Ni Tsumi 2 - BAIBLO ALOO NGMAMI KLƆUKLƆU Ɔ

Mumi Klɔuklɔu ɔ ba

¹ Benɛ Pentekoste ligbi ɔ su ɔ, nihi nɛ heɔ yeɔ tsuo a nya ba bua ngɛ he kake.

² Si kake too ɔ, a nu nɔ́ ko nɛ pɛ kɛ je hiɔwe kaa kɔɔhiɔ nɛ nya wa lɛ ngɛ fiae; nɛ e ba hyi we ɔ mi he nɛ a hii si ngɛ ɔ tɔ.

³ Nɛ ní komɛ kaa la lilɛ nɛ a gba mi ba ma a yi mi kakaaka.

⁴ Mumi Klɔuklɔu ɔ ba mɛ tsuo a nɔ saminya, nɛ a bɔni gbi slɔɔtoslɔɔtohi tumi ngɛ Mumi Klɔuklɔu ɔ he wami nya.

⁵ Yuda bi komɛ nɛ yee Mawu gbeye ngɛ Yerusalem jamɛ a be ɔ mi. A je je ma amɛ tsuo a mi.

⁶ Benɛ a nu nɛ nɔ́ ɔ pɛ ɔ, nihi babauu ba bua a he nya. Mɛ tsuo a he mi po; ejakaa a ti nɔ tsuaa nɔ nu kaa a ngɛ lɛ nitsɛ e ma mi gbi tue.

⁷ Mɛ tsuo a nya kpɛ a he, nɛ a hɛ mi pee mɛ yaa. A de ke, “Nihi nɛ ngɛ munyu tue nɛ ɔ tsuo ɔ, Galilea bi ji mɛ!

⁸ Se kɛ pee kɛɛ nɛ wɔ tsuo wa ngɛ nue nɛ a ngɛ munyu tue ngɛ wɔ nitsɛmɛ wa je gbi mi mɔ?

⁹ Wa je Partia, kɛ Media, kɛ Elam; wa ti ni komɛ je Mesopotamia, Yudea, Kapadokia, Ponto, kɛ Asia;

¹⁰ ni komɛ je Frigia, kɛ Pamfilia; nɛ ni komɛ hu je Egipt, kɛ Libia kpokpa amɛ a nɔ ngɛ Kirene kasa nya. Wa ti ni komɛ je Roma.

¹¹ Wɔ tsuo ɔ, Yuda bi kɛ ma je li nɛ ba sɛ Yuda bi jami ɔ mi ji wɔ; nɛ wa ti ni komɛ hu je Kreta, kɛ Arabia; se wɔ tsuo wa ngɛ nue nɛ a ngɛ Mawu ní nguangua amɛ jajee ngɛ wɔ nitsɛmɛ wa je gbi mi!”

¹² Mɛ tsuo a nya kpɛ a he, nɛ a dɛ yaa. A bi a sibi ke, “Kɛ ji enɛ ɔ sisi kɛɛ?”

¹³ Se ni komɛ hu ye fɛu ke, “Wai he nɛ a nu nɛ a de.”

Munyu nɛ Petro tu

¹⁴ Jehanɛ ɔ, Petro kɛ ni nyɔngma kɛ kake ɔmɛ te da si; Petro wo e nya nɔ nɛ e tu munyu tsɔɔ ni kpekpemi ɔ ke, “Ye nyɛmimɛ Yuda bi, kɛ nyɛ nihi tsuo nɛ ngɛ Yerusalem, nyɛɛ bu mi tue, konɛ ma tsɔɔ nyɛ nɔ́ nɛ ɔ sisi.

¹⁵ Tsa pi dã nɛ ni mli nɛ ɔmɛ de kaa bɔ nɛ nyɛ ngɛ susue ɔ, ejakaa mɔtu ngmlɛ nɛɛ kɛkɛ ji nɛ ɔ nɛ.

¹⁶ Se mohu enɛ ɔ ji nɔ́ nɛ gbalɔ Yoel tu he munyu ɔ nɛ:

¹⁷ ‘Mawu ke, Nyagbe be ɔ, ma ngɔ ye Mumi ɔ kɛ wo nɔ tsuaa nɔ mi. Nyɛ binyumu ɔmɛ, kɛ nyɛ biyi ɔmɛ maa fiɛ ye sɛ gbi ɔ; nihewi maa na nina, nɛ nikɔtɔmahi maa nla.

