Ni Tsumi 16 - BAIBLO ALOO NGMAMI KLƆUKLƆU Ɔ

Timoteo ba piɛ Paulo kɛ Sila a he

¹ Paulo ba su Derbe, nɛ e tsa nɔ kɛ ya Listra. Benɛ e su Listra a, e ba na nɔ ko nɛ heɔ Yesu yeɔ ngɛ lejɛ ɔ. A tsɛɛ lɛ Timoteo. E nyɛ ɔ, Yuda yo nɛ heɔ Yesu yeɔ ji lɛ; se e tsɛ lɛɛ Hela no.

² Nyɛmimɛ ɔmɛ tsuo nɛ ngɛ Listra, kɛ Ikoniom ɔ yeɔ Timoteo he odase kpakpa.

³ Paulo hla kaa e kɛ Timoteo nɛ ya; lɔ ɔ he ɔ, e po lɛ. E pee ja ejakaa Yuda bi tsuo nɛ ngɛ lejɛ ɔ kpokpa a nɔ ɔ le kaa Timoteo tsɛ ɔ Hela no ji lɛ.

⁴ Benɛ a ngɛ ma amɛ a nɔ kpae ɔ, mlaahi nɛ bɔfo ɔmɛ, kɛ asafo nikɔtɔma amɛ wo ngɛ Yerusalem ɔ, a tsɔɔ mɛ, konɛ a ye nɔ.

⁵ Enɛ ɔ ha asafo ɔmɛ a hemi kɛ yemi mi ba wa, nɛ daa nɛ ɔ, nihi babauu ba piɛɔ a he.

A je nina ha Paulo ngɛ Troya

⁶ A po mi ngɛ Frigia, kɛ Galatia zugba a nɔ, ejakaa Mumi Klɔuklɔu ɔ ha we mɛ blɔ kaa a fiɛ munyu ɔ ngɛ Asia.

⁷ Benɛ a ba su Misia huzu ɔ nya a, a ka kaa a maa ya Bitinia, se Yesu Mumi ɔ ha we mɛ blɔ.

⁸ Lɔ ɔ he ɔ, a tsɔ Misia he kɛ be, nɛ a po mi tɛɛ kɛ ya su Troya.

⁹ Jamɛ a nyɔ ɔ mi nɔuu ɔ, a je nina ko kɛ tsɔɔ Paulo. E na Makedonia no ko nɛ daa si ngɛ lɛ pɛɛ kpae ke, “Ba Makedonia nɛ o ba ye bua wɔ!”

¹⁰ Amlɔ nɔuu nɛ Paulo na nina nɛ ɔ, wa dla wa he, konɛ waa ya Makedonia, ejakaa wa kpa si kaa Mawu lɛ ngɛ wɔ tsɔe ke wa ya fiɛ sane kpakpa a ngɔ tsɔɔ ni ɔmɛ ngɛ lejɛ ɔ.

Lidia tsake pee Yesu se nyɛɛlɔ ngɛ Filipi

¹¹ Wa wó lɛ kɛ je Troya tɛɛ kɛ ya Samotrake, nɛ e nɔ jena a, wa ya su Neapoli.

¹² Benɛ wa je lejɛ ɔ, wa tsa nɔ kɛ ya su Filipi, Makedonia zugba a nɔ ma nguaa ko nɛ ji Roma bi a nɔ yemi he. Wa hi ma nɛ ɔ mi be saii.

¹³ Hejɔɔmi ligbi ɔ, wa je ma a mi kɛ ya pa nya he nɛ wa susu kaa Yuda bi ɔmɛ peeɔ sɔlemi ngɛ ɔ. Wa ya hi si, nɛ wa fiɛ Mawu munyu ɔ kɛ tsɔɔ yihi nɛ ba bua a he nya ngɛ lejɛ ɔ.

¹⁴ A ti nɔ kake ji Lidia. Yo nɛ ɔ je Tiatira ma a mi, nɛ e juaa bo tsu he jua wawɛ. Mawu jalɔ ji lɛ; nɛ Nyɔmtsɛ ɔ bli e juɛmi nya nɛ́ nɔ́ nɛ Paulo ngɛ dee ɔ, e bu tue saminya.

