Ni Tsumi 8 - BAIBLO ALOO NGMAMI KLƆUKLƆU Ɔ

¹ Stefano gbemi ɔ ngɔ Saulo nya. Jamɛ a ligbi ɔ nɔuu ɔ, a bɔni asafo ɔ nɛ ngɛ Yerusalem ɔ yi mi wami wawɛɛ. Nihi nɛ he ye ɔ tsuo gbɛ fĩa Yudea, kɛ Samaria kpokpa amɛ a nɔ; nɛ e piɛ bɔfo ɔmɛ pɛ.

Saulo wa asafo ɔ yi mi

² Nyumuhi Mawu gbeye yeli komɛ ya dla Stefano gbogboe ɔ, nɛ a nyɛ ya ha lɛ kɛ awe nyami.

³ Se Saulo lɛɛ e ka kaa e ma kpata asafo ɔ hɛ mi. E yaa wehi a mi, nɛ e ya nuɔ nyumuhi kɛ yihi, nɛ e ya woɔ mɛ tsu.

A fiɛ sane kpakpa a ngɛ Samaria

⁴ Nihi nɛ gbɛ fĩa a ya kpa si nɛ a fiɛ sane kpakpa a.

⁵ Filipo ya Samaria ma nguaa amɛ eko mi, nɛ e ya fiɛ Kristo he sane ɔ ngɔ tsɔɔ mɛ.

⁶ Benɛ nimli babauu ɔ bu Filipo tue, nɛ a na okadihi nɛ e pee ɔ, mɛ tsuo a ngɔ e munyu ɔ.

⁷ Nihi fuu nɛ mumi yayamihi ngɛ a mi ɔ, mumi ɔmɛ kpa ngmlaa wawɛɛ kɛ je a mi. A tsa nihi nɛ hule pue si, kɛ glɔtsɛmɛ babauu.

⁸ Lɔ ɔ he ɔ, bua jɔmi babauu ba ma a mi.

⁹ Nyumu ko nɛ a tsɛɛ lɛ Simon ngɛ ma a mi lejɛ ɔ. E tsuɔ kunya kɛ peeɔ níhi nɛ peeɔ Samaria bi ɔmɛ nyakpɛ nitsɛnitsɛ. E peeɔ e he kaa nɔmlɔ nguaa ji lɛ.

¹⁰ Lɔ ɔ he ɔ, ni wawi, kɛ ni nguahi tsuo buɔ lɛ, nɛ a deɔ ke, “Nɔmlɔ nɛ ɔ hɛɛ Mawu a he wami nɛ tsɛɛ kpetekpleenyɛ ɔ.”

¹¹ Niinɛ, kunya yemi nɛ ɔ nɛ haa ni ɔmɛ a nya kpɛɛ a he ɔ, Simon je sisi kɛ.

¹² Se benɛ Filipo fiɛ sane kpakpa a nɛ kɔɔ Mawu matsɛ yemi ɔ, kɛ Yesu Kristo he ɔ tsɔɔ ni ɔmɛ ɔ, a sɔle, nyumuhi kɛ yihi tsuo nɛ he ye ɔ.

¹³ Simon nitsɛ hu he ye, nɛ a sɔle lɛ. Lɔ ɔ se ɔ, e kɛ Filipo bɔni nyɛɛmi. Benɛ Simon na okadihi, kɛ he wami ní nguanguahi nɛ a pee ɔ, e nya kpɛ e he.

¹⁴ Bɔfo ɔmɛ nɛ ngɛ Yerusalem ɔ na le kaa Samaria bi ɔmɛ pɛtɛ Mawu munyu ɔ he, lɔ ɔ he ɔ, a tsɔ Petro kɛ Yohane kɛ ya a ngɔ.

¹⁵ Benɛ a ba lejɛ ɔ, a ba sɔle ha nihi nɛ he ye ɔ, konɛ a na Mumi Klɔuklɔu ɔ.

¹⁶ Ejakaa Mumi ɔ bɛ a ti nɔ ko nɔ lolo; se a sɔle mɛ ngɛ Nyɔmtsɛ Yesu biɛ mi kɛkɛ.

¹⁷ Jehanɛ, Petro kɛ Yohane ngɔ a nine pue ni ɔmɛ a nɔ, nɛ a na Mumi Klɔuklɔu ɔ.

¹⁸ Simon na kaa bɔfo ɔmɛ a nine nɛ a ngɔ pue nihi nɛ he ye ɔ a nɔ ɔ ha nɛ a na Mumi Klɔuklɔu ɔ. Lɔ ɔ he ɔ, e je sika kɛ ha Petro kɛ Yohane,

¹⁹ nɛ e ke, “Nyɛ ha imi hu kikɛmɛ a he wami nɛ ɔ, konɛ nɔ tsuaa nɔ nɛ ma ngɔ ye nine kɛ pue e nɔ ɔ, e na Mumi Klɔuklɔu ɔ.”

²⁰ Se Petro de lɛ ke, “O kɛ o sika a tsuo hɛ mi nɛ kpata, ejakaa o susuu kaa Mawu nɔke nɔ́ ɔ, sika a kɛ heɔ!

²¹ O be blɔ nya, loo blɔ fa mi nɔ́ ko ngɛ wa ní tsumi nɛ ɔ mi; ejakaa o tsui mi dɛ ngɛ Mawu hɛ mi.

²² Pia o he mohu ngɛ nɔ́ yayami nɛ o susu ɔ he, nɛ o kpa Nyɔmtsɛ ɔ pɛɛ kaa alini a maa ngɔ yayami nɛ o susu ɔ ngɔ pa mo lo.

