Ni Tsumi 12 - BAIBLO ALOO NGMAMI KLƆUKLƆU Ɔ

A wa asafo ɔ yi mi babauu

¹ Jamɛ a be ɔ mi nɔuu ɔ, Matsɛ Herode bɔni asafo ɔ mi bi ɔmɛ ekomɛ yi mi wami.

² E ha nɛ a kɛ klaate gbe Yohane nyɛmi Yakobo.

³ Benɛ e na kaa e ngɔ Yuda bi ɔmɛ a nya a, e ya nɔ nɛ e ha nɛ a nu Petro. (Abolokplolo nyami be mi nɛ e tsu kikɛmɛ a ní nɛ ɔ).

⁴ Benɛ a nu Petro ɔ, a wo lɛ tsu, nɛ a tu lɛ ngɔ wo ta buli a dɛ mi nɛ a bu e he. A dla ta buli ɔmɛ a mi eywiɛ, nɛ ta buli eywiɛ ngɛ kuu tsuaa kuu mi. Herode to kaa ke a ye Hetsɔmi ɔ ta pɛ e maa ngɔ Petro kɛ ha ma a nɛ a kojo lɛ.

⁵ Enɛ ɔ he ɔ, e tsi Petro nya ngɛ tsu ɔ mi; se Kristo asafo ɔ kpa Mawu pɛɛ wawɛɛ kɛ ha Petro.

A je Petro ngɛ tsu mi

⁶ Nyɔ ɔ mi, loko je maa na nɛ Herode maa ngɔ Petro kɛ ba ma a hɛ mi, konɛ a kojo lɛ ɔ, Petro hwɔɔ si ngɛ ta buli enyɔ a kpɛti. A kɛ kɔsɔkɔsɔ enyɔ bɔ lɛ pã, nɛ buli daa si ngɛ sinya a nya nɛ a ngɛ tsu ɔ he bue.

⁷ Tlukaa a, Nyɔmtsɛ ɔ bɔfo ko ba da e kasa nya, nɛ la kpɛ ngɛ tsu ɔ mi. Bɔfo ɔ gba Petro konɔ ma nɛ e tsɛ̃ɛ̃ lɛ ke, “Tee si esɔ!” Amlɔ ɔ, kɔsɔkɔsɔ ɔmɛ kplɔ ngɛ e nine.

⁸ Bɔfo ɔ de lɛ ke, “Dla o he nɛ o wo o tokota a!” Petro pee ja, nɛ Mawu bɔfo ɔ de lɛ ke, “Wo o yi nɔ tade ɔ, nɛ o nyɛɛ ye se!”

⁹ Petro nyɛɛ Mawu bɔfo ɔ se kɛ je kpo, se e li kaa nɔ́ nitsɛ nɛ ngɛ nɔ yae ɔ; e pee lɛ kaa nɔ́ nɛ nlami je e ngɛ.

¹⁰ A be kekle buli ɔmɛ, kɛ ni enyɔne ɔmɛ a he, nɛ a ba su dade agbo nɛ a kɛ yaa ma a mi ɔ he. Agbo ɔ nitsɛ bli ha mɛ, nɛ a je kpo kɛ po gbɛjegbɛ ko. Tlukaa a, Mawu bɔfo ɔ si Petro.

¹¹ Jehanɛ Petro hɛ mi pee lɛ paa, nɛ e de ke, “Kpaako i na le! Nyɔmtsɛ ɔ tsɔ e bɔfo ɔ kɛ ba, nɛ e ba je mi kɛ je Herode dɛ mi, kɛ je níhi nɛ Yuda bi ɔmɛ to kaa a maa pee mi ɔ a mi.”

¹² Benɛ e na bɔ nɛ níhi ya nɔ ha a, e pue nɔ kɛ ho Yohane nɛ a tsɛɛ lɛ Marko hulɔ ɔ nyɛ Maria we ɔ mi ya. Nihi fuu ba bua a he nya ngɛ lejɛ ɔ momo nɛ a ngɛ sɔlee.

