Ni Tsumi 18 - BAIBLO ALOO NGMAMI KLƆUKLƆU Ɔ

Paulo ngɛ Korinto

¹ Enɛ ɔ se ɔ, Paulo je Atene, nɛ e pue nɔ kɛ ho Korinto ya.

² E ya na Yuda no ko nɛ a tsɛɛ lɛ Akuila ngɛ lejɛ ɔ. A fɔ Akuila ngɛ Ponto. Nyumu nɛ ɔ, kɛ e yo Priskila je Italia kɛ ba we; ejakaa Kaisare Klaudio fa Yuda bi ɔmɛ tsuo ke a je Roma. Paulo ya a ngɔ,

³ nɛ e kɛ mɛ ya hi si kɛ tsu ní; ejakaa bo tsu peemi ji a ní tsumi.

⁴ Daa Hejɔɔmi ligbi ɔ, e ya fiɛɔ Mawu munyu ngɔ tsɔɔ nihi ngɛ kpe he ɔ, nɛ e bɔɔ mɔde kaa e ma tsake Yuda bi, kɛ Hela bi tsuo.

⁵ Benɛ Sila kɛ Timoteo je Makedonia kɛ ba a, jehanɛ Paulo tsu we nɔ kpa ko hu pe munyu ɔ fiɛmi kɛkɛ; nɛ e yeɔ odase veveeve ngɔ tsɔɔ Yuda bi ɔmɛ kaa Yesu ji Kristo ɔ nɛ.

⁶ Enɛ ɔ he ɔ, a te si wo lɛ, nɛ a tu musu bɔmi munyuhi kɛ si lɛ. Lɔ ɔ he ɔ, e huanya e tade mi mu kɛ pue a nɔ, nɛ e de mɛ ke, “Nyɛ musu tloo nyɛ! Imi lɛɛ ye nya be mi. Kɛ je be nɛ ɔ kɛ yaa a, ma je li ɔmɛ a ngɔ ma ya.”

⁷ Lɔ ɔ he ɔ, e si lejɛ ɔ, nɛ e ho ya to ma je no Mawu jalɔ ko nɛ a tsɛɛ lɛ Titio Yusto ɔ we mi, nɛ e kɛ lɛ hi si. E we ɔ tsa kpe he ɔ nɔ.

⁸ Kpe he ɔ nɔkɔtɔma nɛ a tsɛɛ lɛ Krispo ɔ, kɛ e we tsuo he Nyɔmtsɛ ɔ ye. Nihi babauu hu nɛ ngɛ Korinto ɔ nu sɛ gbi ɔ, nɛ a he ye; nɛ a sɔle mɛ.

⁹ Ligbi ko nyɔ mi ɔ, Nyɔmtsɛ ɔ de Paulo ngɛ nina mi ke, “Koo ye gbeye, se mohu fiɛ munyu ɔ. Ko ma o nya,

¹⁰ ejakaa i kɛ mo ngɛ. Nɔ ko nɔ ko be nyɛe maa pee mo yayami ko; ejakaa i ngɛ we bi babauu ngɛ ma nɛ ɔ mi.”

¹¹ Lɔ ɔ he ɔ, Paulo ye jeha, kɛ nyɔhiɔ ekpa ngɛ lejɛ ɔ, nɛ e kɛ tsɔɔ ni ɔmɛ Mawu munyu ɔ.

¹² Benɛ Roma nɔ yemi ɔ wo Galio amlaalo ngɛ Akaya a, Yuda bi ɔmɛ pee a nya kake nɛ a te si wo Paulo, nɛ a nu lɛ kɛ ho kojomi he ɔ ya.

¹³ A ya po e nya ke, “Nyumu nɛ ɔ ngɛ ma a yi mi woe nɛ a ja Mawu ngɛ blɔ ko nɔ nɛ kɛ wa mlaa a yɛ!”

¹⁴ Benɛ Paulo miɔ nɛ e ma je e nya a, kɛkɛ nɛ Galio po e nya nɔ, nɛ e de Yuda bi ɔmɛ ke, “Yuda bi, ju kɛ fɔ̃ sane ko nyɛ kɛ ba jinɛ ma na tsui kɛ bu nyɛ tue.

¹⁵ Se akɛnɛ munyunguhi, kɛ biɛhi, kɛ nyɛ mlaa a he nyɛ ngɛ sane yee ngɛ nɛ ɔ, nyɛ nitsɛmɛ nyɛ ya hyɛ mi. Sanehi nɛ ngɛ kaa kikɛ nɛ ɔ, i be kojoe.”

