Ni Tsumi 10 - BAIBLO ALOO NGMAMI KLƆUKLƆU Ɔ

Petro kɛ Kornelio

¹ Nyumu ko ngɛ Kaisarea nɛ a tsɛɛ lɛ Kornelio. Kornelio nɛ ɔ, Roma tabo ɔ nɛ a tsɛɛ Italia tabo ɔ we asafoatsɛ ji lɛ.

² Mawu jalɔ ji lɛ, nɛ e kɛ e we ɔ tsuo yee Mawu gbeye. E peeɔ mami bi dɛgutsɛmɛ ɔmɛ kpakpa hulɔ, nɛ e kpaa Mawu pɛɛ daa.

³ Ligbi ko piani maa pee ngmlɛ etɛ ɔ, a je tsɔɔ lɛ ngɛ nina mi kaa Mawu bɔfo ba e ngɔ ba tsɛ lɛ ke, “Kornelio!”

⁴ Kornelio hyɛ lɛ too; gbeye nu lɛ, nɛ e bi ke, “Nyɔmtsɛ, mɛni sane?” Bɔfo ɔ de lɛ ke, “Kue nɛ o ngɛ fae, kɛ kpakpa nɛ o ngɛ pee ɔ, Mawu na he bua jɔmi.

⁵ Lɔ ɔ he ɔ, moo tsɔ nihi kɛ ya Yopa, nɛ o ya kpee Simon nɛ a tsɛɛ lɛ Petro hulɔ ɔ kɛ ba.

⁶ E ya to Simon, lohwe he womi tsopa wolɔ ɔ ngɔ ngɛ wo ɔ nya.”

⁷ Kɛkɛ nɛ Mawu bɔfo ɔ je. Jehanɛ Kornelio tsɛ e sɔmɔli enyɔ, kɛ ta bulɔ kake kɛ ba e ngɔ. Ta bulɔ nɛ ɔ, Kornelio he buli ɔmɛ a ti nɔ kake nɛ yee Mawu gbeye ji lɛ.

⁸ E sɛɛ níhi nɛ ba e nɔ ɔ tsuo ha mɛ; kɛkɛ nɛ e tsɔ mɛ Yopa.

⁹ E nɔ jena benɛ a ngɛ blɔ ɔ nɔ kɛ yaa nɛ a miɔ nɛ a maa su Yopa, maa pee ngmlɛ nyɔngma kɛ enyɔ ɔ, Petro ho tsu ɔ yi mi ya, konɛ e ya sɔle.

¹⁰ Hwɔ bɔni lɛ yemi, nɛ e hla kaa e na nɔ́ ko nɛ e ye. Se benɛ a ngɛ niye ní ɔ pee ɔ, nɔ́ nɔ e nɔ.

¹¹ E na nɛ hiɔwe nya bli, nɛ nɔ́ ko kaa bo nguaa ko je lejɛ ɔ kɛ ma zugba kaa nɔ nɛ pe a hɛɛ e kɔ nya eywiɛ ɔmɛ a mi.

¹² Lohwe nane eywiɛɛywiɛtsɛmɛ, lohwehi nɛ waa, kɛ lohwe pɛlitsɛ slɔɔto ɔmɛ tsuo eko ngɛ mi.

¹³ Gbi ko de lɛ ke, “Petro, tee si; gbee eko nɛ o ye!”

¹⁴ Se Petro ke, “Nyɔmtsɛ, dɛbi; nɔ́ ko nɛ a buu kaa e he tsɔ we, loo e sɛ nɛ a yeɔ ɔ, i yi hyɛ.”

¹⁵ Gbi ɔ de lɛ ekohu ke, “Nɔ́ nɛ Mawu tsu he ɔ, koo bu lɛ kaa e sɛ nɛ a yeɔ!”

¹⁶ Nɔ́ nɛ ɔ ya nɔ si etɛ, kɛkɛ nɛ a kpale nɔ́ ɔ kɛ ho hiɔwe ya.

¹⁷ Benɛ Petro dɛ yaa, nɛ e ngɛ nɔ́ nɛ ɔ he susue ɔ, jamɛ a be ɔ mi ɔ, ni ɔmɛ nɛ Kornelio tsɔ ɔ ya bi si, nɛ a ba we mi he nɛ Simon ngɛ ɔ; nɛ a daa si ngɛ agbo ɔ nya.

¹⁸ A bi kɛ ngmlaa ke, “Nubwɔ ko ngɛ we nɛ ɔ mi nɛ a tsɛɛ lɛ Simon Petro lo?”

