Nehemia 3 - BAIBLO ALOO NGMAMI KLƆUKLƆU Ɔ

A fia Yerusalem gbogbo ɔ ekohu

¹ Bɔ nɛ a pee kɛ fia Yerusalem gbogbo ɔ ekohu ji nɛ ɔ nɛ. Osɔfo nɔkɔtɔma pe kulaa Eliashib, kɛ e nyɛmimɛ osɔfo ɔmɛ ya ma To Agbo ɔ ekohu, nɛ a tsukɔ he; nɛ a ma agbo ɔmɛ ngɛ a blɔ hehi. A tsukɔ gbogbo ɔ he kɛ ya su Lafa Mɔ ɔ kɛ Hananel Mɔ ɔ a he.

² Yeriko nyumu ɔmɛ fia kɛ tsa nɔ, nɛ Imri binyumu Zakur hu fia kɛ tsa a nɔ́ ɔ nɔ.

³ Hasenaa binyumu ɔmɛ ma Lo Agbo ɔ, nɛ a kɛ tso sɛu nɔ, nɛ a ma sinya amɛ, nɛ a dadehi kɛ a se lami níhi wo a nya.

⁴ Hakoz binyumu Uria binyumu Meremot ɔ fia gbogbo ɔ kɛ tsa nɔ. Nɔ nɛ fia kɛ tsa nɔ ji Meshezabel binyumu Berekia e binyumu Meshulam. Baana binyumu Zadok ji nɔ nɛ fia kɛ tsa nɔ.

⁵ Gbogbo ɔ he nɛ tsa nɔ ɔ, Tekoa bi nɛ fia. Se Tekoa ma nimeli ɔmɛ lɛɛ, ní tsumi nɛ a nɔ hyɛli ɔmɛ ha mɛ ke a tsu ɔ, a kua tsumi.

⁶ Pasea binyumu Yoyada, kɛ Besodeya binyumu Meshulam dla agbo nɛ a tsɛɛ Agbo Momo ɔ. A kɛ tso sɛu nɔ, nɛ a ma sinya amɛ nɛ a wo dadehi a nya nihi kɛ a se lami.

⁷ Melatia nɛ je Gibeon, Yadon nɛ je Meronot, Gibeon bi ɔmɛ, kɛ Mizpa bi ɔmɛ fia gbogbo ɔ he nɛ tsa nɔ ɔ. A fia kɛ ya su he nɛ amlaalo ɔ nɛ hyɛɛ Yufrate pa a bonyoku je ɔ hii ɔ.

⁸ Harhaya binyumu Uziel, sika tsu ga ní tsulɔ ɔ fia gbogbo ɔ nɔ tsami ɔ. Hanania, nu kɛ e he via peelɔ ɔ fia gbogbo ɔ kɛ tsa nɔ kɛ ya su he nɛ a tsɛɛ Gbogbo Gbajaa a he.

⁹ Hur bi Refaya nɛ hyɛɛ Yerusalem zugba a mi dlami fa nɔ ɔ fia gbogbo ɔ he nɛ tsa nɔ ɔ.

¹⁰ Harumaf binyumu Yedaya fia gbogbo ɔ kɛ tsa nɔ ngɛ e we ɔ kasa nya. Hashabneya binyumu Hatush fia gbogbo ɔ kɛ tsa nɔ.

¹¹ Harim binyumu Malkiya, kɛ Pahat Moab binyumu Hashub fia gbogbo ɔ fa a nɛ tsa nɔ ɔ, kɛ Flɔɔnɔɔ Mɔ ɔ.

¹² Halohesh binyumu Shalum, Yerusalem zugba a mi dlami fa nɔ yelɔ ɔ fia gbogbo ɔ kɛ tsa nɔ. (E biyi ɔmɛ piɛ e he kɛ tsu ní ɔ.)

¹³ Hanun kɛ Zanoa ma mi bi ɔmɛ dla Kɔ̃ Agbo ɔ. A ma sinya amɛ, nɛ a wo a nya dadehi kɛ a se lami níhi dadehi. A fia gbogbo ɔ gugue lafa enyɔ kɛ nyingmi enuɔ kɛ ya su Dwɔmi Agbo ɔ he tɔɔ.

¹⁴ Rekab binyumu Malkiya nɛ yeɔ Bet Hakerem zugba a nɔ ɔ dla Dwɔmi Agbo ɔ. E fia ekohu, nɛ e ma sinya amɛ, nɛ e wo a nya dadehi kɛ a se lami níhi.

¹⁵ Kolhoze binyumu Shalum, Mizpa zugba a nɔ yelɔ ɔ dla Nyu Vu Agbo ɔ. E fia ekohu, nɛ e tsi e yi mi ɔ. E ma sinya amɛ, nɛ e wo a nya dadehi kɛ a se lami níhi. Gbogbo ɔ nɛ tsa matsɛ abɔɔ ɔ nɔ ngɛ Shela Taku ɔ he ɔ, lɛ kɛ̃ nɛ e fia jamɛ a gbogbo ɔ kɛ ya su kpoku ɔmɛ nɛ a kɛ kpleɔ si kɛ jee David ma a mi ɔ a he.

¹⁶ Azbuk binyumu Nehemia, Betzur zugba a kasa fa nɔ yelɔ ɔ fia gbogbo nɛ tsa nɔ ɔ kɛ je David yɔkɔ ɔmɛ a hanɔ kɛ ya na taku ɔ, kɛ ta buli ɔmɛ a hi he ɔ.

