Ni Tsumi 6 - BAIBLO ALOO NGMAMI KLƆUKLƆU Ɔ

Asafo ɔ hla bɔfo ɔmɛ a he piɛli kpaago

¹ Jamɛ be ɔ mi benɛ kaseli ɔmɛ a he ba bɔni hiɛmi ɔ, a kpɛti nihi nɛ tuɔ Hela gbi ɔ ba te si kɛ wo ni nɛmɛ nɛ tuɔ Hebri gbi ɔ ke a hyɛ we mɛ nihi nɛ tuɔ Hela gbi ɔ a yalɔyi ɔmɛ bɔ nɛ sa; sika nɛ a haa yalɔyihi daa ligbi nɛ a kɛ hyɛɛ a he nɔ ɔ, mɛɛ lɛɛ a nine sui a nɔ́ nɔ.

² Lɔ ɔ he ɔ, bɔfo nyɔngma kɛ enyɔ ɔmɛ tsɛ nihi nɛ he Yesu ye ɔ tsuo kɛ ba, nɛ a de mɛ ke, “E sɛ kaa wa siɔ Mawu munyu ɔ fiɛmi se, nɛ wa ya yeɔ niye ní sane.

³ Lɔ ɔ he ɔ, wa nyɛmimɛ, nyɛɛ hla nyɛ kpɛti ni kpaago, nihi nɛ ngɛ biɛ kpakpa; nihi nɛ Mumi Klɔuklɔu ɔ hyi mɛ tɔ, nɛ a le ní hulɔ, konɛ waa ngɔ mɛ ngɔ to ní tsumi nɛ ɔ nya.

⁴ Wɔɔ lɛɛ wa maa ngɔ wa be tsuo kɛ pee sɔlemi, nɛ waa fiɛ Mawu munyu ɔ.”

⁵ Nɔ́ nɛ bɔfo ɔmɛ de ɔ, asafo ɔ kplɛɛ nɔ, nɛ a hla Stefano, nyumu ko nɛ ngɛ hemi kɛ yemi, nɛ Mumi Klɔuklɔu ɔ ngɛ e mi saminya a, kɛ Filipo, kɛ Prokoro, kɛ Nikanor, kɛ Timon, kɛ Parmena, kɛ Nikolao, ma je no nɛ je Antiokia nɛ tsake ba sɛ Yuda bi a jami ɔ mi be ko ɔ.

⁶ A kɛ mɛ ba da bɔfo ɔmɛ a hɛ mi; kɛkɛ nɛ bɔfo ɔmɛ sɔle, nɛ a kɛ a nine pue a nɔ.

⁷ Mawu munyu ɔ ya nɔ nɛ e gbɛ fĩa saminya. Nihi nɛ he ye ɔ a he ba hiɛ babauu ngɛ Yeruslem, nɛ Yuda osɔfo ɔmɛ a kpɛti nihi saii nitsɛ he Mawu munyu ɔ ye.

A nu Stefano

⁸ Mawu dloo Stefano saminya, nɛ e ha lɛ he wami nɛ e kɛ pee nyakpɛ ní nguanguahi ngɛ ma a mi.

⁹ Kɛkɛ nɛ Kirene kɛ Aleksandria bi komɛ nɛ je kpe he nɛ a tsɛɛ “Nihi nɛ ye a he” ɔ te si wo Stefano. Yuda bi komɛ hu nɛ je Kilikia, kɛ Asia a, ba piɛ nimli nɛ ɔmɛ a he, nɛ a kɛ lɛ sã nya.

¹⁰ Se Mumi Klɔuklɔu ɔ ha Stefano nile, nɛ benɛ e tu munyu ɔ, a nyɛ we nya nɛ a da.

¹¹ Lɔ ɔ he ɔ, ni ɔmɛ ya wo ni komɛ a yi mi, nɛ a ba de ke, “Wa nu nɛ e tu munyu kɛ bɔ musu kɛ si Mose kɛ Mawu.”

¹² Blɔ nɔ nɛ ni ɔmɛ gu kɛ sú ma mi bi ɔmɛ, kɛ ma nimeli ɔmɛ, kɛ mlaa tsɔɔli ɔmɛ kɛ wo Stefano he ji nɛ ɔ nɛ. Ni ɔmɛ bu kɛ ba pue Stefano nɔ, nɛ a nu lɛ kɛ ho kpe ngua a hɛ mi ya.

¹³ Jehanɛ a kɛ lakpa odase yeli komɛ ba, nɛ a ba de ke, “Daa nɛ ɔ, kikɛmɛ a nɔmlɔ nɛ ɔ tuɔ munyu kɛ siɔ wa sɔlemi we klɔuklɔu ɔ, kɛ Mose mlaa a.

¹⁴ Wa nu nɛ e de ke, Yesu, Nazaret no ɔ, maa ku sɔlemi we nɛ ɔ, nɛ e ma tsake blɔ nyahi nɛ Mose ngɔ ha wɔ ɔ.”

¹⁵ Kpe ngua a mi bi ɔmɛ tsuo dɔ a hɛ ngmɛ ngɔ to Stefano nɔ, nɛ a na kaa e hɛ mi pee kaa Mawu bɔfo hɛ mi.