Nehemia 9 - BAIBLO ALOO NGMAMI KLƆUKLƆU Ɔ

Ma a jaje a he yayami ɔmɛ

^1-2 Jamɛ a nyɔhiɔ ɔ ligbi nyingmi enyɔ kɛ eywiɛne ɔ nɔ ɔ, Israel bi ɔmɛ ba kpe konɛ a ha hwɔ, nɛ a pia a he ngɛ a yayami ɔmɛ a he. Jamɛ a be ɔ mi ɔ, Israel bi ɔmɛ tsɔ a he kɛ je nibwɔ ɔmɛ tsuo a he momo. Israel bi ɔmɛ bu kpekpe ya bo, nɛ a ngɔ bunyuku ngɔ pue a yi mi kɛ ye kɔmɔ. Jehanɛ, a da si nɛ a bɔni mɛ nitsɛmɛ, kɛ a nɛmɛ ɔmɛ a he yayamihi nɛ a pee ɔ jajemi.

³ A kane Yawɛ, a Mawu ɔ mlaa a ngmlɛfia etɛ, nɛ ngmlɛfia etɛ nɛ tsa nɔ ɔ, a jaje a he yayami ɔmɛ, nɛ a ja Yawɛ, a Mawu ɔ.

⁴ A pee kpoku ko ha Levi bi ɔmɛ, nɛ lɔ ɔ nɔ nɛ Yeshua, Bani, Kadmiel, Shebania, Buni, Sherebia, Bani, kɛ Kenani da si ngɛ. A sɔle boboobo kɛ ha Yawɛ, a Mawu ɔ.

⁵ Levi bi nɛ ɔmɛ ji ni nɛmɛ nɛ nyɛɛ ma a hɛ mi kɛ sɔle ha Mawu: Yeshua, Kadmiel, Bani, Hashabneya, Sherebia, Hodia, Shebania, kɛ Petahia. Bɔ nɛ a de ji nɛ ɔ nɛ, “Nyɛɛ te si nɛ nyɛ je Yawɛ, nyɛ Mawu ɔ yi. Nyɛ je e yi daa kɛ daa. Mawu lee, ha nɛ nɔ tsuaa nɔ nɛ je o biɛ ɔ yi. Nɔmlɔ adesa yi jemi pi ha mo lɛɛ, se ha nɛ wa je o yi kɛ̃.”

Yayami jajemi

⁶ Nɛ a sɔle ke, “Yawɛ, mo nɔ kake pɛ ji Yawɛ, mo nɛ o pee hiɔwe ɔ, kɛ dodoe ɔmɛ ngɛ kɔɔhiɔ mi. Mo nɛ o pee zugba kɛ wo, kɛ nɔ́ tsuaa nɔ́ nɛ ngɛ a mi, nɛ o ha mɛ tsuo wami. Hiɔwe ta a kplaa si haa mo, nɛ a jaa mo.

⁷ Yawɛ Mawu, mo nɛ o hla Abram, nɛ o kpaka lɛ kɛ je Ur ngɛ Babilonia; o tsake e biɛ ngɔ pee Abraham.

⁸ O na kaa e ye mo anɔkuale, lɔ ɔ he ɔ, o kɛ lɛ so. O wo lɛ si ke o maa ngɔ Kanaan, Hit, Amon, Periz, Yebus, kɛ Girgash bi ɔmɛ a zugba a kɛ ha e nina. O ye o siwo ɔ nɔ, ejakaa o yeɔ anɔkuale.

⁹ “O na bɔ nɛ wa nɛmɛ ɔmɛ na amanehlu ngɛ Egipt, o nu a kue fami ɔ ngɛ Wo Tsu ɔ nya.

¹⁰ O pee okadihi, kɛ nyakpɛ níhi ngɛ Farao ɔ, kɛ e ma ní tsuli ɔmɛ, kɛ e ma a tsuo a hɛ mi, ejakaa o le bɔ nɛ a wa o ma a yi mi. O he biɛ kɛ je jamɛ a be ɔ mi tɔɔ kɛ ba su mwɔnɛ ɔ.

¹¹ O je blɔ kɛ gu wo ɔ mi kɛ ha o ma a, nɛ o kpaka mɛ kɛ nyɛɛ wo ɔ mi ngɛ zugba gbigbli nɔ. Nihi nɛ nyɛɛ a se ɔ gbo tlɔ nyu nɛ mi kuɔ ɔ sisi, kaa bɔ nɛ tɛ muɔ kɛ yaa wo nɛ gli sisi ɔ.

¹² O ngɔ bɔku kɛ tsɔɔ mɛ blɔ piani; se nyɔ mi lɛɛ o ha mɛ la nɛ a kɛ hyɛ a blɔ mi.

¹³ O kple si kɛ je hiɔwe kɛ ba Sinai yo ɔ nɔ, nɛ o kɛ o ma a ba tu munyu; o ha mɛ mlaa kpakpahi, kɛ ní tsɔɔmi nɛ hi kɛ pi si.

