Ni Tsumi 1 - BAIBLO ALOO NGMAMI KLƆUKLƆU Ɔ

¹ Ye suɔlɔ Teofilo: Ngɛ ye kekle womi ɔ mi ɔ, i ngma níhi tsuo nɛ Yesu ba pee, kɛ ní nɛ e tsɔɔ kɛ je be nɛ e bɔni e ní tsumi,

² kɛ ya su ligbi nɛ a ngɔ lɛ kɛ ho hiɔwe ya. Loko a ngɔ lɛ kɛ ho hiɔwe ya a, e gu Mumi Klɔuklɔu ɔ nɔ nɛ e tsɔɔ bɔfohi nɛ e hla a mlaa nɛ a ye nɔ.

³ E gbenɔ se kekleekle ligbi nyingmi eywiɛ ɔmɛ ɔ, e gu blɔhi fuu a nɔ je e he kpo tsɔɔ bɔfo ɔmɛ kaa e ngɛ wami mi kɛ mwɔɔ. A na lɛ, nɛ e kɛ mɛ sɛɛ Mawu matsɛ yemi ɔ he ní.

⁴ Benɛ a nya ba bua ngɛ he kake ɔ, e fa mɛ ke, “Nyɛ ko je Yerusalem; se mohu nyɛɛ mlɛ kɛ yaa si be nɛ si nɛ Tsaatsɛ wo ɔ maa ba mi kaa bɔ nɛ i de nyɛ momo ɔ.

⁵ Yohane ngɔ nyu kɛ sɔle nihi, se nyɛɛ lɛɛ e be kɛe nɛ a kɛ Mumi Klɔuklɔu ɔ maa sɔle nyɛ.”

A ngɔ Yesu kɛ ho hiɔwe ya

⁶ Benɛ bɔfo ɔmɛ kɛ Yesu ba bua ngɛ he kake ɔ, a bi lɛ ke, “Nyɔmtsɛ, anɛ kikɛmɛ a be nɛ ɔ mi nɛ o maa kpale ngɔ matsɛ yemi ɔ kɛ ha Israel ɔ lo?”

⁷ Yesu de mɛ ke, “Be nɛ ní nɛ ɔmɛ maa ba mi ɔ, Tsaatsɛ pɛ lɛ to, nɛ e pi nyɛ blɔ nya kaa nyɛ maa le;

⁸ se ke Mumi Klɔuklɔu ɔ na ba nyɛ nɔ ɔ, nyɛ ma na he wami kɛ fiɛ, nɛ nyɛ maa ye odase ha mi ngɛ Yerusalem, Yudea, kɛ Samaria tsuo kɛ yaa su je ɔ nyagbe he tɔɔ.”

⁹ Benɛ e de enɛ ɔ se ɔ, a ngɛ lɛ hyɛe nɔuu nɛ a wo lɛ kɛ ho hiɔwe ya, nɛ bɔku ba sa lɛ kɛ ho nɛ a nɛ lɛ hu.

¹⁰ Benɛ e yaa nɛ a ngɛ hiɔwe hyɛe too kɛ mwɔɔ ɔ, tlukaa a, ne nyumuhi enyɔ nɛ wo tade hiɔ, nɛ daa si ngɛ a kasa nya.

¹¹ Nyumu ɔmɛ bi ke, “Nyɛ Galilea bi mɛni he je nyɛ daa si ngɛ kɔɔhiɔ mi hyɛe kikɛ nɛ ɔ? Yesu ɔ nɛ a ngɔ kɛ ho hiɔwe ya nɛ ɔ, e maa kpale kɛ ba ja nɔuu kaa bɔ nɛ nyɛ na lɛ nɛ e yaa a.”

Yuda nane mi malɔ

¹² Bɔfo ɔmɛ kpale a se kɛ je Oliv yo ɔ he kɛ ho Yerusalem ya. Lejɛ ɔ kɛ Yerusalem kɛmi maa pee Hejɔɔmi ligbi blɔ nyɛɛmi.