¹⁸ Ye tsɔli nyumu ɔmɛ kɛ yi ɔmɛ hu, ma ha mɛ ye Mumi ɔ jamɛ a be ɔ mi, nɛ a maa fiɛ ye sɛ gbi ɔ.

¹⁹ Ma pee nyakpɛ níhi ngɛ hiɔwe, kɛ okadihi ngɛ zugba a nɔ. Muɔ, kɛ la, kɛ la su ku maa ba.

²⁰ Pu maa tsɔ diblii, nɛ nyɔhiɔ ma pee tsutsuutsu kaa muɔ loko Nyɔmtsɛ ɔ ligbi nguaa nɛ ngɛ gbeye ɔ maa ba.

²¹ E maa ba mi kaa nɔ tsuaa nɔ nɛ ma kpa ngmlaa kɛ tsɛ Nyɔmtsɛ ɔ biɛ ɔ, a ma he e yi wami.’

²² “Ye nyɛmimɛ Israel bi, nyɛɛ bu munyu nɛ ɔ tue saminya! Nyakpɛ níhi, kɛ okadihi nɛ Mawu pee kɛ gu Yesu nɛ je Nazaret ɔ nɔ ɔ yeɔ odase paa kaa Mawu nitsɛ lɛ tsɔ lɛ. Nyɛ nitsɛmɛ nyɛ le enɛ ɔ, ejakaa nyɛ kpɛti a pee ni nɛ ɔmɛ ngɛ.

²³ Mawu nitsɛ to e yi mi momo kaa e maa ngɔ Yesu ɔ ngɔ ha nyɛ. Nyɛ ngɔ lɛ ngɔ ha yayami peeli nɛ a sɛu lɛ ngɛ sɛumi tso nɔ, nɛ e gbo.

²⁴ Se Mawu tle lɛ si kɛ je gbeje; e kpɔ lɛ ngɛ gbenɔ nya mi, ejakaa gbenɔ be e nya nyɛe maa tsi kɔkɔɔkɔ.

²⁵ Bɔ nɛ David de ngɛ e he ji nɛ ɔ nɛ: ‘I naa Nyɔmtsɛ ɔ daa; e ngɛ ye hiɔ nɔ, nɛ nɔ ko be nyɛe maa wo ye he gbeye.

²⁶ Lɔ ɔ he ɔ, ye tsui nɔ ye mi, nɛ i kɛ bua jɔmi ngɛ munyu tue; se imi nɛ adesa kɛkɛ ji mi ɔ, ma ngɔ ye hɛ ngɔ fɔ Mawu nɔ kulaa.

²⁷ Ejakaa o be mi sie ngɛ gbeje; o be hae nɛ o nɔ klɔuklɔu ɔ nɛ puɛ ngɛ yɔkɔ mi.

²⁸ O ha nɛ i le blɔ nɛ kɛ nɔ yaa wami mi ɔ. O ma ha ye tsui maa nɔ ye mi fuaa ngɛ o hɛ mi.’

²⁹ “Ye nyɛmimɛ, nyɛ ha ma tu munyu paa ngɔ tsɔɔ nyɛ ngɛ wa nɛ̃ Matsɛ David he. E gbo nɛ a pu lɛ, nɛ e yɔkɔ ngɛ wa kpɛti kɛ ba si mwɔnɛ ɔ.

³⁰ Gbalɔ ji lɛ, nɛ si nɛ Mawu wo lɛ ɔ, e le. Mawu wo David si kaa e ma ha e nina ma ba ye tsɛ kaa bɔ nɛ lɛ David ɔ ye tsɛ ɔ.

³¹ David na nɔ́ nɛ Mawu maa pee ɔ momo, lɔ ɔ he ɔ, e tu Kristo si temi ɔ he munyu, nɛ e de ke, ‘A si we lɛ ngɛ gbeje, nɛ e he lo hu puɛ we ngɛ yɔkɔ mi.’

³² Mawu tle kikɛmɛ a Yesu nɛ ɔ nɔuu si kɛ je gbeje; lɔ ɔ he odase yeli ji wɔ tsuo.