¹⁶ Kɛkɛ nɛ e fie mɛ kɛ je kojomi he ɔ.

¹⁷ Mɛ tsuo a ya nu kpe he ɔ nɔkɔtɔma nɛ a tsɛɛ lɛ Sostene ɔ ngɛ kojomi he ɔ hɛ mi, nɛ a fia lɛ ní. Se nɔ́ nɛ a pee nɛ ɔ si we Galio kpu.

Paulo kpale kɛ ba Antiokia

¹⁸ Paulo kɛ nyɛmimɛ ɔmɛ hi si ngɛ Korinto be saii. Lɔ ɔ se ɔ, e kɛ mɛ ye sɛ, nɛ e ngɔ Priskila, kɛ Akuila kɛ piɛ e he, nɛ a ya wó lɛ kɛ ba Siria. Loko lɛ ɔ maa hia ngɛ Kenkrea a, Paulo ha a sɛ e yi ha lɛ, ejakaa be ko ɔ, e wo Mawu si ko.

¹⁹ Benɛ a ba su Efeso ɔ, Paulo si Priskila kɛ Akuila ngɛ lejɛ ɔ; se loko e je ɔ, lɛ nitsɛ lɛɛ e ya kpe he ɔ, nɛ e kɛ Yuda bi ɔmɛ ya hla ní a nya.

²⁰ A kpa lɛ pɛɛ ke e ye be bɔɔ ngɛ a ngɔ, se e kplɛɛ we.

²¹ Benɛ a ngɛ sɛ yee ɔ, e de mɛ ke, “Ke Mawu suɔ ɔ, ma kpale kɛ ba nyɛ ngɔ ekohu.” Kɛkɛ nɛ e wó lɛ, nɛ e je Efeso.

²² Benɛ e ya kple ngɛ Kaisarea a, e ya Yerusalem, nɛ e ya nga asafo ɔ; kɛkɛ nɛ e pue nɔ kɛ ho Antiokia ya.

²³ E hi lejɛ ɔ be bɔɔ ko; lɔ ɔ se ɔ, e pue nɔ ekohu, nɛ e ya kpa Galatia, kɛ Frigia ní ɔmɛ a mi, nɛ e wo nihi nɛ he ye ɔ tsuo he wami.

Apolo ngɛ Efeso kɛ Korinto

²⁴ Jamɛ a be ɔ mi ɔ, Yuda no ko nɛ a tsɛɛ lɛ Apolo, nɛ e se je Aleksandria a ba Efeso. Nyumu nɛ ɔ nya mi tsɔ saminya, nɛ e le ngmami ɔmɛ a mi fitsofitso.

²⁵ A tsɔɔ nyumu nɛ ɔ Nyɔmtsɛ ɔ blɔ ɔ, nɛ e kɛ kã, kɛ mumi nɛ nya wa fiɛ Mawu munyu ɔ; nɛ e tsɔɔ Yesu he ní fitsofitso. Pohu Yohane nɔ sɔlemi ɔ pɛ nɛ e le.

²⁶ E kɛ kã bɔni munyu tumi ngɛ kpe he ɔ. Benɛ Priskila kɛ Akuila nu nɛ e ngɛ fiɛe ɔ, a ngɔ lɛ kɛ ba a ngɔ, nɛ a tsɔɔ lɛ Nyɔmtsɛ ɔ blɔ ɔ fitsofitso.

²⁷ Jehanɛ, Apolo to e yi mi kaa e maa po mi kɛ ya Akaya, lɔ ɔ he ɔ, nyɛmimɛ ɔmɛ nɛ ngɛ Efeso ɔ susu he, nɛ a ngma womi ya ha nyɛmimɛ ɔmɛ nɛ ngɛ Akaya a kɛ wo mɛ ga ke a he lɛ hɛmuɔ. Benɛ e ba su lejɛ ɔ, nihi nɛ Mawu dloomi nya a, a ba he Kristo ye ɔ na e he se saminya.

²⁸ Ejakaa e tu munyu kɛ he wami kɛ ku Yuda bi ɔmɛ a nya la; nɛ e je ngmami ɔmɛ a mi kɛ tsɔɔ mɛ faii kaa Yesu ji Kristo ɔ nɛ.