¹³ A ba sɛ ma a mi, nɛ a kuɔ kɛ ho hiɔwe tsu mi he nɛ a ba to ɔ. Mɛ ji Petro, Yohane, Yakobo, Andrea, Filipo, Toma, Bartolomeo, Mateo, Alfeo bi Yakobo, Simon ma he doolɔ ɔ, kɛ Yuda, Yakobo bi ɔ.

¹⁴ A kɛ yi ɔmɛ, kɛ Yesu nyɛ Maria, kɛ Yesu nyɛminyumu ɔmɛ pɔɔ a he nya buami kɛ ha sɔlemi.

¹⁵ Be bɔɔ se ɔ, nihi maa pee lafa kɛ nyingmi enyɔ nɛ he Yesu ye ɔ ba bua a he nya. Kɛkɛ nɛ Petro te da si, nɛ e kɛ mɛ tu munyu ke,

¹⁶ “Ye nyɛmimɛ, Mumi Klɔuklɔu ɔ ba David nɔ be ko, nɛ e de nɔ́ ko ngɛ Yuda nɛ nyɛɛ nihi a hɛ mi ya nu Yesu ɔ he. Nɔ́ nɛ ngmami ɔ de ɔ, e sa kaa e ba mi.

¹⁷ Yuda a, jinɛ e piɛ wa he; a hla lɛ, nɛ a ha lɛ blɔ nya, konɛ waa kɛ lɛ tsuo nɛ tsu sɔmɔmi ní tsumi nɛ ɔ.”

¹⁸ (Se Yuda tsu yi wu tso ní; nɛ sika nɛ e na ngɛ mi ɔ, e ngɔ ya he abɔɔ. Lejɛ ɔ nɛ e gbo ngɛ, nɛ e mi ni pã pue si.

¹⁹ Nihi tsuo nɛ ngɛ Yerusalem ɔ na le enɛ ɔ; lɔ ɔ he ɔ, a tsɛɛ jamɛ a abɔɔ ɔ ngɛ mɛ nitsɛmɛ a gbi mi ke Akeldama. E sisi ji “Muɔ Abɔɔ.”)

²⁰ “Bɔ nɛ a ngma ngɛ La womi ɔ mi ji nɛ ɔ nɛ, ‘E we ɔ nɛ pee we doku, nɛ nɔ ko nɔ ko kó hi mi.’ A ngma hu ke, ‘E sɔmɔmi blɔ nya a, nɔ kpa nɛ he.’

^21-22 “Lɔ ɔ he ɔ, e sa kaa nɔ ko nɛ ba piɛ wa he kɛ ye odase kaa Nyɔmtsɛ Yesu te si kɛ je gbeje. Nɔmlɔ nɛ ɔ, e sa kaa e pee nihi nɛ piɛ wa he benɛ waa kɛ Yesu nyɛɔ kɛ yaa kɛ baa a a ti nɔ kake. E pee nɔ ko nɛ kɛ wɔ ngɛ kɛ je be nɛ Yohane bɔni fiɛmi ke e sa kaa a sɔle nɔ ɔ, kɛ ba si be nɛ a ngɔ Yesu kɛ je wa he kɛ ho hiɔwe ya a.”

²³ Lɔ ɔ he ɔ, a hla ni enyɔ ngɔ da si, Yosef nɛ a tsɛɛ lɛ Barsaba hulɔ, nɛ e biɛ kpa ji Yusto ɔ, kɛ Matia.

²⁴ Kɛkɛ nɛ a sɔle ke, “Nyɔmtsɛ, mo nɛ o le nimli tsuo a tsui mi, tsɔɔ wɔ ni enyɔ nɛ ɔmɛ a ti nɔ nɛ o hla,

²⁵ konɛ e sɔmɔ kaa bɔfo ngɛ Yuda nane mi. Yuda je wa he kɛ ho he nɛ sa kaa e hi ɔ ya.”

²⁶ Kɛkɛ nɛ a fɔ sɔ, konɛ a kɛ hla ni enyɔ ɔmɛ a ti nɔ kake. Sɔ ɔ ya nɔ Matia nɔ; nɛ a ngɔ lɛ ngɔ piɛ bɔfo nyɔngma kɛ kake ɔmɛ a he.