¹⁴ O tsɔɔ mɛ kaa a ye Hejɔɔmi ligbi ɔ klɔuklɔu, nɛ o gu o tsɔlɔ Mose nɔ kɛ ha mɛ o mlaa amɛ.

¹⁵ “Benɛ hwɔ ye mɛ ɔ, o ha mɛ niye ní kɛ je hiɔwe, nɛ benɛ kuma ye mɛ ɔ, o ha mɛ nyu kɛ je tɛ sa mi. O de mɛ ke zugba a nɛ o wo si ke o ma ha mɛ ɔ, a ya ngɔ nɛ a hi nɔ.

¹⁶ Se wa nɛmɛ ɔmɛ ba wo a he nɔ nɛ a wa tue, nɛ a yi o mlaa amɛ a nɔ.

¹⁷ A kplɛɛ we nɛ a bu mo tue; a hɛ je níhi tsuo nɛ o pee ɔ a nɔ, nyakpɛ níhi tsuo nɛ o pee ha mɛ ɔ, a hɛ je nɔ. Ngɛ a he nɔ womi ɔ mi ɔ, a hla hɛ mi nyɛɛlɔ konɛ e kpale mɛ kɛ ya Egipt nyɔguɛ yemi ɔ mi. Se moo lɛɛ Mawu nɛ ngɔɔ tɔmi ngɔ paa ji mo; dloolɔ kɛ mɔbɔ nalɔ ji mo, nɛ o mi mi fu we mla. O mɔbɔ nami ɔ kle; o kua we o ma a.

¹⁸ Benɛ a puɛ amaga ko nɛ ngɛ kaa na ku, nɛ a de ke amaga nɛ ɔ nɛ kpaka mɛ kɛ je Egipt kɛ ba a, a bɔ musu babauu kɛ si mo Yawɛ.

¹⁹ Jamɛ a be ɔ mi po, o ngmɛɛ we a he ngɛ nga kplanaa a nɔ; ejakaa o naa mɔbɔ saminya. O je we bɔku ɔ nɛ tsɔɔ mɛ blɔ piani ɔ, kɛ la a hu nɛ tsɔɔ mɛ blɔ nyɔ mi ɔ kɛ ji a he.

²⁰ O ha nɛ o mumi kpakpa a tsɔɔ mɛ ní, nɛ o ha mɛ a nya mi ngma, kɛ nyu nɛ a nu.

²¹ Jeha nyingmi eywiɛ sɔuu nɛ a nyɛɛ nga kplanaa a nɔ ɔ, o ha mɛ nɔ́ tsuaa nɔ́ nɛ he hia mɛ: a tadehi gba we ngɛ a he, nɛ a nanehi hu fuu we.

²² “O ha a ye je mahi, matsɛ yemihi, kɛ zugbahi nɛ bɔle mɛ ɔ a nɔ. A ye Heshbon zugba a, kɛ Bashan zugba a tsuo nɔ. Heshbon ji he nɛ Sihon ye matsɛ ngɛ, nɛ Bashan ji he nɛ Og ye matsɛ ngɛ.

²³ O ha nɛ a bimɛ ɔmɛ hu a he hiɛ babauu kaa dodoehi ngɛ hiɔwe; nɛ zugba a nɛ o de a nɛmɛ ɔmɛ ke a ya ngɔ ɔ, o kpaka mɛ kɛ ya lejɛ ɔ.

²⁴ Lɔ ɔ he ɔ, a bimɛ ɔmɛ ya nɛ a ya ngɔ zugba a. O jɔɔ Kanaan bi ɔmɛ a he, nɛ o ngɔ mɛ, a matsɛmɛ ɔmɛ, kɛ zugba a tsuo ngɔ wo o ma a dɛ, konɛ a pee mɛ bɔ nɛ a suɔ.

²⁵ A ngɔ ma nguahi nɛ a fia gbogbo ngɔ wo a he ɔ zugba nɛ baa ní, kɛ wehi nɛ hyi tɔ kɛ ní kpakpahi tsuo; a ngɔ nyu vuhi nɛ a tsua momo, oliv tsohi, tsohi nɛ woɔ yiblii, kɛ wai ngmɔhi. A ye ní ɔmɛ nyamanyama; a tɔ nɛ a plɔke. Ní kpakpa amɛ nɛ o ha mɛ ɔ, a nya he.

²⁶ “Se enɛ ɔmɛ tsuo a se ɔ, o ma a tsɔ o hɛ mi atuã, nɛ a bui mo tue; a sake o mlaa a ngɔ fɔ a tue se. A gbe gbali ɔmɛ nɛ ka a hɛ mi, nɛ de mɛ ke a kpale kɛ ba o ngɔ ɔ; kɛ nɔ a bɔ musu babauu.

