Ni Tsumi 5 - BAIBLO ALOO NGMAMI KLƆUKLƆU Ɔ

Anania kɛ Safira

¹ Se nyumu ko nɛ a tsɛɛ lɛ Anania, kɛ e yo Safira ya jua a weto ní ko.

² Anania kɛ sika nɛ a na a mi fa ko to, nɛ e yo ɔ hu le he nɔ ko. Nɛ e kɛ sika a mi fa nɛ piɛ ba ha bɔfo ɔmɛ.

³ Kɛkɛ nɛ Petro de lɛ ke, “Anania, mɛni he je Satan ba sɛ o mi nɛ o ye Mumi Klɔuklɔu ɔ lakpa kikɛ nɛ ɔ? Sika nɛ o na benɛ o jua zugba a, o ngɔ fa ngɔ to, pi jã?

⁴ Benɛ zugba a ngɛ ɔ, o nɔ́; nɛ benɛ o jua a hu sika a mo nitsɛ o nɔ́. Mɛni he je o to o yi mi, nɛ o pee yayami kaa kikɛ nɛ ɔ? Nɔ́ nɛ o pee nɛ ɔ, pi adesa nɛ o ye lakpa, se Mawu!”

⁵ Benɛ Anania nu munyu nɛ ɔ, e tsɔ fia si, nɛ e gbo. Nihi tsuo nɛ nu sane nɛ ba a ye gbeye wawɛɛ nitsɛ.

⁶ Kɛkɛ nɛ nihewi ɔmɛ ba, nɛ a ngɔ nɔ́ kɛ blaa e gbogboe ɔ, nɛ a ya pu lɛ.

⁷ Maa pee ngmlɛfia etɛ se ɔ, e yo ɔ hu ba lejɛ ɔ; lɛɛ e li sane nɛ ba.

⁸ Petro bi lɛ ke, “De mi anɔkuale ɔ; anɛ bɔ nɛ o kɛ o huno ɔ nyɛ jua zugba a ha ji nɛ ɔ?” Safira he nɔ ke, “Ee, sika a tsuo ji ja a nɛ.”

⁹ Jehanɛ Petro bi lɛ ke, “Kɛ pee kɛɛ nɛ nyɛ pee nyɛ nya kake kɛ ye Nyɔmtsɛ ɔ Mumi ɔ lakpa a, nyɛ susu kaa nyɛ maa ye nyɛ he lo? Hyɛ, nihi nɛ ya pu o huno ɔ, mɛ lɛ a kpale kɛ ma a nɛ; a ma wo mo hu kɛ ho!”

¹⁰ Amlɔ nɔuu ɔ, e tsɔ fia si ngɛ Petro nane nya, nɛ e gbo. Benɛ nihewi ɔmɛ ba su we ɔ mi ɔ, a na kaa e gbo; kɛkɛ nɛ a wo lɛ kɛ ho, nɛ a ya pu lɛ ngɛ e huno ɔ kasa nya.

¹¹ Asafo ɔ, kɛ ni kpahi tsuo nɛ nu sane nɛ ɔ ye gbeye wawɛɛ nitsɛ.

Okadihi kɛ nyakpɛ nihi

¹² Mawu pee okadihi, kɛ nyakpɛ níhi babauu kɛ gu bɔfo ɔmɛ a nɔ ngɛ ni ɔmɛ a kpɛti. He nɛ a pɔɔ kpemi ngɛ ji Salomo Ablanaa a nɔ.

¹³ E ngɛ mi kaa nihi tuɔ a he munyu kpakpa mohu, se e bɛ nɔ kpa ko yi mi kaa e ya piɛ a he.

¹⁴ Se kɛ̃ ɔ, nyumuhi, kɛ yihi babauu nɛ heɔ Nyɔmtsɛ ɔ yeɔ ɔ ba piɛ asafo ɔ he.

¹⁵ Nyakpɛ níhi nɛ bɔfo ɔmɛ pee he je ɔ, ke pee ɔ, nihi ngɔɔ hiɔtsɛmɛ kɛ a sa kɛ baa gbɛjegbɛ tue, konɛ ke Petro bee ɔ, e nini kɛkɛ po nɛ nɔ a nɔ.

