Nehemia 4 - BAIBLO ALOO NGMAMI KLƆUKLƆU Ɔ

Nehemia ye he nyɛli ɔmɛ a nɔ

¹ Benɛ Sanbalat nu kaa wɔ Yuda bi ɔmɛ, wa bɔni gbogbo ɔmɛ fiami ɔ, e mi mi fu wawɛɛ nitsɛ, nɛ e ye wa he fɛu.

² E de ngɛ e nyɛmimɛ, ɔmɛ kɛ Samaria ta buli ɔmɛ a hɛ mi ke, “Mɛni Yuda bi wudɔwudɔ nɛ ɔmɛ ngɛ pee nɛ ɔ? Ma a gbogbo ɔmɛ nɛ a to a yi mi kaa a maa fia ekohu lo? Anɛ a susu kaa bɔ ɔmɛ nɛ a ngɛ sãe ɔ ma ha a maa ngɔ ligbi kake pɛ kɛ gbe ní tsumi ɔ nya lo? Anɛ a ma nyɛ ma ha gli kokoehi nɛ sã pueɔ si nɛ ɔ ma plɛ pee tsu mami tɛhi lo?”

³ Amon no ɔ nɛ a tsɛɛ Tobia, nɛ daa si ngɛ e ngɔ ɔ hu bi ke, “Mɛni gbogbo a ma nyɛ maa fia?” E ya nɔ nɛ e de ke, “Tsia, kɔkɔbo tete po ma nyɛ ma tsitsɛɛ a gbogbo ɔ ngɔ ko si!”

⁴ I sɔle ke, “Wa Mawu lee, moo bu bɔ nɛ a ngɛ wa he fɛu yee ɔ tue. Ha nɛ zo nɛ gbe mɛ ngɛ nɔ́ nɛ a pee ɔ he. Ha nɛ a kpɔ a nɔ́ tsuaa nɔ́ ngɛ a dɛ; nɛ a nuu mɛ nyɔguɛ kɛ ya ma se.

⁵ Koo ngɔ yayami nɛ a pee nɛ ɔ ngɔ pa mɛ, nɛ o hɛ ko je a tɔmi ɔmɛ a nɔ; ejakaa be mi nɛ wa hɛ dɔ kɛ ngɛ gbogbo ɔ fiae ɔ, mɛɛ lɛɛ a ngɛ wɔ ahlua bɔe.”

⁶ Wa ya nɔ wa fia gbogbo ɔ ekohu. E kɛ we kulaa nɛ wa fia kɛ ta gbogbo ɔ kpɛti; ejakaa ma a hɛ dɔ kɛ wo ní tsumi ɔ he.

⁷ Sanbalat, Tobia, Arabia bi ɔmɛ, Amon bi ɔmɛ, kɛ Ashdod bi ɔmɛ nu kaa wa ngɛ Yerusalem gbogbo ɔ fiae mlamlaamla, nɛ wa ngɛ puɔ ɔmɛ tsie. Kɛkɛ nɛ a mi mi fu wawɛɛ nitsɛ.

⁸ Lɔ ɔ he ɔ, mɛ tsuo a so kaa a kɛ Yerusalem maa hwu ta nɛ a gudu lejɛ ɔ.

⁹ Se wɔɔ lɛɛ wa sɔle nɛ wa tsɛ wa Mawu ɔ, nɛ wa ha nihi bu nyɔ kɛ pia kɛ huɔ mɛ.

¹⁰ Yuda bi ɔmɛ a nya nygɛ nɔ ngɛ dee ke, “Pɔ tɔ wɔ kɛ nɔ́ tloomi. Ní kokoe ɔmɛ nɛ wa ma je ɔ hiɛ tsɔ. Kɛ wa ma pee kɛ fia gbogbo ɔ kɛɛ?”

¹¹ Wa he nyɛli ɔmɛ susu kaa wa be mɛ nae, loo wa be nɔ́ nɛ ngɛ nɔ yae ngɛ a kpɛti ɔ lee kɛ yaa si be nɛ a ma ba tua wɔ tlukaa, nɛ a maa gbe wɔ, konɛ ní tsumi ɔ se nɛ po.

¹² Se be tsuaa be ɔ, Yuda bi nɛ kɛ wa he nyɛli ɔmɛ ngɛ he kake ɔ ba woɔ wa tue nɔ ngɛ gahi nɛ he nyɛli ɔmɛ ngɛ toe ɔ a he.