²⁷ Lɔ ɔ he ɔ, o ha a he nyɛli ba ye a nɔ, nɛ a hao mɛ. Ngɛ a fimi be ɔ mi ɔ, a fa kue kɛ tsɛ mo, nɛ o bu mɛ tue kɛ je hiɔwe. O mɔbɔ nami babauu ɔ nya a, o ha mɛ hɛ mi nyɛɛli nɛ kpɔ mɛ kɛ je a he nyɛli a dɛ.

²⁸ Benɛ a na tue mi jɔmi ɔ, a pee yayami ekohu; kɛkɛ nɛ o je a se, nɛ a he nyɛli ɔmɛ ba ye a nɔ ekohu. Se benɛ a tsake a tsui, nɛ a fa kue kɛ tsɛ mo ekohu ɔ, o bu mɛ tue kɛ je hiɔwe; nɛ o na mɛ mɔbɔ, nɛ o kpɔ mɛ si abɔ.

²⁹ O wo mɛ ga ke a ye o mlaa amɛ a nɔ, se a ya wo a he nɔ mohu, nɛ a yi mlaa amɛ a nɔ. A ye o mlaa amɛ a nɔ jinɛ a yi ko na wami. Se akɛnɛ a kuɛ wa, nɛ a bui nɔ́ ko nɔ́ ko he je ɔ, a kua mlaa amɛ a nɔ yemi.

³⁰ O to o tsui si, nɛ o bɔ mɛ kɔkɔ jeha babauu. O ngɔ o mumi ɔ ngɔ wo o gbali ɔmɛ a mi, konɛ a tu munyu ngɔ tsɔɔ mɛ; se o ma a wa tue. Lɔ ɔ he ɔ, o ngmɛɛ a he ha ma kpahi nɛ a ye a nɔ.

³¹ O kua we mɛ; o na mɛ mɔbɔ, nɛ o kpataa we a hɛ mi hulɔ. Ejakaa Mawu mɔbɔ nalɔ kɛ dloolɔ ji mo!

³² “Wa Mawu, mo Mawu kpetekpleenyɛ, mo nɛ o he ngɛ gbeye, nɛ o kɔni si wa. Moo lɛɛ o yeɔ o somi, kɛ si womi ɔmɛ a nɔ pɛpɛɛpɛ. Kɛ je benɛ Asiria matsɛmɛ ɔmɛ bɔni wɔ haomi kɛ ba su mwɔnɛ ɔ, moo hyɛ amanehlu sɔuu nɛ wa na! Wa matsɛmɛ ɔmɛ, wa ma nimeli ɔmɛ, wa osɔfo ɔmɛ, gbali ɔmɛ, wa nɛmɛ ɔmɛ, kɛ wa ma kpekpemi ɔ tsuo na nɔ́ tsɔ. Mo kai wɔ, ejakaa wa we amanehlu ɔ hiɛ tsɔ!

³³ O ye dami sane kaa o gbla wa tue, ejakaa o ye anɔkuale, be nɛ wɔɔ lɛɛ wa pee yayami.

³⁴ Wa nɛmɛ ɔmɛ, wa matsɛmɛ ɔmɛ, wa ma nimeli ɔmɛ, kɛ osɔfo ɔmɛ yi o mlaa a nɔ. A bui o mlaa; nɛ ke o ka a hɛ mi hu, e pue we a tsui nɔ.

³⁵ O gbaa matsɛmɛ ɔmɛ nɛ ye o ma a nɔ ɔ, kɛ zugba kpakpa nɛ baa ní saminya a. Se kɛ̃ ɔ, a kpa we yayami peemi ɔ, konɛ a ba sɔmɔ mo.

³⁶ Amlɔ nɛ ɔ, wa zugba nɛ o ngɔ ha wa nɛmɛ ɔmɛ, konɛ a ye e nɔ niba ní kpakpahi ɔ, wa ba pee nyɔguɛhi ngɛ zugba a nɔ.

³⁷ Zugba a baa ní babauu ha matsɛmɛ ɔmɛ nɛ a ngɔ to wa nya a mohu, se akɛnɛ wa pee yayami kɛ si mo ɔ, a pee wɔ nimli ɔmɛ, kɛ wa lohwe ɔmɛ yayami bɔ nɛ a suɔ, nɛ wa yi fi wawɛɛ nitsɛ!”

A ngma biɛhi ngɔ wo somi womi ɔ sisi

³⁸ Enɛ ɔmɛ tsuo nɛ ba wa nɔ he je ɔ, wɔ Israel ma a, wa ngɛ si woe veveeve ke wa ma sɔmɔ Yawɛ pɛ. Wa ngma nɔ́ nɛ ɔ kɛ wo womi mi, nɛ wa ma nimeli ɔmɛ, Levi bi ɔmɛ, kɛ wa osɔfo ɔmɛ ngma a biɛhi kɛ wo sisi kɛ sɔu nya.