Ni Tsumi 4 - BAIBLO ALOO NGMAMI KLƆUKLƆU Ɔ

Petro kɛ Yohane ngɛ kpe ngua a hɛ mi

¹ Petro kɛ Yohane ngɛ munyu ɔ tue kɛ ngɛ ma a tsɔɔe kɛ mwɔɔ, kɛkɛ nɛ osɔfo komɛ, sɔlemi we ɔ asafoatsɛ ɔ, kɛ Saduki bi komɛ ba pue a nɔ ngɛ lejɛ ɔ.

² A mi mi fu wawɛɛ, ejakaa bɔfo enyɔ ɔmɛ ngɛ ma a ní tsɔɔe ke Yesu te si kɛ je gbeje, nɛ lɔ ɔ maa nɔ mi kaa gbogboehi maa te si kɛ ba wami mi.

³ Enɛ ɔ he je ɔ, a nu Petro kɛ Yohane; nɛ a ya wo mɛ tsu kɛ yaa su be nɛ je maa na, ejakaa jamɛ a be ɔ du bu.

⁴ Se nihi nɛ ba bu sɛ gbi ɔ tue ɔ, a ti nihi babauu nɛ maa su akpe enuɔ he ye.

⁵ E nɔ jena a, Yuda bi ɔmɛ a hɛ mi nyɛɛli ɔmɛ, kɛ ma nimeli ɔmɛ, kɛ mlaa tsɔɔli ɔmɛ ba bua a he nya ngɛ Yerusalem.

⁶ Hana, osɔfo nɔkɔtɔma pe kulaa a, Kayafa, Yohane, Aleksandro, kɛ nihi abɔ nɛ je osɔfo nɔkɔtɔma pe kulaa a weku ɔ mi ba kpe ɔ.

⁷ A ha bɔfo ɔmɛ ba da a hɛ mi, nɛ a bi mɛ ke, “Kɛ nyɛ pee kɛɛ nɛ nyɛ tsa glɔtsɛ ɔ? Mɛnɔ he wami nya, aloo mɛnɔ biɛ mi nyɛ tsu nɔ́ nɛ ɔ?”

⁸ Kɛkɛ nɛ Petro nɛ Mumi Klɔuklɔu hyi lɛ tɔ ɔ de mɛ ke, “Nyɛ Israel ma hɛ mi nyɛɛli, kɛ ma nimeli,

⁹ ke a kɛ wɔ ngɛ munyu yee mwɔnɛ ligbi nɛ ɔ ngɛ kpakpa nɛ a pee kikɛmɛ a glɔtsɛ nɛ ɔ he, kaa kɛ a pee kɛ tsa lɛ kɛɛ ɔ,

¹⁰ lɔ ɔ lɛɛ nɔ́ nɛ sa nɛ nyɛ tsuo nyɛɛ le, nɛ Israel ma kpekpemi ɔ tsuo hu nɛ na nɛ a le ji nɛ ɔ nɛ. Nɔmlɔ nɛ a tsa lɛ nɛ daa si ngɛ nyɛ hɛ mi nɛ ɔ, Yesu Kristo, Nazaret no ɔ he wami nya nɛ a tsa lɛ. Nyɛɛ lɛɛ nyɛ sɛu Yesu ɔ, se Mawu tle lɛ si kɛ je gbeje.

¹¹ Yesu nɛ ɔ nɔuu he ngmami ɔ deɔ ngɛ ke, ‘Tɛ ɔ nɛ nyɛ tsu fiali ɔmɛ nyɛ sake fɔ he ɔ plɛ kɔ nya tɛ.’

¹² Lɛ nɔ kake too pɛ lɛ ma nyɛ ma he nimli a yi wami. E se ɔ, nɔ ko nɔ ko be je ɔ mi nɛ Mawu ha lɛ kikɛmɛ a he wami nɛ ma nyɛ he wa yi wami.”

¹³ Benɛ kpe ngua a mi bi ɔmɛ na kã nɛ Petro kɛ Yohane pee, nɛ a ná le hu kaa nimli gu kɛkɛ ji mɛ, se pi womi mi leli ɔ, a he mi po. A kɔ se kaa a kɛ Yesu hi si.

¹⁴ A nɛ́ nɔ́ nɛ a ma de, ejakaa nɔmlɔ nɛ a tsa lɛ ɔ kɛ Petro, kɛ Yohane daa si ngɛ lejɛ ɔ.

¹⁵ Lɔ ɔ he ɔ, a de mɛ ke a je kpo ngɛ tsu ɔ mi he nɛ a kpe ngɛ ɔ. Kɛkɛ nɛ a ya da, nɛ a bi a he ke, “Kɛ wa maa pee nimli nɛ ɔmɛ kɛɛ?

¹⁶ Nyakpɛ nɔ́ nguaa nɛ Mawu tsu kɛ gu nimli nɛ ɔmɛ a nɔ ɔ, nihi tsuo ngɛ Yerusalem nu he; nɛ wa be nyɛe ma de ke e be mi.

¹⁷ Se kɛ̃ ɔ, bɔ nɛ pee nɛ munyu ɔ ko gbɛ fĩa fuu ko hu ngɛ ma a mi he je ɔ, nyɛ ha waa bɔ mɛ kɔkɔ ke a ko ngɔ Yesu biɛ kɛ tsɔɔ ní hu.”

¹⁸ Lɔ ɔ he ɔ, a tsɛ mɛ kɛ ba, nɛ a fia a tue mi wawɛɛ ke a ko wo Yesu biɛ ta, nɛ a ko ngɔ Yesu biɛ kɛ tsɔɔ ní kulaa hu.