¹⁶ Nihi jeɔ mahi nɛ bɔle Yerusalem ɔ a mi kɛ baa. A kɛ hiɔtsɛmɛ, kɛ nihi nɛ mumi yayamihi ngɛ mɛ haoe ɔ baa, nɛ bɔfo ɔmɛ tsaa hiɔtsɛmɛ ɔmɛ, nɛ a hiaa mumi yayami ɔmɛ hulɔ.

A wa bɔfo ɔmɛ yi mi

¹⁷ Jehanɛ osɔfo nɔkɔtɔma pe kulaa a, kɛ e nimeli ɔmɛ, kɛ Saduki bi ɔmɛ nɛ hunga sa mɛ ɔ te si kɛ hɛdɔ wawɛɛ

¹⁸ kɛ wo bɔfo ɔmɛ, nɛ a ya wo mɛ tsu.

¹⁹ Se nyɔ mi ɔ, Nyɔmtsɛ ɔ bɔfo ba bli tsu ɔ nya sinya amɛ, nɛ e je mɛ; nɛ e de mɛ ke,

²⁰ “Nyɛɛ ya sɔlemi we ɔ nɛ nyɛ ya jaje kikɛmɛ a si himi he nɛ ɔ mi munyu ɔmɛ tsuo ngɔ tsɔɔ ma a.”

²¹ Bɔfo ɔmɛ pee bɔ nɛ a de mɛ ɔ. A pue nɔ mɔtu kɛ ho sɔlemi we ɔ ya ya tsɔɔ ní. Jehanɛ osɔfo nɔkɔtɔma pe kulaa a, kɛ e nikɔtɔma amɛ tsɛ Yuda ma nimeli ɔmɛ nɛ a ngɛ kpe ngua a mi ɔ kpe. A tsɔ nihi kɛ ya he nɛ a wo bɔfo ɔmɛ tsu ngɛ ɔ, konɛ a ya ngɔ mɛ kɛ ba.

²² Se benɛ tsɔli ɔmɛ su lejɛ ɔ, a nɛ bɔfo ɔmɛ ngɛ tsu ɔ mi. Lɔ ɔ he ɔ, a kpale a se nɛ a ba bɔ kpe ngua a mi bi ɔmɛ amaniɛ ke,

²³ “Benɛ wa ya a, tsu ɔ nya ngɛ ngangɛ. A ngmɛ mi kpɛii, nɛ buli ɔmɛ hu pee klaalo kɛ daa si ngɛ sinya a nya. Se benɛ wa bli ɔ, wa nɛ bɔfo ɔmɛ a ti nɔ ko nɔ ko!”

²⁴ Benɛ osɔfo nikɔtɔma amɛ, kɛ sɔlemi we ɔ asafoatsɛ ɔ nu kikɛmɛ a munyu nɛ ɔ, a hɛ mi pee mɛ yaa, nɛ a li nɔ nɛ a ma de.

²⁵ Kɛkɛ nɛ nɔ ko ba de mɛ ke, “Nyɛ le nɔ́ ko! Ni ɔmɛ nɛ nyɛ nuu wo tsu ɔ, a daa si ngɛ ma a ní tsɔɔe ngɛ sɔlemi we ɔ.”

²⁶ Kɛkɛ nɛ asafoatsɛ ɔ, kɛ e we bi ɔmɛ ya ngɔ bɔfo ɔmɛ kɛ ba. A pee we mɛ soisoi, ejakaa a ngɛ gbeye yee kaa ma a maa fia mɛ tɛ.

²⁷ A ngɔ bɔfo ɔmɛ kɛ ba da kpe ngua a hɛ mi, nɛ osɔfo nɔkɔtɔma pe kulaa a ta a nya mi.

²⁸ E bi mɛ ke, “Tse wa fia nyɛ tue mi veveeve ke nyɛ ko ngɔ Yesu biɛ kɛ tsɔɔ ní hu? Se nyɛɛ hyɛ nɔ́ nɛ nyɛ pee! Nyɛ ha nɛ nihi tsuo nɛ ngɛ Yerusalem ɔ nu nyumu nɛ ɔ he sane nɛ nyɛ ngɛ hlae nɛ nyɛɛ tsɔɔ kaa wɔ nɛ wa gbe lɛ!”

