Ni Tsumi 11 - BAIBLO ALOO NGMAMI KLƆUKLƆU Ɔ

Petro bɔ Yerusalem asafo ɔ amaniɛ

¹ Bɔfo ɔmɛ, kɛ nyɛmimɛ ɔmɛ nɛ he Yesu ye, nɛ a ngɛ Yudea a tsuo nu kaa ma je li ɔmɛ hu pɛtɛ Mawu munyu ɔ he.

² Lɔ ɔ he ɔ, benɛ Petro ba Yerusalem ɔ, nihi nɛ a po mɛ ɔ a ti ni komɛ kɛ lɛ na nya sami.

³ A ke, “O ya ma je li nɛ a pui mɛ ɔ a ngɔ, nɛ o kɛ mɛ ya ye ní!”

⁴ Lɔ ɔ he ɔ, Petro bɔ mɛ amaniɛ ɔ tsuo fitsofitso ke,

⁵ “Benɛ i ngɛ sɔlee ngɛ Yopa ma a mi ɔ, nɔ́ nɔ ye nɔ, nɛ a je nɔ́ ko tsɔɔ mi. I na nɔ́ ko kaa bo nguaa ko nɛ je hiɔwe. A hɛɛ nɔ ɔ kɔ nya eywiɛ ɔmɛ, nɛ a ngɛ siue kɛ ma zugba kɛ ba su ye ngɔ haa.

⁶ I hyɛ nɔ́ ɔ mi too, nɛ i na we mi lohwe nane eywiɛɛywiɛtsɛmɛ, kɛ nga mi lohwehi, kɛ lohwehi nɛ waa, kɛ lohwe pɛlitsɛmɛ ngɛ mi.

⁷ Jehanɛ, i nu gbi ko nɛ de mi ke, ‘Petro, tee si, gbee eko nɛ o ye!’

⁸ Se i de lɛ ke, ‘Dɛbi Nyɔmtsɛ, i yi yakayaka nɔ́ ko, loo nɔ́ ko nɛ he tsɔ we hyɛ.’

⁹ Se gbi nɛ je hiɔwe ɔ he nɔ ekohu ke, ‘Nɔ́ nɛ Mawu tsu he ɔ, koo bu lɛ kaa e sɛ kaa a ye.’

¹⁰ A pee jã si etɛ, nɛ nyagbe ɔ, a wo nɔ́ ɔ kɛ ho hiɔwe ya ekohu.

¹¹ Jamɛ a be ɔ mi nɔuu ɔ, nyumuhi etɛ ba da agbo ɔ nya ngɛ we mi he nɛ i ngɛ ɔ; a tsɔ mɛ kɛ je Kaisarea kɛ ba ye ngɔ.

¹² Mumi ɔ de mi ke i kɛ mɛ nɛ ya, nɛ ma ko to tsle. I kɛ nyɛmimɛ ekpa nɛ ɔmɛ nɛ je Yopa a ya Kornelio we ɔ mi.

¹³ Lɛ hu e bɔ wɔ bɔ nɛ e na Mawu bɔfo ko ngɛ e we ɔ mi. Bɔfo ɔ ba da si ngɛ e hɛ mi nɛ e de lɛ ke, ‘Moo tsɔ nihi kɛ ya Yopa, nɛ o ya kpee Simon nɛ a tsɛɛ lɛ Petro hulɔ ɔ kɛ ba.

¹⁴ Ke e ba a, e ma de mo níhi nɛ a maa gu nɔ kɛ he mo nitsɛ, kɛ o we ɔ tsuo nyɛ yi wami.’

¹⁵ Benɛ i bɔni munyu ɔ tumi nɔuu kɛkɛ nɛ Mumi Klɔuklɔu ɔ ba a nɔ kaa bɔ nɛ e ba wɔ hu wa nɔ kekleekle Pentekoste ligbi ɔ.

¹⁶ Kɛkɛ nɛ i kai kaa Nyɔmtsɛ ɔ tu munyu nɛ ɔ ke, ‘Yohane ɔ, nyu e kɛ sɔle ni ɔmɛ, se nyɛɛ lɛɛ Mawu maa ngɔ Mumi Klɔuklɔu kɛ sɔle nyɛ.’

