a woɔ kaa Mawu ji lɛ ɔ, a wui; nɛ a nɛ́ lɛ si hulɔ. Lɔ ɔ ji kaa nɔ́ kpakpa ko kulaa be a juɛmi mi; nɛ a kɔ we nɔ́ se, ejakaa a juɛmi mi wo diblii kpii.

²² A tsɛɔ a he ní leli, se a plɛ pee kuasiahi mohu.

²³ Mawu nɛ gbo we gblee ɔ, a wui e hɛ mi nyami bɔ nɛ sa kaa a peeɔ, se mohu a ya woɔ níhi nɛ a puɛ kaa nɔmlɔ adesa nɛ gboɔ ɔ, aloo lohwe pɛlitsɛmɛ, loo lohwe nane eywiɛɛywiɛtsɛmɛ, loo lohwehi nɛ sãã si mohu a hɛ mi nyami.

²⁴ Lɔ ɔ he ɔ, Mawu ngmɛɛ a he, nɛ a ya nyɛɛ akɔnɔ yaya nɛ ngɛ a tsui nɔ ɔ se; nɛ a kɛ a sibi tsu mu níhi kɛ pue a nɔmlɔ tso ɔ hɛ mi si.

²⁵ Anɔkuale ɔ nɛ a le ngɛ Mawu he ɔ, a he we yi; lakpa níhi mohu a heɔ yeɔ. Níhi nɛ Mawu bɔ ɔ, lɔ ɔmɛ mohu a jaa, nɛ a sɔmɔɔ. Bɔlɔ ɔ nɛ sa kaa a je e yi kɛ ya neneene ɔ, a ja we lɛ, nɛ a sɔmɔ we lɛ hulɔ. Amen!

²⁶ Enɛ ɔ he je ɔ, Mawu ngmɛɛ a he, nɛ a ya nyɛɛ akɔnɔ ní yayahi nɛ ngɛ zo a se. A yi ɔmɛ tete po kɛ a sibi peeɔ níhi nɛ pi ja nɛ Mawu to.

²⁷ Nyumu ɔmɛ hu ja nɔuu, a hla we yihi a se blɔ. Se ke akɔnɔ yaya te si ngɛ a mi ɔ, a kɛ a sibi nyumuhi mohu ya naa bɔmi. Nyumuhi kɛ a sibi nyumuhi tsu zo níhi, nɛ tue gblami nɛ sa mɛ kaa nihi nɛ bɔ musu ɔ, a ná ngɔ wo a he mi.

²⁸ Jehanɛ ɔ hu, akɛnɛ nimli nɛ ɔmɛ bui a he kaa e sa mɛ kaa a leɔ Mawu ɔ, Mawu hu ngmɛɛ a he ngɔ ha juɛmi nɛ sɛ́, konɛ a pee níhi nɛ sɛ́.

²⁹ A peeɔ yi wu tso ní, kɛ yayami slɔɔtoslɔɔtohi. A jeɔ hunga, a pueɔ muɔ si, a pɛɔ, a sisiɔ nɔ, nɛ a toɔ a sibi a he ga yaya;

³⁰ a yeɔ sieku, nɛ a sume Mawu sane; a bui nɔ, a woɔ a he nɔ, a fĩaa, a toɔ nɔ́ yaya he ga, nɛ a bui a fɔli;

³¹ a he nile gbo; ke a wo si ɔ, a yi nɔ, nɛ a nɛ́ mɔbɔ.

³² A le kaa Mawu de ke nihi nɛ tsuɔ ní nɛ ɔmɛ ɔ, a sa gbenɔ, se kɛ̃ pi kaa mɛ nitsɛmɛ a peeɔ yayami nɛ ɔmɛ kɛkɛ, se mohu a jeɔ nihi nɛ peeɔ ní nɛ ɔmɛ ɔ a yi.