¹³ Lɔ ɔ he ɔ, i ngɔ nihi nɛ hɛɛ klaatehi, akplɔhi, kɛ kɛ̃ɛ̃hi ngɔ to gbogbo ɔmɛ a se hehi nɛ a gbi a fiami nya lolo ɔ. I ha buli nɛ ɔmɛ ya da si weku nya weku nya.

¹⁴ Jehanɛ, i na kaa ni ɔmɛ hao; lɔ ɔ he ɔ, i de ma nimeli ɔmɛ, ma ní tsuli ɔmɛ, kɛ ma a tsuo ke, “Nyɛ ko ye wa he nyɛli ɔmɛ gbeye. Nyɛ kai kaa Nyɔmtsɛ ɔ kle, nɛ e he ngɛ gbeye, konɛ nyɛɛ hwu ha nyɛ nyɛmimɛ ɔmɛ, nyɛ bimɛ ɔmɛ, nyɛ yi ɔmɛ, kɛ nyɛ we ɔmɛ.”

¹⁵ Wa he nyɛli ɔmɛ ba na kaa wa le nɔ́ nɛ a ngɛ susue kaa a maa pee ɔ; a kpá si kaa Mawu puɛ a yi mi tomi ɔmɛ. Kɛkɛ nɛ wɔ tsuo wa kpale kɛ ya tsa gbogbo ɔ fiami ɔ nɔ.

¹⁶ Kɛ je jamɛ a ligbi ɔ kɛ yaa a, i dla ye we bi ɔmɛ a mi enyɔ; be nɛ ni fa ngɛ gbogbo ɔ fiae ɔ, ni fa hu mia kɛ gbaja, nɛ a hɛɛ akplɔhi, tsɛ̃ihi, kɛ kɛ̃ɛ̃hi kɛ daa si, ngɛ bue. Wa ma nimeli ɔmɛ tsuo fí Yuda ma a se kpɛii.

¹⁷ Nihi nɛ ngɛ gbogbo ɔ fiae, kɛ nihi nɛ ngɛ tɛhi kɛ níhi tlooe ɔ, nɔ tsuaa nɔ kɛ e nine kake ngɛ ní ɔ tsue, nɛ e kɛ e nine kake hu hɛɛ ta hwumi níhi.

¹⁸ Ní tsuli ɔmɛ tsuo nɛ ngɛ gbogbo ɔ he ní tsue ɔ fi klaate ngɛ a mlɛ mi. Titimati kpalɔ ɔ ngɛ ye kasa nya.

¹⁹ I de ni ɔmɛ, ma nimeli ɔmɛ, kɛ ma ní tsuli ɔmɛ ke, “Ní tsumi ɔ yi bli kɛ ya se lokoo, nɛ e ha waa kɛ wa sibi wa kpɛti kɛ tsɔ ngɛ gbogbo ɔ nɔ.

²⁰ Ke nyɛ nu titimati ɔ pɛmi pɛ, nyɛ bua nyɛ he nya kɛ ba wa ngɔ ngɛ lejɛ ɔ. Wa Mawu ɔ maa hwu ha wɔ.”

²¹ Lɔ ɔ he ɔ, bɔ nɛ wa tsu ní ɔ ji nɛ ɔ nɛ. Daa ligbi ɔ, kɛ je makɛ futɛfutɛ kɛ ya si gbɔkuɛ be nɛ dodoe ɔmɛ maa je kpo ɔ, wa ti ni fa hii gbogbo ɔ fiae, nɛ ni fa hu hɛɛ akplɔhi kɛ daa si kɛ ngɛ bue.

²² Jamɛ a be ɔ, i de ní tsumi ɔ nɔ hyɛli ɔmɛ ke a kɛ ní tsuli ɔmɛ tsuo nɛ a ba hi Yerusalem, bɔ nɛ pee nɛ waa bu ma a he nyɔ mi, nɛ ke je na a, wa tsu ní.

²³ Enɛ ɔ he ɔ, i kɛ ye nyɛmimɛ ɔmɛ, ye we bi ɔmɛ, kɛ ye he buli ɔmɛ nɛ ngɛ ye se ɔ, wa je we wa tade ɔmɛ ngɛ wa he; mohu nɔ tsuaa nɔ hɛɛ e tahwu ní ngɛ e dɛ.