¹⁷ E fɔɔ si paa kaa nike ní ɔ nɛ wa ná benɛ wa he Nyɔmtsɛ Yesu Kristo ye ɔ, lɔ ɔ nɔuu nɛ Mawu ha jamɛ a ma je li ɔmɛ ɔ nɛ. Mɛnɔ ji mi mɔ nɛ ma de ke i ngɛ Mawu nya tsie!”

¹⁸ Benɛ a nu munyu nɛ ɔmɛ ɔ, a nya mi jɔ, nɛ a wo Mawu hɛ mi nyami mohu, nɛ a de ke, “Lɛɛ ma je li ɔmɛ hu Mawu ha mɛ he blɔ kaa a tsake a tsui, konɛ a he a yi wami!”

Antiokia asafo ɔ

¹⁹ Stefano gbenɔ se ɔ, a bɔni nihi nɛ he Nyɔmtsɛ Yesu ye ɔ yi mi wami wawɛɛ. Enɛ ɔ ha nɛ a ti ni komɛ tu fo kɛ ho Foinike, Kipro, kɛ Antiokia tɔɔ ya. A fiɛ we munyu ɔ kɛ ha we nɔ ko nɔ ko pe Yuda bi kɛkɛ.

²⁰ Se a ti ni komɛ nɛ je Kipro kɛ Kirene lɛɛ a pue nɔ kɛ ho Antiokia ya ya fiɛ sane kpakpa a nɛ kɔɔ Nyɔmtsɛ Yesu he ɔ kɛ tsɔɔ Hela bi hulɔ.

²¹ Nyɔmtsɛ ɔ piɛ a he, nɛ nihi babauu he ye, nɛ a tsake.

²² Asafo ɔ nɛ ngɛ Yerusalem ɔ nu sane nɛ ba nɛ ɔ. Lɔ ɔ he ɔ, a tsɔ Barnaba Antiokia.

²³ Benɛ e ya su lejɛ ɔ, nɛ e na bɔ nɛ Mawu gbaa ni ɔmɛ ɔ, e bua jɔ e he, nɛ e tu munyu tsɔɔ mɛ tsuo ke a ye Nyɔmtsɛ ɔ anɔkuale kɛ a tsui tsuo.

²⁴ Barnaba a, nɔmlɔ kpakpa nɛ heɔ Mawu yeɔ saminya ji lɛ, nɛ Mumi Klɔuklɔu hyi lɛ tɔ. Enɛ ɔ ha nɛ a na nihi babauu kɛ ha Nyɔmtsɛ ɔ.

²⁵ Jehanɛ Barnaba pue nɔ kɛ ho Tarso ya ya hla Saulo.

²⁶ Benɛ e na lɛ ɔ, e kɛ lɛ ba Antiokia ekohu. A kɛ asafo ɔ hi si jeha mluku, nɛ a tsɔɔ nihi babauu ní. Antiokia ji he nɛ a wo nihi nɛ he ye ɔ biɛ ngɛ ke Kristo we bi.

²⁷ Maa pee jamɛ a be ɔ mi nɔuu ɔ, gbali komɛ je Yerusalem kɛ ba Antiokia.

²⁸ A ti nɔ ko nɛ a tsɛɛ lɛ Agabo ɔ te da si, nɛ Mumi ɔ ha nɛ e gba nɛ e de ke hwɔ nguaa ko ma ba te si ngɛ je ɔ mi tsuo. Hwɔ ba niinɛ ngɛ Kaisare Klaudio yi nɔ.

²⁹ Lɔ ɔ he ɔ, kaseli ɔmɛ pee a yi mi kaa a ti nɔ tsuaa nɔ ma tsu nɔ́ ko bɔ nɛ e ma nyɛ, konɛ a kɛ ya je ngmlaa ha nyɛmimɛ ɔmɛ ngɛ Yudea.

³⁰ A pee ja niinɛ, nɛ a ngɔ sika a kɛ mane asafo nikɔtɔma amɛ kɛ gu Barnaba kɛ Saulo a nine nɔ.