Levi bi nɛ fia gbogbo ɔ

¹⁷ Levi bi nɛ fia gbogbo ɔ hehi babauu ji nɛ ɔmɛ nɛ. Bani binyumu Rehum fia fa ko nɛ tsa nɔ ɔ. Hashabia, Keila zugba a mi dlami fa nɔ yelɔ ɔ da e nɔ yemi he ɔ nane mi, nɛ e fia gbogbo ɔ eko kɛ tsa nɔ.

¹⁸ Henadad binyumu Bavai, Keila zugba a mi dlami fa nɛ piɛ ɔ nɔ yelɔ ɔ hu fia gbogbo ɔ nɔ tsami ɔ.

¹⁹ Yeshua binyumu Ezer, Mizpa zugba a nɔ yelɔ ɔ fia gbogbo ɔ fa nɛ ngɛ he nɛ a guu kɛ kuɔɔ kɛ yaa ta hwumi níhi a to he ɔ hanɔ ɔ; e fia gbogbo ɔ kɛ ya su kɔ̃ ɔ nya.

²⁰ Zabai binyumu Baruk fia gbogbo ɔ nɔ tsami ɔ kɛ ya su osɔfo nɔkɔtɔma pe kulaa Eliashib we ɔ nya blɔ tɔɔ.

²¹ Uria binyumu Meremot, Hakoz bibi ɔ fia gbogbo ɔ he nɛ tsa nɔ ɔ kɛ ya su osɔfo nɔkɔtɔma pe kulaa Eliashib we ɔ nyagbe he ɔ tɔɔ.

Osɔfohi nɛ fia gbogbo ɔ

²² Osɔfohi nɛ fia gbogbo ɔ mi dlami slɔɔtohi nɛ tsa nɔ ɔ ji nɛ ɔmɛ nɛ. Osɔfohi nɛ je hehi nɛ bɔle Yerusalem ɔ fia gbogbo ɔ fa ko.

²³ Benyamin kɛ Hashub fia e nɔ tsami ɔ nɛ ngɛ a we ɔmɛ a hanɔ ɔ. Jehanɛ Anania binyumu Maaseya bi Azaria fia gbogbo ɔ he nɛ ngɛ e we ɔ hɛ mi ɔ.

²⁴ Henadad binyumu Binui fia he nɛ tsa nɔ ɔ, kɛ je Azaria we ɔ nya kɛ ya su gbogbo ɔ kɔ nya.

^25-26 Uzai binyumu Palal fia gbogbo ɔ he nɛ tsa nɔ ɔ, kɛ je gbogbo ɔ kɔ nya kɛ yiti mɔ yi mi pinoo ɔ nɛ ngɛ buli ɔmɛ a kue ɔ hanɔ ɔ. Parosh binyumu Pedaya fia kɛ tsa nɔ kɛ ya ta he ko ngɛ Nyu Agbo ɔ, kɛ mɔ ɔ nɛ ngɛ sɔlemi we ɔ a hanɔ ɔ. (Hiɛ ɔ kɛ ma a he nɛ a tsɛɛ Ofel ɔ kɛ we. Lejɛ ɔ nɛ Yawɛ we ɔ he ní tsuli ɔmɛ hii.)

Ni kpahi nɛ fia gbogbo ɔ

²⁷ Tekoa bi ɔmɛ fia gbogbo ɔ fa ko nɛ tsa nɔ ɔ. A fia fa enyɔne ɔ nɛ a ha mɛ ɔ, kɛ je mɔ ngua a nɛ ngɛ Yawɛ we ɔ hanɔ ɔ he, kɛ ya gbogbo ɔ nɛ ngɛ Ofel kasa nya a tɔɔ.

²⁸ Osɔfo ɔmɛ a kuu ko fia gbogbo ɔ nɔ tsami ɔ, kɛ je Okpɔngɔ Agbo ɔ nya kɛ ya omleyi je; nɔ tsuaa nɔ fia gbogbo nɛ ngɛ lɛ nitsɛ e we hanɔ ɔ.

²⁹ Imer binyumu Zadok fia gbogbo ɔ nɛ ngɛ e we ɔ hanɔ ɔ. Shekania binyumu Shemaya nɛ buu Beleku Agbo ɔ nya a fia gbogbo ɔ he nɛ tsa nɔ ɔ.

³⁰ Shelemia binyumu Hanania, kɛ Zalaf binyumu ekpane ɔ nɛ a tsɛɛ Hanun ɔ fia gbogbo ɔ he nɛ tsa nɔ ɔ; enɛ ɔ ji he enyɔne nɛ a fia. Berekia binyumu Meshulam fia e nɔ tsami nɛ ngɛ e we ɔ hanɔ ɔ.

³¹ Sika tsu ga ní tsuli ɔmɛ a ti nɔ ko nɛ a tsɛɛ Malkiya hu fia gbogbo ɔ kɛ tsa nɔ. E fia kɛ ya gu ɔmɛ, kɛ jua yeli ɔmɛ hii ngɛ Buli Agbo ɔ hanɔ hluu kɛ ya su hiɔwe tsu ɔ nɛ ngɛ gbogbo ɔ kɔ nya a he.

³² Sika tsu ga ní tsuli ɔmɛ kɛ jua yeli ɔmɛ fia gbogbo ɔ nyagbe mi dlami ɔ; a fia kɛ je hiɔwe tsu ɔ nɛ ngɛ kɔ nya a he kɛ ya su To Agbo ɔ nya tɔɔ.