¹⁹ Se Petro kɛ Yohane he nɔ nɛ a de mɛ ke, “Ke e da blɔ ngɛ Mawu hɛ mi kaa a bu nyɛ mohu tue pe Mawu ɔ, nyɛɛ kojo.

²⁰ Ejakaa wɔɔ lɛɛ, níhi nɛ wa na, kɛ níhi nɛ wa nu ɔ, wa be nyɛe ma ma wa nya ngɔ to nɔ kaa ja wa de.”

²¹ Kɛkɛ nɛ kpe ɔ bɔ mɛ kɔkɔ wawɛɛ pe kekle ɔ po, nɛ a ngmɛɛ a he. A nɛ́ bɔ nɛ a maa pee nɛ a maa gbla a tue; ejakaa ni ɔmɛ tsuo ngɛ Mawu hɛ mi nyami woe ngɛ nɔ́ nɛ a pee ɔ he.

²² Nɔmlɔ nɛ a gu kikɛmɛ a nyakpɛ blɔ nɔ kɛ tsa lɛ ɔ ye pe jeha nyingmi eywiɛ.

Asafo ɔ kpa pɛɛ kɛ bi he wami womi

²³ Benɛ a ngmɛɛ Petro kɛ Yohane he nɔuu nɛ a ba nyɛmimɛ ɔmɛ a ngɔ ɔ, a ba sɛɛ níhi tsuo nɛ osɔfo nikɔtɔma amɛ, kɛ ma nimeli ɔmɛ de mɛ ɔ ha mɛ.

²⁴ Benɛ nyɛmimɛ ɔmɛ nu ɔ, a kɛ juɛmi kake fa kue ha Mawu ke, “Mo Nyɔmtsɛ nɛ o bɔ hiɔwe kɛ zugba, kɛ wo, kɛ níhi tsuo nɛ ngɛ a mi.

²⁵ O ha nɛ Mumi Klɔuklɔu ɔ wo wa nɛ̃ David, o tsɔlɔ ɔ he wami, nɛ e tu munyu ke, ‘Mɛni he je ma je li ɔmɛ ngɛ hoo pee, nɛ a ngɛ nihi a yi nɔ soe yaka gu?

²⁶ Zugba a nɔ matsɛmɛ ɔmɛ, kɛ ganɔ ɔmɛ ba bua a he nya; nɛ a te si ngɔ wo e nyɔmtsɛ ɔ kɛ nɔ nɛ a pɔ lɛ nu ɔ.’

²⁷ Niinɛ, Herode, Pontio Pilato, ma je li ɔmɛ, kɛ Israel ma amɛ hu ba bua a he nya ngɛ ma nɛ ɔ mi ngɔ wo Yesu, o tsɔlɔ klɔuklɔu nɛ o pɔ lɛ nu ɔ he.

²⁸ A ba bua a he nya, konɛ a pee níhi tsuo ngɛ o he wami nya kaa bɔ nɛ o to ngɔ fɔ si kaa a pee ɔ.

²⁹ Jehanɛ hu Nyɔmtsɛ, hyɛ wa he gbeye nɛ a ngɛ woe ɔ, nɛ o wo wɔ, o sɔmɔli ɔmɛ kã nɛ waa jaje o munyu ɔ.

³⁰ Je o he wami kpo, nɛ o ha a tsa nihi, nɛ a ngɔ Yesu, o tsɔlɔ klɔuklɔu ɔ biɛ kɛ pee okadihi, kɛ nyakpɛ níhi.”

³¹ Benɛ a sɔle kikɛ ɔ, he nɛ a bua ngɛ ɔ mimiɛ, nɛ Mumi Klɔuklɔu ɔ ba mɛ tsuo a nɔ saminya, nɛ a ngɔ kã kɛ jaje Mawu munyu ɔ.

Nihi nɛ he ye ɔ pee a níhi tsuo kake

³² Nihi babauu nɛ he Yesu ye ɔ tsuo hɛɛ juɛmi kake, kɛ mumi kake. Nɛ a ti nɔ ko nɔ ko tsɛ we e níhi nɛ e ngɛ ɔ mi eko ke lɛ nitsɛ e nɔ́, se mohu, nɔ́ nɛ nɔ ko ngɛ ɔ peeɔ ma tsuo nɔ́.

³³ He wami kpetekpleenyɛ lɛ bɔfo ɔmɛ kɛ ye Nyɔmtsɛ Yesu si temi ɔ he odase, nɛ Mawu dloo mɛ babauu.

³⁴ Nɔ ko nɔ ko be a kpɛti nɛ nɔ́ ko he hia lɛ, ejakaa nihi nɛ ngɛ we, loo zugba a juaa, nɛ a kɛ sika a baa.

³⁵ A kɛ ba haa bɔfo ɔmɛ, nɛ a dlaa kɛ haa nɔ tsuaa nɔ kaa bɔ nɛ he hia lɛ.

^36-37 Bɔ nɛ ba loko Yosef ya jua e zugba nɛ e ngɔ sika a ba ha bɔfo ɔmɛ ji nɛ ɔ nɛ. Yosef nɛ ɔ, Levi no ji lɛ; a fɔ lɛ ngɛ Kipro. Biɛ nɛ bɔfo ɔmɛ kɛ tsɛɔ lɛ ji Barnaba. E sisi ji nɔmlɔ nɛ woɔ nɔ he wami.