¹⁵ E ha nɛ a sɔle lɛ kɛ e we ɔ tsuo. Lɔ ɔ se ɔ, e de wɔ ke, “I kpa nyɛ pɛɛ, ke nyɛ na mi kaa nɔ nɛ heɔ Nyɔmtsɛ ɔ yeɔ anɔkuale mi ɔ, lɛɛ nyɛ ba hi ye ngɔ.” E hɛɛ munyu nɛ ɔ mi hluu kɛ ya si wa kplɛɛ nɛ wa ya to lɛ.

A wo Paulo kɛ Sila tsu ngɛ Filipi

¹⁶ Ligbi ko benɛ wa yaa he nɛ a sɔlee ngɛ ɔ, waa kɛ nyɔguɛ yiheyo ko nɛ klaami mumi ngɛ e mi kpe. E kɛ mumi nɛ ɔ peeɔ sika kɛ haa e nyɔmtsɛmɛ ɔmɛ.

¹⁷ Yiheyo nɛ ɔ nyɛɛ waa kɛ Paulo wa se kɛ ngmlaa ke, “Kikɛmɛ a nimli nɛ ɔmɛ ɔ, Mawu, Hiɔwe No ɔ tsɔli ji mɛ; nɛ a ngɛ fiɛe kɛ ngɛ nyɛ tsɔɔe bɔ nɛ nyɛ maa pee nɛ a he nyɛ yi wami.”

¹⁸ E pee enɛ ɔ hluu kɛ ya si Paulo mi mi wo la, nɛ e plɛ e he nɛ e de mumi ɔ ke, “I ngɛ mo fae ngɛ Yesu Kristo biɛ mi ke o je e mi.” Amlɔ nɔuu ɔ, mumi ɔ je yiheyo ɔ mi.

¹⁹ Benɛ e nyɔmtsɛmɛ ɔmɛ na kaa blɔ nɔ nɛ a guu kɛ naa sika a se po ɔ, a nu Paulo kɛ Sila kã nya, nɛ a gbla mɛ ya ha ma nimeli ɔmɛ ngɛ he nɛ ma a kpee ngɛ ɔ.

²⁰ Mɛ hu a ngɔ mɛ ya ha Roma kojoli ɔmɛ, nɛ a wo a he munyu ke, “Kikɛmɛ a nimli nɛ ɔmɛ ɔ, Yuda bi ji mɛ, nɛ a ngɛ wa ma a mi hliihlii woe.

²¹ Kusumi komɛ nɛ a ngɛ tsɔɔe ɔ, a kɛ wa mlaa amɛ yɛ. Roma bi ji wɔ; wa be kusumi nɛ ɔmɛ ngɔe, nɛ waa kɛ be ní tsue hulɔ.”

²² Nɛ a de ja a, kɛkɛ nɛ ma a tsuo te kɛ wo Paulo kɛ Sila. Jehanɛ Roma kojoli ɔmɛ hía tade ɔmɛ ngɛ Paulo kɛ Sila a he, nɛ a fa ke a fia mɛ kpa.

²³ Benɛ a fia mɛ kpa gbegbelii se ɔ, a wo mɛ tsu, nɛ a fa pamitsɛmɛ a nɔ hyɛlɔ ɔ ke e ngmɛ a yi saminya.

²⁴ Bɔ nɛ a de lɛ he je ɔ, e kɛ mɛ ya wo kpɛtikpɛti tsu ɔ mi, nɛ e ngɔ tso kpoku kɛ bɔ a nane pã.

²⁵ Maa pee nyɔ mi kpɛti ɔ, Paulo kɛ Sila ngɛ sɔlee, nɛ a ngɛ lae kɛ ngɛ Mawu yi jee nɛ pamitsɛmɛ kpa amɛ ngɛ a he nue.

²⁶ Tlukaa a, zugba mimiɛ wawɛɛ, nɛ tsu ɔ, kɛ e sisi tomi ɔ tsuo mimiɛ. Amlɔ ɔ, sinya amɛ tsuo bli, nɛ kɔsɔkɔsɔ ɔmɛ kplɔ ngɛ pamitsɛmɛ ɔmɛ a he.