¹⁹ Se benɛ Petro ngɛ nɔ́ nɛ a je tsɔɔ lɛ ɔ he susue kɛ mwɔɔ ɔ, Mumi ɔ de lɛ ke, “Hyɛ, nyumuhi ni etɛ ngɛ mo hlae.

²⁰ Dla o he nɛ o kple si esɔ, nɛ o kɛ mɛ nɛ ho; ejakaa imi lɛ i tsɔ mɛ.”

²¹ Petro kple si, nɛ e ya de nyumu ɔmɛ ke, “Imi ji nɔ nɛ nyɛ ngɛ hlae ɔ nɛ. Sane ko lo?”

²² A he nɔ ke, “Asafoatsɛ Kornelio lɛ tsɔ wɔ. Nyumu nɛ ɔ yeɔ dami sane; e yee Mawu gbeye wawɛɛ, nɛ Yuda bi ɔmɛ tsuo tuɔ e he munyu kpakpa. Mawu bɔfo ko de lɛ ke e tsɔ nɛ a ba kpee mo kɛ ba e we ɔ mi, konɛ e bu o nya mi munyu tue.”

²³ Petro kɛ mɛ ya we ɔ mi, nɛ a ya hwɔ e ngɔ. E nɔ jena a, e kɛ mɛ pue nɔ kɛ ho; nɛ nyɛmimɛ nɛ ngɛ Yopa a a ti ni komɛ piɛ e he.

²⁴ E nɔ jena ekohu ɔ, a ya su Kaisarea. Jamɛ a be ɔ mi ɔ, Kornelio ngɛ mɛ blɔ hyɛe, nɛ e tsɛ e weku li, kɛ e huɛmɛ kpakpahi kɛ ba kpe.

²⁵ Benɛ Petro ngɛ we ɔ mi sɛe ɔ, Kornelio kɛ lɛ ba kpe, nɛ e ba kpla si ngɛ Petro nane nya.

²⁶ Se Petro wo e nɔ, nɛ e ke, “Tee si! Imi nitsɛ hu adesa kɛkɛ ji mi.”

²⁷ Petro kɛ Kornelio sɛɛ ní hluu kɛ ya sɛ we ɔ mi. Petro na kaa nihi babauu ba bua a he nya ngɛ lejɛ ɔ.

²⁸ Nɛ e de mɛ ke, “Nyɛ nitsɛmɛ nyɛ le kaa Yuda no be he blɔ nɛ e kɛ ma kpa ko mi no bɔɔ, aloo e baa e ngɔ. Se imi lɛɛ Mawu je tsɔɔ mi ke ma ko bu nɔ ko yaka nɔmlɔ, loo nɔ nɛ he tsɔ we.

²⁹ Enɛ ɔ he hulɔ nɛ benɛ a tsɔ ba tsɛ mi ɔ, i je we ye nya, nɛ i ba a nɛ. Lɔ ɔ he ɔ, i ngɛ nyɛ bie ke, mɛni he je nyɛ tsɔ ba tsɛ mi ɔ?”

³⁰ Kornelio he nɔ ke, “Mwɔnɛ ɔ ji ligbi eywiɛ, maa pee gbɔkuɛ ngmlɛ etɛ ɔ, i ngɛ sɔlee ngɛ ye we ɔ mi. Tlukaa a, nyumu ko nɛ wo tade nɛ ngɛ kpɛe klãiklãi ba da ye hɛ mi,

³¹ nɛ e de ke, ‘Kornelio, Mawu nu o kue fami ɔ, nɛ ní kpakpahi nɛ o pee ɔ hu, e ná he bua jɔmi.

³² Moo tsɔ nihi kɛ ya Yopa, nɛ o ya kpee Simon nɛ a tsɛɛ lɛ Petro hulɔ ɔ kɛ ba. E ya to Simon, lohwe he womi tsopa wolɔ ɔ ngɔ ngɛ wo ɔ nya.’

³³ Lɔ ɔ he ɔ, amlɔ nɔuu ɔ, i tsɔ nihi o ngɔ; nɛ o pee saminya kaa o ba. Amlɔ nɛ ɔ nɛ wɔ tsuo wa ba bua ngɛ Nyɔmtsɛ hɛ mi ngɛ hiɛmɛ nɛ ɔ, nɔ́ tsuaa nɔ́ ko nɛ Nyɔmtsɛ ɔ de mo ɔ, wa suɔ nɛ waa maa nu.”