³³ A wo e nɔ kɛ ho e Tsɛ Mawu ɔ hiɔ nɔ ya, nɛ e ná Mumi Klɔuklɔu nɛ a wo he si ɔ kɛ je e dɛ. Nɔ́ nɛ nyɛ ngɛ hyɛe, kɛ nɔ́ nɛ nyɛ ngɛ nue nɛ ɔ, Yesu lɛ ha nɛ e ba.

³⁴ Ejakaa tsa pi David nɛ ya hiɔwe ɔ, se David nɔuu lɛ de ke, ‘Nyɔmtsɛ ɔ de ye Nyɔmtsɛ ɔ ke, Hii si ngɛ ye hiɔ nɔ,

³⁵ nɛ ma pee o he nyɛli ɔmɛ kaa nɔ́ nɛ o kɛ o nane maa nɔ.’

³⁶ “Lɔ ɔ he ɔ, Israel bi tsuo nɛ́ a na nɛ a le kaa Yesu ɔ nɛ nyɛ sɛu ɔ, Mawu ngɔ lɛ ngɔ pee Nyɔmtsɛ, kɛ nɔ nɛ lɛ nitsɛ e hla!”

³⁷ Benɛ ni ɔmɛ nu munyu nɛ ɔ, e hao mɛ wawɛɛ, nɛ a bi Petro kɛ bɔfo kpa amɛ nɛ piɛ e he ɔ ke, “Wa nyɛmimɛ, kɛ wa maa pee kɛɛ?”

³⁸ Petro de mɛ ke, “Nyɛ tsake nyɛ tsui, nɛ nyɛ ti nɔ tsuaa nɔ nɛ ha nɛ a sɔle lɛ ngɛ Yesu Kristo biɛ mi, kɛkɛ, a maa ngɔ nyɛ he yayami ɔmɛ ngɔ pa nyɛ, nɛ nyɛ ma na Mawu nɔke nɔ́ nɛ ji Mumi Klɔuklɔu ɔ.

³⁹ Ejakaa si nɛ Mawu wo ɔ, nyɛɛ kɛ nyɛ bimɛ, kɛ nihi abɔ tsuo nɛ ngɛ se lokoo nɛ Nyɔmtsɛ, wa Mawu ɔ ma tsɛ kɛ ba e ngɔ ɔ nyɛ he ngɛ mi.”

⁴⁰ Petro tu munyu kpahi fuu kɛ ye odase, nɛ e kɛ wo mɛ ga ke, “Tue gblami nɛ yi nɔ nɛ ɔ bi yayami peeli ma na a, nyɛɛ hyɛ saminya nɛ e kó ba nyɛ nɔ.”

⁴¹ Nihi babauu he e sɛ gbi ɔ ye, nɛ a sɔle mɛ. Jamɛ a ligbi ɔ, a na nimli maa pee akpe etɛ kɛ piɛ a he.

⁴² Nimli nɛ ɔmɛ kaseɔ ní be tsuaa be ngɛ bɔfo ɔmɛ a ngɔ; a kɛ mɛ peeɔ kake kɛ yeɔ ní, nɛ a kɛ peeɔ sɔlemi hulɔ.

Nihi nɛ he Yesu ye ɔ a si himi

⁴³ Kɛ gu bɔfo ɔmɛ a nɔ ɔ, a pee nyakpɛ níhi, kɛ okadihi babauu, nɛ gbeye nu nɔ tsuaa nɔ.

⁴⁴ Nihi nɛ he Yesu ye ɔ tsuo kake peemi saminya ngɛ mɛ tsuo a kpɛti, nɛ a gba we nɔ ko mi ngɛ nɔ ko he.

⁴⁵ A jua a zugba amɛ, kɛ a weto ní tsuo, nɛ a dla sika a ngɔ ha ni ɔmɛ tsuo bɔ nɛ he hia nɔ tsuaa nɔ.

⁴⁶ Daa ligbi ɔ, a ya kpee ngɛ sɔlemi we ɔ, nɛ a buaa a he nya kɛ ya kuɔ abolo ngɛ a sibi a we mi, nɛ a kɛ bua jɔmi nɛ je tsui mi faa yeɔ ní.

⁴⁷ A jeɔ Mawu yi be tsuaa be, nɛ ni ɔmɛ tsuo ná a he bua jɔmi babauu. Daa ligbi ɔ, nihi nɛ Nyɔmtsɛ ɔ he a yi wami ba piɛɔ asafo ɔ he.