Obadia 1 - BAIBLO ALOO NGMAMI KLƆUKLƆU Ɔ

¹ Obadia gbami ɔ ji nɛ ɔ nɛ. Nɔ́ nɛ Nyɔmtsɛ Yawɛ de ngɛ Edom ma a he ji nɛ ɔ nɛ. Wa nu sɛ gbi ko kɛ je Yawɛ ngɔ; e tsɔ bɔfo ko ke e ya de je ma amɛ tsuo ke, “Nyɛɛ te si! Nyɛ ha waa kɛ Edom ya hwu ta!” Mal 1.2-5

Yawɛ maa gbla Edom tue

² Yawɛ ngɛ Edom dee ke, “Ma ba mo si ngɛ je ma amɛ a kpɛti, nɛ o he guɛ ma gbo.

³ O he nɔ womi ɔ sisi mo. O matsɛ ma a, a fia gbogbo kɛ wo he ngɛ tɛ sa nɔ; o hi he ngɛ yo ɔmɛ a nɔ tsitsaa, lɔ ɔ he ɔ, o deɔ ngɛ o yi mi ke, ‘Mɛnɔ po ma nyɛ maa gbla mi kɛ ba zugba?’

⁴ O ya pee o hi he ngɛ hiɔwe lokoo kaa kɔle tsu, nɛ e peeɔ mo kaa dodoehi a kpɛti nɛ o ngɛ. Se kɛ ɔ, ma gbla mo kɛ ba zugba.” Yawɛ lɛ de.

⁵ “Ke juli ba jumi nyɔ mi ɔ, a muɔɔ níhi bɔ nɛ a ma nyɛ. Ke nihi bua wai yiblii nya a, a siɔ bɔɔ ko kɛ̃. Se o he nyɛli ɔmɛ lɛɛ, a kpata o nɔ́ tsuaa nɔ́ hɛ mi.

⁶ Esau nina, a ha o june.

⁷ Ni nɛmɛ nɛ o kɛ mɛ peeɔ kake kɛ hwuɔ ta a, a mlɔɔ mo nɛ a fie mo kɛ je o ma a mi. Ni nɛmɛ nɛ kɛ mo ngɛ saminya a, a mlɔɔ mo nɛ a ye o nɔ. Huɛmɛ nɛ kɛ mo yeɔ ní ɔ hu tsɔ mo klama, nɛ a deɔ ke? ‘Jije a hɛ mi tɛ̃mi ɔ ngɛ?’

⁸ “Ligbi nɛ ma gbla Edom tue ɔ, ma kpata e ní leli ɔmɛ a hɛ mi, nɛ ma ha a ní lemi ɔ tsuo se maa po.

⁹ Sawale maa nu Teman ta hwuli kpanaa amɛ, nɛ a maa gbe Edom ta bulɔ tsuaa ta bulɔ.” Mawu lɛ de.

Nɔ́ he je nɛ a maa gbla Edom tue

¹⁰ “O nyɛmimɛ ji Yakob nina. Se o wa mɛ yi mi, nɛ o gbe mɛ. Lɔ ɔ he ɔ, a ma kpata o hɛ mi, nɛ a ma pue o hɛ mi si kɛ ya neneene.” Mawu lɛ de.

¹¹ “Benɛ he nyɛli ɔmɛ ba ywia agbo ɔmɛ ɔ, o daa si ngɛ se banee. Nihi nɛ ba muɔ Yerusalem june ɔmɛ kɛ ho nɛ a ya dla ngɔ ha a he ɔ, o ngɛ kaa mɛ pɛ.

¹² Amanehlu nɛ o nyɛmimɛ Yuda bi ɔmɛ na a, e sɛ nɛ o bua jɔɔ he. E sɛ kaa o naa bua jɔmi ngɛ ligbi nɛ a kpata a hɛ mi ɔ nɔ. E sɛ nɛ o tuɔ he nɔ womi munyu ngɛ a haomi ligbi ɔ nɔ.

¹³ E sɛ kaa o sɛɔ ye we bi ɔmɛ a ma a mi ngɛ a we amanehlu be mi E sɛ nɛ o ya piɛɔ nihi a he kɛ nyaa ligbi ɔ nɛ amanehlu ba Yuda nɔ ɔ. E sɛ nɛ o ya haa e nihi ligbi ɔ nɛ amanehlu ba e nɔ ɔ.

¹⁴ E sɛ kaa o ya daa blɔ gbla nya nɛ o kpataa nihi nɛ ngɛ fo tue ɔ a hɛ mi. E sɛ kaa o kɛ ni nɛmɛ nɛ piɛ ngɛ se ɔ haa a he nyɛli ngɛ a fimi ligbi nɔ.

Mawu maa kojo je ma amɛ

¹⁵ “Be ɔ su ta nɛ imi Yawɛ, ma kojo je ma amɛ tsuo. Edom, nɔ́ nɛ o pee ɔ, a kɛ maa pee mo. O ní peemi ní ɔmɛ maa kpale ba bu o yi mi.” Mawu lɛ de.

¹⁶ “Ye we bi ɔmɛ na nɔ ngɛ yo klɔuklɔu ɔ nɔ. Se je ma amɛ nɛ bɔle mɛ ɔ, maa na nɔ kulaa pe mɛ, nɛ a maa ta zugba a nɔ.” Mawu lɛ de.

Israel manye yemi

¹⁷ “Se a ma he ni komɛ a yi wami ngɛ Zion yo ɔ nɔ, nɛ lejɛ ɔ maa pee klɔuklɔu. Yakob we ɔ nine maa su a blɔ fa mi ní ɔmɛ a nɔ ekohu.” Mawu lɛ de.

¹⁸ “Yakob we ɔ maa pee kaa la; Yosef we ɔ maa pee kaa la lilɛ. Nɛ a maa sã Esau we ɔ kaa a sãã blɛfo tso gbigbli. Esau nina ko be piɛe.” Imi, Yawɛ lɛ i de.

¹⁹ “Nihi nɛ je Yuda leneyi je ɔ maa ngɔ Edom; ni nɛmɛ nɛ je bonyoku je yoku ɔmɛ a nɔ ɔ maa ngɔ Filisti bi ɔmɛ a zugba a. A maa ngɔ Efraim kɛ Samaria zugba amɛ; nɛ Benyamin wɛtso ɔ maa ngɔ Gilead.” Mawu lɛ de.

²⁰ “Israel bi nɛ a nuu kɛ ho ɔ maa kpale ba ngɔ Kanaan bi a zugba a kɛ yaa si Zarefat. Ni nɛmɛ nɛ a nuu kɛ je Yerusalem kɛ ho Sefarad ya a maa ngɔ Yuda leneyi je ma amɛ.

²¹ Yerusalem manye yeli ɔmɛ ma ya tua Edom, nɛ a maa ye ma a nɔ. Nɛ Yawɛ nitsɛ maa pee a matsɛ.” Mawu lɛ de.