Nehemia 5 - BAIBLO ALOO NGMAMI KLƆUKLƆU Ɔ

A wa ohiatsɛmɛ yi mi

¹ Be ko se ɔ, ma mi bi ɔmɛ ekomɛ, nyumuhi kɛ yihi tsuo ba bɔni ngmlaa kpami kɛ ngɛ a nyɛmimɛ Yuda bi ɔmɛ woe.

² Ni komɛ de ke, “Waa kɛ wa binyumu ɔmɛ, kɛ wa biyi ɔmɛ wa he hiɛ ngɛ wa we ɔmɛ a mi. Nyɛ ha wɔ blɛfo nɛ maa su wa nya, konɛ wa yi nɛ na wami.”

³ Ni komɛ hu de ke, “Hwɔ nɛ ba a he je ɔ, wa ngɔ wa zugba amɛ, wa wai ngmɔ ɔmɛ, kɛ wa we ɔmɛ kɛ to awaba, bɔ nɛ pee nɛ wa na blɛfo nɛ waa ye.”

⁴ Ni komɛ hu ke, “Wa pa sika kɛ wo wa zugba amɛ, kɛ wa wai ngmɔ ɔmɛ a he tó ha nɔ yeli ɔmɛ.

⁵ Waa kɛ Yuda bi ɔmɛ tsuo ɔ, ni kake ji wɔ. Anɛ wa bimɛ tsɔwi ɔmɛ kɛ mɛ hu a bimɛ tsɔwi ɔmɛ sɔɛ lo? Se fimi nya a, e hia kaa waa jua wa bimɛ ɔmɛ kaa nyɔguɛhi. Wa jua wa biyi ɔmɛ ekomɛ momo kaa nyɔguɛhi, nɛ wa be nɔ́ ko nɔ́ ko hu; ejakaa a kpɔ wa zugba amɛ, kɛ wai ngmɔ ɔmɛ ngɛ wa dɛ.”

⁶ Benɛ i nu ní nɛ ɔmɛ nɛ a ngɛ mɛ pee ɔ, ye mi mi fu wawɛɛ,

⁷ nɛ i to ye yi mi kaa ma pee he nɔ́ ko amlɔ. I kuɛ wo ma nimeli ɔmɛ, kɛ ma ní tsuli ɔmɛ, nɛ i kã a hɛ mi ke, “Nyɛ ngɛ nyɛ nitsɛmɛ nyɛ nyɛmimɛ ɔmɛ yi mi wae!” Jehanɛ i tsɛ ma a kpe, konɛ waa hyɛ munyu nɛ ɔ mi.

⁸ I de ke, “Wɔɔ lɛɛ wa ngɛ mɔde bɔe kaa wa ma kpɔ wa nyɛmimɛ Yuda bi ɔmɛ nɛ hiami nya a, a jua a he ngɔ ha nibwɔhi ɔ. Se nyɛɛ lɛɛ nyɛ ngɛ nyɛ nitsɛmɛ nyɛ nyɛmimɛ ɔmɛ a nɔ nyɛe kaa a jua a he ngɔ ha nyɛ a nyɛmimɛ Yuda bi!” Ma nimeli ɔmɛ pee kɔ̃; ejakaa a be nya jemi ko.

⁹ Kɛkɛ nɛ i ngɔ pi a hɛ mi ke, “Nɔ́ nɛ nyɛ ngɛ pee ɔ dɛ! E sa kaa nyɛɛ ye Mawu gbeye, nɛ nyɛɛ pee nɔ́ nɛ da. Ke nyɛ pee nɔ́ nɛ da a, wa he nyɛli ɔmɛ, nɛ ji ma je li ɔmɛ be nɔ́ ko nae nɛ a maa da nɔ kɛ bɔ wɔ ahlua.

¹⁰ Imi nitsɛ i ha nɛ ma a pa sika kɛ blɛfo ngɛ ye dɛ, nɛ ye he piɛli ɔmɛ kɛ ye ní tsuli ɔmɛ hu pee ja. Lɔ ɔ he ɔ, nyɛ ha nɛ waa ngɔ hiɔ ɔmɛ tsuo kɛ ke mɛ.

