Nehemia 7 - BAIBLO ALOO NGMAMI KLƆUKLƆU Ɔ

¹ Jehanɛ, wa fia gbogbo ɔ gbe nya, nɛ wa ma agbo ɔmɛ a nya sinya amɛ. Wa to agbo nya buli, nɛ wa hla nihi nɛ ma la ngɛ he klɔuklɔu ɔ. Levi bi nɛ piɛ ɔ hu, wa ngɔ a ní tsumi ɔmɛ ngɔ wo a dɛ.

² I ngɔ nihi enyɔ ngɔ to Yerusalem kaa ma a nɔ hyɛli. Mɛ ji ye nyɛmi Hanani, kɛ Hanania, mɔ nɔ hyɛlɔ nɔkɔtɔma a. Hanania yeɔ anɔkuale, nɛ e yee Mawu gbeye pe nihi tsuo.

³ I de mɛ ke ke pee a ko bli Yerusalem agbo ɔmɛ ngɔ fɔ si, se a mlɛ saii kɛ yaa si be nɛ pu maa te si loko a bli. I de mɛ ke, a nga agbo ɔmɛ, nɛ a la a se dade ɔmɛ loko pu nɛ nɔ si be mi nɛ buli ɔmɛ kpa we lolo. I de mɛ hulɔ ke, a hla buli kɛ je Yerusalem ma mi bi ɔmɛ a kpɛti, nɛ a ngɔ ní tsumi pɔtɛɛ komɛ ngɔ wo a dɛ. Jehanɛ hu, á to ni kpahi nɛ maa bu hehi nɛ mɛ nitsɛmɛ a we ɔmɛ ngɛ ɔ.

Nihi nɛ kpale kɛ je ma se ɔ a biɛhi

⁴ Yerusalem ji ma ngua lɛɛ, se nihi nɛ ngɛ ma a mi ɔ, a he pi, nɛ a na we nɛ a ma wehi fuu ngɛ mi lolo.

⁵ Mawu ha nɛ i bua ma nimeli ɔmɛ, kɛ ma ní tsuli ɔmɛ tsuo a nya, nɛ i hyɛ a weku womi ɔmɛ a mi. I ya na womi ko nɛ tsɔɔ nihi abɔ nɛ kpale kɛ je ma se kɛ ba kekleekle ɔ a weku kpa. Nɔ́ nɛ i na ngɛ womi ɔ mi ɔ ji nɛ ɔ nɛ.

⁶ Nihi nɛ Matsɛ Nebukadnezar nuu kɛ ho Babilonia ya a, a kpɛti ni komɛ kpale kɛ ba Yerusalem kɛ Yuda; nɛ nɔ tsuaa nɔ ho lɛ nitsɛ e ma mi ya.

⁷ A nɔ hyɛli nikɔtɔmahi nɛ kɛ mɛ ba a ji Zerubabel, Yoshua, Nehemia, Azaria, Raamia, Nahamani, Mordekai, Bilshan, Misperet, Bigvai, Nehum, kɛ Baana.

^8-25 Israel bi a wekuhi nɛ kpale kɛ je ma se kɛ ba a, a hiɛhi kɛ a yibɔ ji nɛ ɔmɛ nɛ: Parosh - 2,172 Shefatia - 372 Ara - 652 Pahat Moab nɛ ji Yeshua kɛ Yoab a nina - 2,818 Elam - 1,254 Zatu - 845 Zakai - 760 Binui - 648 Bebai - 628 Azgad - 2,322 Adonikam - 667 Bigvai - 2,067 Adin - 655 Ater nɛ e biɛ kpa ji Hezekia a - 98 Hashum - 328 Bezai - 324 Harif - 112 Gibeon - 95

^26-38 Nihi nɛ a nɛmɛ hi ma nɛ ɔmɛ a mi hu kpale kɛ ba: Betlehem, kɛ Netofa - 188 Anatot - 128 Bet Azmavet - 42 Kiriat Yearim, Kefira, kɛ Beerot - 743 Rama, kɛ Geba - 621 Mikmash - 122 Betel kɛ Ai - 123 Nebo kaketsɛ ɔ - 52 Elam kaketsɛ ɔ - 1,254 Harim - 320 Yeriko - 345 Lod, Hadid, kɛ Ono - 721 Senaa - 3,930