²⁷ Benɛ pamitsɛmɛ a nɔ hyɛlɔ ɔ hɛli si kɛ je mahe mi ɔ, e na kaa sinya amɛ tsuo a nya fɔɔ si. Lɔ ɔ he ɔ, e hia klaate nɛ jinɛ e maa gbe e he; ejakaa e susu kaa pamitsɛmɛ ɔmɛ tu fo.

²⁸ Se Paulo kpa ngmlaa wawɛɛ ke, “Koo ye o he awi; wɔ tsuo wa ngɛ hiɛ ɔ!”

²⁹ Pamitsɛmɛ a nɔ hyɛlɔ ɔ de kɛ ngmlaa ke a ba ha lɛ kane; nɛ e sa fo kɛ sɛ tsu ɔ mi, nɛ e ya kpla si ngɛ Paulo kɛ Sila a nane nya kɛ he domi blibliibli.

³⁰ Lɔ ɔ se ɔ, e kɛ mɛ je kpo, nɛ e bi ke, “Tsaatsɛmɛ, kɛ ma pee kɛɛ nɛ́ a he ye yi wami?”

³¹ A he nɔ ke, “Mo he Nyɔmtsɛ Yesu nɛ o ye, nɛ a ma he o kɛ o we ɔ tsuo nyɛ yi wami.”

³² Jehanɛ a fiɛ Nyɔmtsɛ ɔ munyu ɔ ngɔ tsɔɔ e kɛ nihi tsuo nɛ ngɛ e we ɔ mi.

³³ Jamɛ a ngmlɛfia a nɔuu ɔ, pamitsɛmɛ a nɔ hyɛlɔ ɔ ngɔ mɛ nɛ e ya fɔ a pa amɛ a nɔ ha mɛ; nɛ a sɔle lɛ, kɛ e we ɔ tsuo amlɔ nɔuu.

³⁴ Kɛkɛ nɛ e ngɔ Paulo kɛ Sila kɛ ya e we ɔ mi, nɛ e ya ha mɛ ní nɛ a ye. E kɛ e we ɔ tsuo nya kaa jehanɛ ɔ e he Mawu ye.

³⁵ Benɛ je na a, Roma kojoli ɔmɛ tsɔ ma he buli ɔmɛ kɛ ba de pamitsɛmɛ a nɔ hyɛlɔ ɔ ke, “Ngmɛɛ ni ɔmɛ a he nɛ a ho.”

³⁶ Kɛkɛ nɛ pamitsɛmɛ a nɔ hyɛlɔ de Paulo ke, “Roma kojoli ɔmɛ tsɔ kɛ ba ke a ngmɛɛ o kɛ Sila nyɛ he. Lɔ ɔ he ɔ, nyɛɛ je kpo nɛ nyɛɛ ya. Nyɛɛ ya ngɛ he jɔmi mi.”

³⁷ Se Paulo de ma he buli ɔmɛ ke, “Hyɛ, nɔ ko bui wɔ fɔ, se wɔ Roma bi ɔ, a fia wɔ kpa ngɛ ma hɛ mi. Lɔ ɔ se ɔ, a wo wɔ tsu, nɛ jehanɛ a ngɛ hlae nɛ a ngmɛɛ wa he nigii nɛ waa ho lo? Dɛbi! Mɛ nitsɛmɛ a ba nɛ a ba je wɔ.”

³⁸ Ma he buli ɔmɛ ya sɛɛ nɔ́ nɛ ɔ ha Roma kojoli ɔmɛ. Nɛ benɛ a nu kaa Paulo kɛ Sila a, Roma bi ji mɛ ɔ, a ye gbeye.

³⁹ Lɔ ɔ he ɔ, Roma kojoli ɔmɛ ba Paulo kɛ Sila a ngɔ, nɛ a ba ye pɔpu. Lɔ ɔ se ɔ, a je mɛ ngɛ tsu ɔ mi, nɛ a de mɛ ke a je ma a mi nɛ a ho.

⁴⁰ Paulo kɛ Sila je kpo, nɛ a ho Lidia we ɔ mi ya. A ya na nyɛmimɛ ɔmɛ ngɛ lejɛ ɔ, nɛ a tu munyu kɛ wo mɛ he wami; kɛkɛ nɛ a pue blɔ, nɛ a je.