²³ Ejakaa i na kaa hɛkɔ hyi mo tɔ kaa bɔ nɛ duɔ kuɔɔ nɔ ɔ, nɛ yayami bɔ mo pã.”

²⁴ Kɛkɛ nɛ Simon de Petro kɛ Yohane ke, “I kpa nyɛ pɛɛ, nyɛ kpa Nyɔmtsɛ ɔ pɛɛ ha mi, konɛ níhi nɛ nyɛ de nɛ ɔmɛ ekoeko ko ba ye nɔ.”

²⁵ Benɛ Petro kɛ Yohane ye odase, nɛ a fiɛ Nyɔmtsɛ ɔ munyu ɔ ngɔ tsɔɔ ni ɔmɛ se ɔ, a kpale a se kɛ ho Yerusalem ya. Benɛ a kpale kɛ yaa a, a fiɛ sane kpakpa a ngɛ Samaria kɔpehi fuu a mi.

Filipo kɛ Etiopia sɔmɔlɔ nɔkɔtɔma a

²⁶ Nyɔmtsɛ ɔ bɔfo ko ba de Filipo ke, “Dla o he nɛ o ya leneyi je, nɛ o nyɛɛ blɔ nɛ je Yerusalem kɛ yaa Gaza a nɔ.” (A nyɛɛ we blɔ nɛ ɔ nɔ hu.)

^27-28 Filipo dla e he, nɛ e ho. Benɛ e yaa a, e na Etiopia manyɛ ɔ tsɔlɔ nɔkɔtɔma ko nɛ a puɛ lɛ. Lɛ nɛ e hyɛɛ manyɛ ɔ juetli nɔ. Nyumu nɛ ɔ ya Yerusalem ya ja Mawu, nɛ e kpale kɛ yaa e ma mi ngɛ e zugba lɛ mi. Benɛ e yaa a tsuo e ngɛ gbalɔ Yesaya womi ɔ kanee.

²⁹ Kɛkɛ nɛ Mumi Klɔuklɔu ɔ de Filipo ke, “Nyɛɛ kɛ ya lɛ nɛ ɔ he haa.”

³⁰ Kɛkɛ nɛ Filipo sa fo kɛ ya na lɛ ɔ, nɛ e nu nɛ nyumu ɔ ngɛ gbalɔ Yesaya womi ɔ kanee. Filipo bi lɛ ke, “Nɔ́ nɛ o ngɛ kanee ɔ, anɛ o ngɛ sisi nue?”

³¹ Sɔmɔlɔ nɔkɔtɔma a he nɔ ke, “Kɛ ma pee kɛɛ nɛ ma nu sisi kaa ja nɔ ko tsɔɔ mi?” Kɛkɛ nɛ e de Filipo ke e kuɔ lɛ ɔ nɛ e ba hi si ngɛ e kasa nya.

³² Ngmami ɔ mi he nɛ e ngɛ kanee ɔ ji nɛ ɔ nɛ: “A ngɔ lɛ kɛ ho kaa jijɔ nɛ a yaa gbe! Nɛ bɔ nɛ jijɔ bi peeɔ kpoo ngɛ e he bwɔmi sãlɔ hɛ mi ɔ, ja nɔuu e pee. nɛ e kpɛ we e kuɔ si.

³³ A wa lɛ yi mi; a ye lɛ sane yaya. Mɛnɔ ma nyɛ maa gba e nina he sane? Ejakaa a po e wami nɔ kpiti ngɛ je ɔ mi.”

³⁴ Sɔmɔlɔ nɔkɔtɔma a bi Filipo ke, “I kpa mo pɛɛ, mɛnɔ he munyu gbalɔ ɔ ngɛ tue ɔ? Lɛ nitsɛ e he, loo nɔ kpa?”

³⁵ Kɛkɛ nɛ Filipo wo e nya nɔ nɛ e bɔni munyu tumi. E je sisi kɛ ngmami ɔ nɛ sɔmɔlɔ nɔkɔtɔma a ngɛ kanee ɔ, nɛ e gba Yesu he sane kpakpa a.

³⁶ Benɛ a ngɛ blɔ ɔ nɔ kɛ yaa a, a ya su he ko nɛ nyu ngɛ; kɛkɛ nɛ sɔmɔlɔ nɔkɔtɔma a de ke, “O nɛ nyu; mɛni maa tsi ye sɔlemi nya?” [

³⁷ Filipo de lɛ ke, “Ke o heɔ yeɔ kɛ o tsui tsuo ɔ, lɛɛ blɔ ngɛ he faa.” E he nɔ ke, “I heɔ yeɔ kaa Yesu Krsito ji Mawu Bi ɔ nɛ.”]

³⁸ Kɛkɛ nɛ sɔmɔlɔ nɔkɔtɔma a fa nɛ zugba lɛ ɔ da si. E kɛ Filipo tsuo kple si, nɛ a ho nyu ɔ mi ya; nɛ Filipo sɔle lɛ.

³⁹ Benɛ a je nyu ɔ mi ɔ, Nyɔmtsɛ ɔ Mumi ɔ ngɔ Filipo kɛ je. Sɔmɔlɔ nɔkɔtɔma a nɛ́ lɛ hu; se e pue nɔ kɛ ho kɛ nyami babauu.

⁴⁰ Filipo ya je Azoto. E fiɛ sane kpakpa a ngɛ ma amɛ tsuo a mi hluu kɛ ya su Kaisarea.