^39-42 Osɔfohi a wekuhi nɛ kpale kɛ je ma se kɛ ba a, a biɛhi ji nɛ ɔmɛ nɛ: Yedaya, Yeshua nina - 973 Imer - 1,052 Pashur - 1,247 Harim - 1,017

^43-45 Levi bi a wekuhi nɛ kpale kɛ je ma se kɛ ba a ji: Yeshua, kɛ Kadmiel (Hodavia nina) - 74 Nihi nɛ lá ngɛ sɔlemi we ɔ (Asaf nina) - 148 Sɔlemi we ɔ he buli (Shalum, Ater, Talmon, Akub, Hatita, kɛ Shobai a nina) - 138

^46-56 Yawɛ we ɔ he ní tsuli a wekuhi nɛ kpale kɛ je ma se kɛ ba a ji: Ziha, Hasufa, Tabaot, Keros, Sia, Padon, Lebana, Hagaba, Shalmai, Hanan, Gidel, Gahar, Reaya, Rezin, Nekoda, Gazam, Uza, Pasea, Besai, Meunim, Nefushesim, Bakbuk, Hakufa, Harhur, Bazlit, Mehida, Harsha Barkos, Sisera, Temah, Nezia, kɛ Hatifa.

^57-59 Salomo tsɔli a wekuhi nɛ kpale kɛ je ma se kɛ ba a ji: Sotai, Soferet, Perida Yaala, Darkon, Gidel, Shefatia, Hatil, Pokeret, Hazebaim, kɛ Amon.

⁶⁰ Yawɛ we ɔ he ní tsuli a nina, kɛ Salomo tsɔli ɔmɛ a nina, nɛ kpale kɛ je ma se kɛ ba a tsuo a hiɛmi ji 392.

^61-62 Nihi 642 nɛ ji Delaya, Tobia, kɛ Nekoda a weku li nɛ kpale kɛ je Tel Mela, Tel Harsha, Kerub, Adon, kɛ Imer ma amɛ a mi kɛ ba a, mɛɛ a nyɛ we nɛ a tsɔɔ a sipoku tutuutu kaa Israel bi ji mɛ.

^63-64 Jã kɛ̃ osɔfohi a weku nɛ ɔmɛ hu a biɛ be womi ko mi nɛ tsɔɔ a weku kpa: Hobaya, Hakoz, kɛ Barzilai. Osɔfohi a weku nɛ a tsɛɛ Barzilai ɔ na a biɛ ɔ kɛ je osɔfohi a weku nɛ ngɛ Gilead ɔ mi; nyumu ko ya ngɔ Barzilai biyo, lɔ ɔ he ɔ, a ngɔ biɛ ɔ ngɔ wo lɛ kɛ e nina tsuo. Akɛnɛ a nɛ womi nɛ tsɔɔ a sipoku saminya he je ɔ, a bui mɛ ngɔ si osɔfo ɔmɛ a nɔ.

⁶⁵ Yuda nɔ yelɔ ɔ de mɛ ke a be he blɔ kaa a yeɔ niye ní nɛ a kɛ sã bɔ ha Mawu kɛ yaa su be nɛ a ma na osɔfo nɛ maa ngɔ Urim kɛ Tumim kɛ bi Mawu gbi ha mɛ.

^66-69 Nimli abɔ nɛ kpale kɛ je ma se nyɔguɛ yemi ɔ mi kɛ ba a ji - 42,360. A tsɔli nyumuhi, kɛ mawayihi - 7,337 Lali nyumuhi, kɛ yihi - 245 Okpɔngɔ - 736 Teji okpɔngɔ - 245 Afukpɔngɔ - 435 Teji - 6,720

^70-72 Nihi babauu ba ke ní, konɛ a kɛ ma sɔlemi we ɔ ekohu. Amlaalo ɔ ha sika tsu kilo kpaanyɔ, kahi 50, kɛ osɔfo tade 530; weku ɔmɛ a nya dali nikɔtɔma amɛ ha sika tsu kilo 168, kɛ sika hiɔ kilo 1,250; níhi nɛ ma a mi bi ɔmɛ nɛ piɛ ɔ ha ji sika tsu kilo 168, sika hiɔ kilo 140, kɛ osɔfo tade 67.

⁷³ Osɔfo ɔmɛ, Levi bi ɔmɛ, buli ɔmɛ, lali ɔmɛ, ma mi bi ɔmɛ saii, sɔlemi we ɔ he ní tsuli ɔmɛ, kɛ Israel ma a tsuo ba hi Yuda ma amɛ a mi.