²⁹ Petro, kɛ bɔfo kpa amɛ he nɔ ke, “E sa kaa waa bu Mawu mohu tue, se pi nimli.

³⁰ Yesu nɛ nyɛ sɛu ngɛ tso nɔ nɛ nyɛ gbe lɛ ɔ, wa nɛmɛ a Mawu ɔ tle lɛ si.

³¹ Mawu wo e nɔ, nɛ e ngɔ lɛ kɛ to e hiɔ nɔ, nɛ e pee lɛ hɛ mi nyɛɛlɔ, kɛ kpɔlɔ, konɛ Israel bi nɛ a ná he blɔ nɛ a tsake a tsui, nɛ a ngɔ a he yayami ɔmɛ kɛ pa mɛ.

³² Wa ngɛ kikɛmɛ a sane nɛ ɔmɛ a he odase yee; nɛ Mumi Klɔuklɔu ɔ nɛ Mawu kɛ dloo nihi nɛ buɔ lɛ tue ɔ ngɛ odase yee ja nɔuu.”

³³ Benɛ kpe ngua a mi bi ɔmɛ nu munyu nɛ ɔ, e wo a mi mi la wawɛɛ nitsɛ, nɛ e pee mɛ kaa a gbe bɔfo ɔmɛ.

³⁴ Se a ti nɔ kake nɛ a tsɛɛ lɛ Gamaliel ɔ te da si. Farisi no, kɛ mlaa tsɔɔlɔ nɛ ma a buu saminya ji lɛ. Gamaliel fa ke a je bɔfo ɔmɛ kpo bɔɔ;

³⁵ nɛ e de sihi he ɔ ke, “Sane nɛ nyɛɛ kɛ nimli nɛ ɔmɛ ngɛ yee nɛ ɔ, nyɛɛ hyɛ saminya.

³⁶ Nyɛ kai kaa be bɔɔ ko pɛ ji nɛ nɛ Teuda wo e he nɔ ke nɔ ko ji lɛ, nɛ nyumuhi maa pee lafa eywiɛ ya nyɛɛ e se. Se a gbe lɛ, nɛ e we bi ɔmɛ tsuo gbɛ fĩa nɛ a kpe ɔ nya ya hɛ si.

³⁷ E se ɔ, Yuda, Galilea no ɔ hu ba benɛ a ngɛ nihi kanee ɔ. E ba gbla nihi kɛ nyɛɛ e se, se lɛ hu e hɛ mi kpata, nɛ e we bi ɔmɛ tsuo gbɛ fĩa.

³⁸ Lɔ ɔ he ɔ, sane nɛ ɔ mi hu, ga nɛ i ngɛ nyɛ woe ji nyɛ ko pee nimli nɛ ɔmɛ nɔ́ ko; nyɛɛ ngmɛɛ a he nɛ a ho. Ke yi mi nɛ a to, kɛ nɔ́ nɛ a ngɛ tsue nɛ ɔ, adesa dɛ mi nɛ e je ɔ, e be he ko sue.

³⁹ Se ke Mawu dɛ mi nɛ e je ɔ, nyɛ be Mawu nɔ nyɛe maa ye. Nyɛ ko ba pee nyɛ he kaa nihi nɛ a kɛ Mawu ngɛ ta hwue!” Kpe ngua a ngɔ Gamaliel ga womi ɔ.

⁴⁰ A tsɛ bɔfo ɔmɛ kɛ ba, nɛ a ha nɛ a fia mɛ kpa. A bɔ mɛ kɔkɔ hulɔ ke a ko fiɛ kɛ Yesu biɛ hu; kɛkɛ nɛ a ngmɛɛ a he.

⁴¹ Bɔfo ɔmɛ je kpe ngua a hɛ mi kɛ ho kɛ bua jɔmi kaa Yesu biɛ ɔ he ɔ, Mawu bu mɛ nihi nɛ sa kaa a bɔ mɛ ahlua.

⁴² Daa ligbi ɔ, a tsɔɔ ní, nɛ a fiɛɔ sane kpakpa a nɛ kɔɔ Yesu Kristo he ɔ ngɛ sɔlemi we ɔ, kɛ nihi a wehi a mi.