¹³ Petro si agbo ɔ, nɛ yiheyo ko nɛ a tsɛɛ lɛ Roda a tu fo kɛ ba.

¹⁴ Benɛ e yó Petro gbi ɔ, bua jɔmi sɔuu nɛ e na he je ɔ, e bli we agbo ɔ, se mohu e tu fo kɛ ho ya de ke Petro daa si ngɛ agbo ɔ se.

¹⁵ A de lɛ ke, “O yi mi ngɛ puɛe.” Se e ma nɔ mi ke anɔkuale nɛ e ngɛ tue. Kɛkɛ nɛ a ke, “Lɛɛ e bɔfo mɔ!”

¹⁶ Se Petro ya nɔ nɛ e ngɛ agbo ɔ sie kɛ mwɔɔ. Benɛ a bli ɔ, ne Petro; nɛ a nya kpɛ a he.

¹⁷ E wo mɛ nine ke a pee kɔ; nɛ e tsɔɔ mɛ bɔ nɛ Nyɔmtsɛ ɔ ba je lɛ ngɛ tsu ɔ mi. E de mɛ ke, “Nyɛɛ ya nɛ nyɛ ya sɛɛ nɔ́ nɛ ɔ ha Yakobo kɛ nyɛmimɛ ɔmɛ.” Kɛkɛ nɛ e je lejɛ ɔ kɛ ho he kpa ya.

¹⁸ Benɛ je na a, gbeye nu ta buli ɔmɛ, nɛ a pee basaa; ejakaa a li nɔ́ nɛ ba Petro nɔ.

¹⁹ Herode ha nɛ a hla Petro, se a nɛ lɛ. Enɛ ɔ he ɔ, e ha nɛ a ta ta buli ɔmɛ a nya mi, nɛ lɔ ɔ se ɔ, e ha nɛ a gbe mɛ. Enɛ ɔ se ɔ, Herode je Yudea kɛ ho Kaisarea ya, nɛ e ya hi lejɛ ɔ.

Herode gbenɔ

²⁰ Herode mi mi fu Tiro, kɛ Sidon bi ɔmɛ wawɛɛ. Lɔ ɔ he ɔ, a bua a he nya, nɛ a ba na lɛ ngɛ Kaisarea. Benɛ a ba a, a ba na Blasto, tsɔlɔ nɛ hyɛɛ matsɛ we ɔ nɔ ɔ, nɛ a kpa lɛ pɛɛ ke e nyɛɛ a hɛ mi kɛ ya matsɛ ɔ ngɔ. Nɛ a ya na Herode, nɛ a kɛ lɛ kpata, ejakaa matsɛ ɔ zugba nɔ ní a yeɔ.

²¹ Ligbi pɔtɛɛ ko nɛ Herode nitsɛ to ɔ, e wo e we ablade tade ɔ, nɛ e ya hi matsɛ sɛ ɔ nɔ, nɛ e kɛ ma a tu munyu.

²² Ni ɔmɛ kpa ngmlaa ke, “Mawu ko gbi ji nɛ ɔ nɛ; enɛ ɔ lɛɛ pi nɔmlɔ gbi!”

²³ Amlɔ nɔuu ɔ, Nyɔmtsɛ ɔ bɔfo ɔ fia Herode nɔ́. Gɔgɔ ye lɛ, nɛ e gbo; ejakaa e wui Mawu hɛ mi nyami.

²⁴ Be nɛ ɔ mi tsuo ɔ, nihi babauu ba nu Mawu munyu ɔ, nɛ a he ye.

²⁵ Benɛ Barnaba kɛ Saul ya gbe ní tsumi nɛ a tu ngɔ wo a dɛ ɔ nya a, a kpale kɛ je Yerusalem, a ngɔ Yohane, nɔ nɛ a tsɛɛ lɛ Marko hulɔ ɔ ngɔ piɛ a he kɛ ba.