Petro fiɛ sane kpakpa a ha Kornelio kɛ e we mi bi ɔmɛ

³⁴ Kɛkɛ nɛ Petro wo e nya nɔ nɛ e de ke, “I kpa si anɔkuale mi kaa Mawu hyɛ we nɔ hɛ mi.

³⁵ Se mohu ma tsuaa ma mi ɔ, nɔ nɛ yee Mawu gbeye, nɛ e peeɔ nɔ́ nɛ da a, lɛ ji nɔ nɛ saa e hɛ mi.

³⁶ Mawu tsɔ nɛ a kɛ munyu ɔ ya ha Israel bi ɔmɛ, nɛ a gu Yesu Kristo nɔ kɛ jaje sane kpakpa a nɛ kɛ tue mi jɔmi baa a ngɔ tsɔɔ mɛ. Lɛ, Yesu Kristo ɔ ji nimli adesahi tsuo a Nyɔmtsɛ.

³⁷ Nyɛ nitsɛmɛ nyɛ le sane ɔ nɛ ba ngɛ Yudea a tsuo momo; e je sisi kɛ je Galilea, kɛ je benɛ Yohane, nɔ sɔlelɔ ɔ fiɛ ɔ se.

³⁸ Nyɛ le Yesu nɛ je Nazaret ɔ he sane, bɔ nɛ Mawu hla lɛ, nɛ e ha nɛ Mumi Klɔuklɔu ɔ he wami ɔ ba e nɔ. Nyɛ le bɔ nɛ e kpa si kɛ ya he tsuaa he kɛ kpakpa peemi. E tsa hiɔtsɛmɛ, nɛ e hia mumi yayamihi hulɔ; ejakaa Mawu kɛ lɛ ngɛ.

³⁹ Níhi tsuo nɛ e pee ngɛ Yuda bi ɔmɛ a zugba a nɔ, kɛ Yerusalem tsuo ɔ, wa yeɔ he odase. A sɛu lɛ ngɛ sɛumi tso nɔ, nɛ e gbo.

⁴⁰ Se Mawu tle lɛ si ligbi etɛne ɔ, nɛ e ha nɛ e je e he kpo tsɔɔ

⁴¹ wɔ nihi nɛ Mawu hla ngɔ to momo kaa odase yeli ɔ, se pi nɔ tsuaa nɔ. Wɔ ji ni nɛmɛ nɛ e kɛ wɔ ye ní nɛ wa nu ní, benɛ e te si kɛ je gbeje se ɔ.

⁴² Jehanɛ hu, e fa wɔ ke waa fiɛ sane kpakpa a ngɔ tsɔɔ ma a, nɛ waa ye odase kaa lɛ ji nɔ nɛ Mawu hla nɛ e kojo nihi nɛ hɛ ngɛ, kɛ ni nɛmɛ nɛ gbo ɔ.

⁴³ Gbali ɔmɛ tsuo ye Yesu he odase, nɛ a de ke nɔ tsuaa nɔ nɛ ma he lɛ maa ye ɔ, a maa ngɔ e he yayami kɛ pa lɛ ngɛ Yesu biɛ mi.”

Ma je li ɔmɛ ná Mumi Klɔuklɔu ɔ

⁴⁴ Benɛ Petro ngɛ munyu tue kɛ mwɔɔ ɔ, Mumi Klɔuklɔu ɔ ba nihi tsuo nɛ ngɛ munyu ɔ tue bue ɔ a nɔ.

⁴⁵ Enɛ ɔ ha Yuda bi nɛ he ye, nɛ a kɛ Petro je Yopa kɛ ba a a nya kpɛ a he kaa Mawu ha nɛ nɔke nɔ́ nɛ ji Mumi Klɔuklɔu ɔ ba ma je li ɔmɛ hu a nɔ.

⁴⁶ Ejakaa a nu kaa a ngɛ ma se gbi slɔɔtohi tue, nɛ a ngɛ Mawu yi jee. Kɛkɛ nɛ Petro wo e gbi nɔ nɛ e de ke,

⁴⁷ “Ni nɛ ɔmɛ ná Mumi Klɔuklɔu ɔ kaa bɔ nɛ wɔ hu wa na a. Anɛ nɔ ko ma nyɛ maa tsi nya nɛ a ko ngɔ nyu kɛ sɔle mɛ lo?”

⁴⁸ Kɛkɛ nɛ e fa ke a sɔle ni ɔmɛ ngɛ Yesu Kristo biɛ mi. Lɔ ɔ se ɔ, a kpa Petro pɛɛ ke e kɛ mɛ nɛ hi si be bɔɔ ko.