¹¹ Hiɔhi tsuo nɛ a hɛɛ nyɛ ɔ, nyɛ ngɔ ke mɛ: sika jio, blɛfo jio, wai jio, oliv nu jio; nɛ nyɛɛ kpale a ngmɔ ɔmɛ, a wai ngmɔ ɔmɛ, oliv abɔɔ ɔmɛ kɛ a we ɔmɛ kɛ ha mɛ amlɔ!”

¹² Ma nimeli ɔmɛ kplɛɛ, nɛ a de ke, “Wa maa pee bɔ nɛ o de ɔ. Wa maa kpale nɔ́ tsuaa nɔ́ kɛ ha mɛ. Wa be nɔ́ ko nɔ́ ko hee ngɛ a dɛ.” Kɛkɛ nɛ i tsɛ osɔfo ɔmɛ kɛ ba, nɛ i ha ma nimeli ɔmɛ ka kita kɛ fɔ nɔ ngɛ a hɛ mi kaa a maa pee bɔ nɛ a wo si ɔ.

¹³ Jehanɛ hu i je ye mlɛ mi fimi nɔ́ nɛ i huanya, nɛ i de mɛ ke, “Nɔ tsuaa nɔ nɛ be si womi nɛ ɔ nɔ yee ɔ, bɔ nɛ Mawu ma huanya lɛ kɛ je e we, kɛ e ní tsumi he ji nɛ ɔ nɛ; Mawu ma kpɔ nyɛ we ɔmɛ, kɛ nyɛ nɔ́ tsuaa nɔ́ ngɛ nyɛ dɛ, nɛ nyɛ maa pee pasaa.” Ni ɔmɛ tsuo nɛ kpe ngɛ lejɛ ɔ de ke, “Amen”, nɛ a je Mawu yi. Ma nimeli ɔmɛ ye a siwo ɔ nɔ.

Nehemia pee we kpɛle

¹⁴ Imi Nehemia, i ye amlaalo ngɛ Yuda zugba a nɔ jeha nyɔngma kɛ enyɔ, ngɛ Persia matsɛ, Artaherhes yi nɔ. Kɛ je e matsɛ yemi jeha nyingmi enyɔne ɔ mi kɛ ya si nyingmi etɛ kɛ enyɔne ɔ mi nɛ i ye amlaalo ɔ nɛ. Jamɛ be ɔ mi tsuo ɔ, i kɛ ye we bi ɔmɛ wa yi amlaalo blɔ nya niye ní ɔ.

¹⁵ Amlaalo ɔmɛ tsuo nɛ hi sɛ ɔ nɔ loko e ba su ye nɔ ɔ ngɔ tlomi agbo ngɔ fɔ ni ɔmɛ a nɔ. A biɔ, nɛ a haa mɛ niye ní, kɛ wai kɛ piɛɔ sika hiɔ nyingmi eywiɛ he daa ligbi. A tsɔli ɔmɛ hu waa ma a yi mi. Se imi lɛɛ i pee we ja; ejakaa i yeɔ Mawu gbeye.

¹⁶ I ngɔ ye he wami tsuo kɛ wo gbogbo fiami ní tsumi ɔ mi, nɛ i he we zugba ko ha ye he. Imi nitsɛ ye tsɔli po, i haa mɛ tsuo a ba fiaa gbogbo ɔ.

¹⁷ Jehanɛ, Yuda bi ɔmɛ kɛ a hɛ mi nyɛɛli ɔmɛ a kpɛti nihi lafa kɛ nyingmi enuɔ yeɔ ní ngɛ ye okplɔɔ he daa ligbi; slo nihi babauu nɛ jeɔ je ma amɛ nɛ bɔle wɔ ɔ a mi kɛ baa ye ngɔ ɔ.

¹⁸ Daa ligbi ɔ, i gbee na ku kake, to nɛ wo zɔ ekpa, kɛ kungwɔhi fuu, nɛ daa ligbi nyɔngma se ɔ, i haa wai he hu babauu. Se kɛ̃ ɔ, enɛ ɔmɛ tsuo mi ɔ, i bi we amlaalo blɔ nya niye ní ɔ si, ejakaa tó nɛ a ngɛ ma a he ɔ nya wa tsɔ ha mɛ.

¹⁹ Mawu lee, i ngɛ mo pɛɛ kpae, mo kai nɛ o gbaa mi ngɛ níhi tsuo nɛ i pee kɛ ha ma nɛ ɔ he.